1 Tʼáá aaníigo Shí nihichʼįʼ haasdziih, nihikʼisoo atílyaa, dóó nidaneeskaad, dóó kéyah baadahideestʼánée bitsʼą́ą́dóó chʼídabidiʼneeskaad—

2 Shí, Diyin Bóhólníihii, atíʼálʼį́ bichʼįʼ kólyaayę́ę bee lą́ aséłį́į́ʼ, éí ndaʼayisíʼígíí biniinaa, atídabiʼdiilyaa;

3 Ákótʼée ndi shidineʼé ádadeishłííł, dóó áajįʼ ayííłką́ągo shiyódí íiyisí ílíinii hashtʼeeshłéehgo shííʼ dadooleeł.

4 Éí bąą, bichʼahodiʼdooshkeeł dóó ndabidíʼnóotah, Abraham ábiʼdiilyaayę́ęgi átʼáo, éí biyeʼ tʼááłáʼíʼígíí nááhidííłnih biʼdooʼniid.

5 Háálá tʼáá ałtso achʼahoʼdishké doo yídaneelʼánígíí, dóó doo dashinízinígíí, éí doo haałtʼéego ádabidiʼdoolnííł da.

6 Áko shooh, Shí nihichʼįʼ haasdziih, ałchʼįʼ áháchįʼ, dóó saad dahółǫ́, dóó oolchʼį́į́d, dóó ahinááʼdiijah, dóó ałjiłnii dóó naadeełii yíchádadínéelninígíí; díí tʼáá ałtso biniinaa baa dahideestʼánée deiyííłʼchxǫʼ.

7 Bóhólníihii sodizin daʼatahígíí biDiyin God bízhí doo tsxį́įłgo yikʼeh dahółʼį́į da; éí bąą, bichʼįʼ ndahwiiʼnáago, Bóhólníihii biDiyin God bisodizin doo tsxį́įłgo yididootsʼį́į́ł da.

8 Áhodéezyéél bee dahólǫ́ǫgo shinaʼnitin doo bił danilį́į da; ákondi, bichʼįʼ ndahwiiʼnáago índa, chʼééh hadashinitáa łeh.

9 Tʼáá aaníigo Shí nihichʼįʼ haasdziih, azhą́ bąąhági átʼéii bee dahólǫ́ǫ ndi, shiyiʼdóó ajoobaʼ bichʼįʼ kwíínísin doo. Doo éí tʼóó bitsʼą́ąjigo nídeesxis da; áádóó sháháchįʼ cdnl bichʼįʼ kóshłéehgo ajoobaʼ bee béédeeshnih.

10 Shí bee ádee haasdzííʼ, éí áłtséédą́ą́ʼ shibee hazʼáanii bee haasdzíʼę́ę haneʼ ílíinii nihił chʼííníʼą́, dóó sháháchįʼ béésh hał náákę́ę́z nahalingo bikʼijįʼ nidookǫs éí shidineʼé bá ákódeeshłííł; áádóó bee haasdzíʼę́ęgi átʼáo, tʼáá aaníí bohodoolnííł.

11 Tʼáá ałtso nihokááʼ dineʼé dahdeíkáhígíí shiʼáháchįʼ doo nineelʼą́ą́góó bikʼi yeidookááł; áádóó bibąąhági ádaatʼéii bibąąhaʼíízhahí biiʼ haʼdéébįįdgo díí bichʼįʼ kódeeshłííł.

12 Áádóó áajįʼ ayííłką́ągo bikááʼdóó-haʼalzídí yíkááʼdóó hadaʼasíidgo yiltsʼą́ągo, éí doodago kótʼáo ááłdíshní, shi Israel tʼáá ałtso, yisdádookah.

13 Áádóó tʼáá ałtso daʼníłtsʼą́ąjigo ahineeskaadyę́ę ahanináhidootʼish.

14 Áádóó tʼáá ałtso yínííł danilínée éí hadaʼólníigo ádadoolnííł.

15 Áádóó tʼáá ałtso beʼiina shízhiʼ binahjįʼ ninádeesdláhígíí éí naatʼá chʼah bąąh ndahidooʼnił.

