1 Dɛ mbrɛ mekyerɛwee wɔ mo nwoma a medze brɛɛ hom ansaana mirifi me bea no do no mu dɛ mebɛkyerɛw hom ofi ber to ber na makã hom nsɛm a ɔfa ndzɛmba pii ho no, afei morosɔw ewufo hɔn enuma ho asɛm no do, dɛ mbrɛ dɛm asɛm yi hyɛ m’adwen do, na ɔhyɛ me nkãtse do dzendzenndzen, fi ber a m’atamfo hyɛɛ ase dɛ woritsiw me no.

2 Mekyerɛɛw nyikyerɛ ho kasafua kakra bi a ɔfa ɔkyerɛwfo ho. Mowɔ adwen kakra bi dze kã nsɛm yi ho a afei misi no pi yi. Ɔno nye dɛ ɔwɔ mo nwoma dadaw no mu dɛ ɔwɔ dɛ ɔkyerɛwfo wɔ hɔ, a ɔbɛyɛ dasefo, na ɔdze nankasa n’aso tse dza wɔkã nyina, ama oeetum akyerɛw dza ɔyɛ nokwar wɔ Ewuradze enyim.

3 Afei, ɔfa dɛm nsɛm yi ho no, ɔbɛyɛ fona kɛse ama nsɛnkyerɛwnyi kortoo dɛ no nko bɔwɔ hɔ aber biara na obedzi dwuma no nyinara. Mbrɛ ɔbɛyɛ a hom beyi dɛm fona yi efi hɔ no, hom botum ama kurow no mu ward biara afa ɔkyerɛwfo a odzi mu a obotum akyerɛw nsɛm a ɔkɔ do no yie na hom mma ɔnkyerɛw ndzɛmba a wɔyɛ nyina pɛpɛɛpɛr na ɔngye ho dase dɛ ɔdze n’enyi hunii, na ɔdze n’aso tsee, na ɔnkyerɛw da no, nye edzin, nye dza ɔkekã ho nyina a osi hɔ no; na ɔnkyerɛw hɔn a wɔwɔ hɔ bi no hɔn mu baasa edzin, sɛ binom wɔ hɔ a, wobotum wɔafrɛ hɔn aber biara mu dɛ wɔngye dase wɔ dza osii ho a, ama adasegyefo beenu anaa baasa anomu no wɔafa do esi asɛm biara ngyinae.

4 Afei, hom nyi wiadze mfɛndzanan ɔkyerɛwfo panyin kor so wɔ hom mu a hom dze kyerɛwsɛm no nyina bɛhyɛ ne nsa, na wɔdze dasegye krataa a hɔn edzin hyɛ ase dɛ dza wɔakyerɛw wɔ mu no nyina yɛ nokwar. Nkyii wiadze mfɛndzanan ɔkyerɛwfo panyin no akyerɛw no wɔ asɔrtɔw no abakɔsɛm nwoma no mu na ɔdze adasegye nkrataa nyina nye adasegyefo a nna wɔwɔ hɔ no nyina so akã ho, na nankasa so ɔakyerɛw nedze akã ho dɛ, ɔgye dase dɛ nsɛm a wɔakyerɛw nyina yɛ nokwar, na dɛ onyim dɛm nkorɔfo no na hɔn suban, na onyim so dɛ asɔr no na oyii hɔn dze dɛm dwumadzi no hyɛɛ hɔn nsa. Na sɛ ɔkyerɛw iyi wɔ asɔrtɔw no abakɔsɛm nwoma no mu a, nna kyerɛwsɛm no yɛ nokwar na ɔbɛyɛ krɔnkrɔn so, na obeyi ayɛdze no ano tse dɛ mbrɛ ɔdze n’enyi hunii na ɔdze n’aso tsee, na ɔakyerɛw nsɛm no wɔ asɔrtɔw no abakɔsɛm nwoma no mu.

5 Hom bɔdwen dɛ nhyehyɛɛ yi yɛ soronko dodow; na mbom hom mma menkã nkyerɛ hom dɛ ɔyɛ Nyame ne pɛ ho nhyehyɛɛ dɛ yɛbɛyɛ dze edzi ayɛdze nye mboaboaho a Ewuradze hyehyɛɛ too hɔ dada ansaana wɔrotow wiadze ne fapem, dze ama ewufo hɔn nkwagye, hɔn a wobowu a woennya asɛmpa no ho nyimdzee no do.

