1 Diyin Bóhólníihii bizaad dóó yinízinígíí éí Israel Dah Yinééłii Eʼeʼaahjigo deeznánígíí bídéétʼiʼ:

2 Jesus Christ Bisodizin Bá Hooghan Díí jį́į́góó Yá Naazínígíí tʼáá átʼé, dóó bił deínéhígíí, ałʼąą dah deínééhgo ádadoolnííł, éí bee ałhaʼditʼaah dóó bee ádee haʼoodzííʼ bee tʼáá ałtso bee hazʼáanii dóó Diyin Bóhólníihii nihiDiyin God haidiilaii yikʼeh dahółʼį́į doo.

3 Dah deínééh ályaaígíí dóó neeznádiin binaatʼáanii holǫ́ǫgo, ashdladiin binaatʼáanii, dóó neeznáá binaatʼáanii dahólǫ́ǫgo, áádóó bilą́ąjįʼ sizíinii dóó naakigo bíká anáʼahinilchéhígíí tsʼídá bilą́ąjįʼ dah naháaztʼą́ągo, éí Hastóí Naakitsʼáadah Bikʼihodiiniiʼígíí biyaadóó nihikʼi dahwéeʼaah doo bididííniił.

4 Áádóó díí éí niheʼahaʼdeetʼą́ átʼée dooleeł—áko Diyin Bóhólníihii bibee ádaʼoolʼįįł tʼáá átʼé bikʼeh dahoniilʼį́įgo bee yiikah doo.

5 Tʼáá ałtso dah yinéłígíí łį́į́ʼ ndaʼałbąąsígíí, tsinaabąąs, chʼaa naʼadáago choidooʼįįłígíí, dóó ééʼ, dóó chʼaa oodáałgo nidzinígíí, tʼáá yídeíghahígíí deínóhjááh doo bididííniił.

6 Dah daʼdiinéhígíí hashtʼeʼ ádaʼdiilyaago bidziilgo dah dadidoonééł, tʼáá ákǫǫʼígíí yá hashtʼe dahodoolííł.

7 Dah deínéhígíí, binaatʼáanii dóó bilą́ąjįʼ naazíinii yił, daango díkwíigo da dah didookahígíí yee ahił nidahodooʼááł; áádóó haanéelą́ą́ʼ yideíghahígíí dóó hastʼóí daʼiichįįhígíí, łį́į́ʼ ndaʼałbąąsígíí chodeidoołʼįįł, naniseʼ bikʼǫ́ǫ́ʼ, dóó kʼidilyé chooʼínígíí, áádóó alą́ąjįʼ deíkáahii danohłį́įgo daango kʼidadidoolyéłígíí kʼidadidoohłééł bididííniił.

8 Diné dah deínéhígíí tʼáá aheenéelą́ągo, bikéyah bitsʼą́ą́dóó diné yichʼįʼ ndeiyiiléhígíí bikʼehgo, baa dahojoobáʼí, dóó sáanii bąąh ádahasdįįdígíí, dóó áłchíní bizhéʼé ádaadinígíí, dóó ndaabaahgóó adahaaskai baʼáłchíní baa ádahaalyą́ą doo bididííniił, áko sáanii bąąh ádaʼasdįįdígíí dóó áłchíní bizhéʼé ádaadinígíí daachago doo Diyin Bóhólníihii doo yididootsʼį́į́ł da doo díí diné bikʼijįʼ siʼą́ą da doo.

9 Díí diné dahdeínéhígíí kin, dóó dáʼákʼeh bikááʼ naadą́ą́ʼ ádaatʼéii kʼididoolyéełgo bá hashtʼeʼ ádadoołnééh bididííniił, éí kʼad yihahígíí biyiʼ tʼáá ákǫ́ǫ́ʼ dooleełígíí bá doo; áádóó díí éí Diyin Bóhólníihii bidineʼé yá yinízin.

10 Diné tʼáá ałtso yee átʼéhígíí dóó bikéyah yee díí diné Diyin Bóhólníihii Zion bił hahoodzoh ádoolníiłjįʼ nidahohʼéésh bididííniił.

11 Áádóó nihijéí haałtʼéego díí ádaahłéehgo, yéego akééʼ nisoozį́įgo, nihikʼihojidlíi doo; nihidibé, dóó nihibéégashii, dóó nihidáʼákʼeh nahazʼą́ą́góó, dóó danihighan, dóó nihaʼáłchíní ałdóʼ bikʼhojidlíi doo.

