1 T’ahdoo shighandóó dahdiishááhyę́ędą́ą́’ naaltsoos nich’į ííshłaaígíí biyi’ nihił hweeshne’, t’áá nihich’į’ áná’iish’įįh doo nihidííniid áádóó t’áá díkwíígóó shį́į́ ádahoonííł bídadéét’i’ígíí bee nihił náháshnih doo, k’ad éí Shí ańdahaaskaiígíí bá tó bee alzį́į́h ánál’įįhígíí baa nááháshne’ doo, háálá t’áá éí t’éiyá baa ntséskees, dóó shiyi’di íiyisíí neiyiiłná, háálá she’ana’í shíká’ádaat’ínígíí biniinaa.

2 Na’iizóohii bídéét’i’ígíí t’áá áłts’íísígo Diyingo ííshją́ą́ ályaaígíí baa ná’íídéísoh. Díí t’áá áłts’íísígo bídadéét’i’ígíí baa nitsídíkééz, éí k’ad bee nihił hodeeshnih. Éí éí, ná’iizóohii hólǫ́ǫ dooleeł dishníigo t’áá áłtséédą́ą́’ baa ná’íízoh, háí oo’íínii nilį́į dooleełígíí, áádóó ałdó’ bijaa’ yee adidoots’į́į́ł, áko Diyin Bóhólníihii bidaahdóó t’áá aaníí yaa ná’íídóózoh.

3 Áko k’ad, díí baa yá’áti’ígíí bídéét’i’go, na’iizóohii t’ááłá’í hólǫ́ǫgo t’áá ahą́ą́h nihíká’análwo’go, dóó t’áá ałtso naanish íídoolíiłgo t’áá íiyisíí nanitł’ah doo. Áko díí doo bá nanitł’ahgóó adoolníiłgo éí, kin dahnaazhjaa’góó ward biyi’ tááłá’í na’iizóohii hólǫ́ǫgo ádoolnííł, éí áhooníłígíí nizhónígo yaa ná’íizóóhgo yíighah; áádóó bíni’dii t’áá ałtso áhooníłígíí t’áá yíní át’éegi yaa na’iizóóh dooleeł, t’áá aaníí shináá’ bee yiiłtsá, dóó shijaa’ bee sidíts’ą́ą́’ níigo yaa ná’iizóóh doo, yoołkááł góneʼ ádahóótʼįįdgi yaa halneʼ doo, áádóó ázhi’ígíí ałdó’ néíyiizóóh doo, áádóó t’áá ha’át’ííshį́į́ bídadéét’i’ígíí ałdó’, áádóó t’áá ałtso ałk’idą́ą́’ ádahóót’įįdyę́ę t’áá ałkéé sinilgo yaa hodoolnih ná’íídóozoh; áádóó ałdó’ ákwe’é táá’go nijikaiígíí bízhį’ yaa hodoolnih, ła’ ákwe’é hojílǫ́ǫgo, éí t’áá hoolzhishgi nihíká’adíílwoł nábidi’niihgo t’áá ákót’éego t’áá aaníí ákóhoodzaa didooniił, áko naaki éí doodago tááʼ daʼiiłtsą́ągo yee hadaasdzíʼígíí bee ndahidoot’ááł.

4 Áko, bíni’dii agháahdi na’iidzóohii hólǫ́ǫ doo, éí díí nááná ła’ naaltsoos bikáá’ baa nída’íísdzohígíí baa ha’nííł doo, éí ahoodzaaígíí t’áá aaníí daaníigo, bízhi’ naaltsoos yikáá’ ádeiyiilaa. Áko índa Diyin bá hooghan agháahdi na’iizóohii nilínígíí éí ádahooníłígíí baa nda’íísdzohyę́ę sodizin bá hooghanjí yaa ná’íídoozoh, naaltsoos bił dóó t’áá ałtso oo’íinii dabíínáłígíí, t’áá bí yee haadzí’ígíí éí hódahdi baa ha’oodzí’ę́ę dóó ádahoodzaago baa nída’íísdzoyę́ę éí t’áá aaníigo yoodlą́, éí sodizin bá hooghan biyi’ hastóí naanish bee bik’idahodiinii’ígíí dóó haadáát’įįłígíí t’áá bí bee bił bééhózin. Áádóó díí t’áá áłtso sodizin bá hooghanjí naaltsoos bikáá’ alyaago, baa nída’íísdzohyę́ę t’áá beełt’éego dílzin doo, áádóó éí ó’ool’įįłígíí t’áá aaníí bináá’ yee yiyiiłtsą́, dóó bijaa’ yee yidiizts’ą́ą́’ nahalingo baa nídá’íídzohyę́ę bihodoolnííł, dóó t’áá aaníí ádahóót’į́į́dígíí t’áá éí sodizin bá hooghan binaaltsoos biyi’ nídaháásdzoh.

