1 M’akowaa Orson Hyde no, wɔfrɛɛ no Nyame tseasefo no Sunsum do hyɛɛ no sɔfo dɛ ɔmbɔ asɛmpa a ɔwɔ hɔ daapem no ho dawur mfi nyimpa kor do nkɔ nyimpa kor do, mfi asaase kor do nkɔ asaase kor do, wɔ mboanofo emumuyɛfo mu, wɔ hɔn asɔrfi mu; nye hɔn nyi atsɛn na onsiansian kyerɛwsɛm nyinara mu nkyerɛ hɔn.

2 Na, hwɛ, na hu dɛ iyi yɛ mfatoho dze ma hɔn a wɔama hɔn asɔfodzi no, hɔn a wɔasoma hɔn dɛ wɔnkɔ kan no.

3 Na iyi yɛ mfatoho dze ma hɔn dɛ wɔbɛkã dza Sunsum Krɔnkrɔn no kenyan hɔn dɛ wɔnkã no.

4 Na biribiara a Sunsum Krɔnkrɔn no bekenyan hɔn dɛ wɔnkã no bɛyɛ kyerɛwsɛm, ɔbɛyɛ Ewuradze ne pɛ, ɔbɛyɛ Ewuradze n’adwen, ɔbɛyɛ Ewuradze n’asɛm, ɔbɛyɛ Ewuradze ne ndze, nye Nyame no tum a ɔdze kɔ nkwagye mu.

5 Hwɛ, iyi nye Nyame n’anohoba a ɔdze bɔ hom, O hom a hom yɛ mo nkowaa.

6 Dɛm ntsi, hom enyi ngye, na mma hom nnsuro, na emi, Ewuradze, menye hom wɔ hɔ, na mibegyina hom afã; na hom bɛgye mo ho dase mpo dɛ, Jesus Christ meyɛ Nyame tseasefo ne Ba, na dɛ, nna mowɔ hɔ, na mowɔ hɔ na mebɛba.

7 Iyi nye Ewuradze m’asɛm a medze ma ɔwo, m’akowaa Orson Hyde nye ɔwo so m’akowaa Luke Johnson, nye ɔwo m’akowaa Lyman Johnson, nye ɔwo m’akowaa William E. McLellin, nye m’asɔr mu elderfo anokwafo nyinara—

8 Hom nkɔ wiadze nyina mu, nkɛkã asɛmpa no nkyerɛ abɔdze nyinara, hom ndzi dwuma wɔ tumdzi a medze ama hom no mu, hom nnuma wɔ Egya no, nye Ɔba no, nye Sunsum Krɔnkrɔn no ne dzin mu.

9 Na nyia ɔbɛgye edzi na woenuma no no, wɔbɛgye no nkwa, na nyia ɔnnkɛgye edzi no, wobobu no fɔ.

10 Na nyia ɔbɛgye edzi no, wɔdze nsɛnkyerɛdze a odzi do yi behyira no, dɛ mbrɛ wɔakyerɛw no.

11 Na hom na wɔama hom ho kwan dɛ wonhu mber mu nsɛnkyerɛdze; nye Nyimpa Ba ne mbae no ho nsɛnkyerɛdze;

12 Na dodowara a Egya no bɛgye hɔn ho dase no, ɔbɛma hom tum ma wɔasɔw hɔn ano dze ama onnyiewiei nkwa. Amen.

13 Na afei, ɔfa ndzɛmba no a ɔkã ahyɛmudzi nye mbrasɛm no ho nye iyinom—

14 Dza ɔaka ekyir nye dɛ, wɔ Ewuradze ne mber pa mu no, hom nyi bishopfo binom nsi hɔ mma asɔr no, ma wɔnyɛ ɔsomdwuma no dɛ mbrɛ hom yɛɛ no ahyɛse no mpo;

15 Dɛm ntsi, wɔbɛyɛ asɔfompanyimfo a wodzi mu, na Melchizedek Asɔfodzi President a Odzi Kan no na n’Apamfo na wobeyi hɔn, gyedɛ wɔyɛ Aaron n’asefo ankasa.

16 Na sɛ wɔyɛ Aaron n’asefo ankasa a, nna mbrasɛm no ma hɔn ho kwan dɛ wɔkɛhɛn bishop na n’apamfo fɛkuw no mu, sɛ wɔyɛ Aaron ne mbabanyin hɔn abakamba a;

17 Osiandɛ abakamba no na ɔwɔ president na n’apamfo hɔ kwan wɔ asɔfodzi yi ho na okitsa ho nsaafee anaa no tumdzi no.

18 Obiara nnyi mbrasɛm ho kwan wɔ dzibew yi ho, dɛ obekitsa asɔfodzi yi ho nsaafee, gyedɛ ɔyɛ Aaron n’asenyi abakamba ankasa.