6 Na bio, mepɛ dɛ hom kaa dɛ John Oyikyerɛfo no nna ɔrodwendwen dɛm asɛm yi ara a ɔfa ewufo ho no, ber a ɔkãa wɔ Nyikyerɛ 20:12—Na muhun ewufo nkakraba nye akɛse, dɛ wogyinagyina ahengua no enyim; na woebuebue nwoma mu; na wobuee nwoma bi so a ɔyɛ nkwa nwoma no mu; na wɔnam dza wɔakyerɛw wɔ nwoma no mu no do buu ewufo no atsɛn dɛ mbrɛ hɔn ndwuma tse.

7 Hom bohu wɔ dɛm ɔserɛkã a wɔakã yi mu dɛ wobuebuee nwoma mu; na wobuee nwoma bi so a ɔyɛ nkwa nwoma no mu; na mbom wɔnam dza wɔakyerɛw wɔ nwoma no mu no do buu ewufo no atsɛn dɛ mbrɛ hɔn ndwuma tse; iyi no nsunsuando nye dɛ, dɛm nwoma a wɔakã ho asɛm yi bɛyɛ nwoma a wɔakyerɛw hɔn ndwuma wɔ mu no, na iyi kyerɛ nsɛm a wɔakyerɛw ato asaase yi do. Na nwoma no a ɔyɛ nkwa nwoma no nye nsɛm a wɔakyerɛw wɔ sor no; dɛm nsɛm yi nye nkyerɛkyerɛ a wɔdze hyɛɛ hom wɔ nyikyerɛ a mekyerɛwee wɔ mo nwoma a medze brɛɛ hom ansaana miribefi me bea a nna mowɔ mu no, dzi ehyia pɛpɛɛpɛr—dɛ nsɛm a hom bɛkyerɛw nyina na wɔbɛkyerɛw no wɔ sor.

8 Afei, dɛm ayɛdze yi no su wɔ asɔfodzi tum no mu dɛ mbrɛ Jesus Christ ne nyikyerɛ tse, dɛ biribiara a hom bɛkyekyer wɔ asaase do no, wɔbɛkyekyer wɔ sor, na biribiara so a hom bɛsan wɔ asaase do no, wɔbɛsan wɔ sor. Anaadɛ, sɛ yɛbɔhwɛ nkyerɛase no wɔ kwan fofor do a, biribiara a hom bɛkyerɛw wɔ asaase do no, wɔbɛkyerɛw wɔ sor, na biribiara a hom nnkɛkyerɛw wɔ asaase do no, wɔnnkɛkyerɛw wɔ sor; na dɛm nwoma no mu na wɔbɔhwɛ ebu hom ewufo atsɛn, dɛ mbrɛ hɔn ndwuma tse, na sɛ hɔnankasa na wɔbɛyɛ dɛm ayɛdze no ama hɔnho, anaadɛ hɔnankasa hɔn ananmusifo na wobegyina ayɛ ama hɔn, dɛ mbrɛ ayɛdze a Nyankopɔn ahyehyɛ ato hɔ dada dze ama hɔn nkwagye ansaana wɔrobɔtow wiadze fapem, dɛ mbrɛ nsɛm a wɔakyerɛw ato hɔ a ɔfa hɔn ewufo ho no tse.

9 Binom bɔdwen dɛ nkyerɛkyerɛ a yɛrekã ho asɛm yi yɛ asɛm fofor—tum a ɔkyerɛw anaadɛ ɔkyekyer wɔ asaase do na ɔkyekyer wɔ sor so. Naaso, wiadze ne mber nyina mu no, aber biara a Ewuradze nam nyikyerɛ do dze asɔfodzi mberano no bɛma nyimpa bi, anaa nyimpa kuw bi no, daa ɔdze dɛm tum yi ma. Dɛm ntsi biribiara a dɛm nyimpa no nam tumdzi mu bɛyɛ wɔ Ewuradze ne dzin mu no, na wɔyɛɛ no ampaara nye nokwar mu, na wɔkyerɛɛw ho nsɛm nokwar mu no, dɛm kyerɛwsɛm no bɛyɛ mbra wɔ asaase do nye sor so, na wonnkotum apepa da, dɛ mbrɛ Jehovah kokroko ahyɛ ho mom no. Iyi yɛ nokwasɛm. Woana botum etsie?

