Ílį́įgo Bee Hada’iisdzí’ígíí 2
Naaltsoos Mormon Wolyéhígíí biyi’ “Diyin God díí tʼáá ałtsoní tʼáá aheełtʼéego yaa ntsékees,” níigo biyi’dóó na’nitin “bitsį’ łizhin dóó bitsį’ łigai, dabi’dótą’ dóó tʼáá bíneʼ naakaii, hastóí dóó sáanii” (2 Nephi 26:33). Nákéé’ náháne’dę́ę́’ Sodizin Bá Hooghan, bíla’ ashdla’ii bitsį’ ał’ąą ádaat’éii dóó be’iina’ ał’ąą ádaat’éii lą’í da ał’ąą dah da’íldéehgo tó bee dabi’diilzį́į́’ dóó yéego ádaat’į́įgo sodizin bá hoghan deiyoodlą́. Joseph Smith hiinánéedą́ą́’, t’áá díkwíhígo hastóí bitsį’ daalzhin sodizin da’atahgo Diyin Bibe’adziilii ó’ool’įįł baa dahalyée ńt’ę́ę́’. T’áá ániid sodizin bá hooghan bił hoolzhishyę́ędą́ą́’, Sodizin Bá Hooghan binaat’áanii zhinii hast’óí African danilínígíí Diyin Bibe’adziilii doo baa dahalyée da silį́į́’. Sodizin Bá Hooghan binaaltsoos díí é’él’ínígíí háádę́ę́’ bee hahoolzhiizhígíí doo hazhó’ó yaa dahalne’ da. Sodizin Bá Hooghan yilą́ąjį’ naazínígíí Diyin God bits’ą́ą́déé’ diyingo ííshją́ą́ ádoolníłígíí ła’ nidzin daaníigo deiyoodlą́, áko łahgo át’áo ál’į́į dooígíí biniinaa sodizin éí yada’oozlíí’. Diyingo ííshją́ą́ ályaa Sodizin Bá Hooghan Yilą́ąjį’ Sizíinii Spencer W. Kimball beiílyá dóó łahjį’ Sodizin Bá Hooghan yilą́ąjį’ naazíinii Salt Lake Diyin Bighan Ntsaaígíí Ya’iishjááshchilí 1góó yoołkááłgo, 1978 yihahgo bił hóóne’ dóó yee lą́ da’asłį́į́’. Díí diyingo ííshą́ą́ ályaaígíí t’áá ałtso Diyin bibe’adziilii bee haz’áanii bidadéét’i’yę́ę nahjį’ kódaalyaa dóó biyi’ ání t’áá ałtso áł’ąąh dine’é hastóí danilínígíí díí Diyin bibe’adziilii bąąh ndahalyée doo.
Díí Bídéét’i’ígíí Bich’į’:
Bini’ant’ą́ą́tsoh 30, 1978 yihahgo, 148 Hastą́ą́ Ninádízi’go Jesus Christ Bisodizin Bá Hooghan Dííjį́į́góó Yá Naazínígíí Bintsaago Áłah Ná’ádleehdi, Alą́ąjį’ Sizíinii N. Eldon Tanner, Áłtsé Áka’análwo’ii Sodizin Bá Hooghan Ts’ídá Yilą́ąjį’ Bídahólníhígíí díí yaa hoolne’:
Díí Ya’iishjááshchilí háázid díí yihahígíí biyi’, Ts’ídá Alą́ąjį’ Bídahólníhígíí Sodizin Bá Hooghan Yilą́ąjį’ Sizíinii Spencer W. Kimball diyingo bił ííshją́ą́ ályaaígíí chídeez’ą́ éí diyin bibe’adziilii dóó Diyin bighan ntsaa biyi’ ak’ihojídlí sodizin bá hooghanjí t’áá ałtso hastóí daniłtólí áda’diilyaaígíí baa dahalyée doo. Sodizin Bá Hooghan Yilą́ąjį’ Sizíinii Kimball áníigo díí diyingo ííshją́ą́ ályaaígíí neílyáago ntsaago áłah aleehdi bee bił hodíílnih, éí nízaadgóó baa ntsáhákees dóó sodizin Diyin bighan ntsaaígíí biyi’ dílzingo haz’ą́ą́ góne’ beílyá, áádóó bíká’anáhi’nilchéhígíí yee yił ch’ííní’ą́, éí néidiilá dóó yee lą́ asłį́į́’. Áádóó Hastóí Naakitsʼáadah Bik’idahodiinii’ígíí yich’į’ ííshją́ą́ áyiilaa, éí t’áá ałtso yee lą́ da’asłį́į́’, áádóó t’áá ałtso Sodizin Yilą́ąjį’ Naat’áanii Danilínígíí yił ííshją́ą́ ánááyiidlaa, éí ałdó’ t’áá át’é yee lą́ da’asłį́į́’.