12 Shá naalʼaʼí Ezra T. Benson dóó Erastus Snow dahʼoonééł hashtʼedoohlííł bididííniił.

13 Shá naalʼaʼí Orson Pratt dóó Wilford Woodruff dahʼoonééł hashtʼedoohłííł bididííniił.

14 Áádóó áłdóʼ, shá naalʼaʼí Amasa Lyman dóó George A. Smith dahʼoonééł hashtʼedoohłííł bididííniił.

15 Áádóó alą́ąjįʼ naazíinii, dóó neeznádiin, dóó ashdladiin, dóó neeznáá yiltʼéego bindaabaahii binanitʼaʼí yikʼi dadidoolnih.

16 Áádóó shá ndaalʼaʼí bikʼIi dahodiiniiʼígíí ákǫ́ǫ́ dookah dóó ndeidínóotįįł, shí nisinígíí, akééʼ naazínígíí bichʼįʼ, áko kéyah hodéezyéélgóó dookah éí bichʼįʼ hashtʼeʼ ádadoołnééh bididííniił.

17 Yíwohjįʼ dóó bee nihił hweeshneʼígíí ádaołééh, áádóó niheʼanaʼí tʼáadoo béédaałdzidí; háálá shinaanish niʼ kódeidoolíiłgo doo yichʼįʼ dabidziilgóó ádeeshłííł.

18 Zion bá nináʼdoolyééł shá bóhónéedzą́ą́ góneʼ.

19 Áádóó łaʼ diné díí yee ádééhólzingo, dóó shinaʼnitin doo yiyíístsʼą́ʼígíí, éí adziilii doo bee hólǫ́ǫ da doo, dóó niʼiisíhígíí ííshją́ą́ ádadoolnííł.

20 Diyin Bóhólníihii biká ádaahtʼį́; dóó bee áłchʼįʼ ádee hadahisoodzíʼígíí bikʼeh dahonołʼį́; áádóó nihikʼisoo daabíhígíí tʼáadoo bídin danohłíní.

21 Doo yáʼádaashóonii tʼáadoo ádaałʼíní Diyin Bóhólníihii bízhiʼ tʼáadoo bee ndaʼohdziihí, háálá shí éí Bóhólníihii nihiDiyin God nishłį́, danihizhéʼéyę́ę biDiyin God nishłį́, Abraham biDiyin God dóó Isaac dóó Jacob ałdóʼ.

22 Shí éí Israel baʼáłchíní kéyah Egyptdę́ę́ʼ chʼíníʼeezh; áádóó Israel shidineʼé yisdáʼdeeshʼishgo akéedi dayoołkáałdi, shigaan bichʼįʼ ąą átʼée doo.

23 Tʼáadoo saad bee daʼahoohgání; tʼáadoo háiida tʼóó baaʼihgo baa yádaałtiʼí.

24 Tʼáadoo daʼohdlání; áádóó nihizaadígíí nááná łaʼ bee bidziilgo ádaałeʼ.

25 Nihikʼéí tʼáadoo leʼé nihaʼníʼą́ągo, éí nihaʼátʼánígíí baa nídadoohʼááł; áádóó nihinaagóó bighanígíí doo bichʼįʼ nináʼnóhdléégóó tʼáá kʼéházdon baa doohááł dóó bichʼįʼ hadohdzih, éí doo ákóoh dzaagóó éí nihá nahodootʼááł.

26 Nihinaagóó bighanígíí yooʼayííʼánígíí nídooʼą́ągo, yéego bá hadadínóohʼį́įgo hadanohtą́ąʼjįʼ baa nídadoohʼááł.

27 Áádóó nihee hólónígíí yéego baa ádahoołʼyą́, áko honíyą́ągo akʼi bóhólníihii nílį́į doo; háálá Bóhólníihii niDiyin God tʼáá jííkʼeh neinílá, áádóó ni éiyá bá akʼi bóhólníihii sínílį́į́ʼ.

28 Nił hózhǫ́ǫgo, Diyin Bóhólníihii baa hániihgo bichʼįʼ hótaał, sin bee, azhish bee, dóó aa haʼniih dóó ahééh hwiindzin bee sodílzin.

29 Yínííł nínízingo, Bóhólníihii niDiyin God bichʼįʼ náʼiiníkąąh, áko nihiiʼ naazíinii bił dahózhǫ́ǫ doo.

30 Niheʼanaʼí tʼáadoo béédaałdzidí, háálá shílaʼ bee bikʼi díníshʼį́į́ʼ dóó tʼáá shí íínísinígíí bichʼįʼ kódeeshłííł.

31 Shidineʼé éí tʼáá ałtsoní bee ndoolkah, áko shiʼayóó átʼéii bá hashtʼeeshłaaígíí yichʼįʼ hashtʼeʼ ádadiʼdoolnííł, Zion biʼayóó átʼéii ndi; áádóó háiida doo bichʼah hoʼdishkéhígíí éí shił hazʼą́ądi doo yíneilʼą́ą da.