16 Éí bąą, nihijéí bee Zion bá chánah danohłį́į doo; áádóó tʼáá ałtsoní bitsʼíís dahólóonii daashígo baa áháshyą́; ádahodołzééh dóó Diyin God nishłínígíí nihił béédahodoozįįł.

17 Zion doo nahjįʼ kódoolnííłgóó siʼą́ą dooleeł, azhą́ baʼáłchíní daʼníłtsʼą́ąjigo ahineeskaad ndi.

18 Chʼéékaiígíí, dóó bijéí biyiʼ báʼátʼeʼ ádaadinígíí, nídookah, dóó baa dahideestʼánígíí baa dahidoolyééł, bí dóó badaʼáłchíní, hoolʼáágóó ił hózhóonii biyiin bee, Ziondi dahóóchxǫʼę́ęgóó hashtʼéédeidoodlííł—

19 Áádóó díí tʼáá ałtso ákóhodoonííł áko Diyin yá yádaałtiʼí yee hadahaasdzíʼę́ę bidahodoolnííł.

20 Áádóó, áko shooh, shí bikʼi diishniiʼígíí éí doo nááná łahgi hazʼą́ągi bikʼihodiiniiʼígi átʼée da; áádóó shí bikʼi diishniiʼígíí éí doo nááná łahgi hazʼą́ągi átʼáo bikʼihodidoonih da, háálá éí naanishígíí éí shikééʼ naazíinii ahíhidootʼish—

21 Ahídaʼiitʼéésh ląʼí silį́į́ʼ baa hoolzhiizhgo; éí nááná łahgi ahínéikahgo bá shóíséłtʼeʼ, áádóó stakes éí daolyée doo, háálá Zion bináheezbaal doo éí doodago bee bidziil dooleeł.

22 Áko shooh, shí íínísingo éí, tʼáá ałtsó shízhiʼ yinahjįʼ sodadilzinígíí, dóó shinahatʼá bee yisdáʼiildéehii doo ninítʼiʼii yee shichʼįʼ ndahałáa doo, éí ahíídookah, dóó dahodílzin hazʼą́ągi naazį́į doo;

23 Áádóó diyingo bił ííshją́ą́ ádadoolníłígíí yíká hashtʼeʼádadólzin doo, éí shighan ntsaa dáádiníbaal bikʼistiʼígíí, shiwótʼááh biyiʼ, éí nahasdzáán neiniłʼin, éí nahjįʼ kódoolnííł, áádóó tʼáá ałtso bitsʼíís dahólónígíí tʼáá łahjįʼ dahshidoołtsééł.

24 Áádóó tʼáá ałtso dadoolchxǫǫłii, tʼáá áłah nihokááʼ dineʼé, éí doodago naaldlooshii daʼałchinii hodíłchʼildi nidaakaiígíí, éí doodago wótʼááhdi ndaatʼaʼígíí, éí doodago łóóʼ tónteel yiiʼ naaldeehii, áko tʼáá ałtso nahasdzáán yikááʼ kéédahatʼíinii, ałtso ádooldįįł;

25 Áádóó ałdóʼ kǫʼ bitsʼáhonigahii tʼáá ałtso ádaalyaii yididoołhxįh; áádóó tʼáá ałtsoní ániidgo ándadoolnííł, áko shił bééhózinii dóó shiʼayóó átʼéii tʼáá ałtso nahasdzáán bikááʼgóó hináa dooleeł.

26 Áádóó áajįʼ ayííłką́ąʼgo nihokááʼ dineʼé daʼahoolchʼį́dígíí, áádóó naaldlooshii daʼałchinii daʼahoolchʼį́dígíí, aooʼ, tʼáá ałtsoní bitsʼíís dahólóonii daʼahoolchʼį́dígíí, shidááhdóó nidadooyisgo shitsʼą́ąjįʼ dahdidookah.

27 Áádóó áajįʼ ayííłką́ągo tʼáá haʼátʼííshį́į́ nihokááʼ dineʼé yaa sodilzinígíí, éí baa doolyééł.

28 Áádóó áajįʼ ayííłką́ąʼgo Chʼį́įdii diné bąąhági átʼéii yichʼįʼ yíʼoołkąąhgo doo bídadééłníi da doo.

