1 ^aKakauongo, O ngkami karawa, ao anga taningami, O aonaba, ao kimwareirei ngkami kaaina, bwa te Uea bon te ^bAtua, ao ^cakea riki te ^dTia Kamaiu i rarikina.

2 E ^akorakora wanawanana, a ^bkamimi ana kawai, ao akea ae kona n ataa korakoran ana mwakuri.

3 A aki bwaka ana ^abaire, ao akea te aomata temanna ae kona ni katoka baina.

4 Man akea tokina nakon akea tokina bon ^atitebo ngaia, ao ^bakea tokin ana ririki.

5 Bwa e taku te Uea—Ngai, te Uea, I ^ananoanga ao n akoi nakoia naake a ^bmakai, ao ni kukurei ni karineia naake a ^cbeku irou n te raoiroi ao n te koaua ni karokoa te toki.

6 E na korakora kanuangaia ao e na akea tokin ^amimitongiia.

7 Ao nakoia N na ^akaoti ni kabane ^bmwakuri aika raba, eng, ni kabane taian mwakuri aika raba n abanueau man boong ake ngkoa, ao ibukin ririki aika a na roko, N na kaoti nakoia oin nanou are atataiaomata ni kaineti ma bwaai ni kabane aika kaineti nakon abanueau.

8 Eng, a na atai naba kamiimi aika akea tokina, ao N na kaoti nakoia bwaai aika a na roko, bwaai naba ibukin roro aika mwaiti.

9 Ao e na korakora ^awanawanaia, ao e roota karawa ^bootaia; ao a na ^cmauna wanawanaia ake a wanawana i mataia, ao e na akea bonganan ootaia ake a wanawana.

10 Bwa man ^aTamneiu N na ^bkaotaia, ao N na kaota nakoia au kantaninga aika raba man ^cmwaakau—eng, bwaai naba akekei are e tuai nooria te ^dmata, ke n ongo te taninga, ao ake a tuai n rin i nanon te aomata.

11 Ngaira, Iotebwa Timiti te Ataei ao Sidney Rigdon, ^ai aan ana kairiiri te Tamnei n te katebwii ma onoua ni bong ni Beberuare, n ana ririki ara Uea ae teuana te ngaa wanibubua ao tenibwi ma uoua—

12 Man mwaakan te ^aTamnei a kaureaki ^bmatara ao a kaotaaki ootara, bwa ti aonga ni kona n noora ao n oota n ana bwai nako te Atua—

13 Ae bwaai akekei naba ake man te moan i mwaain rikin te aonaba, ake a baireaki iroun te Tama, rinanon Natina ae te Rikitemanna, are e mena ni banibanin te Tama, man te ^amoan;

14 Ae ngaia ae ti kaota koauana; ao te rongorongo ae ti kaotia bon bwaninin ana euangkerio Iesu Kristo, are bon te Nati, are ti nooria ao ti ^amaroro ma ngaia n te ^bmii ni burabeti mai karawa.

15 Bwa ngke ti karaoa te mwakuri n ^arairairi, are e a tia n rineira te Uea nako iai, ti roko n te kauabwi ma ruaia ni kibu n te kanimaua ni mwakoro ni Ioane, are e kaotaki nakoira n aron aei—

16 Are e taekina mangautiia maate, ni kaineti nakoia naake a na ^aongo bwanaan ^bNatin te Aomata:

17 Ao a na oti nako; naake a tia ni karaoa ae ^araoiroi, ni ^bmangautiia naake a ^craoiroi; ao naake a tia ni karaoa ae buakaka, n aia mangauti naake aki raoiroi.

18 Ngkai aio ae e karikiira bwa ti na mimi iai, bwa e kaotaki nakoira iroun te Tamnei.

19 Ao ngke ti ^aiangoi raoi bwaai aikai, e ringa matan ootara te Uea ao a kaukaki, ao e oota nako mimitongin te Uea i rarikira.

20 Ao ti noora ^amimitongin te Nati, i ^bangatain te ^cTama, ao ni karekea bwanininna ao mimitongina;

21 Ao n nooriia ^aanera aika tabu, ao naake a ^bitiaki i matan ana kaintokanuea, n taromauria te Atua, ao te Tiibu te Teei, ake a ^ctauromauria n aki tootoki.

22 Ao ngkai, i mwin taian kakoaua aika mwaiti ake a kaotaki ibukina, aio te kabanea ni ^akakoaua ngkai, ae ti kaotia ibukina: Bwa e ^bmaiu!

