1 Shikʼisoo, Shí tʼáá aaníigo nihichʼįʼ haasdziih, nahatʼá, dóó beehazʼáanii nihikʼijįʼ kóshłééh, akʼi dadéezʼį́į́ʼii ályaaígíí kéyah tʼáá átʼé sodizin binaadeełii yikʼi dadéezʼį́į́ʼii bídéétʼiʼí éí shí ádíshníigo binahastʼą́ dóó hadilyaa, éí sodizin binaadeełii yikʼi dadéezʼį́į́ʼii dadooleeł, dóó nízaadgóó hoogááłgóó ályaa shisodizin daʼatahígíí bíká adoolwołgo bá dóó nihokááʼ dineʼé níyáajįʼ yisdéíyiiʼéésh doo—

2 Ádee haʼoodzííʼ łąʼígo dóó doo łahgo ánééhgóó, áko éí bee bichʼįʼ haazdziʼę́ę tʼah deiyoodlą́ągo éí ląʼígo akʼihojídlí bee bikʼihozhdeeshdliił;

3 Ákondi doo daʼoodlą́ągóó éí yíi binaagóó siláa doo.

4 Éí bąą, łaʼ shá ndaalʼaʼí shibee hazʼáanii doo yikʼeh dahółʼínígíí biniinaa, adádanoolníinii binahjįʼ yee ahadaʼdeestʼánígíí kʼídeiztiʼ, áádóó haneʼ tʼóó ádaalyaii ałdo biniinaa, ákódaatʼínígíí tʼáá shiidą́ąʼdii tʼáá íiyisíí doo yáʼátʼééhgóó atídabidiʼdoolníiłgo bá nidahwiistʼą́.

5 Háálá Shí, Diyin Bóhólníihii, shijéí bee nihoníʼą́, diné łaʼ sodizin binaadeełii yikʼi dadéezʼį́į́ʼii asihgo habiʼdoolʼį́į́ʼgo, éí doodago, kótʼáo ááłdíshní, ahaʼdeetʼą́ kʼíínítiʼígíí éí nihąąh silá, ákódzaago díí iiná biyiʼ atínihidiʼdoolnííł, áádóó tʼáá háí shį́į́ bikʼi diishniiʼígíí atínihidoolííł;

6 Háálá Shí, Diyin Bóhólníihii, díí nihichʼįʼ kólyaaígíí doo bee shaa oodloh da doo—

7 Áádóó díí tʼáá átʼé biniinaanígíí éí nihitahgóó baʼátʼeʼ ádaadinígíí doo ákogi ádaatʼéhígíí doo bił atídadoonííł da; áko doo ákogi ádaatʼéii doo łaʼ baa náhódóotʼįįł da; háálá Shí, Diyin Bóhólníihii, shinishnáájí dah sinídáago ayóó átʼéii nah ndoolyéełgo bee ádee haasdzííʼ.

8 Éí bąą, ndaʼiisíiʼii danohłį́įgo bee hanihiʼdoolʼį́į́ʼgo, shi atíʼálʼį́ díí hinínánígíí biyiʼ doo bitsʼá dínííchééł da.

9 Áko ndasiyoosíʼígíí biniinaa nahjįʼ kónihiʼdiilyaago, ákondi Chʼį́įdii biʼatíʼálʼį́ doo bitsʼádadínóohchééł da nihá nináʼályá beiníłką́ąjįʼ ahoolzhiizhgo índa.

10 Áádóó díí oolkiłdóó sheʼadziil nihaa nishłé, hastiin da łaʼ nihitahdóó, akʼi dadéezʼį́į́ʼiidóó, éí asihgo habiʼdoolʼį́į́ʼgo dóó bąąhági ádzaaígíí dóó tʼáadoo ádaanáʼooskangóó, áko éí Chʼį́įdii bitiʼhoonííh baa jidoolóós; áko éí bichʼįʼ nihiʼdoodlóozgo doo nihikʼeh didoodleeł da.