29 Áádóó aniné ádinígíí biniinaa yínííł doo hólǫ́ǫ da doo.

30 Áádóó áajįʼ ayííłką́ągo awééchíʼí éí doo bizééʼ hodooleeł da háálá są́ yiih yíyáago índa; áádóó éí tsin sikaad hiná ínízáádgóó béédoohah;

31 Áádóó dah nídiidzáago doo łeeh bidiʼdooltééł da, ááhyiłnínígíí éí nahasdzáán doo biyiʼ nahjįʼ kóbidiʼdoolnííł da, ákondi jineeskʼołígi átʼéego tsxį́įłgo łahgo ábidiʼdoolnííł, dóó wótʼááhgóó doogááł, áádóó hanályį́įhgi ayóó áhonóolningo bił hwiidooʼaał.

32 Aooʼ, tʼáá aaníigo Shí nihichʼįʼ haasdziih, Diyin Bóhólníihii nídoodáałjįʼ ayííłką́ągo, tʼáá ałtsoni nihił ííshją́ą́ íidoolííł—

33 Bił adahóóyáhígíí, dóó nihokááʼ dineʼé doo bił béédahózingo nidanilʼinée, nahasdzáán bikááʼ naazléí, éí bee hadilyaaígíí, áádóó biniyé ályaaígíí dóó niilyáhígíí ałdóʼ—

34 Tsʼídá daʼílíinii, wótʼááh biyiʼdi dahólóonii, dóó biyaa naazléi, dóó nahasdzáán biyiʼ dahólóonii, dóó nahasdzáán bikááʼ dahólóonii, áádóó yáʼąąshdi ałdóʼ.

35 Áádóó tʼáá áłtso shízhiʼ binahjįʼ yéego atʼídabiʼdilʼínígíí, dóó tʼah hadaʼólnínígíí, shiniyé beʼiinaʼ niʼ nideidooléełgo bikʼi dahodiiniiʼ ákó índa díí tʼáá átʼé ayóó anóolninii daabí dooleeł.

36 Ákohgo, aniné tʼáadoo binídaałdzidí; háálá díí nahasdzáán bikááʼ éí ił hózhǫ́ doo tʼáá átʼé hólǫ́ǫ da, ákondi shí shinahjįʼ éí ił hózhóonii tʼáá átʼé nihee hodooleeł.

37 Éí bąą, tʼáadoo nihitsʼíís tʼéiya íiyisíí baa ntsédaahkeesí, éí doodago haanízáádgóó atsʼíís hináa dooleełígíí; ákondi nihiyiʼ sizíinii tʼáá íiyisíí baa ádahoołyą́, áádóó nihiiʼ naazíinii yee hinánígíí ałdóʼ.

38 Áádóó Diyin Bóhólníihii tʼáá áłahjįʼ hádíníʼį́į́ʼ, hadaʼíínółnínígíí binahjįʼ hoolʼáágóó nihiyiʼ sizíinii tʼáá hináa doo, kótʼáo hoolʼáágóó iiná danihí doo.

39 Nihokááʼ dineʼé shinahatʼá bee yisdáʼiildéehii doo ninítʼiʼii yee ndaʼnitin doogo bee bikʼI dahodiiniiʼígíí, dóó hoolʼáágóó diyingo bee ahadaʼdeestʼánii yee ahaʼdeestʼą́ągo, éí nahasdzáán beʼáshįįh danilį́įgo béédahoʼdílzin doo nihokááʼ dineʼé yáʼátʼéehgo yá naazį́į doo;

40 Éí nihokááʼ dineʼé yáʼátʼéehgo yá naazį́į doogo bee bikʼi dahodiiniiʼ; éí bąą, nahasdzáán beʼashįįh doo halniih silį́į́ʼgóó, áko shooh, doo bá yáʼátʼééh da doo tʼóó nahjįʼ kódoolnííł dóó nihokááʼ dineʼé bikeeʼ yee tʼóó yikʼindoojah.

