Mwakoro 48
Kaotioti ae kaotaki rinanon Iotebwa Timiti te Burabeti, i Kirtland, Ohio, ni Maati 10, 1831. E bubutiia te Uea te Burabeti ni kaineti ma aron karaoan karekean aba ibukin maekaia Aomata aika Itiaki. E rangi ni kakawaki aei ibukin mwanangaia kaain te Ekaretia mai mainiku n te United States, n ongeaba nakon ana tua te Uea bwa a riai ni ikotaki i Ohio (taraa mwakoro 37:1–3; 45:64).
1–3, A riai Aomata aika Itiaki i Ohio n tibwaua abaia ma tariia; 4–6, A riai Aomata aika Itiaki ni kabooi aaba, katea te kaawa, ao ni irii aia reirei aia taan tararua.
1 E riai bwa kam na tiku n te tai aei n ami tabo ane kam maeka iai, bwa a bon nakoraoi ibukin aromi.
2 Ao ngkana kam teimatoa ni iai abami, kam na atibwauaia nakoia tarimi ake i mainiku;
3 Ao ngkana akea abami, a riai ni kabooi n te tai aei n taabo nako ake a uakaan, n noran raoiroina irouia, bwa e bon riai bwa e na iai aia tabo ni maeka n te tai aei.
4 E bon riai bwa kam na kaikoi ami mwane ni kabane nakon ami konaa, ao bwa kam na karekei ni kabane are kam konaa i nanon te raoiroi, bwa n taai aika a na roko kam aonga ni kona ni akaabooi aba ibukin abaia ni bwaibwai, bae te kaawa naba.
5 E tuai moa ni kaotaki te tabo; ma a na rineaki atabeman mwaane i mwin rokoia tarimi mai mainiku, ao a na anganaki bwa a na bataa te tabo, ke e na kaotaki nakoia.
6 Ao a na rineaki bwa a na kabooi aba, ao ni wakina kawenean an te akaawa; ao ngkanne a na moana ikotakiia ma aia utu, aomata nako ma aia butu, ni kaineti ma aroia, ao n aron rineakina irouia kaain te beretitentii ao te bitiobi n te ekaretia, ni kaineti nakon tua ao kaetieti are kam a tia ni karekei, ao are kam na karekea i mwin aei. Eng. Amen.