19 Mbom ɔnam dɛ Melchizedek sɔfopanyin no wɔ tumdzi dɛ odzi dwuma wɔ dzibew nkakraba nyina mu ntsi obotum edzi dwuma wɔ bishop dzibew mu, sɛ woennya Aaron n’asenyi ankasa a, Melchizedek President a Odzi Kan na n’Apamfo no botum ato nsa afrɛ no na wɔdze nsa egu no do dze dɛm tum yi dwumadzi no ama no.

20 Aaron n’asenyi ankasa no mpo, ɔwɔ dɛ President na n’Apamfo yi hwehwɛ no mu hu dɛ odzi mu, na wɔsera no ngo na President na n’Apamfo yi dze nsa gu no do dze dɛm asɔfodzi no ahyɛ no, ɔnntse dɛm a, wonnyi mbrasɛm ho kwan dɛ wɔdze hɔn asɔfodzi no mu no dzi dwuma.

21 Mbom, ɔnam ɔmom a wɔahyehyɛ ato hɔ a ɔyɛ hɔn kyɛfa a wɔwɔ no wɔ asɔfodzi ho dɛ ofi egya do sian ba babanyin do no ntsi, sɛ wotum kyerɛ ma wohu dɛ wofi dɛm ebusua no mu a, wotum kã ma wɔfɔw hɔn ngo, anaadɛ sɛ Ewuradze da no edzi kyerɛ hɔn wɔ nyikyerɛ mu a, President na n’Apamfo a wɔabɔ hɔn edzin yi tum dze hɔn nsa gu hɔn do.

22 Na, bio, sɛ bishop anaa sɔfopanyin a wobeyi no esi hɔ dɛ ɔnyɛ ɔsomdwuma yi fom a, onnyi dɛ obiara dze no kɔ asɛndzii anaadɛ obu no fɔ, gyedɛ asɔr no ne President a Odzi Kan na n’Apamfo no nko enyim;

23 Na susuampaara dɛ odzi fɔ wɔ President yi na n’Apamfo no enyim no, ɔnam dasegye a ekyingye biara nnyi ho no, wobobu no fɔ;

24 Na sɛ onu noho a, wɔdze bɛkyɛ no, dɛ mbrɛ asɔr n’ahyɛmudzi na mbrasɛm no se.

25 Na, bio, susuampaara dɛ awofo wɔ mba wɔ Zion, anaa ne stake a wɔakyekyer no mu bi no, na wɔannkyerɛkyerɛ hɔn ma wɔanntse nkyerɛkyerɛ a ɔfa nnuho ho, nye gyedzi wɔ Jesus Christ, Nyame tseasefo ne Ba no mu, nye enuma, nye Sunsum Krɔnkrɔn n’akyɛdze no a wɔdze nsa gu do ma wonya no, sɛ wodzi mfe awɔtwe a, bɔn no bogu awofo no hɔn etsifi.

26 Na iyi bɛyɛ mbra ama nkorɔfo a wɔwɔ Zion anaa wɔ ne stake a wɔakyekyer no nyina mu.

27 Na sɛ hɔn mba dzi mfe awɔtwe a, wobonuma hɔn ama woeenya bɔnfakyɛ na wɔdze nsa egu hɔn do.

28 Na wɔbɛkyerɛkyerɛ hɔn mba so mbrɛ wonsi mbɔ mpaa, na wɔnantsew nokwar mu wɔ Ewuradze enyim.

29 Na hɔn a wɔwɔ Zion no so bɛkaa Ahomgyeda no na woesie no krɔnkrɔn.

30 Na hɔn a wɔwɔ Zion so bɛkaa hɔn ndwuma, mber dodowara a wɔahyɛ hɔn dɛ wɔnyɛ edwuma wɔ nokwardzi mu no; na wɔbɛkaa onyihafo no wɔ Ewuradze enyim.

31 Afei, Emi, Ewuradze, m’enyi nngye hɔn a wɔwɔ Zion no ho, osiandɛ enyihafo wɔ hɔn mu; na hɔn mba so rinyin wɔ emumuyɛdze mu; na hɔn so wɔmmper nnhwehwɛ mbersantsen ahonyadze, mbom enyiber ahyɛ hɔn enyiwa mu mã.

32 Ndzɛmba yinom nnyi dɛ ɔba no dɛm, na ɔwɔ dɛ woyi fi hɔn mu; dɛm ntsi wɔmma m’akowaa Oliver Cowdery mfa nsɛm yinom nkɛma hɔn a wɔwɔ Zion asaase no.

33 Na mbrasɛm a medze ma hɔn nye yi—dɛ nyia onndzi ne mpaabɔ do wɔ Ewuradze enyim wɔ ne mber mu no, wɔnkaa no wɔ mo nkorɔfo no hɔn ɔtsɛmbuafo no enyim.

34 Nsɛm yinom yɛ ampa nye nokwar; dɛm ntsi, mma hom nntõ, nna mma hom nnyi bi mmfi mu so.

35 Hwɛ, Emi nye Alpha na Omega, na mereba ntsɛm. Amen.