Wóltaʼii 100
Diyin Yá Yáłtiʼí Joseph Smith dóó Sidney Rigdon díí diyingo bił ííshją́ą́ ályaa, Perrysburg, New Yorkdi, Ghąąjįʼ 12, 1833 yihahgo. Díí ałkʼis, baʼáłchíní doo yił naaldeehgóó dikwíí da yiską́, tʼóó yó bąąh bíneʼ silį́į́ʼ.
1–4, Joseph dóó Sidney nihokááʼ dineʼé biiʼ sizíinii yisdánáhidookah biniyé nahatʼá bee yisdáʼiildéehii yee naʼnitin; 5–8, Tsʼídá haʼátʼíí da yee hadoodzihii áadi índa bee bił hodoonih; 9–12, Sidney éí áyáłtiʼí nilį́į doo áádóó Joseph éí diyingo bił ííshją́ą́ éʼélʼį́į doo dóó tʼáá aaníí ádaatʼéii bidziilgo yaa halneʼ doo; 13–17, Diyin Bóhólníihii éí nihokááʼ dineʼé daniłtólígo yidínóosééł, áádóó akʼedahołʼíinii éí yisdéidoonił.
1 Tʼáá aaníigo, Diyin Bóhólníihii kónihiłní, shikʼisoo Sidney dóó Joseph, nihaʼáłchíní éí yáʼádaatʼééh; éí baa áháshyą́, dóó yáʼátʼéehii bá nisinígíí bichʼįʼ kódeeshłííł; háálá adziilii tʼáá ałtso shiiʼ hólǫ́.
2 Éí bąą, shikééʼ wohʼash, dóó bee nihá nahashʼáa dooígíí nihaadeeshłééł.
3 Áko shooh, dóó nołʼį́, kweʼé ląʼí dineʼé hólǫ́, hadahwiisdzohgóó; dáádíilkał hózhǫ́ idídóołniił biniyé haʼaʼaahjigo kéyah hadahwiisdzogóó ąąʼ ádoolnííł.
4 Éí bąą, Shí, Diyin Bóhólníihii, díí hazʼą́ąjįʼ ánihííłʼaʼ; háálá iiʼnaazíinii yisdáʼnáhidookahígíí tʼáá íiyisíí bá nisin.
5 Éí bąą, tʼáá aaníigo ánihidishní, nihízhí yéego diitsʼaʼgo díí diné bee bichʼįʼ hadohdzih; ntsáhákees nihijéí biih deeshłéłígíí bee hadoohdzih, dóó nihokááʼ dineʼé bidááhdóó soozį́įgo doo nanihiníłtłʼagóó hadoohdzih;
6 Háálá tsʼídá nidzingi bee nihichʼįʼ kódoolnííł, aooʼ, tsʼídá haʼátʼíí da bee haʼdoodzihii, áadi índa bee bił hodoonih.
7 Ákondi Shí bee hazʼáanii łaʼ nihaa nishłé, tʼáá ałtsoníjįʼ, haʼátʼííshį́į́ chʼídoohʼáłígíí shízhiʼ binahjįʼ chʼídoohʼááł, nihijéí bee dahodíínóhsingo, nihiiʼ sizʼíinii joobaʼí nízingo, éí tʼáá ałtsoníjįʼ.
8 Áádóó díí bee nihonishʼaah, díí hanásdzihgo Iiʼ Sizį́ Diyinii tʼáá ałtso bee hanáhdzihígíí diné tʼáá aaníigo yił ííshją́ą́ ííłʼį́į doo.
9 Áádóó shí shiyiʼdi íínísingo, shá naalʼaʼí Sidney, éí nihokááʼ dineʼé yá áyáłtiʼí nilį́į doo; aooʼ, tʼáá aaníí, díí naanish bee nikʼihodiiniiʼ, shá naalʼaʼí Joseph ndi bá yáníłtiʼ doo.
10 Áádóó adziilii baa deeshłééł áko tsʼídá bidziilgo tʼáá aaníinii ádaatʼéii yee hanádzih doo.
11 Áádóó tʼáá átʼé diyin bizaad yéego baa hólneʼ doogo adziilii naadeeshłééł, áko bá yáníłtiʼí nílį́į doo, áádóó bí éí diyingo bił ííshją́ą́ éʼélʼíní nilį́į doo, áko nihokááʼ shił hazʼą́ągi tʼáá ałtsoní bídadéítiʼígíí tʼáá aaníigo nił bééhózin doo.
12 Éí bąą, náás náánááhtʼash dóó bíniʼdii nihijéí bił hózhǫ́; háálá áko shooh, dóó nołʼį́, Shí nihoníyáajįʼ nihił honishłǫ́.
13 Áádóó kʼad éí Zion bee nihił hashneʼ. Zion éí bá nináʼdoolyééł, azhą́ tʼóó hóníshgháníjįʼ bichʼanáhoʼdishkeeh ndi.
14 Nihikʼisoo, shá naalʼaʼí Orson Hyde dóó John Gould, bikʼidíníshʼį́į́ʼ; áádóó éí shibee hazʼáanii yikʼeh hółį́įgo yisdáʼdeeshʼish.
15 Éí bąą, nihijéí bee chánah danohłį́į doo; háálá diyinkʼehgo deíkáhígíí tʼáá ałtso bá yáʼátʼééh doo, dóó sodizin bá hooghan daʼatahígíí bąąhági átʼéii bitsʼą́ąjįʼ náábiʼdiizniiʼii daniidlį́įgo Diyin God ádabiilaa.
16 Háálá nihokááʼ dineʼé daniłtólígíí dínéésééł, áko éí yáʼátʼééhjí iiná yee shíkáʼadoojah;
17 Áádóó tʼáá ałtso Diyin Bóhólníihii bízhiʼ yinahjįʼ sodadilzinígíí, dóó shibee hazʼáanii yikʼeh dahółʼínígíí, éí yisdáʼdookah. Tʼáá ákótʼée doo. Amen.