5 Díí ó’ool’įįł bik’ehgo áhodooníłígíí éí hazhó’ó baa hoone’ daats’í nínízin; ákondi nił hashne’ díí éí Diyin God yinízinígíí binahjį’ kót’áo áda’el’į́, éí ó’ool’į́į́łígíí bik’ehgo áda’iilyaa dóó Diyin Bóhólníihii éí díí t’ahdoo nahasdzáán álnééhę́ędą́ą́’ yee nihoní’ą́ dóó hasht’eyiilaa, éí ańdahaaskaiígíí Diyin bina’nitin bee yisdá’iildéehii t’ahdoo yaa dahodiits’į́į́hgóó bizéé’ dahazlį́’ígíí yisdáádookah biniyé hasht’eilyaa.

6 Áádóó t’ah wónáasdi, t’áá béédaałniih John Diyingo Bił Ííshją́ą́ É’él’íinii éí ts’ídá díí kwá’ásiní anídahaaskaiígíí yaa ntsékeesgo, kódííniid, Diyin Bizaad Revelation 20:12gi díí náhaasdzoh—Diné daneeznáanii, ayóó ádaat’éii índa a’ohgo ádaat’éii, bikáá’dóó nahat’áii bidááhdóó naazį́įgo yiiłtsą́; naaltsoos ąą ádaalyaa; áádóó naaltsoos náánáła’, éí iiná naaltsoos át’éego ałdó’ ąą ályaa; diné daneeznáanii yaa nidaaskaiyę́ę, naaltsoos bikáá’ ádaalyaago bik’ehgo baa nídahast’įįd.

7 Díí náhasdzohígíí biyi’dóó nihił béédahózin doo naaltsoos ąą ádaat’éé ńt’ę́ę́’; áádóó naaltsoos náánáła’, éí iiná naaltsoos át’éego ałdó’ ąą ályaa; áko diné daneeznáanii yaa nidaaskaiyę́ę, naaltsoos bikáá’ ádaalyaaígíí bik’ehgo baa nídahast’įįd, binaanish ádeiyiilaaígíí bik’ehgo; éí binahjį’, áko naaltsoos baa ha’oodzí’ígíí éí naanish ádeiyiilaaígíí biyi’ baa nída’íísdzoh, áádóó éí nahasdzáán bikáá’ nídaháásdzohígíí bidadéét’i’. Áádóó naaltsoos iiná naaltsoosígíí éí yá’ąąshdi si’ą́; t’ahdoo dahdiishááhyę́ędą́ą́’ naaltsoos nihich’į’ ííshłaayę́ę biyi’ atł’ááh naazléí Jesus bina’nitin bił aheełt’é éí adadoohłííł nihi’doo’niid—áko éí t’áá ałtso baa nida’iisoozohígíí yá’ąąshdi baa nda’íísdzoh doo.

