Chapit 34
Tigason ki te gen movèzespri a
Yon jou yon mesye te mande Sovè a pou ede pitit gason li. Tigason an te gen yon movèzespri nan li. Disip yo te deja eseye geri pitit gason l lan, men yo pa t kapab.
Jezi te mande mesye a pou mennen pitit gason an ba li. Lè tigason an te vini, movèzespri a te fè l tonbe atè.
Sovè a te mande konbyen tan movèzespri a te nan kò tigason an. Papa a te di ke l te la depi l te piti.
Jezi te di ke li te ka geri tigason an si papa a te gen lafwa. Papa a te kòmanse kriye. Li te di ke li te gen lafwa. Men li te mande Jezi pou ede l vin gen pi plis lafwa.
Jezi te kòmande movèzespri a pou l te sòti nan kò tigason an epi pou l pa janm retounen ankò. Movèzespri a te fache. Li te maltrete tigason ankò. Apresa li te obeyi Jezi epi li te ale.
Tigason an te sitèlman trankil ke anpil moun te panse ke l te mouri. Men Jezi te pran men li epi li te ede l kanpe. Tigason an te geri. Movèzespri a te ale.
Nan apre disip yo te mande Jezi poukisa yo pa t kapab fè movèzespri a ale kite tigason an. Jezi te di yo ke pafwa yo bezwen jene ak priye pou yon kapab geri yon moun.