10 Na bio, hom nhwɛ dza ɔfa iyi ho a wɔakyerɛw wɔ Matthew 16:18, 19: Na mese wo so dɛ, Ɔwo nye Peter, na ɔbotan yi do na medze m’asɔr besi; na samanadze aponkɛse nnkedzi do nyim. Na medze sor ahenman ne nsaafee bɛma wo; na biribiara a ebɛkyekyer wɔ asaase do no, wɔbɛkyekyer wɔ sor; na biribiara a ebɛsan wɔ asaase do no, wɔbɛsan wɔ sor.

11 Seseiara esumasɛm kɛse na ɔsõ a ɔwɔ asɛm yi nyina mu, nye dza ɔyɛ asɛm a ɔda hɛn enyim yi mu no mu adze pa a ɔkrɔn nye dɛ yɛbenya Asɔfodzi Krɔnkrɔn no mu tum. Na nyia wɔdze dɛm nsaafee yinom ama no no nnkɛberɛ koraa na oenya nyimdzee wɔ adasamba hɔn nkwagye ho, hɔn a woewu nye hɔn a wɔtse ase nyina.

12 Iyi mu na enyimnyam nye enyidzi nye bɛkyebo na onnyiewiei nkwa wɔ—Enuma ayɛdze a wɔdze nyimpa hyɛ nsu mu no yɛ nhyehyɛɛ a ɔda hɔ dze kyerɛ owu ama fapem kor nye kor so aayɛ kor; sɛ wɔdze hom hyɛ nsu mu na hom fi nsu no mu pue a, ogyina hɔ ma dɛ ewufo asoɛr na wofi hɔn nda mu reba, dɛm ntsi, dɛm ayɛdze yi, wɔhyehyɛe too hɔ ama ɔnye ewufo hɔn enuma ayɛdze no aayɛ adze kor, dza ogyina hɔ ma ewufo no.

13 Dɛm ntsi, wɔyɛɛ enuma bura no ama oeegyina hɔ ama owumaa, na wɔahyɛ dɛ, ɔwɔ dɛ ɔkɔ beebi a ɔwɔ famu ama hɔn a wɔwɔ nkwa mu no eetum ehyia na woeehu atseasefo nye ewufo, ama ndzɛmba nyina eenya hɔn sɛfo, na ama kor nye kor no edzi ehyia—ama dza ɔyɛ asaase dze no aasɛ dza ɔwɔ sor no, dɛ mbrɛ Paul akã wɔ 1 Corinthfo 15:46, 47 na 48:

14 Naaso, nnyɛ sunsum dze na odzi kan, mbom honam mu dze no a; na nkyii sunsum dze no aba. Nyimpa a odzi kan no fi famu, ɔyɛ famunyi, nyimpa a otsĩa ebien no yɛ Ewuradze a ofi sor. Dɛ mbrɛ famunyi no tse no dɛm ara so na famufo so tse; na dɛ mbrɛ sornyi no tse no dɛm ara so na sorfo so tse. Na dɛ mbrɛ hom akyerɛw wɔ asaase do a ɔfa hom ewufo ho yɛ nokwar no, dɛmara na ma wɔakyerɛw wɔ sor no so tse. Dɛm ntsi, iyi nye nsɔwano na nkyekyeree tum no, na asɛm kor no ara so nye dɛ, ahenman no ne nsaafee no wɔ nyimdzee saafee no mu.

15 Na afei, mo nuambanyin na me nkyerɛbaa adɔfo, hom mma minsi no pi nkã nkyerɛ hom dɛ, dɛm fapem yinom na ɔwɔ hɔ a ɔfa ewufo na atseasefo ho a ɔnnsɛ dɛ yebu hɛn enyi gu do, dza ɔfa hɛn nkwagye ho. Osiandɛ hɔn nkwagye hia na oye ma hɛn nkwagye so, dɛ mbrɛ Paul kãe wɔ egyanom ho dɛ—sɛ wokwetsi hɛn a Ewuradze remma wondzi mu—anaadɛ hɛn ewufo kwetsi hɛn a Ewuradze nnkɛma woedzi mu.

16 Na afei, ɔfa ewufo ho no, mebɛkã hom nsɛm bi so a Paul kãe wɔ, 1 Corinthfo 15:29 mu dɛ: Ɔnntse dɛm a, hɔn a wonuma hɔn ma ewufo no, wɔbɛyɛ dɛn? Sɛ ewufo nnyan koraa a, ɔyɛ dɛn na wonuma hɔn ma ewufo?