11 Áko díí shił bééhózingo; ákohgo, Shibee hazʼáanii łaʼ nihaa nishłé, áko hashtʼeʼ ádadidoołnííł dóó diné tʼáá ałtso aa ádahalyą́ą doogo naanish baa dahidooyééł;

12 Áko nihokááʼ dineʼé tʼáá ałtso aa áháyą́ naanish bee bikʼi dahodiiniiʼígíí ádeiyiilaaígíí yee shił nídahodoolnih.

13 Háálá áko Shí, Diyin Bóhólníihii, diné tʼááłáʼí nízínígo yindaashnishígíí shichʼįʼ nídeidooltahgo nisin, díí éí nahasdzáán bikááʼ akʼi dahojídlí baa ádahołyą́ągo, éí nihokááʼ bikáaʼgi shidineʼé danilíinii bá hashtʼeeshłaa dóó bá íishłaa.

14 Shí, Diyin Bóhólníihii, wótʼáahdi hiníláii ąą íishłaa dóó nahasdzáán íishłaa, dóó nahasdzáán hadiishłaa, díí tʼáá áłah íishłaa; dóó tʼáá ałtsóní biiʼ siléí éí daashí.

15 Áádóó shikééʼ naazíinii bíká anáshwoʼ biniyé shikʼihodiiniiʼ, háálá tʼáá ałtsóní shí.

16 Ákondi díí tʼáá shí íínísinígi átʼáo ádoolnííl; áádóó áko shooh Shí, Diyin Bóhólníihii, díigi átʼáo shikééʼ naazíinii bíká adeeshwołgo bee nihoníʼą́, áko baa dahojoobáʼígíí aláahdi baa dahaʼniih dooleeł, áko daʼatʼíinii daʼaʼohgo ádoolnííł.

17 Háálá nahasdzáán éí tʼáá ałtsoní bikááʼ hólǫ́, áádóó łąʼí hólǫ́ dóó tʼáá bilááh danéelʼą́; aooʼ, tʼáá ałtsóní hólóonii hashtʼeeshłaa, áádóó nihokááʼ dineʼé baʼáłchíní tʼáá bí ádá nitsídaakeesgo yee bídahólníihgo bá ályaa.

18 Éí bąą, łaʼ da diné łą́ągo tʼáadoo leʼé íishłaaígíí yee łaʼ yiyilaago, dóó shinahatʼá bee yisdáʼiildéehii bibee hazʼáanii bikʼehgo, doo háiida łahdóó yee yíkaʼeelwodgóó, baa dahojoobáʼígíí dóó bichʼįʼ andahaztʼiʼígíí, áko éí, bąąhági ádaatʼínígíí bił, hoolʼáágóó tiʼhojoonííhgo, chʼį́įdiitahdę́ę́ʼ hajííghal doo.

19 Áádóó áko, tʼáá aaníigo sodizin binaadeełii yikʼi dadéezʼį́į́ʼii bindaadeełii baa, Shí nihichʼįʼ haasdziih—

20 Shá naalʼaʼí Sidney Rigdon kʼad hiná hazʼą́ągi baa didootʼááł bididííniił, áádóó akágí yildzééh bá hooghangi bił hazʼą́ągi naanish bee hokʼihodiiniiʼ doo, éí hákáʼanálwoʼ doo shidáʼákʼehgi naalnishgo, shí íínísinígíí bikʼeh, díí ádíílííł hodííniidgo.

21 Áádóó akʼi dadéezʼį́į́ʼii yaa ndahaʼáhígíí bikʼehgo tʼáá ałtsóní ádadoolnííł bididííniił, dóó łaʼ danilį́įgo lą́ nídaʼadleehgo éí doodago akʼi dadéezʼį́į́ʼii ádaaníigo, éí Kirtlanddi kéyah siʼą́ądi kéédahatʼį́.

22 Áádóó díí naanish bee hokʼidiiniiʼígíí dóó akʼihojídlí, Shí, Diyin Bóhólníihii, shá naalʼaʼí Sidney Rigdon bee yiisį́į́ʼ akʼihojídlí átʼéego, díí éí bí dóó baʼáłchíní baa deeshłééł;

23 Áádóó éí shidááhdóó hojoobaʼ ádólzingo, ląʼída akʼihojídlí bichʼįʼ kódeeshłííł.

