Koroboki Aika Tabu
Reirei ao Berita aika Tabu 69


Mwakoro 69

Kaotioti ae kaotaki rinanon Iotebwa Timiti te Burabeti, i Hiram, Ohio, n Nobembwa 11, 1831. Ikotakin taian kaotioti ake a nang boretiaki a tia ni kariaiakaki n te maungatabu ae e onoti n Nobembwa 1–2. N Nobembwa 3, te kaotioti n te boki aei ae oti bwa mwakoro 133, e karinaki, i mwina e aranaki bwa te Abentekiti. E a kamam rineaki mai i mwaina Oliver Cowdery bwa e na uoti taian koroboki i aon ikotakin kaotioti ao tua nako Independence, Missouri, ibukin boretiakina. E riai naba n uota te mwane are e a tia n rikoaki ibukin katean te Ekaretia i Missouri. Te kaotioti aei e tuangaki iai John Whitmer bwa e na raona Oliver Cowdery ao e tuangki naba Whitmer bwa e na mwananga ao e na rikoi rongorongon bwai aika riki ni weteana bwa te tia korea rongorongon ao te tia tau mwin rongorongo n te Ekaretia.

1–2, John Whitmer e riai n raona Oliver Cowdery nako Missouri; 3–8, E riai naba ni kabwarabwara ao n rikoi, n tauii mwiin, ao ni korea rongorongon bwaai aika riki.

1 Ongora nakoiu, e taku te Uea ae Atuami, ibukin kabwaian au tia mwakuri ae aOliver Cowdery. E bon aki wanawana aei irou bwa e na onimakinaki ma taian tua ao taian mwane are e na uotia nakon aban Tion, ma tii ngkana e nako temanna ma ngaia ae e na kokoaua ao e kakaonimaki.

2 Mangaia are, Ngai, te Uea, I kantaningaia bwa au tia mwakuri, ae aJohn Whitmer, e riai n nako ma au tia mwakuri ae Oliver Cowdery;

3 Ao bwa e na waaki naba ni koroi ao ni karaoa arongorongon bwaai ni kabane aika a kakaawaki ake e na noori ao n ataia ibukin au ekaretia;

4 Ao bwa e na karekei naba ataeka n reirei ao ibuobuoki mai iroun au tia mwakuri ae Oliver Cowdery ao tabeman riki.

5 Ao au taan mwakuri naba ake a uamaenako n te aonaba a na kanakoa rongorongon aia amwakuri n tararua nakon aban Tion;

6 Bwa aban Tion e na riki bwa te kaintekateka ao te tabo ni butimwaai ao ni karaoi bwaai ni kabane aikai.

7 E ngae n anne, e riai au tia mwakuri ae John Whitmer ni mwananga n taai aika mwaiti man te tabo teuana nakon teuana, ao man botakin te ekaretia teuana nakon teuana, bwa e aonga ni kona ni beebete riki karekean te atatai—

8 N tataekina ao ni kabwarabwarai, ni koroi, ni kaewei, n rinei, ao ni karekei bwaai ni kabane ake a raoiroi ibukin te ekaretia, ao ibukin rooro aika rikirake ake a na rikirake n aban aTion, ni bwaini man te roro teuana nakon te roro teuana, n aki tootoki. Amen.