41 Áko shooh, kǫ́ǫ́ éí Zion baʼáłchíní bee hódzáanii bídéítiʼii, ląʼída, ákondi doo tʼáá átʼé átʼée da; ndaʼiisíihii danilį́įgo hadabiʼdoolʼį́į́ʼ, éí bąą bichʼadahodiʼdooshkeeł—

42 Háálá ayóó ájítʼé ízhdólzinígíí éí aʼohgo ájítʼéego áhodiʼdoolnííł, ndi tʼáá háíida aʼohgo ádaa nitsídzíkeesígíí éí ayóó ájítʼéego áhodiʼdoolnííł.

43 Áádóó áko, haneʼ binahjįʼ akʼeʼdiitįįhii bee nihił hodeeshnih, áko Zion bá nináʼályáhígíí baa nihił béédahodoozįįł.

44 Łaʼ hastiin bééhoʼdílzinii bikéyahgi hazʼą́ągo hólǫ́, ayóó nidzin léiʼ; áádóó bá ndaalʼaʼí ííłní: Nílááh shidáʼákʼeh góyaaʼí doohkááh, díí kéyah ayóó nidzinígíí bichʼįʼ, áádóó tsin sikaad olive naakitsʼáadahgo kʼidadidoohłééł;

45 Áádóó hadaʼasíidii binaagóó naazį́įgo ádoolnííł, dóó bighą́ą́ʼdóó ádéestʼį́į́ʼgo ádeidoolííł, áko kéyah binaagóó bikʼi ádéistʼį́į́ʼ doo biniyé, éí haʼasíidii yaʼdiitłʼin yikááʼdóó akʼi déezʼį́į́ʼ doo, áko shitsin naazkaad olive doo kʼídahidookał da anaaʼí shidáʼákʼehdi daʼneestʼą́ągo doo tʼáá bí ádá adeidíyoojih da.

46 Áko, hastiin bééhoʼdílziní bá ndaalʼaʼí bibóhólníihii ádadoohłííł bidííniidyę́ę ádeiyiilaa, dóó tsin sikaad olive kʼideidíílá, dóó chʼil yee yinídaʼastiʼ, dóó haʼasíidii łaʼ ákweʼé nideistį́, áádóó bighą́ą́ʼdóó ádéestʼį́į́ʼ ádeiléehgo hadaʼaztłʼin.

47 Áádóó tʼahdii hadaʼatłʼingo, kótʼáo hadahaasdzííʼ: Díí bighą́ą́ʼdóó ádéestʼį́į́ʼ haʼátʼíí biniyé nihibóhólníihii nidootʼááł ní?

48 Áádóó nízáádgóó ahił yádááłtiʼ, kódaʼahidiʼníigo: Nihibóhólníihii díí bighą́ą́ʼdóó ádéestʼį́į́ʼ haʼátíí biniyé yinízin, kʼad yee hodéezyéelgo hoolzhish?

49 Díí béeso daatsʼí tʼóó béeso ndeichʼidígíí baa dooʼnił ńtʼę́ę́ʼ? Háálá díí haitʼáo choidooʼįįłígíí éí ádin.

50 Áádóó bizaad yee ałkʼijįʼ danilínígíí biniinaa tʼóó bił dahóyééʼ daazlį́į́ʼ, áádóó bóhólníihii ábidííniidyę́ę tʼáadoo yikʼeh dahóółʼįįd da.

51 Áádóó anaaʼí tłʼéeʼgo yíkai, dóó chʼil náztiʼyę́ę hadeiyiistłʼííd; áádóó hastiin bééhoʼdílzinii bá ndaalʼaʼí nídiijééʼ dóó nídaasdzííd, áádóó dahdiijééʼ; áádóó yindaashnishyę́ę anaaʼí ałtso bitsʼą́ą́ʼ deiyííłchxǫʼ, dóó tsin naazkaad oliveyę́ę ałtso kʼídeiyiisneʼ.

52 Kʼad, shooh, áádóó hastiin bééhoʼdílzinii, dáʼákʼeh bee bóhólníihii, bá ndaalʼaʼí hágo yidííniid, áádóó kwíidííniid, Háʼátʼíísh biniyé! háʼátʼíí éí biniinaa díí tsʼídá doo yáʼáshǫ́ǫ́góó áhóótʼįįd?