24 Áádóó ałdóʼ, shá naalʼaʼí Martin Harris díí bee bikʼi diishniiʼ, éí honaanish doo, éí kéyah haadzoh shá naalʼaʼí John Johnson beiítʼą́ éí áłtséédą́ą́ʼ kéyah baa deetʼáanée bił ałnáosnil, éí bí dóó baʼáłchíní daabí doo;

25 Áádóó tʼáá akééʼ sizį́įgo, ląʼída akʼihojídlí bí dóó bílástsiiʼ bichʼįʼ kódeeshłííł.

26 Áádóó shá naalʼaʼí Martin Harris bibéeso shizaad yee naʼnitinjigo choidoołʼįįł bididííniił, éí shá naalʼaʼí Joseph Smith, Jun., nahaʼáhígíí bikʼehgo.

27 Áádóó ałdóʼ, shá naalʼaʼí Frederick G. Williams kéyah kʼad yikááʼ kééhatʼínígíí tʼáá bí dooleeł bididííniił.

28 Áádóó shá naalʼaʼí Oliver Cowdery kéyah kin bitsį́į́góóígíí bí doo bididííniił, éí naaltsoos ádaalʼį́ bikin biyiʼdóó nahatʼá báhazʼą́ą doo, éí tʼááłáʼí hazʼání góneʼ, áádóó ałdóʼ éí hazʼą́ ákweʼé bizhéʼé bighan.

29 Áádóó shá naalʼaʼí Frederick G. Williams dóó Oliver Cowdery naaltsoos ádaalʼį́ biyiʼdóó nahatʼáii dóó tʼáá ałtso biiʼ siláhígíí bí doo bididííniił.

30 Áádóó díí éí binaanish átʼée doo éí bee bikʼihodidoonih.

31 Áádóó tʼáá akééʼ sizį́įgo, áko shooh shí bikʼihojideeshdliił, dóó ląʼígo akʼi dahojídlí bichʼįʼ kódoolnííł.

32 Áádóó naanish bee bikʼi deeshniiʼígíí bee hahodoolzhish, éí ląʼígo akʼihojídlí bí dóó baʼáłchíní bá doo.

33 Áádóó, tʼah tʼáá akééʼ naazį́įgo, ląʼí akʼihojídlí bí dóó baʼáłchíní bichʼįʼ kódeeshłííł, azhą́ tsʼídá ląʼígo akʼihojídlíi ndi.

34 Áádóó ałdóʼ, shá naalʼaʼí John Johnson kin yiiʼ bighanígíí bí dooleeł bididííniił, dóó heiyílyáhígíí, tʼáá átʼé tʼáá hazhóʼó kéyah shikin ádadoolnííł bá hashtʼeʼ niiʼnilígíí tʼéiyá, éí hweeyílyáhígíí, áádóó nahazʼą́ shá naalʼaʼí Oliver Cowdery bá yíízhiʼígíí tʼéiyá.

35 Áádóó tʼáá oodlą́ągo, ląʼída akʼihojídlí bichʼįʼ kódeeshłííł.

36 Áádóó shí íínísingo éí kéyah hazʼą́ ałtsʼádaasdzohígíí baa nahidoonih éí ákweʼé kin haalʼáagi shikééʼ naazíinii bá ádadoolnííł, éí Iiʼ Sizį́ Diyinii bízhí binahjįʼ bił ííshją́ą́ áyiilaago, dóó akʼi dadéezʼį́į́ʼii yaa ndahaʼáhígíí bikʼehgo, dóó akʼi dadéezʼį́į́ʼii ádaanínígíí bikʼehgo ałdóʼ.

37 Áádóó díí binahjįʼ binaanish haidoołwołgo bee bikʼi diishniiʼ, háálá éí bee bí dóó baʼáłchíní dahodooleełígíí bee bikʼi dajideeshdliił.

38 Áádóó yéego akééʼ sizį́įgo, ląʼígo akʼihojídlí bee bikʼihozhdeeshdliił.

