Chapit 43
Jezi fè Laza retounen vivan ankò
Yon mesye ki te rele Laza t ap viv nan Betani avèk sè li Mari ak Mat. Jezi te renmen Laza ak sè l yo, e yo te renmen Jezi tou.
Laza te vin malad anpil. Sovè a te nan yon lòt vil. Mari ak Mat te voye nouvèl ba li pou di l ke Laza te malad.
Sovè a te mande disip li yo pou yo te ale avèk li pou ede Laza. Disip yo te pè ale Betani. Li te tou pre Jerizalèm. Gen kèk moun nan Jerizalèm ki te vle touye Jezi.
Jezi te di disip li yo Laza te mouri. Li te di ke li t ap mennen l retounen nan lavi. Mirak sa a t ap ede disip yo konnen ke li sete Sovè a. Jezi te ale Betani. Lè l te rive, Laza te mouri depi kat jou.
Mat te di Jezi ke Laza t ap toujou vivan si l te vin pi bonè a. Jezi te di Laza ki li t ap viv ankò. Li te mande Mat si li te kwè nan li. Mat te di wi. Li te konnen ke Jezi sete Sovè a.
Mat te kite Jezi pou l t al jwenn sè l la, Mari. Mari t al rankontre Jezi tou. Anpil moun te suiv li. Mari te mete ajenou, li t ap kriye, nan pye Sovè a. Moun ki te avèk li yo t ap kriye tou. Jezi te mande ki kote kò Laza te ye.
Jezi te ale nan tonm nan kote yo te antere Laza a. Te gen yon wòch ki te devan li. Li te di moun yo pou yo deplase wòch la.
Jezi te leve tèt li. Li te remèsye Papa nou ki nan Syèl la paske l tande priyè li.
Apresa, avèk yon gwo vwa, Jezi te di Laza pou l te sòti nan tonm nan. Laza te sòti. Anpil moun ki te wè mirak la lè sa a te kwè ke Jezi sete Sovè a.