53 Shí bee nihichʼįʼ haasdzíʼę́ęísh bedaʼdoołííł ńtʼę́ę́ʼ, áádóó—dáʼákʼehgi ałtso kʼidaʼdooláago, dóó dáʼákʼeh chʼil bee binídaʼsoołtiʼgo, áádóó ákweʼé bináʼástłʼingi haʼasíidii łaʼ haʼasíídgo ádaałaago—áádóó ákweʼé ałdóʼ bikááʼdóó haʼalzídí ádaałaago, áádóó bikááʼdóó haʼalzídí éí haʼasídí łaʼ ákweʼé ndasoołtį́įgo, áko shidáʼákʼeh yikʼI déezʼį́į́ʼ doogo, dóó doo iidoołhwoshgóó, ákótʼáo anaaʼí doo nihikʼiidoojah da?

54 Áádóó áko shooh, bikááʼdóó haʼalzídí éí haʼásíidii yikááʼdóó beʼanaʼí tʼah nízaadę́ę́ʼ yikahgo yidoołtsééł ńtʼę́ę́ʼ; áádóó anaaʼí yichʼįʼ hashtʼeʼ áʼdiilyaa doo ńtʼę́ę́ʼ dóó chʼil bee náʼáztiʼę́ę doo yikʼindoojah da ńtʼę́ę́ʼ, áádóó shidáʼákʼehgi kʼidoolyáhígíí niʼiiłchxǫǫhii yitsʼą́ą́dóó yisdéidoonił ńtʼę́ę́ʼ.

55 Áádóó dáʼákʼeh bee bóhólníihii bá ndaalʼaʼí łaʼ íidííniid: Shá ndaalʼaʼí chʼéédzíʼígíí bichʼįʼ dínááh dóó ahanahidííʼish, áádóó tʼáá átʼé shighandóó dabidziilígíí, éí shá ndaabaahí, shitsíłkéí danilíinii, áádóó tʼáá átʼé shá ndaalʼaʼí bitahdóó ániid nidaakaiígíí, jó éí shighandóó dabidziil, tʼáá hazhóʼó tʼáá kǫ́ǫ́ dahonohłǫ́ǫ doo dabidííniidígíí éí tʼáá kǫ́ǫ́ naakai doo;

56 Áádóó tʼáá tsxį́įłgo shidáʼákʼeh bił hazʼą́ą́góó doohkááh, dóó shidáʼákʼeh háádadidoohdlííł; háálá éí shí; éí tʼáá shí béeso bee nahiséłniiʼ.

57 Éí bąą, tʼáá tsxį́įłgo shidáʼákʼeh bił hazʼą́ą́góó doohkááh; shiʼanaʼí binaa ahénátłʼinii ałtso nahjįʼ adahidoołtłʼił; bikááʼdóó haʼalzídí niʼjįʼ adahidoołhxą́ą́ł, áádóó bihadaʼasíidii yóóʼadadínóołkał.

58 Áádóó nihikʼijįʼ deeznáago, sheʼenaʼí shá baa nánítʼį́, áko tʼáá tsxį́łígo shighandóó chʼéékaiígíí ákǫ́ǫ́ bił deeshkah dóó shikéyah nínádideeshʼááł.

59 Áádóó bóhólníihii bá naalʼaʼí ábíłní: Hahgo shąʼ díí bidahodoolnííł?

60 Áádóó bóhólníihii bá naalʼaʼí kwíidííniid: Shí tʼáá ándishniihgo; tʼáá tsxį́įłgo, áádóó tʼáá ałtso bee nihichʼįʼ haasdzííʼyę́ę ádadoohłííł;

61 Áádóó díí éí bee ná lą́ adeeshłeeł dóó bee nikʼihojideeshdliił—shighan hazʼą́ągi baʼahódlí dóó hóyą́ągo aa áhályáanii nilį́, shi diyingo hazʼą́ądi nanitʼaʼí nilį́į doo.

62 Áádóó bá naalʼaʼí tsxį́įłgo dah diiyá, dóó bóhólníihii ádíílííł bidííniidyę́ę tʼáá ałtso áyiilaa; áádóó ląʼí yiską́ągo tʼáá átʼé ádíílííł biʼdooniidyę́ę ałtso áyiilaa.