39 Áádóó ałdóʼ, shá naalʼaʼí Newel K. Whitney kééhatʼį́įgi kin naaznilígíí dóó kéyah hazʼą́, áádóó akwéʼé kéyah hazʼą́ dóó bikáaʼgi naalyéhí bá hooghan siʼánígíí, áádóó shádiʼááhjígo kéyah naalyéhé bá hooghan bikááʼ siʼánígíí, dóó kéyah bikááʼ łeeshchʼih bá hazʼánígíí éí tʼáá ałtso baa dooʼnił bididííniił.

40 Áádóó díí tʼáá átʼé shá naalʼaʼí Newel K. Whitney naanish bá bikʼi diishniiʼ, éí bí dóó baʼáłchíní dahodooleełígíí bee bikʼi dajidoodliił, éí akʼi dadéezʼį́į́ʼii shinaalyéhé bá hooghan yíkáʼadoojah biniyé shistake Kirtlanddi kéyah bá áshłaa.

41 Aooʼ, tʼáá aaníí, díí naanish shá naalʼaʼí N. K. Whitney bee bikʼi diishniiʼ, díí naalyéhé bá hooghan hadilyaaígíí ndi, bí dóó bíká análwoʼí, dóó baʼáłchíní dahodooleełígíí bá.

42 Áádóó shibee hazʼáanii baa níláhígíí, tʼáá íiyisíí yikʼeh hółʼį́įgo, áádóó bí dóó bílástsiiʼ dóó bikééʼdóó ndahazhchínígíí ląʼígo akʼihojídlí baa dadeeshłééł, azhą́ ląʼígo akʼihojídlí ndi bee bikʼijideeshdliił.

43 Áádóó ałdóʼ, shá naalʼaʼí Joseph Smith, Jun., kéyah shikin bikʼi hodiiniiʼgo bikááʼ nidootʼáłígíí bá hashtʼeʼ nidootʼááł bididííniił, éí tsin dízdiin áníłnééz dóó naakitsʼáadahgi áníłtéél, áádóó kéyah bizhéʼé kʼad yikááʼ kééhatʼínígíí ałdóʼ baa dootʼááł;

44 Áádóó díí éí naanish bee bikʼi hodidoonihgo bee hahodoolzhish, éí bí dóó bizheʼé, bee bikʼihojidoodliił.

45 Háálá áko shooh, bizhéʼé kéyah baa doolyééł bá hashtʼeeshłaa, háálá díí bee bíkaʼaashwod doo; éí bąą biníʼ shá naalʼaʼí Joseph Smith, Jun bighan yiiʼ kééhatʼį́į doo.

46 Áádóó shá naalʼaʼí Joseph Smith, Jun., beʼasdzą́ą́ dóó baʼáłchíní ląʼígo bikʼihojideeshdliił, ląʼígo akʼihojídlí bee bikʼihozhdeeshdliił.

47 Áádóó áko, Zion bídéétʼiʼgo Shí bee hazʼáanii łaʼ nihichʼįʼ kóshłééh, nihikʼisoo Zion biyaadi doo sodizin binaadeełii yikʼi dadéezʼį́į́ʼii danohłį́įgo nihiʼdótąʼ da dooleeł, éí kótʼáo tʼéiyá—

48 Hazhóʼó hashtʼeʼ dahoołaa dóó bikʼijįʼ, Zion biStakejí Sodizin Binaadeełii Yikʼi Dadéezʼį́į́ʼii bee nihidíʼdóojiił, Kirtland biKin Dah Shijaaʼdi. Áádóó nihikʼisoo, éí ałtso hashtʼeʼ ádaʼdiilyaago, éí Ziondi biKin Dah Shijaaʼ Sodizin Binaadeełii Yikʼi Dadéezʼį́į́ʼii bee yídóojiił.

49 Áádóó dah yikahígíí bízhiʼ ádeidoolíiłgo yee hashtʼeʼ ádadiʼdoolnííł, dóó tʼáá éí bízhiʼ yee; dóó tʼáá éí bízhiʼ biyaadóó binaanish ádeiłʼį́į doo, dóó tʼáá bí dabízhiʼ bee ałdóʼ;

50 Áádóó tʼáá nihízhiʼ biyaadóó nihinaanish ádaałʼį́į doo, dóó tʼáá danihízhiʼ bee ałdóʼ.

