1 Díí naaltsoos dóó Naaltsoos Mormon Wolyéhígíí t’áá aaníí át’éego baa dahwiilne’go bee ndasiidzį́, Diyin Yá Yáłti’í Joseph Smith, dóó bínaaí Á Sodilzinii nilíinii Hyrum Smith bi’diisxį́įgo baa dahwiilne’. Carthage awáalyah biyi’ bił adeesdǫǫh, Yá’iishjááshchilí 27góó yoołkááłgo, 1844 yihahgo, ashdladi oolkiłgo, éí doo yá’áshǫ́ǫ́góó atída’ał’íinii be’aldǫǫh ndeijaah—łizhingo ádadeeshdléézhgo—t’ááłáhádi neeznádiin dóó ba’aan ashdladiin dóó naakidi neeznádiin ánéélą́ą́’go dabiisxį́. Hyrum áłtsé bił adeesdǫǫh áádóó hazhó’ógo, kóníigo naa’íígo’, kódííniid: Diné bi’diishxíinii sélį́į́’! Joseph éí tsétsǫ’ dóó ádahneeshjį́į́d, ákódzaago bił adeesdǫǫh, kóníigo: O Diyin Bóhólníihii shiDiyin God! T’áá áłah deiyisxį́h bikéé’dóó t’áá na’níle’dii yił nááda’deesdǫǫh, dóó t’áá áłah dį́į’di be’eldǫǫh bik’a’ bee bił adeesdǫǫh.

2 John Taylor dóó Willard Richards, éí Hastóí Naakitsʼáadah Bik’idahodiinii’ígíí atah nilį́įgo, t’áá áłah t’áá bí t’éiyá awáalyah góne’ sikéé ńt’ę́ę́’; hastiin áłtsé wóji’ígíí éí doo yits’ídígo dį́įdi be’eldǫǫh bik’a’ bee bił aní’deesdǫǫh, éí áhóót’įįd bikéé’dóó yá’át’ééh násdlį́į́’; hastiin akéédóó wóji’ígíí éí, Diyin God baa áhályánígíí biniinaa, yisdáábííłtį́, bi’éé’ ndi t’áa doo biníkáhoodzání silį́į́’ da.

3 Joseph Smith, Diyin Bóhólníihii Yá Yáłti’í dóó Yá Oo’íinii nilíinii, éí ts’ídá aláahgo í’iilaa, ákondi Jesus t’éiyá díí doo yiláahdi í’iilaa da, díí nahasdzáán bikáá’ nihokáá’ dine’é yisdáádookahgo yíká’eelwod, éí nááná ła’ diné nahasdzáán yikáá’ kééhat’íinii yilááh áát’įįd. T’áá hodíína’í naadiin nááhai, Naaltsoos Mormon Wolyéhígíí nihitahgóó kóyiilaa, éí Diyin God bibee aʼiilyéii dóó bibe’adziilii bee hadilyaa, áádóó kéyah naaki dah sinilígíí bikááʼ díí naaltsoos bee ályaa; éí naaltsoos biyi’, hool’áágóó diyingo naʼnitin bee yisdáʼiildéehii t’áá át’é bii’ silá, nahasdzáán bikááʼ t’áá dį́į́ʼgo ałts’ą́ą́’ adahwiisʼáágóó bich’į’ kódoolnííł; éí díí Diyingo Na’nitin dóó Bee Ahadaʼdeest’áanii naaltsoosígíí biyi’ diyingo ííshją́ą́’ ádaalyaaígíí dóó bee haz’áanii nihich’į’ kóyiilaa, áádóó lą’í naaltsoos ílį́įgo na’nitin bits’ą́ą́dóó nihokáá’ dine’é ba’áłchíní ídahooł’aah; Jesus Christ Dííjį́į́góó Yá Naazínígíí mííl ayóó ánéilt’e’go ahaniiní’eezh, áádóó kintah ayóó át’áo haidiilaa, áádóó dahnídiidzáa ndi bízhi’ ayóó béého’dílzingo dóó doo doolchxǫǫłgóó áyiilaa. Ts’ídá nizhónígo be’iiná áyiilaa, áádóó Diyin God bidááhdóó dóó bidine’é bá dahodísingo dahnídiidzá; áádóó Diyin Bóhólníihii ałk’idą́ą́’ diné yik’idiilnii’yę́ęgi át’áo, naanish t’áá aaníí baa deet’ánígíí dóó binaanish áyiilaaígíí éí t’áá bí bidił yee niná’nídlá; áádóó bínaaí Hyrum ałdó’ t’áá ákódzaa. Be’iina’ t’áá aheełt’éé ńt’ę́ę́’, áádóó anoonééł biyi’ ndi t’áa doo ałts’ásht’áázh da!

