Mwakoro 134
Katanoataan te onimaki ni kaineti ma tautaeka ao tua aika a tabangaki, ake a bwainaki man te rinerine ae a nano teuana iai n te botaki ni kabuta n te Ekaretia ae karaoaki i Kirtland, Ohio, n Aokati 17, 1835. A mwaiti Aomata aika Itiaki ake a ikotaki bwa a na rinanon kanoan te moan boki are otinako ibukin Reirei ao Berita aika Tabu are a uotaki rake. N te tai arei, te katanoata aei e anganaki moan kabwarabwarana ae kaotaki ikai: “Bwa e aonga ara onimaki ni kaineti ma tautaeka ao tua aika tabangaki n te aonaba n aki kabureaki rairana ke ni kairua otaia iai, ti a tia ni iangoia bwa e riai bwa ti na kaotia, n tokin te boki aei, ara iango ibukin naba aio.”
1–4, A riai tautaeka ni kawakina te inaomata ni iango ao n taromauri; 5–8, A riai aomata ni kabaneia ni boutoka aia tautaeka ao ni kabaeaki bwa a na karinea ao ni kawakina te tua; 9–10, Botaki n aaro a riai n akea mwaakaia i aon waakin te tautaeka; 11–12, A kaetaki aia waaki aomata ni kamanoia ma aia bwai.
1 Ti kakoaua bwa ataian tautaeka a bon kateaki iroun te Atua ibukin kabwaian te aomata; ao bwa e tauia aomata bwa a na bbukinaki ibukin aia mwakuri nako ni kaineti ma ngaai, ni karaoan tuua ao kamwakuraia, ibukin kabwaiaia ao kamanoaia te botanaomata.
2 Ti kakoaua bwa akea te tautaeka ae kona n tei i nanon te rau, ma ti ngkana a karaoaki tua ao a kateimatoaki n te aro are e na reke nakon temanna ma temanna ainaomatana ni kamwakura ana biango, inaomatana n taua aron ana bwai, ao ckamanoan maiuna.
3 Ti kakoaua bwa tautaeka ni kabane a riai ni karekeia ataan mwakuri n te tautaeka ao tia moti bwa a na kamatoai tuan te tautaeka; ao naakai a na kamwakura te tua n ae riai ao ae te motiraoi e na ukoukoraki ao ni boutokaaki ni bwanaaia aomata ngkana te tautaeka ae rineaki irouia aomata, ke nanon te uea are e tautaeka.
4 Ti kakoaua bwa te aro e kateaki iroun te Atua; ao bwa aomata a mwioko irouna, ao bon ti ngaia, ibukin kamwakurana, ma ti ngkana aia iango ibukin te aro e kairiia bwa a na urua inaomataia ao kariaiakakiia tabeman; ma ti aki kakoaua bwa iai inaomatan ana tua te aomata ni kumekume n anga tua ibukin te anebonebo ni kabaea aia iango aomata, ke ni bairea aron te taromauri n te botanaomata ao i bon irouia; bwa te tia moti n te tua e na totokoa karaoan te bure, ma e na aki taua aron te iango; e na katuaea ae kairua, ma e na aki taua inaomatan te nano.
5 Ti kakoaua bwa aomata ni kabaneia a kabaeaki bwa a na boutokai ao ni kateimatoai tautaeka aika kakaokoro ake a maeka iai, ngkai a kamanoaki ni inaomataia are irouia ae aki kona n anaaki mai irouia n tuan tautaeka akanne; ao bwa kakiriwean ao akaaitaraan te tautaeka e aki riai irouia kaain te aba ake a kamanoaki iai, ao a riai ni katuaeaki ni kaineti ma aio; ao bwa tautaeka ni kabane iai inaomataia ni katei tuua aika n aron oin aia baire bon te kabanea n tamaroa ibukin kamanoan ana waaki te botanaomata; ao, n te tai naba anne a kawakina tabun te inaomata ni iango.
6 Ti kakoaua bwa aomata n tatabemania a riai ni karineaki n nakoaia, taan tautaeka ao taan moti n nakoaia, bwa a kateaki ibukin kamanoan ae akea ana bure ao katuaean te tia bure; ao bwa nakon atuua a kabaeaki aomata ni kabaneia bwa a na karinei ao ni kawakin, ibukina bwa n akeaia te rau ao te mweraoi a na taonaki nako n te mangaongao ao te kakamaaku; ana tua te aomata e kateaki ibukin te kantaninga ae onoti ni bairea ara waki n tatabemanira ao botanaomata, i marenan te aomata ma te aomata; ao tuua mai iroun te Atua ae anga mai karawa, are bairei tuua ibukin bwain te tamnei, ibukin te onimaki ao te nebonebo, a na uaia ni kaekaaki iroun te aomata nakon te Tia Karikia.