23 Bwa ti ^anooria, n angatain te ^bAtua; ao ti ongo te bwana ae kaota koauana bwa ngaia te ^cRikitemanna iroun te Tama—

24 Bwa ^amai irouna, ao rinanona, ao irouna, iai ^baonaba ao a karikaki, ao kaaina bon ^cnaati mwaane ao aine aika a manga bungiaki nakon te Atua.

25 Ao ti noora naba aei, ao ni kaota koauana, bwa ana ^aanera te Atua are iai irouna te kariaiakaki i matan te Atua, are e kaitara te Nati ae te Rikitemanna ae e tangiraki iroun te Tama ao are e mena ni banibanin te Tama, e teweaki nako mai matan te Atua ao te Nati,

26 Ao e aranaki bwa Betetion, bwa e tang karawa i aona—bon ^aRutibero, ae natin te ingabong.

27 Ao ti nooria, ao taraia, e a ^abwaka! e a bwaka, ae natin te ingabong!

28 Ao ngke ti bon mena naba i aan ana kairiri te Tamnei, e tuangiira te Uea bwa ti na korea te mii ni burabeti aei; bwa ti noora Tatan, te ^anaeta ni kawai, are te ^briaboro, are e ^ckaitara te Atua, ao n ukoukora anakin abanuean Atuara ao ana Kristo—

29 Ngaia are, e karaoa te ^abuaka ma ana aomata te Atua aika itiaki, ao n otabwaninia.

30 Ao ti noora te mii ni burabeti ae karawawatakakiia naake e buakaniia ao n tokanikai i aoia, bwa e roko bwanaan te Uea nakoira:

31 E taku te Uea ni kaineti ma ni kabane naake a ata mwakau, ao n tia ni katoongnga, ao a kariaira rinanon mwaakan te riaboro bwa e na ^atokanikai i aoia, ao ni kakewea te koaua ao ni kaitara mwaakau—

32 Ngaiia bon naake ^anatin ^bbetetion, are I taekinna bwa e raoiroi riki ibukiia ngke a aki bungiaki;

33 Bwa ngaiia nnen te un, ake a katuaeaki bwa a na karawawataki n unin te Atua, ma te riaboro ao ana anera n te tai are akea tokina.

34 Ni kaineti ma ngaiia are I a tia n taekinna bwa akea ^akabwaraan aia bure n te aonaba aei ke n te aonaba ae e na roko—

35 Ibukin ae a ^akaakea te Tamnei ae Tabu i mwin are a tia ni karekea, ao ibukin ae a kaakea te Nati ae te Rikitemanna iroun te Tama, ibukin ae a tia n ^btauria i bon irouia ao ni kamaemaea i mataia aomata.

36 Aikai naake a na nako nakon te ^anei n ai ao te burimton, ma te riaboro ao ana anera—

37 Ao tii ngaiia ae e na roko mwaakan te kauoua ni ^amate i aoia;

38 Eng, e koaua, tii ^angaiia ake a na aki kabooaki n oin ana tai te Uea, i mwin karawawatakiia n unna.

39 Bwa ni kabane nikiraia a na ^akautaki ni ^bmangautiia maate, rinanon tokanikain ao mimitongin te ^cTiibu te Teei, are e kamateaki, are e mena ni bwanibwanin te Tama i mwain karikan te aonaba.

40 Ao bon aio te ^aeuangkerio, rongorongo aika kakukurei, are te bwana mai karawa e kaota koauana nakoira—

41 Bwa e roko nakon te aonaba, ae Iesu, bwa e na ^atauraki ibukin te aonaba, ao ni ^buoti buren te ^caonaba, ao ni ^dkatabua te aonaba, ao ni ^ekaitiakia man taian buakaka ni kabane;

42 Bwa rinanona a na ^akamaiuaki ni kabane ake e katukuia te Tama i aan mwaakana ao a karikaki irouna;

43 Are e kamimitonga te Tama, ao ni kamaiui ni kabane ana mwakuri baina, ma tii naake natin betetion ake a kaakea te Nati i mwin are e kaotia te Tama.