8 Áko k’ad, díí ó’ool’įįł éí Diyin bibe’adziil binahjį’ é’él’į́, éí Jesus Christ nihił diyingo ííshją́ą́ áyiilaa, áko Diyin bibe’adziilii bik’ehgo ha’át’íhída nahasdzáán bikáa’gi bee ádaazhdeet’ánígíí t’áá éí yá’ąąshdi bee ádaahodeet’ą́ą doo; índa ha’át’íida nahasdzáán bikáa’gi nahjį’ kwíinlaaígíí t’áá éí yá’ąąshdi nahjį’ kódoolnííł. Éí doodago, kótʼáo ááłdíshní, łahgi át’áo bik’ida’diitą́ągo, ha’át’íida nahasdzáán bikáa’gi baa nída’íísoozohígíí t’áá éí yá’ąąshdi baa nída’íísdzoh doo, índa ha’át’íida nahasdzáán bikáa’gi doo baa nída’íísoozohígíí t’áá éí yá’ąąshdi doo baa nída’íísdzoh da doo; háálá naaltsoos bikáá’ ádaalyaaígíí bik’ehgo nihikwá’ásiní daneeznáanii baa ndahidoot’ááł, yaa nidaaskaiyę́ę bik’ehgo, t’áá bí daats’í ádá ó’ool’įįł ádeidoolííł propria persona, éí doodago bá ásizį́ dadooleełígíí, t’ahdoo nahasdzáán álnééhyę́ędą́ą́’ yisdádookah biniyé Diyin God díí ó’ool’įįł yá hasht’eiyiilaa, éí bikwá’ásiní daneeznáanii yaa nída’íizohyę́ę bik’ehgo.

9 Ła’ shį́į́ díí na’anitin baa dahwiilne’ígíí t’áá íiyisíí łah át’é danízin—adziilii nahasdzáán bikáa’gi bee ádaazhdeet’ánígíí éí doodago nahjį’ kwójiilaaígíí t’áá éí yá’ąąshdi be’astł’ǫ́ǫ doo. Ákót’ée ndi, t’áá ałk’idą́ą́’ nahasdzáán bikáá’, Diyin Bóhólníihii éí bibe’adziilii nihokáá dine’é ła’, éí doodago hastóí díkwííshį́į́ yilt’éego Diyin bibe’adziilii chodeidooł’įįł biniyé t’áá aaníí yił ííshją́ą́ áyiilaa, díí Diyin bibe’adziilii chodeił’į́į doogo bá silá. Éí biniinaa, éí adziilii yinahjį’ áda’iilaaígíí, Diyin Bóhólníihii bízhi’ binahjį’, áádóó t’áá aaníí da’oodlą́ągo yee áda’iilaago, dóó t’áá aaníí ádahóót’įįdígíí hazhó’ó yaa nída’íízohgo, éí nahasdzáán bikáa’gi dóó yá’ąąshdi beehaz’áanii silį́į́’, áádóó doo k’éé’doolchxǫǫł da, éí Jehovah ayóó át’éii yee nihoní’ánígíí bik’ehgo. Díí oodlą’ bee ááha’nínígíí éí t’áá aaníí. Háílá yik’idi’dootį́į́ł?

10 Áádóó ałdó’, bik’ehgooígíí, Matthew 16:18, 19gi: Áádóó ałdó’ shí ándishní, Peter ánít’į́, áko díí tsé’éłká’ígíí bikáá’dóó dashoodláanii t’áá ła’ bizhi’ee kin álnéhígi át’éego deeshtł’į́į́ł; áko hool’áágóó ti’hoo’nííh bibee adziilii doo bik’eh didoodleeł da. Yá’ąąshii bee bóhólníihgo bił haz’ą́ągi bee ąą ńdítį́hí naa deeshnił: áko ha’át’íhída nahasdzáán bikáa’gi bee ádaazhdeet’ánígíí t’áá éí yá’ąąshdi bee ádaahodeet’ą́ą doo; índa ha’át’íida nahasdzáán bikáa’gi nahjį’ kwíinlaaígíí t’áá éí yá’ąąshdi nahjį’ kódoolnííł.

11 K’ad ts’ídá ayóó át’éego dóó ayóó aniłtsogo nanil’inii, dóó summum bonum baa yá’áti’ii nihidááhgóó siléí éí, Diyin Bibe’adziilii Dílzinígíí ndadidiilyééł. Áádóó bee ąą ńdítį́hí beiílyáhígíí binahjį’ doo nanitł’agóó nihokáá’ dine’é ba’áłchíní yisdádookah bídéét’i’ígíí baa ééhózinígíí nídidoolyééł, t’áá áłah andahaaskaiígíí dóó dahiináanii bá.

