Mwakoro 44
Kaotioti ae kaotaki nakon Iotebwa Timiti te Burabeti ao Sidney Rigdon, i Kirtland, Ohio, n tokin Beberuare 1831. Ibukin irakin nanon te babaire ake a kaotaki, te Ekaretia e bairea te maungatabu bwa e na karaoaki ni moan te namwakaina ae Tuun ae nang roko.
1–3, A na ikotaki unimwaane n tain te maungatabu; 4–6, A na barongaia ni kaineti nakon tuan te aba ao n tabeakinia kainnano.
1 Nooria, e taku te Uea nakoimi au taan mwakuri, e riai irou bwa unimwaanen au ekaretia a riai ni weteaki ni kabane, mai mainiku ao mai maeao, ao mai meang ao mai maiaki, n te reta ke n aanga riki tabeua.
2 Ao e na koro bukina, bwa ngkana a teimatoa ni kakaonimaki, ao n kamwakura aia onimaki irou, N na kabwaroa aTamneiu i aoia n te bong are a na bane ni ikotaki iai.
3 Ao e na koro bukina bwa a na waaki nako nakon taabo nako ake a uakaan, ao n atataekina te rairannano nakoia aomata.
4 Ao a na mwaiti aika a na arairaki, n te aro are kam na karekea te mwaaka ni barongaingkami ni bkaineti nakon aia tua aomata;
5 Bwa aonga ami akairiribai n aki karekea te mwaaka i aomi; bwa kam aonga ni kawakinaki ni bwaai ni kabane; bwa kam aonga ni kona ni kawakini au tua; bwa aonga ni bwara taian kabae ake a ukoukoria taan kairiribai bwa a na kamaunaia au aomata.
6 Nooria, I tuangkami, bwa kam riai ni akawariia naake akea aia bwai ma kainnano, ao ni karaoa te ibuobuoki ibukin mwengaraoia, bwa aonga ni kawakinaki ni karokoa a bane bwaai ni karaoaki ni kaineti nakon au tua are kam a tia ni karekei. Amen.