44 Mangaia are, e kamaiuiia ni kabane ma tiaki ngaiia—a na nakon te ^akatuaeaki ae ^baki totoki, are te katuaeaki ae e aki kona n toki, ae te katuaeaki ae akea tokina, n tautaeka ma te ^criaboro ao ana anera n te tai are akea tokina, ike e aki mate ^dinoia iai, ao te ai ae e aki mamate, are bon kammarakakiia—

45 Ao ^atokiia, ke aia tabo, ke kammarakakiia, akea te aomata ae e ataia;

46 E aki kaotaki ngkoa, ke ni kaotaki ngkai, ke e na bon aki kaotaki nakoia aomata, ma tii nakoia ake a riki bwa taan katoongnga;

47 E ngae n anne, Ngai, te Uea, I kaotia n te mii ni burabeti nakoia aika mwaiti, ma ni waekoa ni manga katokia;

48 Mangaia are, tokina, rababana, rietana, ^ananona, ao te karawaawata are iai, a aki oota iai, akea naba te aomata ma tii naake a ^brineaki nakon te ^ckabuakakaaki aei.

49 Ao ti ongo te bwana, ae kangai: Korea te mii ni burabeti, bwa taraia, aio tokin te mii ni burabeti ibukin karawawatakia ake a buakaka.

50 Ao ti manga kaota koauana riki—bwa ti nooria ao ti ongo, ao aio bon te ^akakoaua ibukin ana euangkerio Kristo ibukiia ake a na roko ni ^bmangautiia ake a raoiroi—

51 Ngaiia ake a karekea te koaua ibukin Iesu, ao ni ^akakoauaa arana ao ni ^bbwabetitoaki ni ^ckatootongan taunakina, n ^dtaunaki n te ran n arana, ao aio ni kaineti ma te tua are e a tia n anga—

52 Bwa man kawakinan tuua a na kona n ^atebokaki ao ni ^bkaitiakaki man aia bure ni kabane, ao ni karekea te Tamnei ae Tabu man te katoka ^cbai iroun are e ^dkatabuaki ao ni kabaeaki nakon te ^emwaaka aei;

53 Ao naake a tokanikai n te onimaki, ao ni ^akabaeaki iroun te ^bTamnei ae Tabu n te berita, are e kanakoa te Tama nako aoia ni kabane ake a raoiroi ao a koaua.

54 Ngaiia ake ana ekaretia te ^aKarimoa n Nati.

55 Ngaiia ake e anga nako nanoni baia te Tama bwaai ^ani kabane—

56 Ngaiia ake tenaan ^aibonga ao uea, ake a tia ni karekea bwanininna, ao mimitongina;

57 Ao ngaiia ana ^aibonga Teuare Moan te Rietata, n aron ana karinan Merekitereka, n aron ana karinan ^bEnoka, are bon aron ana ^ckarinan te Nati ae te Rikitemanna.

58 Mangaia are, n aron ae e koreaki, bon ngaiia ^atenaan atua, aika ^bnatin te ^cAtua—

59 Mangaia are, bon aia bwai bwaai ^ani kabane, n te maiu ke n te mate, ke bwaai aika ngkai naba, ke bwaai aika a na roko, ni kabane bon aia bwai ao bon ngaia ana bwai Kristo, ao Kristo bon ana bwai te Atua.

60 Ao a na ^atokanikai i aon bwaai ni kabane.

61 Mangaia are, akea te aomata temanna ae e na ^akamoamoa iroun te aomata, ma e na riai ni ^bkamoamoa iroun te Atua, are e na ^ckaaki ana kairiribai ni kabane i aani waena.

62 Aikai a na ^amaeka ^bimatan te Atua ao ana Kristo n aki tootoki.

63 Aikai ^anaake e na uotiia ma ngaia, ngkana e ^broko n nangin karawa n ^ctautaeka i aon te aonaba i aoia ana aomata.

64 Aikai naake a na iai nneia n te ^amoan mangauti.

65 Aikai naake a na roko ni ^amangautiia ake a raoiroi.

66 Aikai naake a na roko nakon te ^aMaunga are ^bTion, ao nakon ana kaawa te Atua ae maiu, te tabo i karawa, ae moanibaan te tabu.

67 Aikai naake a tia n roko n te koraki n anera ae e aki kona ni warekaki mwaitia, nakon te botaki ae tabangaki ao ana ekaretia ^aEnoka, ao te ^bKarimoa n Nati.

68 Aikai naake a ^akoreaki araia i karawa, ike te Atua ao Kristo bon taan ^bmotiki taekaia ni kabane.

69 Aikai naake bon aomata aika ^araoiroi ake a karaoaki bwa a na ^bkakororaoaki rinanon Iesu te tia raoi n te ^cberita ae boou, are e kakoroa bukin te ^dmwakuri ni kamaiu ae kororaoi aei rinanon waanakon oin ^eraraana.