12 Kóne’ ayóó át’éii dóó aaha’niih, hool’áágóó Diyin bił iiná dóó iiná doo ninítʼi’ii silá—Ó’ool’įįł tó bee alzį́į́h, tó hoł didoolkǫǫł dahnídadiikai łeeh dahaastį́ nahalingo, áko bitł’ááh siléí ła’ígíí bił aheełt’’ée dooleeł; tó hół didoolkooł dóó tó biyi’ dóó naadi’doonah éí jishcháádéé’ éí daneeznánée náádahiináa doo; kodóó hoolzhish, díí ó’ool’įįł éí kwá’ásiní ańdahaaskaiígíí bá tó bee danihi’diilzį́į́hígíí bił aheełt’éego hadilyaa, éí andahaaskaiígíí bił ahééłt’é.

13 Éí biniinaa, tó bee alzį́į́h biyi’ ál’ínígíí éí dahnídahidiikaaígíí k’éédabi’dilnééh nahalingo bił hahodiilyaa, dóó Diyin yee haadzíigo ni’ biyaagi haz’ą́ą doo áadii dahiináanii ahíídiikah danízin, áko dahiináanii dóó dahnídahidiikaiígíí bee yit’į́į dooleeł, áko t’áá ałtsoní bedaałt’éhę́ę bee dahólǫ́ǫ doo, áádóó t’ááłá’í danilį́į doo—nahasdzáán át’éhígíí át’éego yá’ąąshdiígíí nahalin doo, Paul ádííniidígi át’éego, 1 Corinthians 15:46, 47, dóó 48gi:

14 Doo éí áłtsé diyink’ehgo da, ákondi ats’íísk’ehgo; áádóó índa diyink’ehgo. Áłtsé hastiin nahasdzáán bikáá’déé’, ni’ bikáá’déé’; naaki góne’ hastiin éí Diyin Bóhólníihii yá’ąąshdéé’go. Nahasdzáándéé’go, éí nahasdzáándéé’go doo; áádóó yá’ąąshdéé’ át’áo, éí ałdó’ yá’ąąshiidéé’. Áádóó nahasdzáán bik’áá’ ndaháásdzooígíí éí nihikwá’ásiní ańdahaaskaiígíí bídadéét’i’, éí t’áá aaníí ndaháásdzo, áko t’áá ákot’áo yá’ąąshdi ałdó’ ákót’é. Díí, éí bąą, hool’áágóó ahóyéel’áágóó adziilii át’é, dóó, łah dóó saad, éí diyingo haz’ą́ bibee ąą ńdítį́hí, éí ééhozin bibee ąą ńdítį́hí bii’ hadít’é.

15 Áádóó áko, shilah dóó shik’iské ayóó ánihííníshníinii, háálá díí t’áá aaníigo nihił bééhózingo áshłééh díí atł’ááh naazléí andahaaskai dóó dahiináanii bídéét’i’, éí bee yisdánáhídiikahígíí bídéét’i’. Háálá yee yisdádookahígíí t’áá daniidzin dóó bee yisdándiikahgo daniidzin, Paul éí danihizází díígi át’éego yaa haadzíí’—áko bí éí t’áá nihídingo doo hadaałt’é ádahodi’doolníił da—nihí ałdó’ t’áá bídingo doo haałt’é ádanihidi’doolníił da.

16 Áádóó áko, kwá’ásiní ańdahaaskaiígíí bá tó bee danihi’diilzį́į́hígíí bídéét’i’go, Paul bizaad dashijaa’ ła’ bee nihił nááháshne’, 1 Corinthians 15:29: Kwá’ásiní ańdahaaskaiígíí bá tó bee danihi’diilzį́į́hígíí shą’; haadadoonííł, daneeznánígíí t’áadoo náádiijéé’góó? Ha’át’íí éí biniinaa éí andáhaaskai tó bee dabidi’doolzį́į́ł?