17 Na bio, ɔfa ɔserɛkã yi ho no, mebɛma hom ɔserɛkã fi nkɔnhyɛfo no kor hɔ, a ɔdze n’enyi sii asɔfodzi ne nsanananmu no do, nye enyimnyam a wɔbɛda no edzi wɔ nda a odzi ekyir no mu, na dza ɔyɛ soronko a ɔfa asɛmpa a ɔwɔ hɔ daapem no ho nyina nye ewufo enuma no; osiandɛ Malachi kãe wɔ ne kyerɛwsɛm tsir a odzi ewiei, nkyekyɛmu 5 na 6 dɛ: Hwɛ mobɔsoma nkɔnhyɛnyi Elijah mabrɛ hom ansaana Ewuradze ne da kɛse a ɔyɛ hu no edu. Na ɔbɛdandan egyanom hɔn akoma aba mba do, na mba hɔn akoma aba hɔn egyanom do; amma maammfa ndom mammbɔbɔ asaase no.

18 Nkyɛ ɔwɔ dɛ mekyerɛ hom iyi ase pefee, na dɛ mbrɛ ɔtse yi ara ɔda mo botae no edzi ara yie. Oye dɛ hom hu, wɔ dɛm asɛm yi mu, dɛ wɔdze ndom bɔbɔ asaase yi gyedɛ nkafamdze bi bɛsẽ egyanom na mba no ntamu wɔ asɛm bi anaa biribi ho—na hwɛ, ebɛnadze nye dɛm asɛm no? Ɔno nye dɛm ewufo enuma no. Osiandɛ sɛ yɛnnkã hɔn ho a, wonnkotum edzi mu, nna sɛ hɔn so wɔnnkã hɛn ho a, yennkotum edzi mu, nna sɛ hɔn a wowui wɔ asɛmpa no mu no so nnkã hɛn ho a hɔn nye hɛn so nnkotum edzi mu; osiandɛ ohia wɔ dɛm mber yi a wɔahyehyɛ ato hɔ ama mberano ne mãhyɛ yi, dɛm mberano yi na ɔahyɛ ase reda no edzi, ama nkabɔmu a odzi mu, nye mberano nyina, nye nsaafee, nye etum, nye enyimnyam nyina ne nkabɔmu no aaba, na wɔbɛda no edzi fitsi Adam n’aber do dze ebesi aber yi mu. Na nnyɛ iyi nkõ, mbom ndzɛmba a wɔnndaa no edzi da fi wiadze ne fapem, na mbom wɔdze esuma enyansafo nye enyimdzefo no, wɔbɛda no edzi akyerɛ mbɔdomaba nye enumfoanomba wɔ dɛm mberano ne mãhyɛ yi mu.

19 Seseiara, ebɛn asɛm na yɛatse efi asɛmpa a hɛn nsa akã yi mu? Enyigye ndze! Ehumbɔbɔr ndze a ofi sor; nye nokwar ndze a ofi asaase mu; enyigyesɛm dze ma ewufo; enyigye ndze dze ma atseasefo nye ewufo; enyigyesɛm a ɔyɛ dɛw kɛse. Hwɛ hɔn a wɔdze enyigyesɛm kɛse ba no mbrɛ hɔn anan ho si yɛ fɛw wɔ mbepɔw do, na wɔse Zion dɛ: Hwɛ, wo Nyankopɔn dzi hen! Dɛ mbrɛ Carmel do bɔw tse no, dɛmara na Nyankopɔn ho nyimdzee so besian aba hɔn do!

20 Na bio, ebɛn asɛm na yɛtse? Enyigyesɛm fi Cumorah! Moroni a ɔyɛ bɔfo a ofi sor reda nkɔnhyɛfo no hɔn nsɛm ne mãhyɛ no edzi—nwoma a wɔrebɛda no edzi no. Ewuradze ne ndze fi Fayette sar no do, nye Seneca mansin mu reda adasegyefo baasa no a wɔbɛgye nwoma no ho dase no edzi! Michael ne ndze fi Susquehanna esuegya, riyi abɔnsam no a ɔdaan noho dɛ kan bɔfoe no edzi akyerɛ! Peter, James nye John ndze wɔ Susquehanna Mansin mu, nye Colesville, Broome mansin a ɔwɔ Susquehanna esutsen ho no, wɔreda hɔnho edzi dɛ hɔn na wokura ahenman no ne nsaafee nye mberano ne mãhyɛ!