70 Aikai naake rabwataia e ^atiretio, are ^bmimitongiia ai aron ^ctaai, ae mimitongin te Atua, te kabanea n rietata i buakoia, are e koreaki bwa mimitongina aekan ootan taai i annang.

71 Ao ti a manga noora te aonaba ae te ^ateretirio, ao nooria ao taraia, aikai naake kaain te teretirio, are mimitongiia e kaokoro ma are mimitongin ana ekaretia te Karimoa n Nati are a tia ni karekea bwaninin te Tama, n aron ae ^bnamwakaina e kaokoro ma taai i annang.

72 Nooria, aikai naake a mate n ^aakea te ^btua;

73 Ao ngaiia naba are ^atamneia aomata ake a kawakinaki n te ^bumwa ni kaikain, are a kawaraki iroun te Nati, ao e ^ctataekina te ^deuangkerio nakoia, bwa a aonga ni kona ni motikaki taekaia n ai aroia aomata n rabwataia;

74 Are a aki karekea te ^akoaua ibukin Iesu n te rabwata, ma a karekea i mwina.

75 Aikai naake bon aomata aika kakannato n te aonaba, ake a kamatakiiaki n aia kamwamwane aomata.

76 Aikai naake a karekea mimitongina, ma tiaki bwaninina.

77 Aikai naake a kawaraki iroun te Nati, ma tiaki bwaninin te Tama.

78 Mangaia are, ngaiia ^arabwata aika teretirio, ao tiaki rabwata aika tiretio, ao a kaokoro mimitongiia n aron namwakaina ae e kaokoro ma taai.

79 Aika naake aki ^akakaonimaki n te koaua ibukin Iesu; ngaia are, a aki karekea te baunuea i aon abanuean Atuara.

80 Ao ngkai aio tokin te mii ni burabeti are ti nooria ibukin te aonaba ae te teretirio, bwa e tuangiira te Uea bwa ti na koreia ngkai ti mena i aan ana kairiiri te Tamnei.

81 Ao ti a manga noora mimitongin te ^ateretio, are mimitongina ae e uarereke riki, n aron mimitongin itoi a kaokoro ma mimitongin namwakaina i annang.

82 Aikai naake a aki butimwaea ana euangkerio Kristo, ke te ^akoaua ibukin Iesu.

83 Aikai naake aki kaakea te Tamnei ae Tabu.

84 Aikai naake a karenakoaki nako ^amoone.

85 Aikai naake a na aki kabooaki mai iroun te ^ariaboro ni karokoa te ^bkabanea ni mangauti, ni karokoa e tia ana mwakuri te Uea, ae Kristo ae te ^cTiibu te Teei.

86 Aikai naake a na aki karekea bwanininna n te aonaba ae akea tokina, ma te Tamnei ae Tabu rinanon te mwakuri ni ibuobuoki n te teretirio;

87 Ao te teretirio rinanon te ^amwakuri ni ibuobuoki n te tiretio.

88 Ao te teretio naba e karekea man aia mwakuri ni ibuobuoki anera ake a rineaki bwa a na ibuobuoki ibukiia, ke a rineaki bwa tamnei ni ibuobuoki ibukiia; bwa a na karekea te kamaiuaki.

89 Ao ti nooria, n te mi ni burabeti mai karawa, mimitongin te teretio, are e riaon aia atatai aomata;

90 Ao akea te aomata ae e ataia ma tii teuare e tia ni kaotia nakoina te Atua.

91 Ao ti noora mimitongin te teretirio ae riao ni bwaai ni kabane nakon mimitongin te teretio, n te mimitong, ao n te mwaaka, ao n te korakora, ao n ueana.

92 Ao ti noora mimitongin te tiretio, ae rianako ni bwaai ni kabane—ike te Atua, are te Tama, e tautaeka i aon ana kaintokanuea n aki tootoki;

93 I matan ana kaintokanuea bwaai ni kabane a boobaraaki ma te ^akarinerine ae mangori, ao n anganna te mimitong n aki tootoki.