17 Áádóó ałdó’, díí saad dashijaa’ diyin yá yádaałti’í ła’ dahnáánashjaa’ bídéét’i’, éí diyin bibe’adziilii ninádoolyééł, ayóó ádaat’éí akéedi dayóółkááłdi diyingo ííshją́ą́’ ádoolnííł, díí aláahdi át’éego ts’ídá t’áá ałtso baa dahane’ii bilááh át’éego, éí hool’áágóó Jesus Christ bina’nitin bee yisdá’iildéehii bił silá, íiyisíí kwá’ásiní ańdahaaskaiígíí bá tó bee danihi’diilzį́’ígíí; háálá Malachi kóní, akéedi wólta’ii, saad dashijaa’ 5 dóó 6gi: Áko shooh, diyin yá yáłti’í Elijah nihaadeeshłóós éí Diyin Bóhólníihii beiníłką́ądi ayóó át’éego dóó báhádzidgo t’ah doo yee yígááhdą́ą́’: Áádóó azhéʼé baʼáłchíní bijéí yee tʼááłáʼí nídadoodleełgo, dóó áłchíní bizhéʼé bijéí yee tʼááłáʼí nídadoodleełgo íidoolííł, éí doodago éí deeshááł dóó nahasdzáán doo yáʼáshǫ́ǫ́góó bikʼijįʼ hadeesdzih.

18 Díí hózhǫ́ bééhózingo bá atah hodeeshnih, ákondi t’áá bik’e’di’dootįįł áko shibiniyéíi ásht’ínígíí shił t’áá áko. Díí t’áá ákohgo bééhózin doo, kwe’é baa náhát’ínígíí, nahasdzáán yíí’ bee bá ha’doodzih t’áá hazhó’ó azhe’é danilíinii ba’áłchíní hool’áágóó yił naaldeehgo ályaago t’éiyá, ła’ éí doodago nááná ła’ baa yá’áti’go—áádóó áko shooh ha’át’íísh éí baa yá’áti’ doo? Éíísh kwá’ásiní ańdahaaskaiígíí bá tó bee danihi’diilzį́į́hígíí. Háálá nihí éí bí t’áágéédgo doo haałt’é dadiidleeł da; áádóó bí ałdó’ doo nihiłgóó doo haałt’é dadiidleeł da. Áko bí dóó nihí doo haałt’é dadiidleeł da Jesus Christ bina’nitin bee yisdá’iildéehii nídeidiiláago dóó ańdahaaskai ałdó’; háálá naaki góne’ yigháahdi Jesus Christ bina’nitin t’áá át’é bééhózingo ch’ídoot’ááł, áko t’áá át’é dóó t’áá ałtso, dóó haałt’éego ła’ da’asdlį́įgo doo dahweelzhiizh ahił siláa doo, dóó bee ąą ńdítį́hí, dóó da’adziilii, dóó ayóó ádaat’éii ádahodoonííł, áádóó Adam biiníłką́ą́déé’ dóó k’ad hoolzhishjį’ ndi béédahódoozįįł. Áádóó doo díí t’éiyá da, ákondi t’ahdoo nahasdzáán álnééhyę́ędą́ą́’ t’ah doo ííshją́ą́ ádaalnééhii, tʼáá íiyisíí binahjįʼ éédahózinii dóó binahjįʼ nizhónígo ntsáhákeesii bitsʼą́ą nanilʼinée, díí k’ad hoolzhishgo da’íchíhígíí biyi’, áłchíní yázhí índa awéé’ t’ahdii da’ałt’o’ii bił ííshją́ą́ ádadoolnííł.

19 K’ad, Jesus bina’nitin bee yisdá’iildéehii bee ndanihidi’neeztą́’ígíí eíísh ha’át’íí bits’ą́ą́dóó nídadoolá? Hane’ baa hózhóonii! Yá’ąąshdéé’ ázhí ajooba’ii; áádóó nahasdzáán biyi’dóó ázhí t’áá aaníinii yaa halne’ii; kwá’ásiní ańdahaaskaiígíí bá hane’ yá’át’éehii; dahiináanii dóó kwá’ásiní ándahaaskaiígíí hane’ baa hózhóonii bá; haneʼ ayóó átʼáo bitsʼą́ą́dóó hózhóonii. Dooládóʼ danizhóní da dził yikáaʼgi dahdadéesʼeezígíí, éí haneʼ yáʼátʼéehii yaa dahalneʼii, áádóó Zion ádeiłní: Áko shooh, NihiDiyin God ákʼi bíhólnííh! Carmeldóó’ dahtoo’ nahalin, áádóó Diyin God bits’ą́ą́dóó éédahózinii bik’ih hoole’!