4 Joseph éí Carthagegóó níyá t’áá bí áníigo yah abidi’doolt’eeł biniyé háálá éí bee haz’áanii ákóní daaníigo biniinaa éí t’áá adzaago ádaaníigo, naaki éí doodago táá’ yiską́ągo bidi’doolyééł bich’į’ hoolzhishgo, kódííniid: “Naʼatseedjįʼ dibé yázhí wólyéii yidlósígi átʼéego shi’doodlóós; ákót’ée ndi shį́įgo abíní nahalingo shii’ hodéezyeel; Diyin God bichʼįʼ tʼáá ákwii áníshtʼéego íʼdííníszinígíí doo shiʼdiiłʼáágóó íínísin, índa t’áá ałtso nihokáá’ dine’é bich’į’ ałdó’. Bee hazʼáanii doo kʼínítiʼgóó yáʼáníshtʼéehgo shidi’niilyį́, áádóó díígii’ át’éego bee shaa náhát’į́įgo ádadidooniił—doo yaa dajooba’góó deiyiisxį́.”—T’áá éí abíní biyi’, Hyrum hasht’e’ádiilyaaígíí bikéé’dóó—da’ dabidi’yoolyéłígíí bich’į’ kóhodi’dooniił? aoo’, háálá ákót’áo ahoodzaa—díí saad dashijaa’ígíí yiyííłta’, éí t’áá áhání ałtso yídooltah bich’į’ hoolzhish Ether naakits’áadah wólta’iigi, Naaltsoos Mormon Wolyéhígíí biyi’, áádóó naaltsoos nástł’ahgi ahą́ą́h niilyáago áyiilaa:

5 Áádóó baa hoolzhiizh Diyin Bóhólníihii Gentile dine’é dajooba’go ádíílííł bidishníigo náoshkąąh, áko Diyin beʼayóó’óʼóní bee dahólǫ́ǫ doo. Áádóó baa hoolzhiizh Diyin Bóhólníihii koshidííniid: Diyingo ayóóʼóʼóní doo bee dahólǫ́ǫ́góó tʼáadoo niʼdiiłʼáhé, háálá iinídlą́ągo shikééʼ yíínááł; ákohgo niʼééʼ chin bąąh ádingo ádoolnííł. Áádóó biʼoh nílínígíí baa ákoninzį́’ígíí biniinaa, nidziilgo ánidiʼdoolnííł, azhą́ shiTaaʼ bił hazʼą́ądi ná hashtʼehooshłaayę́ędi díníídaał. Áádóó áko Shí … Gentile dine’é hágoóneeʼ bidishníi dooleeł; aoo’, áádóó shik’iské ayóó’ádeiníshníinii ałdó’, Christ bibee nahwiitʼaah-hooʼááł bidááhdóó náádaʼahiiltsą́ągo índa, áadi tʼáá ałtso nihokááʼ dineʼé bił béédahodoozįįł shiʼééʼ doo nihidił bąąh da. T’áá aaníinii yaa dahoolne’ę́ę anídahaaskai, áádóó t’áá aaníigo yaa dahoolne’ę́ę baa dit’ááh.