51 Áádóó díí bee yisdádoohkah biniyé bee haasdzííʼ, áádóó bí ałdóʼ yisdádookah biniyé, chʼínoolkaadígíí dóó náás ádahodooníłígíí biniyé.

52 Áádóó bąąhági átʼéii, dóó adáhonooní dóó haneʼ tʼóó ádaalyaii yee nihił dahalneʼígíí biniinaa bee ahadaʼdeestʼánée doo yikʼeh dahólʼį́į da—

53 Éí bąą, nihikʼisoo bił sodizin binaadeełii yikʼi dadéezʼį́į́ʼii danohłínée nahjįʼ kólyaa, áko kʼad oʼoolkidjįʼ índa tʼáá bikééʼ nisoozį́į doo, díí bikʼeh ádaʼoołaago tʼéiyá, éí shí bee haasdzííʼ, éí béeso aahááʼá orderjí ndahaʼáii yee lą́ daʼasłį́įgo bee, nihił hazʼánígíí yaa halneʼgo dóó ndahaʼáii biinééʼ ádaaníigo.

54 Áádóó ałdóʼ, Shí bee hazʼáanii łaʼ nihaa nishłé bindaałnish bídadéétʼiʼígíí baa haasdziih éí shí bee nihikʼihdiishniiʼ.

55 Áko shooh, díí kédaayah éí tʼáá átʼé shí, éí doodago éíí tʼáadoo biniyéhígóó daʼiinohdlą́ą doo, dóó tʼóó ádaʼdołʼį́įgo bee hadanihiʼdeelʼį́į́ʼ, dóó bee shił ahadaʼdinohtʼánée kʼídanootįʼ;

56 Áádóó kédaayahígíí shígo, áko nihí éí aa ádahołʼyáanii danohłį́; doo kótʼéegóó éí doo aa ádahołʼyáanii danohłį́į da doo.

57 Ákondi, tʼáá aaníigo Shí nihichʼįʼ haasdziih, shighan baa ádahołʼyą́ą doogo bee nihikʼi diishniiʼ, azhą́ tʼáá aaníí aa ádahołyáanii dahnohłį́į ndi.

58 Áádóó díí biniyé hashtʼeʼ ádaʼdołnééh nihidííniid, shizaad naaltsoos bikááʼ nidadohnił, éí tʼáá átʼé shizaad naaltsoos bee siʼą́ągo ádadoohłííł, éí diyingo nihił ííshją́ą́ ádaashłaaígíí biyiʼ doo, áádóó shí, kódóó, tʼáá hoolzhishgi nihaanáshdlééh doo—

59 Éí shisodizin bá hooghan łąʼígo yididookah dóó náhasdzáán bikáaʼgi shi diyin hazʼą́ hadadidoohłííł biniyé, áádóó shidineʼé náasdi bił honishłǫ́ǫ doo biniyé hashtʼedadoohłííł, éí kʼadę́ę baa hoolzhíísh.

60 Áádóó béeso bá hooghan łaʼ ádá nidadoohʼááł, dóó shízhiʼ binahjįʼ dílzingo ádadoołííl.

61 Áádóó béeso yikʼi déezʼį́į́ʼ dooleełígíí łaʼ níhitahdóó nídidoołtééł, áádóó díí naanishígíí bee bidiʼdoolzį́į́ł.

62 Áádóó béeso biiʼ sinilgi bídiidlid dooleeł, áádóó tʼáá ałtso dadílzinii éí bééso biiʼ sinilgi nahidoojih; dóó nihitahdóó diné doo łaʼ éí shí didooniił da, éí doodago łahdóó ndi, háálá tʼáá anółtso tʼáá łahjįʼ danihí doo.

63 Áádóó kʼad oolkiłdóó díí nihaadideeshʼááł; áádóó áko bedaʼoołééh, naanish bee nihikʼi dahodiiniiʼígíí ádadoohłííł, dadílzinígíí tʼéiyá, éí díí dadílzinígíí bee haasdzíʼę́ę naaltsoos bikááʼ nídadoosoh biniyé.