21 Na bio, Nyankopɔn ne ndze wɔ akɔkora Egya Whitmer ne pia mu, wɔ Fayette, Seneca mansin mu, wɔ mber pii mu, nye mbea ahorow pii do, wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo yi hɔn akwantu nye hɔn abɛbrɛsɛ nyina mu! Na Michael, ɔbɔfopanyin no ne ndze; Gabriel nye Raphael hɔn ndze, nye abɔfo horow, fi Michael anaa Adam do dze besi dɛm aber yi mu, hɔn nyina ada hɔn mberano, hɔn kyɛfa, hɔn nsaafee, hɔn enyidzi, hɔn ahendzi nye enyimnyam edzi, nye hɔn asɔfodzi tum no; wɔdze nkyerɛkyerɛ nkakrankakra, wɔdze ahyɛdze tsia ahyɛdze, wɔdze kakra ma ha a, nna wɔdze kakra ama hɔ no so; wɔakã dza ndaamba ɔbɛba dze akyekye hɛn werɛ, dze esi hɛn enyidado pi!

22 Enuanom, ana ɔnnsɛ dɛ yɛkɔ do boa wɔ dɛm dwumadzi kɛse yi mu? Hom nkõ nkɔ hom enyim na mma hom nnsan hom ekyir. Hom nnya akokodur, enuanom; na wɔnkɔ do, nkedzi konyim! Hom mma hom akoma ndzi dɛw, na hom enyi ngye kɛse. Hom mma asaase ntow ndwom. Hom mma ewufo mbɔ onnyiewiei ayɛyi ndwom ho dawur mfa mma Ɔhen Immanuel no a ɔhyehyɛe too hɔ ansaana wɔrobɔ wiadze no, dza ɔbɛma yeetum apon hɔn efi efiadze; na adaduafo eenya hɔn fahodzi.

23 Hom mma mbepɔw ntsẽatsẽa mu enyigye mu, na hom mbɔnsa nyina ntsẽa mu kɛse; na hom po nye asaase kɛsɛɛ nyina nkã hom Onnyiewiei Hen no n’anwanwadze! Na hom esutsen, nye esuwa, nye woransu, hom mpem nsian enyigye mu. Hom mma ndupɔn nye hamu ndua nyi Ewuradze ayɛw; na mbotan a wotsim nsu enyigye mu mbɔ ose! Na hom mma ewia, bosoom, nye anapa nworaba mbɔ mu ntow ndwom, hom mma Nyankopɔn ne mba nyina ntsẽa mu enyigye mu! Na hom mma onnyiewiei abɔdze nda ne dzin edzi afebɔɔ kesi afebɔɔ. Na bio, mese mbrɛ odua yɛ enyimnyam wɔ ndze a yɛtse fi sor dɛ ɔrobɔ enyimnyam, nye nkwagye, nye enyidzi, nye bɛkyebo, nye onnyiewiei nkwa, ahenman, mpanyindzi, nye etum ho dawur wɔ hɛn asomu!

24 Hwɛ, Ewuradze ne da kɛse no abɛn; woana na obotum atsena ase wɔ da a ɔbɛba no mu, woana na obotum egyina ber a obopue no? Osiandɛ ɔtse dɛ ɔberfo n’abergya, ɔtse dɛ ɔtanhofo semina; na ɔbɛtsena ase dɛ dwetɛ namfo na yiyimufo, na ɔbɛtsew Levi mbabanyin ho, na ɔapɔw hɔn ho dɛ sika na dwetɛ, ama wɔdze ayɛyɛdze ama Ewuradze wɔ tseneneeyɛ mu. Dɛm ntsi, hom mma hɛn a yɛyɛ asɔr na dɔm yi, na yɛyɛ Nda a Odzi Ekyir Ahotseweefo yi, yɛmbɔ afɔr mma Ewuradze wɔ tseneneeyɛ mu; na sɛ wowie ne temple krɔnkrɔn no si a, hom mma yɛmfa nwoma a hɛn ewufo ho nkyerɛwee a odzi mu wɔ biribiara mu no nkɔto mu.

25 Enuanom, mowɔ nsɛm pii kã kyerɛ hom wɔ dɛm asɛm yi ho; na mbom seseiara dze, medze bɛba ewiei, na mobɔsɔw do da bi so. Mara hom akowaa brɛfo na nyɛnko a ɔmmpaa mmfi hom ho,