63 Nááná, tʼáá aaníí Shí nihichʼįʼ haasdziih, tʼáá átʼé sodizin bá hooghan bá yáʼátʼééh dooleełígíí shił bééhozin éí nihił ííshją́ą́ ádeeshłííł, tʼáá ákogi átʼéii dóó tʼáá ákótʼáo áʼdoolnííł bee biʼdoodlóós doo danízingo éí yee yisdánídookah—

64 Shikééʼ naazíinii ahanahatʼéeshgo naanishígíí tʼáá náás kwáánííł doo, áko hodiyin hazʼą́ągi shízhiʼ binahjįʼ náás kwáánííł doo; háálá ndaʼiidlááh baa hoolzhiizh, áádóó shizaad bee haasdzíʼę́ę bohodoolnííł.

65 Éí bąą, shidineʼé ałhąʼ ádeeshłííł, tłʼoh naadą́ą́ʼ dóó tłʼoh naadą́ą́ʼ nahalinígíí éí haneʼ bikʼedidootį́łígíí bikʼehgo, áko tłʼoh naadą́ą́ʼ baa áháyą́ą dooleełgo hashtʼeʼnidahaashjaaʼ éí hoolʼáágóó hináa dooleeł biniyé, áádóó celestial ayóó áhonoolnindi bee bikʼi hodidoonih, shiTaaʼ bił hazʼą́ądi bił yah anáásdzáago éí nihokááʼ diné tʼááłáʼí nízínígo yindaashnishyę́ę bikʼehgo haa daʼdeeshłééł;

66 Tłʼoh naadą́ą́ʼ nahalinígíí éí ahídaheeshjoolgo bedaʼestłʼǫ́, dóó bee beʼestłʼónígíí bitsxeʼgo ályaa, áko kǫʼ doo nitséésii bee adabidiʼdoolkʼą́ą́ł.

67 Éí bąą, tʼáá ałtso sodizin bá hooghan naaznilgóó bichʼįʼ haasdziih, nidahazʼą́ą́ʼgóó bikʼi diishniiʼígi ákweʼé náásgóó tʼáá áłah nídaahdleeh doo.

68 Ákótʼée ndi, áłtséédą́ą́ʼ bee hazʼáanii bee nihichʼįʼ haasdzíʼę́ę, tʼáadoo tʼóó tsxį́įłgo áłah nídaahdleehí, éí doodago jinoochééł nahalingo; ákótʼée ndi tʼáá ałtsóní tʼáá bítséedi hashtʼeʼnídaałʼįįh doo.

69 Áádóó tʼáá ałtsoní nihá hashtʼeʼdoolnííł danohsingo éí, díí bídadéétʼiʼígíí biniyé bee hazʼáanii nihaa nílá éí bikʼeh dahonołʼį́į doo—

70 Éí kóní, éí doodago díigi átʼáo naʼnitin, tʼáá ałtso kéyah béeso bee nidahidoołnih, éí béeso bee chonáánéidooʼįįłgo átʼé, áádóó éí kéyah binaagóó ndahazʼánígíí éí Zion bikéyah átʼéego bikʼi diishniiʼ, éí shikééʼ naazíinii bee ahíídootʼishgo bee hahodoolzhish biniyé;

71 Éí tʼáá ałtso Jackson county hahoodzoh biyiʼ kéyah nahidoonihígíí, dóó dabinaagóó hadaheesdzooígíí, áádóó chʼéédzíʼígíí éí tʼáá shí dahyishłééł doo.

72 Áko, tʼáá aaníigo Shí nihichʼįʼ haasdziih, sodizin bá hooghan tʼáá átʼé bibéeso ałhąʼádeidoolííł; díí baa dahoolzhíízhgo ádadoolííł bididííniił, ákondi doo éí tʼóó tsxį́įłgo ádadoolííł da; áádóó tʼáá bítséedi díí tʼáá ałtso hashtʼedadoolnííł.

73 Áádóó diné bił daʼílíinii bikʼi dahodidoonih, éí diné dahóyáanii danilį́, dóó díí kéyah ndeidiyoołnih biniyé bíká adahidoołʼaał bidídííniił.