64 Áádóó dadílzinígíí bitsʼą́ą́dóó béeso ályaaígíí éí béeso niiʼnilgi ndooʼnił, áádóó bídiʼdoodlił; áádóó doo háiida choidoołʼįįł da éí doodago béeso niiʼnildóó doo łaʼ chʼíídoojih da, áádóó bíʼdiiljéʼígíí doo nahjįʼ kódoolníił da, order ádadííniidgo tʼéiyá, éí doodago Diyin God ádííniidgo tʼéiyá.

65 Áádóó dadílzinígíí bitsʼą́ą́dóó béeso ályaaígíí éí hashtʼeʼ nidadohnił, éí dadílzinii dóó dadiyingo choidooʼįįłgo tʼéiyá bá.

66 Áádóó díí éí Diyin Bóhólníihii bibéeso dílzingo sinil wolyée doo; áádóó Diyin Bóhólníihii bá dílzin dóó bikʼi sohodoozinígíí biniinaa bikáaʼgi bídiʼdooljah.

67 Áádóó ałdóʼ, nááná łaʼ béeso nidooʼjihgi hashtʼeʼnáádoolnííł, dóó béeso yaa áhályání béeso sijaaʼgi yaa áhályáa dooleełígíí bikʼihodidoonih, áádóó bikáaʼgi bídiʼdidooljah;

68 Áádóó nanilnish bee nikʼihodiiniiʼígíí binahjįʼ tʼáá ałtso béeso naahijááhígíí, éí bee kéyah naadiníʼánígíí bee baa áhályą́ą doogo bee nikʼi diishniiʼ, éí kin ádaatʼéí, éí doodago kédaayah, éí doodago naaldlooshii, éí doodago tʼáá ałtsóní tʼáá hazhóʼó dadílzinii dóó diyingo nadaasdzooígíí éí ndagaʼ, éí dílzinii dóó dadiyin biniyéí dooleełgo hashtʼeʼniníjaaʼ, éí béeso bá hooghan béeso tʼáá naahinidééhgóó, neeznádiin daníjaaʼgo, éí doodago ashdladiin daníjaaʼgo, éí doodago naadiin daníjaaʼgo, éí doodago neeznáá daníjaaʼgo, éí doodago ashdlaʼ daníjaaʼgo.

69 Éí doodago kótʼáo ááłdíshní, diné da łaʼ nihitahdóóígíí ashdlaʼ béeso beiyíjaaʼgo naalyéhé bá hooghan góneʼ yah iidoojih; éí doodago neeznáago beiyíjaaʼgo, éí doodago naadiin beiyíjaaʼgo, éí doodago ashdladiin, éí doodago neeznádiin beiyíjaaʼgo, tʼáá átʼé yah iidoojih;

70 Áádóó łaʼ nihitahdóó éí díí shí doo didooniił da; háálá éí béeso doo bí haʼníi da dooleeł, łahdóó ndi doo bí da doo.

71 Áádóó ádin łahdóó ndi doo choidooʼįįł da, éí doodago béeso bá hooghandóó doo hadooʼnił da, tʼáá hazhóʼó order dóó bizaad dóó yee lą́ daʼasłį́į́ʼgo tʼéiyá.

72 Áádóó díí éí orderdóó dabizaad doo dóó yee lą́ daʼasłį́į́ʼ doo—áko tʼáá háiida nihitahdóó béeso yikʼi déezʼį́ʼígíí kwíididooniił: Naanish bee shikʼihodiiniiʼídi díí béeso yee shíkáʼadoolwoł nisin—

73 Áko ashdlaʼ béeso, éí doodago neeznáá béeso da, éí doodago naadiin da, éí doodago ashdladiin da, éí doodago neeznádiin da, naanish bee bikʼihodiiniiʼígíí biniyé béeso nidzingo éí nidzinígíí ánéílą́ąʼgo béeso yaa áhályáanii beidoojih—

74 Doo yáʼátʼééhgóó éʼéłʼínígíí bínáłkááʼgo, dóó doo baʼahódlíigo índa doo hóyą́ągo naanish bee bikʼihodiiniiʼígíí ííłʼį́įgo éí order yilą́ąjįʼ ndahaʼáí bidááhdóó bééhoozingo índa.