Aláahdi Sodizin Bá Hooghan Yilą́ąjį’ Sizíinii Kimball éí díí naaltsoos k’ad yídííłtah shidííniid:
Ya’iishjááshchilí 8, 1978 yihahgo
T’áá ałtso diyin bibe’adziilii adahwiis’áádę́ę́’ dóó t’áá kǫ́ǫ́’ Jesus Christ Bisodizin Bá Hooghan Dííjį́į́góó Yá Naazínígíí naat’áanii danilíinii:
Shik’isoo Danohłíinii:
Nahasdzáán bikáá’góó Diyin Bóhólníihii binaanish ąąh kwáanííłgo deiltsą́, baa ahééh daniidzin lą’ída bíla’ashdla’ii dahdeínééhgóó Diyin bina’nitin bee yisdá’iildéehii ninályá baa hane’ígíí deidiizts’ą́ą́’, dóó lą’í da Sodizin Bá Hooghan yidahidiikai. Díí, binahjį’, Sodizin Bá Hooghan atah danilínii dahodísinígíí bąąhági át’éii nahjį’ kódeiyiilaaígíí danihidiisnáá’go t’áá ałtso bee bá ahóót’i’ígíí dóó ak’ihojídlí Diyin bina’nitin bee yisdá’iildéehii aayiiléhígíí baa dahidoolyééł.
Diyin yá yáłti’í dóó Sodizin Bá Hooghan yilą́ąjį’ naazíinii yee ádeehadahaasdzíí’yę́ę baa ákódaniizingo éí nihilą́ąjį’ ańdahaaskai áko hahgo shį́į́’ náasdi, Diyin God bihool’áágóó nahat’á, t’áá ałtso nihik’isoo bąąhági ádaat’éii nahjį’ kódayiilaaígíí éí Diyin bibe’adziilii baa dahidoolyééł, áádóó Diyin bibe’adziilii bits’ą́ą́’ da heestł’ónée yéego akéé’ naazínée deiltsą́, éí nízaadgóó dóó bá nda’siikan dóó t’áá íiyisíí yéego bá ádeit’įįd, éí nihik’isoo yéego ádáát’įįd, lą’í ahééda’iiskid Diyin Bighan Ntsaaígíí biyi’ hódahgo haz’ą́ą́ góne’ Diyin Bóhólníihii diyingo nihi’doodloosgo yéego bíká sodadiilzin.
Nihisodizin yidiizts’ą́ą́’, áádóó diyingo ííshją́ą́ é’él’ínígíí bik’ehgo nihił hoolne’ ałk’idą́ą́’ bee ádéé ha’oodzíí’yę́ę beiníłką́ éí t’áá ałtso hast’óí danilínígíí yéego da’oodlánígíí, Sodizin Bá Hooghan biyi’ dahodísinígíí éí Diyin bibe’adziilii dílzinígíí baa dahidoolyééł, Diyingo óhólnííh adziilgo choo’į́į doo, áádóó éí yits’ą́ą́dóó ak’ihojídlí deiyít’éhígíí ayóó’ádeiyó’níinii yił yaa bił dahózhǫ́ǫ doo, Diyin bighan ntsaaígíí dóó ak’ihojídlíhígíí ałdó’. Éí bik’ehgo, t’áá ałtso hast’óí Sodizin Bá Hooghan deidósinígíí Diyin bibe’adziilii ó’ool’įįł baa dahidoolyééł éí nilínígíí éí doodago bitsį’ ał’ąą át’áo nidaashch’ąą’ígíí doo bóhólnííhgóó. Sodizin Bá Hooghan yilą́ąjį’ naazíinii éí bee haz’áanii hazhó’ó yik’eh dahół’į́įgo ndabidi’neestą́ą́’ éí t’áá ałtso ó’ool’įįł baa dahidoolyéłígíí ndabí’díkid éí Diyin Bibe’adziilii Aaronic Wolyéhígíí éí doodago Diyin Bibe’adziilii Melchizedek Wolyéhígíí bá éí haałt’éego í’diilyaaígíí bee haz’áanii niilyáhígíí yídeiyíghah doo biniyé.
T’áá aaníigo ádadiiní’ Diyin Bóhólníihii yinízinée k’ad bééhoozin éí ba’áłchíní t’áá át’é nahasdzáán bikáá’ bik’idahozhdoodliiłgo éí bá ndaal’a’í bee bóhólnííhgo biinéé’ deididoots’į́į́ł, dóó éí binahjį’ t’áá ałtso Diyin bina’nitin bee yisdá’iildéehii bits’ą́ą́dóó ák’ihojídlíhígíí baa dahidoolyééł éí yich’į’ hasht’e’ áda’didoolnííł.
Ná ndaal’a’í ádaaní,
Spencer W. Kimball
N. Eldon Tanner
Marion G. Romney
Ts’ídá Alą́ąjį’ Bídahólníhígíí
Spencer W. Kimball éí Diyin yá yáłti’í, oo’íinii, dóó diyingo bił ííshją́ą́ é’él’íinii nilíigo nihił béédahózin, áádóó Jesus Christ Bisodizin Bá Hooghan Dííjį́į́góó Yá Naazínígíí yilą́ąjį’ sizį́, diné Diyin Bisodizin Bá Hooghan yá naazíinii áłah siidlį́į’go ádadii’ní díí diyingo ííshją́ą́ ályaaígíí Diyin Bóhólníihii bizaad dóó yinízinígíí át’éego bee lą́ da’siidlį́į́’. T’áá ánółtso lą́ dadohnínígíí nishnáájí nihíla’ bee yadadoołnííh. Bits’ą́ą́jí’ígíí ałdó’ t’áá ákót’áo yadadoolnííh.
T’áá ałtso lą́ daaníigo yadadiilnii’ígíí atxisgo silį́į́’.
Salt Lake City, Utah, Bini’ant’ą́ą́tsoh 30.