74 Áádóó sodizin daʼatahígíí haʼaʼaahjigo bił hadahwiisdzoh, bidziil daazlį́įʼgo, díí nahatʼá deidiiztsʼą́ągo kéyah ndeidiyoołnih dóó yikááʼ ahíhidookah; áádóó kótʼáo Zion hadeididoolííł.

75 Áádóó kʼad ndi tʼáá bíighahgo dahólǫ́, aooʼ, azhą́ ląʼí hólǫ́, éí Zion bee bikʼé niʼdoolyééł, áádóó bił dahoochxǫ́ʼyę́ęgóó hashtʼéénídadoolnííł, dóó doo náádadoolchxǫǫłgóó ádadoolnííł, éí shízhiʼ bikʼehgo dabiʼdójíi doo, éí shizaad yikʼeh dahółʼį́įgo deinízin.

76 Áádóó Shí díí bee nihichʼįʼ hanáánásdziih, anaaʼí baa tádaozjéíʼii, éí doo ákódabiʼdiilyaayę́ę bá hashtʼenídoolníiłgo yaa ádaa ńdaʼiidookąął éí tʼáá ákódaatʼį́į doogo bá nisin, áádóó ninádaʼdoolyééł deididooniił, éí nihikʼi dahwéeʼaahii dóó nihikʼibídahólníihii adanihííłʼaʼę́ę ádeiłní—

77 Éí ashdladiingo hahoodzoh kéyah bibee hazʼáanii bee lą́ daʼazlį́ʼígíí, éí shí ádíshníigo hadiilyaa, dóó éí tʼáá ałtso nihokááʼ dineʼé bá adahaztʼiʼ dóó bee baa áháyą́ą doo, tʼáá ákogi ádaatʼéii dóó diyingo atłʼááh naazléí bikʼehgo;

78 Áko nihokááʼ dineʼé tʼááłáʼí nízínígo nahatʼá dóó atłʼááh naazléí náásgóó yikʼehgo ádaʼałʼį́į doo biniyé, tʼáá bí ntsídaakees baa háláhígíí bikʼehgo, áko nihokááʼ dineʼé ndaʼiisíʼígíí tʼáá bí bikʼijįʼ daasdzoh dooleeł nihoníyá bijį́įdi.

79 Éí bąą, doo ákótʼée da diné naalteʼ ádaʼahilʼį́įgo.

80 Áádóó díí biniinaa díí Kéyah Bibee Hazʼáanii Bee Lą́ Daʼazlį́ʼígíí hadiishłaa, diné dahóyáanii éí díí biniyé danésą́, dóó díí kéyah dił dadeeznaʼígíí bee bikʼé niʼnílá.

81 Áko, Zion baʼáłchíní shąʼ háí beełtʼéego baa hodeeshnih? Haneʼ bikʼiʼdidootį́łígíí éí asdzą́ą́ ánahwiiʼaahii doo ákótʼéégóó bá nahoníʼánée baa haneʼígíí beełtʼé, háálá nihokááʼ dineʼé tʼáá áłahjįʼ sodilzin doo dóó doo bąąh nahodookał da, éí kóní—

82 Łah kintahgi ánahwiiʼaahii Diyin God doo yináldzid da, dóó diné doo yaa joobaʼ da.

83 Áádóó éí kintahgi asdzání baa áhásdįįdii naaghá, éí yaa níyáago, ání: Sheʼenaʼí shá baa nánítʼįįh.

84 Ákó doo íinízin da, ákondi hodíínaʼgo adił tsídeezkéezgo kódííniid: Háálá Diyin God, éí doodago nihokááʼ dineʼé doo binásdzid da, ákondi bąą áhásdįįdii shaa nátʼínígíí biniiaa bá baa nídeeshtʼįįł, shaa nátʼínígíí biniinaa shiʼdiiłʼáa doo.

85 Áko Zion baʼáłchíní díí beełtʼéego ádeeshłííł.