32 Doo bił ééhózinígíí ééhózinii yíhwiidoołʼááł éí Bóhólníihii biDiyin God joobaʼ íinízingo yichʼįʼ sodidoolzįįł bididííniił, áko binááʼ ąą ádoonííł dóó yee ooʼį́į dooleeł, áádóó bijaaʼ ąą íidoolííł áko idiitsʼaʼ dooleeł;

33 Háálá shiiʼ Sizíinii adahwiisʼáágóó beʼníłniiʼ éí aʼoh dóó yínííł danilíinii bił éédahodidoozįįł, dóó doo Diyinkʼehgo ádaʼałʼínígíí bá ndahodootʼááł.

34 Nihikʼéí éí nihí dóó tʼáá aaníinii bee hádasoodzíʼę́ę doo deiniizį́į́ʼ da, azhą́ kéédahonohtʼínídę́ę́ʼ chʼídanihineeskaad;

35 Áádóó áko nitsohodinídéél yiih yikaigo, azhą́ yínííl bijį́įjįʼ adeiyiiskáá ndi, asdzání ntseedzá nahalingo; áádóó yínííł yiih yikaiígíí ayóó átʼée doo tʼáá hazhóʼó tsxį́įłgo ádaa ńdaʼooskango tʼéiyá, aooʼ, tsxį́įlgo tʼáá hooschʼįʼ.

36 Háálá Diyin yá yádaałtiʼí nideistseed, áádóó bichʼįʼ adahaasʼaʼą́ą ałdóʼ; éí doo ndaʼałtseedyę́ę bidił ndeisas, éí niʼdę́ę́ʼ bikʼijįʼ daacha.

37 Éí bąą, díí tʼáadoo nihiyaa ndahałhxizí, háálá tʼahdoo hadanółtʼé daołeeh da; háálá shiʼayóó átʼéii tʼah doo bídanóółdzííł da; ákondi deidoołtsʼééł shizaad nihaa níláhígíí tʼáá átʼé yéego bikʼeh dahonołʼį́įgo, Adam dóó Abrahamjįʼ ayiiską́ągo, áádóó Abraham dóó Mosesjįʼ, áádóó Moses dóó Jesus dóó beʼhastóí naakitsʼáadah ayiiską́ąjįʼ, áádóó Jesus dóó beʼhastʼóí naakitsʼáadah dóó ńléí Joseph Smithjįʼ, éí shá ndaalʼaʼígíí binahjįʼ bikʼi dadiishniiʼ, éí shá ndaalʼaʼí shíkáʼanídaajahígíí danilį́, dóó tʼáá shí shizaad yáʼąąshdę́ę́ʼ bee haasdzííʼ, éí shinaanish yaa dahalneʼ doo;

38 Éí bee hadaʼiistłʼinígíí hashtʼeeyiilaa, dóó yéego akééʼ sizį́į́ʼ ńtʼę́ę́ʼ; áádóó éí shił hólǫ́ǫ dooleełgo náádiiłtį́.

39 Ląʼída náádadiilyáhígíí yikʼee dadeesyiz; ákondi bidił yee tʼáá aaníinii ahídiiljéʼígíí nidzin, áko baa hodooʼnih áádóó doo yáʼádaatʼéhígíí éí bá ndahodiyootʼááł.

40 Daʼ niheʼanaʼí bitsʼą́ą́dóóísh yisdánihííʼeezh, daʼ shízhiʼ bee ootʼíinii áshłaago tʼéiyá niníláa?

41 Áko kʼad, éí bąą, daʼíísínółtsʼą́ą́ʼ, O shisodizinjí daʼnohtahígíí; dóó elders danohłínígíí daʼíísínółtsʼą́ą́ʼ; nihí éí shił hazʼą́ądiʼígíí deisoołbą́.

42 Tʼáá ałtso shibee hazʼáanii ádaatʼéhígíí yéego bikʼeh dahonołʼį́, doo ákódaahdzaagóó éí nihá nidahodiyootʼááł, dóó deinohdlánígíí niʼ kódadoonííł, áádóó niheʼanaʼí nihikʼeh dadidoodleeł. Kʼad éí tʼáá ákódí dooleeł. Amen dóó Amen.