Mwakoro 11
Kaotioti ae kaotaki rinanon Iotebwa Timiti te Burabeti nakon tarina ae Hyrum Smith, i Harmony, Pennsylvania, ni Meei 1829. Te kaotioti aei e karekeaki rinanon te Urim ao te Tammim ni kaekaan ana bubuti ma ana titiraki Iotebwa. E taekinaki n Rongorongon Iotebwa Timiti bwa te kaotioti aei e karekeaki i mwin kaokan te Nakoanibonga ae te Aaron.
1–6, Taan mwakuri n te nne ni kurebe a na karekea te kamaiuaki; 7–14, Ukoukora te wanawana, takaruaea te rairannano, onimakina te Tamnei; 15–22, Kawakini tuua, ao kamatebwaia ana taeka te Uea; 23–27, Tai kaakea tamnein te kaotioti ao te taeka ni burabeti; 28–30, Naake a karekea Kristo a na riki bwa natin te Atua.
1 E a kan roko te mwakuri ae korakora ma ni kamiimi i buakoia natiia aomata.
2 Nooria, Ngai te Atua; ongo n au taeka, ae e maiu ma ni mwaaka, e kakang riki nakon te kabaang ae uaitera wiina, nakon bwenauaakin taian toma ma kanoan rii; mangaia are ongo nakon au taeka.
3 Nooria, e a mainaina n tawa ngkai te nne n aroka nakon te taiaki; ngaia are, ane e korakora nanona ni kan taia, e na karina ana biti ni koro wiita ma korakorana, ao man taia ngkai e teimatoa te ngaina, bwa e aonga ni kaikoa ibukin tamneina te kamaiuaki ae akea tokina n uean te Atua.
4 Eng, ane e karina anaa biti ni koro wiita ao n taia, e bon weteaki iroun te Atua.
5 Mangaia are, ngkana ko bubutiai ao ko na bon karekea; ngkana ko karebwerebwe e na kaukaki nakoim.
6 Ngkai, ko a tia ni bubuti, nooria, I taku nakoim, kawakina au tua, ao ukoukora waakinan ao katean ana waaki Tion.
7 Tai ukoukora te kaubwai ma ukoukora te wanawana, ao, nooria, a na kaotaki ana mwakuri te Atua aika raba nakoim, ao i mwina ko na kaubwai. Nooria, ane e karekea te maiu ae akea tokina e bon kaubwai.
8 E koaua, e koaua, I tuangko, n aron are ko tangiria mai irou ao e na bon karaoaki nakoim; ao, ngkana ko tangiria, ko na riki ngkoe bwa te tia karaoa ae raoiroi n te roro aei.
9 Tai taekina te bwai teuana ma ti te rairannano nakon te roro aei; kawakini au tua, ao ni buoka waakin au mwakuri, ni kaineti nakon au tua, ao ko na bon kakabwaiaaki.
10 Nooria, iai te bwai n tituaraoi iroum, ke ko na karekea te bwaintituaraoi ngkana ko bubutiai n te onimaki, ma te nano ae koaua, ni kakoaua mwaakan Iesu Kristo, ke ni mwaakau are I taekinna nakoim;
11 Bwa, nooria, bon Ngai are I taetae; nooria, bon Ngai te oota are e oota n te roo, ao man mwaakau I anganiko taian taeka aikai nakoim.
12 Ao ngkai, e koaua, e koaua ae I tuangko, kawenea am onimaki n te Tamnei are e kairiiri nakon karaoan te raoiroi—eng, ni karaoia ma te motiraoi, n nakonako ma te nanorinano, n motikitaeka n ae raoiroi; ao aio bon Tamneiu.
13 E koaua, e koaua, ae I tuangko, N na kaota nakoim Tamneiu, are e na kaotaa am iango, are e na kaona tamneim ma te kukurei;
14 Ao ngkanne ko na atai, ke man aio ko na atai, bwaai ni kabane ake ko bubutiai iai, ake bwaai ake a irekereke ma te raoiroi, n onimaki ni kakoauaai bwa ko na bon karekei.
15 Nooria, I tuangko bwa ko na tai taku bwa ko weteaki bwa ko na kabwarabwara ni karokoa ae ko na bon weteaki.
16 Tataninga riki teutana, ni karokoa e reke iroum au taeka, au bwa, au ekaretia, ao au euangkerio, bwa ko aonga n ataa raoi au reirei.
17 Ao ngkanne, nooria, ni kaineti nakon am bubuti, eng, ni kaineti naba nakon am onimaki e na bon karaoaki nakoim.
18 Kawakin au tua; tai kakarongoa; bubuti nakon Tamneiu;
19 Eng, teimatoa nakoiu ma nanom ni kabanea, bwa ko aonga ni buoka kaotakin bwaai akana a tia n taekinaki—eng, rairakin au mwakuri; bwaina te taotaonakinnano ni karokoa ko kakoroa bukina.
20 Nooria, aio am mwakuri, ni kawakini au tua, eng, ma ni kabane marurungim, am iango ao korakoram.
21 Tai ukoukora taekinan au taeka, ma ukoukora moa karekean au taeka, ao ngkanne e na aki bae newem; ngkanne, ngkana ko tangiria, e na reke iroum Tamneiu ao au taeka, eng, mwaakan te Atua ibukin anaakin nanoia aomata.
22 Ma ngkai tai kakarongoa; kamatebwaia au taeka are e a tia ni waaki i buakoia natiia aomata, ao kamatebwaia naba au taeka are e na roko i buakoia natiia aomata, ke are e a rairaki ngkai, eng, ni karokoa ko a karekei ni kabane ake N na anga nakoia natiia aomata n te roro aei, ao ngkanne bwaai ni kabane a na bane n ikotaki nako iai.
23 Nooria ngkoe ae Hyrum, ae natiu; ukoukora uean te Atua, ao a na bane n raonaki baikai ni kaineti nakon bwaai aika a eti.
24 Kateitei i aon au bwa, are au euangkerio;
25 Tai kaakea tamnein te kaotioti, ke tamnein te taeka ni burabeti, bwa e na reke kain ane e kaakeai bwaai aikai;
26 Mangaia are, kaawakin i nanom ni karokoa te tai are ni wanawanau ko na waaki iai.
27 Nooria, I taetae nakoia ni kabane ake a raoiroi nanoia, ao n tia ni karina aia biti ni koro wiita n taia.
28 Nooria, bon Ngai Iesu Kristo, are Natin te Atua. Bon Ngai te maiu ao ootan te aonaba.
29 Bon Ngai naba are I roko nakoia ake oin au aomata ao ake oin au aomata aki butimwaeai;
30 Ma e koaua, e koaua, I tuangkami, bwa ni kabane ake a butimwaeai, nakoia are N na anganiia te mwaaka n riki bwa natin te Atua, are nakoia naake a kakoaua arau. Amen.