1 Ewuradze N’Asɛm na ne Pɛ a ɔfa Israel hɔn Asese ho wɔ kwan a worutu akɔ Anee no ho:

2 Hom mma nkorɔfo a wɔwɔ ^aJesus Christ N’Asɔr a ɔwɔ hɔ ma Nda a Odzi Ekyir Ahotseweefo No, nye hɔn a wɔnye hɔn rutu kwan nyina no nkyɛ hɔn mu ekuwekuw, na wondzi ahyɛmu na wɔmbɔ anohoba dɛ wobedzi Ewuradze hɛn Nyankopɔn ne mbrasɛm do na wɔanantsew n’atsempɔn nyina mu.

3 Hom nhyehyɛ ekuwekuw no ^aɔha ɔha na ne asahen, eduonum eduonum na ne asahen na du du na ne asahen, na president kor na n’apamfo beenu ada tsir, a hɔn nyina hyɛ ^bAsomafo Duebien no ase.

4 Na iyi bɛyɛ hɛn ^aahyɛmudzi—dɛ ^byɛbɛnantsew Ewuradze ^cn’ayɛdze nyina mu.

5 Hom mma kuw biara nhwehwɛ anantwi, hwiir a wɔdze twẽ ndzɛmba mma hɔnho, na wɔmfa edziban, ntar, nye ndzɛmba binom so a ohia a wobotum afa nkã ho wɔ hɔn akwantu no mu.

6 Sɛ wowie ekuwekuw no hyehyɛ a, hom mma wɔnkɔ ahoɔdzen mu ara, nkesiesie hɔ mma hɔn a wɔbɛka ekyir no.

7 Hom mma kuw biara nye hɔn asahen na presidentfo no mbɔ adwen pɔw wɔ hɔn mu dodow a wobotum akɔ fefɛwber a ɔreba yi mu; nkyii hom nyi nyimpa a wɔdɔɔ sõ ara yie a hɔn ho yɛ dzen na wɔawea so ma wɔmfa anantwi na hwiir no bi, nye aba, nye ekuadwuma ho ndzɛmba, na wɔnkɔ dɛ edzikamfo nkesiesie bea no do ama woeetum edua eduadzewa wɔ fefɛwber no mu.

8 Hom mma kuw biara mfa hɔn ahonyadze mu dodowara a wobotum nkɔ, na wɔmfa ^aehiafo na ^bekunafo, nye ^cngyanka nye hɔn a wɔkɔ akõno no hɔn ebusuafo, amma ekunafo na ngyanka no hɔn sũ aammfow annkɔ Ewuradze n’asomu enntsia nkorɔfo yi.

9 Hom mma kuw biara nsisi adan na wonsiesie asaase no na wondua edziban wɔ do mma hɔn a wɔbɛka ekyir hyɛber yi mu no; iyi nye dza Ewuradze pɛ dɛ nkorɔfo yi yɛ.

10 Hom mma nyimpa biara mfa ne nyansaa na n’ahonyadze mboa nkorɔfo yi ma wɔnkɔ bea a Ewuradze bɛkyerɛ dɛ wɔnkyekyer Zion ^astake no.

11 Na sɛ hom dze akoma a no mu tsew, nye nokwardzi yɛ iyi a, ^awobehyira hom; wobehyira hom nguan, nye hom anantwi, nye hom haban, nye hom efi, nye hom ebusuafo.

12 Hom mma mo nkowaa Ezra T. Benson nye Erastus Snow nkyekyer kuw.

13 Na hom mma mo nkowaa Orson Pratt na Wilford Woodruff so nkyekyer kuw.

14 Hom mma mo nkowaa Amasa Lyman nye George A. Smith so nkyekyer kuw.

15 Na hom nyiyi presidentfo nye asahen ɔha ɔha, nye eduonum eduonum, nye du du.

16 Na hom mma mo nkowaa a hom eyiyi hɔn no nkɛkyerɛkyerɛ m’apɛdze yi mu nkyerɛ ahotseweefo no, ama wɔaaboaboa hɔnho ayɛ krado dɛ wɔbɔkɔ asomdwee asaase no do.

17 Kɔ wo kwan na kɛyɛ dza makã akyerɛ wo no, na mma nnsuro w’atamfo; osiandɛ wonnkenya tum dze esiw m’edwuma kwan.

18 ^aMobɔpon Zion wɔ mankasa me mber pa mu.

19 Na sɛ nyimpa bi rohwehwɛ ama noho do, na ɔannhwehwɛ ^am’afotu ekyir kwan a, onnkenya tum biara, na no kwasea wɔbɛda no edzi.

20 Hom nhwehwɛ; na hom ^andzi anohoba a hom dze abobɔ homho nkorkor no do; na mma hom ^benyi mmber dza ɔyɛ hom nua dze.

21 Hom ^antwe homho mfi bɔn yi ho dɛ hom nnkɔbɔ Ewuradze ne dzin egyangyan, na Emi nye Ewuradze hom Nyankopɔn, hom ^begyanom Nyankopɔn no mpo, Abraham, na Isaac na Jacob Nyankopɔn no.