94 Naake a maeka ^aimatana bon ana ekaretia te ^bKarimoa n Nati; ao a nooria n aron ae a nooria, ao n ^cataia n aron ae a ataia, n tia ni karekea bwanininna ao ana ^dakoi;

95 Ao e ^akatitebooia n te mwaaka, ao n te korakora, ao n ueaia.

96 Ao mimitongin te tiretio bon tii teuana, n aron mimitongin ^ataai ae tii teuana.

97 Ao mimitongin te teretirio bon tii teuana, n aron mimitongin namwakaina ae tii teuana.

98 Ao mimitongin te teretio bon tii teuana, n aron mimitongin itoi ae tii teuana; bwa teuana te itoi e kaokoro ma te itoi teuana ni mimitongiia, n aron ae e kaokoro temanna ma are temanna ni mimitongiia n te aonaba ae teretio;

99 Bwa aikai naake mai iroun ^aBauro, ao mai iroun Aboro, ao mai iroun Keba.

100 Aikai naake a taku bwa tabeman mai iroun temanna ao tabeman iroun are temanna—tabeman mai iroun Kristo ao tabeman mai iroun Ioane, ao tabeman mai iroun Mote, ao tabeman mai iroun Eriati, ao tabeman mai iroun Etaiati, ao tabeman mai iroun Itaia, ao tabeman mai iroun Enoka;

101 Ma a aki karekea te euangkerio, ke te koaua ibukin Iesu, ke taian burabeti, ke te ^aberita ae tabu ae akea tokina.

102 Te kabanea, aikai naake a na aki ikotaki ma aomata aika itiaki, ni ^auotaki rake nakon ana ^bekaretia te Karimoa n Nati, ao ni butimwaeaki n te nang.

103 Aikai ^anaake ^btaan kewe, ao taan tabunea, ao ^ctaan wenenibure, ao kabekaau, ao ane e tangira ao e karaoa te kewe.

104 Aikai naake a karawawataaki n ^aunin te Atua i aon te aonaba.

105 Aikai naake a rinanon te ^arekenikai n te ai ae akea tokina.

106 Aikai naake a teweakinako nako ^amoone ao n ^brinanon unin te ^cAtua ae Moan te Mwaaka, ni karokoa ^dkoron bongina, ngkana Kristo e na ^ekaaki ana kairiribai ni kabane i aani waena, ao ni ^fkakororaoa ana mwakuri;

107 Ngkana e na anga te abanuea ae akea barekana, ao n angan te Tama, ni kangai: I a tia n tokanikai ao n ^atoutoua ^bnnen kamantan kurebe n tii Ngai, ae nnen kamantan kurebe ae kakamakun unin te Atua ae Moan te Mwaaka.

108 Ngkanne e na baunaki ni baunuean mimitongina, n tekateka i aon ^akaintokanuean mwaakana n tautaeka n aki tootoki.

109 Ma nooria, ao taraia, ti noora mimitongin ao kaain te aonaba ae teretio, bwa e aki kona ni warekaki n aron itoi i annang i karawa, ke n aron te tano i mataniwin te aba;

110 Ao n ongo bwanaan te Uea ae kangai: Aikai a na bane ni katorobubua bubuaniwaeia, ao ni kabane neewe a na ^akaota aia bure nakon teuare e tekateka i aon te kaintokanuea n aki tootoki;

111 Bwa a na motikaki taekaia n aron aia mwakuri, ao ni kabane aomata a na karekea n aron oin ana ^amwakuri, oin ana tautaeka, n taian ^bnne ni maeka are a katauraoaki;

112 Ao a na riki bwa ana toro are Moan te Rietata; ma a aki kona n roko n te ^atabo are a ^bmaeka iai te Atua ao Kristo, n aonaba ae akea tokiia.

113 Aio tokin te mii ni burabeti are ti nooria, are ti tuangaki bwa ti na koreia ngke ti mena i aan ana kairiiri te Tamnei.

114 Ma a ^akorakora ma ni kamimi ana mwakuri te Uea, ao ^bmwakuri aika raba n abanueana are e kaotia nakoira, are e riaon atatai ni kabane n te mimitong, ao n te korakora, ao n te tautaeka;

115 Are e tuangiira bwa ti na aki koreia ngke ti mena i aan ana kairiiri te Tamnei, ao aki ^akairiaiakaki aomata n taekinii;

116 Akea naba te aomata ae ^akona ni kaotii, bwa a na tii nooraki ao n ^bataaki man mwaakan te Tamnei ae Tabu, are e kaaki te Atua i aoia naake a tangiria, ao a kaitiakiia i matana;

117 Nakoia ake e anganiia te tibwanga aei n nooria ao n ataia i bon irouia;

118 Bwa rinanon te mwaaka ao ana kaotioti te Tamnei, ngkai a maiu n rabwata, a na kona n tei imatana n te aonaba ae mimitong.

119 Ao nakon te Atua ao te Tiibu te Teei te mimitong, ao te karineaki, ao te tautaeka n aki tootoki. Amen.