20 Áádóó ałdó’, ha’át’íísh dasidiits’ą́ą́’? Cumorahdéé’ hane’ baa hózhóonii! Yá’ąąshdéé’ diyin yá naal’a’í, Moroni, éí diyin yá yádaałti’ii yaa hadahaasdzí’ę́ę bidahoolyaa ní—éí naaltsoos ííshją́ą́ ádoolnííł. Diyin Bóhólníihii bízhí Fayette, Seneca hahoodzohgi diits’a’, éí táá’ da’iiłtsáanii naałtsoos t’áá aanii át’é daaníigo yee hadadoodzih ní! Tooh Susquehanna bibąąhgi Michael, éí ch’į́įdii adinídíín yá naalʼaʼí ándiilʼįįhgo yaa ákoniizíi’go yiyiiłtsą́! Peter, James, dóó John biinéé’ Harmony hodíłch’ildi, Susquehanna hahoodzoh, dóó Colesville, Broome hahoodzoh bita’gi, éí tooh Susquehanna nílį́įgi, Diyin bił haz’ą́ądi bee ąą ńdítį́hí ndeijaah daaní, dóó t’áá ałtsoní ninályáago hoolzhiishdi!

21 Áádóó k’ad, Diyin God biinéé’ dasidiits’ą́ą́’ éí Nihizhe’é sání Whitmer bił haz’ą́, Fayette, Seneca hahoodzohgi, lą’ídi índa lą’ígóó yich’į’ hahaasdzíí’ áádóó dahwéelzhííshgi, éí Jesus Christ Bisodizin Báhooghan Dííshjį́įgóó Yá Naazínígíí ał’ąą ádahoot’éégóó tádadeezná dóó ti’dahooznii’! Áádóó aláahgo Diyin yá naal’a’í, Michael; Gabriel, dóó Raphael, dóó diyin yá ndaal’a’i ał’ąą ádaat’éego biinéé’ dasidiits’ą́ą́’, Michael éí doodago Adam bił hoolzhishdę́ę́’ dóó kojį’, t’áá át’é díí da’áchíhígíí biyi’, bá adahazt’i’, bibee ąą ńdítį́hí, bił danilínígíí, bikʼeʼíyéʼii dóó beʼtsaʼadinilííd, dóó diyin bibe’adziilii bitsxe’ígíí; tʼáá ałkééʼ saad baa hashʼaah dooleeł, bee nahazʼą́ ałkééʼ baa hishłéé doo; kwe’é áłts’íísígo, áádóó áadi ánáánáłts’íísígo; éí baa hodoolzhishígíí yee hadadoodzih éí bee hada’ííníilníi doo, éí hojoobaʼ hwiindzin niłdzilgo áyósin!

22 Shik’isoo, ayóó át’éii bindeilnishígíí biniinaa t’ááísh náás yiikah doo? T’áá náás deinohkááh t’ą́ą́’jigo éí dooda. Hada’íínółni, shik’isoo; áádóó yéego, t’áá náás deinohkááhgo dahodínóołnééł! Bíniʼ nihijéí bił dahózhǫ́, áádóó t’áá íiyisíí nihił dahózhǫ́. Bíni’dii nahasdzáán tʼáá hooshchʼįʼ hadi’doo’ááł. Bíni’dii kwá’ásiní ándahaaskaiígíí éí Áláahdi Naat’áanii Immanuel hool’áágóó deidósingo sin yee yich’į’ dahodootał, éí bik’ihodiinii’ígíí yiyíísį́į́’, nahasdzáán t’ah doo hadilnééhyę́ędą́ą́’, áko éí ándahaaskaiígíí dabi’dóótą’déé’ nihí bá nináda’diidlééłgo bíká’adiijah; háálá awáalyah naazdáii dabidi’doochił.