22 ^aEmi nye nyia odzii Israelmba no kan fii Egypt asaase do, na matsen me nsa wɔ nda a odzi ekyir yi mu dze ^bregye mo nkorɔfo Israel.

23 Hom ngyaa dɛ hom nye homho ^abedzi aper; hom ngyaa dɛ hom bɛkã ^basɛmbɔn akyerɛ homho nkorkor.

24 Hom ngyaa ^ansãbow; na hom mma hom nsɛm ^bnhyɛ ankorankor nkuran.

25 Sɛ hom fɛm biribi fi hom nyɛnko hɔ a, hom mfa dza hom ^afɛmee no nsan mma no; na sɛ hom nnkotum etua kaw a, hom nkɛkã nkyerɛ hom nyɛnko no ntsɛm, amma woeemmbu hom fɔ.

26 Sɛ hom nyɛnko ^ayew n’adze bi na hom hu a, hom mbɔ mbɔdzen nhwehwɛ kesi dɛ hom bohu na hom mfa nsan mma no.

27 Hom mbɔ ^ambɔdzen nhwɛ dza hom wɔ do yie, ama hom aayɛ ^bedwumayɛfo enyansafo; osiandɛ ɔyɛ akyɛdze a Ewuradze hom Nyankopɔn dze akyɛ hom kwa, na hom yɛ n’edwumayɛfo.

28 Sɛ hom enyi gye a, hom mfa ^aadwontow, nye ayerbɔ, nye asaw, nye ^bayɛyi mpaabɔ, nye ^cndaase nyi Ewuradze ayɛw.

29 Sɛ hom ^awerɛ how a, hom mfa ntotɔserɛ mfrɛ Ewuradze hom Nyankopɔn, ama hom akra ^beedzi dɛw.

30 Mma hom nnsuro hom atamfo, osiandɛ wɔhyɛ me nsamu na dza mepɛ na medze bɛyɛ hɔn.

31 Ɔsɛ dɛ ^awɔsɔ mo nkorɔfo hwɛ wɔ ndzɛmba nyina mu, ama woeesiesie hɔnho dze agye ^benyimnyam a mowɔ dze ma hɔn no, Zion enyimnyam no mpo; na nyia onnkotum asɔw ^casotwe no mmfata ahenman no.

32 Hom mma nyia onnyim no ^ambrɛ noho adze nsũa ^bnyansa, na ɔmfrɛ Ewuradze ne Nyankopɔn, ama woeebue n’enyiwa ma oeehu, na woeebue n’asowa ma ɔaatse;

33 Na masoma mo ^aSunsum ma ɔkɔ wiadze dɛ ɔnkɛtsew ahobrɛadzefo nye hɔn a wɔbotow, no enyi na ɔdze afɔbu ama ndzebɔnyɛfo.

34 Hom nuanom apow hom nye hom dasegye, ɔyɛ ɔman a ^awɔapam hom no mpo;

35 Na afei, hɔn mbusu da no aba, awerɛhow da no mpo, tse dɛ ɔbaa a ɔrokõ awoo; na hɔn awerɛhow bɛyɛ kɛse gyedɛ wonu hɔnho ntsɛntsɛm, nyew, ntsɛntsɛm.

36 Osiandɛ woeku nkɔnhyɛfo, nye hɔn a wɔsomaa hɔn wɔ hɔn nkyɛn no; na wɔakã bɔgya a onndzi fɔ egu, dza osũ fi daadze tsia hɔn no.

37 Dɛm ntsi, mma dɛm ndzɛmba yinom nnyɛ hom ahobow, osiandɛ hom ho nnyae ^anntsewee; hom nnkotum egyina m’enyimnyam ano; mbom sɛ hom dzi me nsɛm a medze ^bama hom no do nokwar mu a hom bohu, ofi Adam n’aber do kesi Abraham do, ofi Abraham do kesi Moses do, ofi Moses do kesi Jesus nye n’asomafo do, na ofi Jesus nye n’asomafo do kesi Joseph Smith do, nyia menam ^cm’abɔfoe do, mo nkowaa asomafo, na mankasa me ndze a ofi sor do frɛɛ no no, dɛ ɔmfa m’edwuma mbra kan mu;

38 Ɔtoow ne fapem no, na odzii nokwar; na mafa no aba me nkyɛn.

39 No wu no ayɛ dodowara ahobow; mbom ohia dɛ ɔdze no ^abɔgyaa ^bsɔw ne ^cdasegye ano, ama wɔaahyɛ no enyimnyam na woeebu emumuyɛfo fɔ.

40 Ana menngyee hom mmfi hom ^aatamfo nsamu? Dza ɔwɔ mu ara nye dɛ megya dase wɔ me dzin ho.

41 Dɛm ntsi, afei, hom nyɛ aso, O nkorɔfo a hom wɔ ^am’asɔr mu; na hom elderfo, hom mbɔ mu ntsie; hom nsa akã ^bm’ahenman no.

42 Hom ndzi me mbrasɛm nyina do enyiberdo, amma atsɛmbu aammba hom do, na hom gyedzi aammpa, na hom atamfo eenndzi hom do konyim. Na, merennkã biribiara bio seseiara. Amen na Amen.