7 Ti kakoaua bwa taan tautaeka, aba, ao tautaeka iai inaomataia, ao a kabaeaki bwa a na katei tuua ibukin kamanoaia kaain te aba ni kabaneia ni kaineti ma inaomataia ni kamwakura aia koaua n aia aro; ma ti aki kakoaua bwa iai inaomataia ae eti bwa a na anai mai irouia kaain te aba inaomataia aei, ke ni katabuia n aia koaua, ti ngkana te mwannano ao te karinerine a kaotaki nakon tuua ao iango n aro aikai aki kariaia te kakiriwe ke waki n ekaanako te tautaeka.
8 Ti kakoaua bwa karaoan te bure e riai ni akatuaeaki ni kaineti ma aron te bure; bwa te tiritiri, kakeru nakon te tautaeka, te kimoa, te ira, ao uruan te rau ae tabangaki, n arona nako, a riai ni katuaeaki ni kaineti ma korakoran te bure ao arona ni karika te buakaka i buakoia aomata, n tuan te tautaeka ike e karaoaki iai te bure; ao ibukin raun ao mweraoin te botanaomata a riai aomata ni kabaneia ni waki ni kabongana aia konabwai ni uotia taan bure ni kaitarai tua aika raoiroi bwa a na katuaeaki.
9 Ti aki kakoaua bwa e riai ni ikotaki ana kairiiri te aro ma ana tautaeka te botanaomata, ike teuana botanaomata n te aro e boutokaaki ao are teuana e katabuaki ni kabwaiana n te aro n tamnei, ao inaomataia kaaina n tatabemania, ngkai kaain te aba, e kaakeaki.
10 Ti kakoaua bwa botaki n aro iai inaomataia ni babaire ma kaaina ibukin aroaro aika aki riai ni kaineti ma tua ao kaetieti ni botaki aikai; ma ti ngkana babaire aikai bon ibukin kaainakina ao nakoraoin aroia; ma ti aki kakoaua bwa te botaki n te aro teuana iai kariaiakana bwa e na kateia aomata ibukin inaomataia n aia bwai ke maiuia, n anai mai irouia kaubwain te aonaba aei, ke ni karika te kaangaanga nakon maiua ke rabwataia, ke ni kamaraka rabwataia bwa tuaaia. A ti kona ni akabaneia man aia botaki, ao n anaa mai irouia tibwangaia ni kaainakina.
11 Ti kakoaua bwa aomata a riai ni uotarake tangiia nakon tuan te aba ibukin rinanoan kairua ni kabane ao tangitangi, ngkana iai mwakuri ni kaikoaki ke kairua ae karaoaki ke e anaki inaomataia n aia bwai ke anuaia, ngkana iai tuua aikai ae na kamanoia; ma ti kakoaua bwa aomata ni kabane a kariaiakaki ni kamanoia i bon irouia, raoia, ao aia bwai, ao te tautaeka, man waki ni iowawa aika aki ira nanon te tua ao uruan inaomataia aomata ni kabaneia n tain kaangaanga, ike e aki kona ni karaoaki uotakirakean te tang n te tai naba anne nakon tuua, ao e aki kona n reke katokan te kaangaanga.
12 Ti kakoaua bwa e riai n atataekinaki te euangkerio nakon botanaomata n te aonaba, ao ni kauringiia aika raoiroi bwa a na kamaiuia man buakakan te aonaba; ma ti aki kakoaua bwa e eti kumean aroia tooro aika tauaki mwiia, ke n tataekina te euangkerio nakoia, ke ni bwabetitoia ni kaitara ana kaantaninga ma nanon aia mataniwi, ke ni kairarangia ke ni kaira nanoia naba teutana ni karikiia bwa a na aki rauaki ma aroia n te maiu aei, ike a uruanaki maiuia aomata; ti kakoaua bwa kakumekume aikai aki rinanon te tua ao aki riai, ao a kakamaku nakon te rau n tautaeka nako ake a kariaia aomata bwa a na tautoronaki.