Wóltaʼii 27
Diyin Yá Yáłtiʼí Joseph Smith díí diyingo bił ííshją́ą́ ályaa, Harmony, Pennsylvaniadi, Biniʼantʼą́ą́tsʼózí 1830 yihahgo. Oodląʼ dah deíkáhígíí áłah nídaadleehdí bááh dóó chʼil naʼatłʼoʼii bitooʼ bikʼi sohodidoozįįł dóó diné bitaa dookáałgo yá hashtʼeʼádahoolaa, Joseph chʼil naʼatłʼoʼii bitooʼ yíká ííyá. Tʼah ńtʼę́ę́ʼ yáʼąąshdę́ę́ʼ haneʼ neiʼáhí łaʼ ba níyá dóó díí diyingo bił ííshją́ą́ áyiilaa, éí íídą́ą́ʼ łahdóó tʼáá íídą́ą́ʼ naháasdzoh áádóó chʼéédziʼígíí éí Biniʼantʼą́ą́tsohgo ałtso ályaa. Sodizindi tó dóó bááh dílzin biniyé áłah naʼádleehgo éí kʼad tó chooʼį́ chʼil naʼatłʼoʼii bitooʼ éí ndagaʼ.
1–4, Tó dóó bááh dilzingo chooʼį́ bee yitʼį́į dooígíí ndahaasyá; 5–14, Tʼáá ałtso da hodeeshzhiizhdę́ę́ʼ Christ dóó Bá Ndaalʼaʼí tó dóó bááh dílzin chodeidoołʼį́į́ł; 15–18, Béésh ééʼ bee naʼabaahii Diyin God nihaidiníʼánígíí tʼáá átʼé bee hadadohnééh.
1 Jesus Christ, nihiDiyin Bóhólníihii, nihiDiyin God, dóó niháNináʼnídláii bizhí deisínółtsʼą́ą́ʼ, éí bizaad hiiná dóó ayóó bidziil.
2 Háálá, shooh, shí ánihidishní, bááh dóó tó bikʼi sohodizin choidooʼįįłgo haʼátʼíí doodį́łígíí éí doodago doodlį́łígíí éí doo tʼáá íiyisíí bóhólníih da, shiʼayóó átʼéii tʼéiyá bichʼįʼ dadínóhʼį́į́ʼ éí aláahdi dadíínóhsin—béédaołniih nihiTaaʼ bidááhdóó shitsʼíís nihá nináníshdlá, áádóó shidił nihá deeznaʼígíí biniinaa nihibąąhági ádaatʼéii nihá yóóʼahididootʼááł.
3 Ákohgo, bee hazʼáanii nihaa nishłé, wain doodaiiʼ tó diłhił doo niheʼanaʼí bitsʼą́ą́dę́ę́ʼ nidahidoołnih da;
4 Ákohgo, doo łaʼ doohdłííł da tʼáá hazhóʼí nihitahgóó tʼáá ániid ályaago tʼéiyá; aooʼ, díí shiTaaʼ bił hazʼánígíí biyiʼ tʼéiyá éí nahasdzáán bikááʼ hadidoolnííł.
5 Áko shooh, díí hódzą́ shiiʼ siláhígíí bikʼehgo; ákohgo, tʼáa doo baa nił hayooí, háálá áájįʼ adoolkił nahasdzáán bikáaʼgi tsin bineestʼąʼ bitsʼą́ą́dóó doodlíłígíí nihił deeshdlííł, dóó Moroni bił, éí Naaltsoos Mormon Wolyéhígíí nihił ííshją́ą́ ídoolííłgo nihichʼįʼ ííłʼaʼ, éí shinaʼnitin bee yisdáʼiildéehii tʼáá átʼé doo ninítʼiʼii biyiʼ silá, éí Ephraim bitsin bikááʼ naʼasdzoh bibee ąą ńditį́hí baʼííníshłį́įgo bichʼįʼ kwíishłaa;
6 Áádóó Elias ałdóʼ bił, éí tʼáá ałtso ninádoolyééłgo bibee ąą ńditį́hí baʼ ííníshʼłíigo íidoolííł éí tʼáá ałtso Diyin yá yádaałtiʼí nahasdzáán ályaadą́ą́ʼ dahodísinyę́ę yee hadahaasdzííʼ, éí nihodoogáałdi átʼéedoógí yaa halneʼgo;
7 Áádóó ałdóʼ John Zacharias biyeʼ nilíinii, éí (Elias) Zacharias yaa níyáago yichʼįʼ ádee haadzííʼ niyeʼ hodooleeł yidííniid, dóó John éí bízhiʼ dooleeł, dóó Elias bee bikʼihodiiniiʼyę́ę bił hólǫ́ǫ doo;