75 Ákondi nizhónígo atah sizį́įgo, dóó akʼeh hółʼį́įgo dóó hoyą́ągo naanish bee bikʼihodiiniiʼígíí nizhónígo ííłʼį́įgo, díí binahjįʼ béeso yaa áhályáanii bił bééhózin doo éí béeso doo łaʼ yichʼįʼ niʼkóyósin da doo.

76 Ákondi doo yáʼátʼééhgóó iʼiilaago, béeso yaaʼ áhályánígíí order bindahatʼá dóó yee hadadoodzihígíí bikʼehgo ádoolnííł.

77 Áádóó béeso yaa áhályání doo akééʼ sizį́įgo habiʼdoolʼį́įgo dóó diyingo doo hóyą́ągo naalnishgóó, éí orderjí alą́ąjįʼ dahwéeʼaahii dóó yaa hadaasdzííʼgo, éí naalnishdóó nahjįʼ habidiʼdooltééł, dóó łaʼ bitsáskʼeh góneʼ bikʼihodidoonih.

78 Áádóó ałdóʼ, tʼáá aaníigo Shí nihichʼįʼ haasdziih, nihąąh hadaazʼáhígíí baa ntséskeesgo—áko shooh shí íínísingo nihąąh hadaazʼáhígíí ałtsoʼ bikʼé ninádaʼdoohdlééł.

79 Áádóó íínísingo shidááhdóó nahaa hajoobaʼgo ádadiʼdoołnííł, dóó díí akʼihojídlí bídadinoołkaal dóó nihaa hojoobaʼ dóó daʼiinohdlą́ągo sodadołzingo nihaa dadoolyééł.

80 Áádóó bídadinoołkaal dóó aʼohgo ádaʼdíínółzingo, dóó daʼiinohdlą́ągo sodizin chodaołʼį́įgo, áko shooh, nihąąh hadeiyíłʼáhígíí nihaa dajoobaʼgo ádadeeshłííł, áko nihąąh hadaazʼáhígíí bee ndaʼdoołééłígíí nihichʼįʼ kódeeshłííł.

81 Éí bąą New Yorkgóó tsxį́įłgo bichʼįʼ ádaʼdoohłííł dóó shiʼIiʼ Sizį́ Diyinii ádadoohłííł nihiłnínígíí bikʼehgo ndaʼdoohsoh; áádóó nihąąh hadeiyíłʼáhígíí nihaa dajoobaʼgo ádadeeshłííł, áko bíniʼ dabiyiʼ atíʼdanihidoolííłgo nihaa ntsédaakeesyę́ę nahjįʼ kódadeeshłííł.

82 Áádóó aʼohgo ádadíínóhsingo dóó akééʼ nisoozį́įgo dóó shízhiʼ bíká ádadohníigo, áko shooh, dahodínóółnééł.

83 Nihichʼįʼ ádee haasdziih, díí tʼááłáhídi nihiʼdótąʼdę́ę́ʼ yisdáʼnihidiʼdootʼish.

84 Nihá bíighahdą́ą́ʼ béeso aa dahohnííłdą́ą́ʼ neeznádiin da bee, éí doodago mííl da bee, éí niʼdótąʼdę́ę ánéelą́ą́ʼ ná bikʼe niʼdoolyééłgo chʼéénídzáago, éí tʼáá bee ná ahóótʼiʼ doo.

85 Áádóó díí kéyah nihaa dahaasyáhígíí binahjįʼ béeso nihaʼdooʼnił, díí tʼááłáhídi tʼéiyá kótʼée doo, éí danízhiʼ bee lą́ daʼsoołį́įʼgo éí doodago nááná łaʼ, éí nihił yáʼádaatʼéhígíí bikʼehgo.

86 Díí tʼááłáhídi, bee nihá ahóótʼiʼgo íishłaa; áádóó áko shooh, díí nihidááh nehánilígíí bikʼeh ádaʼołʼį́įgo, shibee hazʼáanii bikʼehgo, díí tʼáá átʼé daashí, dóó nihí éí shinaanish bee nihikʼi dahodiiniiʼígíí danohłʼį́, dóó akʼi bóhólníihii bighan doo tʼóó yinéłʼį́įgo doolchxǫǫł da. Tʼáá ákótʼée doo. Amen.