6 Hyrum Smith éí Atsá Biyáázh, 1844 yihahgo, dízdiin dóó bi’ąą dį́į́’ binááhai ńt’ę́ę́’, áádóó Joseph Smith éí Níłch’itsoh, 1843 yihah biyi’, tádiin dóó bi’ąą tséébíí binááhai ńt’ę́ę́’; áádóó kodóó hoolʼáágóó t’áá áłah be’oodlą’ biniinaa bidił deeznaʼ ha’níigo bízhi’ béého’dílzin doo; áádóó t’áá áłtso ał’ąą dine’é dah deiyíkaahii Naaltsoos Mormon Wolyéhígíí, dóó díí Diyingo Na’nitin dóó Bee Ahadaʼdeest’áanii naaltsoos deiyółta’ígíí yéédaalniih dooleeł, náhást’éíts’áadahdi neeznádiin nináháhááh biyi’ ts’ídá diné yá’át’éehii be’iina’ yee díí nahasdzáán dóó t’áá ałtso yikáá’ dahiináanii bąąhági yaa naakaiígíí yisdéídoo’ishgo díí yá neinínil; áádóó Diyin God bi’ayóó át’éii bá kǫ’ tsin ditłéé’ígíí atíyiilaago, áko shą’ tsin daazganígíí t’áá hodíína’í idiyoołk’ą́ą́ł éí dá’ák’eh yíchxǫ’ii haałt’é ánéídoodlíiłgo. T’áá áłah ayóó át’éii yíká hiináá ńt’ę́ę́’; áko ayóó át’éii bá náábi’diilyá; akó ayóó át’éii hool’áágóó bee bik’ihojidoodliił. T’áá nináháhááh hoolzhish bii’ diné hadaałt’éhígíí bízhi’ yódí ałtaas’éí íiyisíí da’ílíinii nahalingo bá dahodísin doo.

7 T’áadoo bee haz’áanii ła’ k’íínít’i’ da, jó t’áá ákót’áo bee nabidi’neestą́ą́’, ákondi bits’ą́ą́jí danilínígíí dóó diné doo yá’ádaashóonii azéé’ neis’áanii awáalyah gone’ yah adabíínil; áádóó t’áá áłah doo atí’jileii bidił Carthage awáalyah ni’gi’ bee yishdléézhgo bee bidá’deeshjéé’ éí “Mormonism” bee dabi’dóójíhígíí nahasdzáán bikáá’ éí aa dahwiinít’į́ biyi’ doo yits’ą́ąjį’ nídadooyis da, áádóó Illinois Bináhásdzo dah naat’áhí nahalingo t’áadoo atí’íléhígíí bidił bąąh siláa doo, éí Bináhásdzo binaat’áanii ba’oosdli’ę́ę t’áadoo ye’iilaa da, éí shinahat’á bee yisdá’iildéehii doo ninít’i’ii t’áá aanínígíí nahasdzáán t’áá ałtso yikáá’ dahiináanii doo saad t’óó át’éhígíí yídei’ááh da doo; áádóó t’áadoo atí’iileii bidił tʼáá bí bídahólnííhgóó tʼáá nííkʼeh naʼadá bi dah naatʼaʼí, áádóó Ashdladiin Ntsaago Hadahwiisdzoh bi magna charta bee haz’áaniik’ehgo ałdó’ bąąh bidił doo, háálá éí t’áá áłah Jesus Christ binahagha’ t’áá aanínígíí yá sizį́į́ ńt’ę́ę́’, éí t’áá ałtso dineʼé dah deíkááhgóó diné doo dabiyoochíídii bijéí yididoolchił; áádóó t’áadoo atí’iileii dóó t’áá ałtso atí’daalyáii bidił, éí John náá’iiniih biyaadóó t’áá át’é yiyiiłtsáą́, éí Diyin T’áá Ałtsoní bee Bóhólníihii yich’į’ hadadidoolwosh éí nahasdzáán bikáaʼgi kéédahatʼíinii bidił biniinaa yá yaańdóot’įįłgo atíidoolííł. Amen.