23 Bíni’dii dził ił hózhóonii yee hadadidoolwosh, áádóó t’áá ałtso ch’ídahootsohdéé’ yéego hadadidoolwosh; áádóó t’áá ałtso tónteel dóó kéyah dááłtsei nihiHool’áágóó Aláahdi Naat’áanii biyá’át’éehii baa dahołne’! Áádóó tooh, dóó tó nilį́, dóó tó áłch’íídígo danilíinii, nihił dahózhǫ́ǫgo ndeinóhłí. Bíni’dii dził yi’ dóó kéyah bikáá’ tsin t’áá ałtso Diyin Bóhólníihii yaa dahaniih doo; áádóó tsé naaznilii nihił dahózhǫ́ǫgo daochah! Áádóó jóhonaa’éí, ooljéé’, dóó haiłkáahgo sǫ’tsoh haagháhígíí ahił dahataał dooleeł, áádóó bíni’dii Diyin God t’áá ałtso biye’ danilíinii bił daházhǫ́ǫgo dahodootał! Áádóó bíni’dii hool’áágóó hadadilyaaígíí bízhi’ hool’áágóó ahóyéel’áágóó yee ádaaníi doo! Áádóó ałdó’ ánáádíshni’, dooládó’ ayóó át’éego ázhi’ yá’ąąshdéé’ dasidiits’ą́ą́’ da, danihijaa’ biyi’ji’, ayóó át’éii, dóó bee yisdá’iildéehii, dóó bee baaha’niihii, dóó hool’áágóó Diyin bił iiná, dóó iiná doo ninítʼi’ii; Diyin bił hazą́ądi, naat’áanii danilíinii, dóó óhólnííh bee dahólóonii!

24 Áko shooh, Diyin Bóhólníihii bijį́ ayóó át’éii baa hoolzhiizh; dóó háíísh éí áajį’ ayííłką́ągo yííghááh doo, áádóó háíísh éí yit’į́ á’diilyaago yíighah doo? Háálá kǫʼ doo yáʼátʼéehii nahjįʼ kwííłʼíinii nahalin, dóó táláwosh bee tʼáá ágisígíí nahalin dooleeł; Áádóó béésh łigaii doo nidzinii yąąh haidiyiłkaahii dóó tsʼídá tʼáá ałtso chin nahjįʼ kwííłʼíinii nahalingo dah sidá, dóó Levi dabiyeʼ doo yáʼátʼéehii bąąh ádingo íidoolííł, dóó béésh óola dóó béésh łigaii nahalingo íidoolííł, áko Diyin Bóhólníihii yáʼátʼéehii yee yichʼįʼ náádaʼíídóołnih. Éí bąą, bíni’dii nihí, sodizin bá hooghan da’niitahígíí dóó diné daniidlínígíí, áádóó Jesus Christ Dííshjį́įgóó Yá Naazínígíí daniidlínígii, nihiDiyin Bóhólníihii t’áá ákogi át’éii ádanihi’diilyaago bich’į’ nááda’diyiilnih; áádóó bighan ntsaaígíí, ałtso ályaago, nihi’kwá’ásiní ándahaaskaiígíí tó bee alzį́į́h bá ádaalyaaígíí naaltsoos bikáá’ ńdaháásdzooígíí, éí t’áá ałtso bee lą́ da’azlį́įgo ndidoot’ááł.

25 Shik’isoo danohłíinii, díí baa yáshti’ígíí t’ahdii lą’ígo baa nihich’į’ hadeeszihgo nisin; ákondi k’ad éí áłtsé t’ah doo, dóó baa yáshti’ígíí nááná łahdi hoolzhishgo índa baa hanáádeesdzih. Shí éí, t’áá ahą́ą́h, nihá naal’a’í jooba’ii nishłį́ dóó nihik’is doo nááná łahjį’ nízinii ałdó’ nishłį́,