Wóltaʼii 117
Diyin Yá Yáłtiʼí Joseph Smith díí diyingo bił ííshją́ą́ ályaa, Far West, Missouridi, Yaʼiishjáástsoh 8, 1838 yihahgo, éí William Marks, dóó Newel K. Whitney, dóó Oliver Granger naanish tʼah kodą́ą́ʼ ádeidoolíłígíí bá.
1–9, Diyin Bóhólníihii bá ndaalʼaʼí éí tʼóó kónígháníjįʼ ádaatʼéii tsʼídá tʼáadoo yidádanilníi da doo, háálá “Diyin Bóhólníihii shąʼ haitʼáo naadeełii yaa ntsékees?”; 10–16, Éí doo Diyinkʼehgo ntsídaakeesígíí yóóʼadeideezʼą́ągo, áádóó náádaʼiisniigo Diyin Bóhólníihii yidósin doo.
1 Diyin Bóhólníihii tʼáá aaníí shá naalʼaʼí William Marks kwííłní, áádóó ałdóʼ shá naalʼaʼí Newel K. Whitney, tʼáá tsxį́łígo binaanish hashtʼeidoolííł áádóó Kirtland kéyahdóó dahdidooʼash bididííniił, éí Shí, Diyin Bóhólníihii, tʼahdoo nahasdzáán bikááʼgóó yas kónááníshdlééhdą́ą́ʼ.
2 Chʼéédadoodził, dóó deidoosįįł, áádóó nihidookah bididííniił, dóó tʼáadoo ndaʼáhodilziidí doo, háálá Shí, Diyin Bóhólníihii, díí bee nihoníʼą́.
3 Éí bąą, tʼóó ndaʼáhodilziidgo éí doo bá yáʼátʼéeh da doo.
4 Nihibąąhági ádaatʼéii, dóó tʼáá ałtso bídeʼdanohłínígíí, shidááhdóó bee ádaa ńdaʼiidookąął bididííniił, ní Diyin Bóhólníihii; háálá haitʼáo shąʼ naadeełii baa nitséskees? ní Diyin Bóhólníihii.
5 Kirtlanddi kéyah nihaa nidahidoonih áko éí bee nihąąh hadaazʼáhígíí bee ninádaʼdoohdlééł, ní Diyin Bóhólníihii. Dabidoohchííd, ní Diyin Bóhólníihii, áádóó tʼáá chʼéédaasdzíʼígíí, tʼáá deiyínóhtąʼ doo, ní Diyin Bóhólníihii.
6 Háálá yáʼąąshdiísh tsídii, áádóó tónteel biyiʼísh łǫ́ǫ́ʼígíí ałdóʼ, áádóó dził biyiʼdiísh naaldlooshii daʼałchinígíí doo shee hólǫ́ da? Nahasdzáánísh doo shí íishłaa da? Daʼ nahasdzáán bikááʼgóó siláółtsoí dah deínéhígíí haadadooníłígíísh doo bee shóhólníih da?
7 Éí bąą, dooísh dahodíłchʼilgi álástsiiʼ dóó chʼil ndaninseʼgo ádeeshłííł da, áádóó łą́ągo hadínóotʼį́į́ł? ni Diyin Bóhólníihii.
8 Daʼ Adam-ondi-Ahman dził daníʼáhígíí bikáaʼgiísh doo nidahazʼą́ą da, áádóó Olaha Shinehah dadzígaiísh ałdóʼ, éí doodago Adam kéyah yikááʼ kééhatʼínéegi, áko tʼįhdígo ndahidilchʼáłígíí ndi bídenílį́į doo, áádóó tsʼídá daʼílíiniiyę́ę daatsʼí baa dáádidíínááł?
9 Éí bąą, hóshdę́ę́ʼ shidineʼé bikéyahjįʼ nínááh, Zionjįʼ ndi.
10 Shá naalʼaʼí William Marks tʼáá áłchʼį́dí ndi yéego bídínílkaal doo bididííniił, áádóó ląʼígo éí yikʼihooʼááł doo. Ńléí Far West kin dah shijaaʼdi shidineʼé bitahdi bikʼi díníʼį́į́ʼ dooleeł bididííniił, áádóó shidineʼé bee bikʼihojídlíhígíí bí áłdó bee bikʼihojídlíi doo bididííniił.
11 Shá naalʼaʼí Newel K. Whitney Nicolaitane dah yikahígíí áádóó bibąąhági ádaatʼéii ndeiniłʼinígíí, dóó tʼáá ałtso doo Diyinkʼehgo shikééʼ deíkáhígíí biniinaa yaa yánízin doo bididííniił, ní Diyin Bóhólníihii, áádóó Adam-ondi-Ahman kéyah góde díínááł, áádóó shidineʼé bibishop dííleeł, ní Diyin Bóhólníihii, ázhiʼ bee nikʼihodiiniiʼígíí doo tʼáá éí tʼéiyá baʼííti da doo ákondi íiyisíí dineʼé bíkáʼanánílwoʼígíí éí biniyé doo, ní Diyin Bóhólníihii.
12 Áádóó ałdóʼ, Shí ándishní, shá naalʼaʼí Oliver Granger bénááshniiʼ; áko shooh, tʼáá aaníigo Shí ábidishní nízhiʼ dilzingo ałkééʼ daʼíchííhgo, hoolʼáágóó ahóyéelʼáágóó bééhániih doo, ní Diyin Bóhólníihii.
13 Éí bąą, Shisodizin Tsʼídá Alą́ąjįʼ Bídahólníhígíí bá yéego ántʼį́įgo bąąh hadaazʼáhígíí bá nináʼdoodlééł bididííniił, ní Diyin Bóhólníihii; áádóó niʼiisíhígíí yiyiʼdóó hanádááh doo, háálá yee nááʼííłniihígíí éí béeso ííłʼínígíí biláahgo díínísin doo, ní Diyin Bóhólníihii.
14 Éí bąą, tsxį́įłgo, Zion bikéyah góde doolwoł; áádóó áajįʼ baa hodoolzhish shízhiʼ binahjįʼ naalyéhí neichʼidí nilį́į dooleeł, ní Diyin Bóhólníihii, háálá éí shidineʼé bá yáʼátʼééh doo.
15 Éí bąą shá naalʼaʼí Oliver Granger háiida doo tʼóó tsxį́įłgo yikʼi chʼídoogáał da, ákondi shidineʼé bikʼi dajisdliʼígíí bił hólǫ́ǫgo hoolʼáágóó bił áhoyoolʼáa doo.
16 Áádóó ałdóʼ, tʼáá aaníigo Shí nihichʼįʼ haasdziih, tʼáá átʼé shá ndaalʼaʼí Kirtland kéyahgi Bóhólníihii biDiyin God tʼáá béédaalniih bididííniił, áádóó shighanígíí ałdóʼ, éí yaa ádahalyą́ą doo dóó yá dahodísin doo, áádóó tʼáá shí niizį́ʼígi baa hoolzhiizhgo béeso ałghááʼ daʼiiʼníłígíí chʼíhidínóolkał, ní Diyin Bóhólníihii. Tʼáá ákótʼée doo. Amen.