8 Éí John nihichʼįʼ ííłʼaʼ, shá naołʼaʼí, Joseph Smith, Jun., dóó Oliver Cowdery, éí Diyin bibeʼadziil áłtséhígíí yee nihiidoosį́į́ł éí nihaa yílyá, áko dah nihikʼihodidoonih dóó Aarongi átʼáo nihidiʼdoolzį́į́ł;
9 Áádóó Elijah ałdóʼ, éí bee ąą ńdaditį́hí binahjįʼ azhéʼé baʼáłchíní bijéí yee tʼááłáʼí ńdadoodleełgo beʼadziilii baa nílá, dóó áłchíní bizhéʼé bijéí yee tʼááłáʼí ńdadoodleeł, áko nahasdzáán tʼáá átʼé bikááʼgóó doo yáʼáshǫ́ǫ́góó bikʼijįʼ haʼdoodzih dah;
10 Áádóó danihizhéʼé, Joseph dóó Jacob, dóó Isaac, dóó Abraham ałdóʼ bił, éí binahjįʼ bee ádee hadaʼiisdzííʼ tʼahdii hólǫ́;
11 Áádóó Michael ałdóʼ bił, éí doodago Adam, éí tʼáá ałtso yizhéʼé nilíinii, éí tʼáá ałtsóní yinaatʼáanii nilį́, tʼáá ałkʼidą́ą́ʼ bíídeeską́ą́dę́ę́ʼ;
12 Áádóó Peter, dóó James, dóó John ałdóʼ bił, éí shí nihichʼįʼ ííłʼaʼ, éí binahjįʼ danihíísį́į́ʼ dóó akééʼ naazíinii dasoolį́į́ʼ, dóó shízhiʼ yá daʼooʼíinii ndahaasdlááʼii, dóó ninaʼnitinjí hoogááł bibee ąą ńditį́hí dahdeiyólé dóó tʼáá éí ádaatʼéhígíí bichʼįʼ ííshją́ą́ íishłaa;
13 Shił hazʼą́ bibee ąą ńditį́hí bichʼįʼ kwíishłaaígíí, dóó naʼnitin bee yisdáʼiildéehii bił hoolzhish doo nináádidoolyééł da; dóó tʼáá ałtsoní baa hodoolzhish, éí biyiʼ tʼáá ałtsoní tʼáá łahíjįʼ ałhąʼ ádeeshłííł, éí yáʼąąsh biyiʼígíí, dóó nahasdzáán bikááʼígíí tʼáá áłah;
14 Áádóó ałdóʼ shiTaaʼ tʼáá ałtso nihokááʼ dineʼé shaa yiiznilígíí bił.
15 Ákohgo, nihijéí hidołnááh dóó baa nihił hoozhǫǫh, dóó ééʼ nihoozhnííʼ gónaaʼí bedaʼohtłʼóh, dóó shibéésh ééʼ tʼáá átʼé ádąąh ninoheeh, áko nichǫʼígo ooʼáłígíí doo nihikʼeh didoodleeł da, tʼáá ałtsoní óóhłaago, áko bikʼijįʼ soozį́į doo.
16 Éí bąą, woohsįįh, nihoozhnííʼ gónaa tʼáá aaníinii bináztʼiʼgo, diyingo hadanołtʼéego béésh tʼą́hí nihiyidgi dah naazʼą́ągo, dóó nihikeeʼ hashtʼeelyaago Jesus Christ binaʼnitin bee yisdáʼiildéehii biʼahodiilzeeʼ bikʼéstiʼ, éí diyin yá nidaalʼaʼí nihąąh ndeiyiizlá;
17 Oodląʼ bee achʼą́ą́h naatʼáhí ádąąh ndanohʼaah éí doo yáʼádaashóonii bibéésh dadiltłiʼgo yee adadziiłtʼóóhii ndahidinóółtsis;
18 Áádóó bee yisdáʼiildéehii danihichʼahgo, dóó shiʼIiʼsizʼį́ Diyinii bibéésh hał, éí łą́ągo nihił hólǫ́ǫgo ádeeshłííł, dóó shizaad nihił ííshją́ą́ ádeeshłííł, éí tʼáá ałtso bindashídółkidígíí bee tʼááłáʼí daniidlį́į doo, dóó níyáajįʼ shikééʼ nisoozį́į doo, dóó dei kódanihiʼdidoolnííł, áko shí honishłónídi nihí ałdóʼ dahonohłǫ́ǫ doo. Amen.