86 Ánahwiiʼaahii bidááhdóó ádaa ńdaʼoohkąąh bididííniił;

87 Áádóó doo bidiitsʼį́į́hgóó, hahoodzoh binanitʼaʼí ńdaohkąąh bididííniił;

88 Áádoó hahoodzoh binanitʼaʼí doo bíístsʼą́ą́góó, alą́ąjįʼ sizíinii bidááhdóó ńdaʼiidookąął bididííniił;

89 Áádoó alą́ąjįʼ sizíinii doo bíístsʼą́ą́góó, áko áadi índa Diyin Bóhólniihii nanitʼindę́ę́ʼ chʼídoogááł, áádóó báháchįʼgo diné dah deíkááhgóó atíidoolííł;

90 Áádóó hashkéego, dóó tʼáá íiyisí doo bił hózhǫ́ǫ́góó, tʼáá bí íiniizį́įʼgo, nidanitʼaʼí doo yáʼádaashónígíí, doo baʼahódlíhígíí, dóó doo ákódaatʼínígíí, éí tʼóó ádaʼdilʼínígíí, dóó doo daʼodlánígíí yił bá ndahidiyootʼááł;

91 Chahałheeł biyiʼdi ndi, áadi dajichah, dóó yéego dajidilwoshgo dajichah doo, dóó hawooʼ ahídazhdiłkʼash doo.

92 Éí bąą, bá sodadoołzin, áko daahchahgo danihidiʼdootsʼį́į́ł, áko baa dajiideeshbaał, áko díí doo bikʼijįʼ kódoolníił da.

93 Bee nihichʼįʼ haasdzíʼígíí éí tʼáá ákótʼée doo, áko tʼáá ałtso nihokááʼ dineʼé biniyéíi doo łaʼ bee bá ahóótʼiʼ da doo;

94 Áko diné dahóyáanii dóó akʼi dahwéeʼaahii tsʼídá doo yaa nitsédaazkézą́ą deididootsʼį́į́ł dóó bił béédahodoozįįł;

95 Áko tʼáadoo ájóneʼ hasingi naanish áshʼínígíí ádeeshłííłgo baa hodoolzhish, dóó shinaanish tʼáadoo ájóneʼ hasingi ádeeshłííł, áko nihokááʼ dineʼé Diyinkʼehgo oodááł dóó doo yáʼádaashónígíí bił béédahózin doo, ní nihiDiyin God.

96 Áádóó ałdóʼ, Shí nihichʼįʼ haasdziih, shá naalʼaʼí Sidney Gilbert shinaalyéhí bá hooghan baa nahidoonihgo éí nisinígíí dóó bee haasdzíʼę́ę bitsʼą́ąjígo átʼé, éí shidineʼé bichʼįʼ kwíishłaa, éí sheʼenaʼí yilákʼee deizlá.

97 Bikʼi dadiishniiʼígíí éí tʼáadoo sheʼenaʼí ndabiiłchxǫǫhí, éí shízhiʼ bee dabiʼdójíhígíí binahjįʼ yee lą́ ndaʼiiłeeh;

98 Háálá díí tʼáá íiyisíí baa yínííł hwiinidzin dóó tʼáá íiyisíí doo yáʼáshǫ́ǫgóó bąąhági átʼéii shí dóó shidineʼé nihikʼijįʼ kódayiilaa, éí bee haasdzíʼígíí biniinaa áádóó tʼáá ałtso diné dah deíkáahii hodíínaʼgo bikʼijįʼ kódoolnííł.

99 Éí bąą, shí íínísingo éí shidineʼé díí deidoołtsoł, dóó Shí bee bikʼihodiishniiʼígíí tʼáá yéego deiyótąʼ doo, azhą́ yikááʼ kéédahatʼį́ doo bee bá ahóótʼiʼ da ndi.

100 Ákótʼée ndi, doo yikááʼ kéédahatʼį́į da éí doo dishníi da; háálá tʼáá hazhóʼó aneestʼą́ dóó naanish diyingo shił hazʼą́ądi yah adeiyiijáahgo áko índa yikááʼ kéédahatʼį́į́ dooleeł.

101 Áádóó kin ádeidoolíiłgo, yiiʼ kéédahatʼį́į doo; índa chʼil naʼatłʼoʼii kʼideididooléełgo, bineestʼąʼ deiyą́ą doo. Tʼáá ákótʼée doo. Amen.