Wóltaʼii 103
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Atsá Biyáázh 24, 1834 yihahgo. Parley P. Pratt dóó Lyman Wight, Kirtland, Ohiodi níʼáázhgo díí diyingo ííshją́ą́ ályaa, éí Missouridę́ę́ʼ níʼáázh áko Diyin Yá Yáłtiʼí yił nahodooʼááł biniyé éí Diyin Yikééʼ Naazíinii haʼátʼíí bee bíkáʼadoowoł dóó haitʼáo Jackson County dabikéyahyę́ę baa nídadootʼááł.
1–4, Haʼátʼíí biniyé Diyin Bóhólníihii Diyin Yikééʼ Naazíinii Jackson County Hahoodzohdi atídabiʼdiilʼį́įgo yá hoołʼaʼ; 5–10, Diyin Yikééʼ Naazíinii éí tʼáá Diyin God bibee hazʼáanii yikʼeh dahółʼį́įgo dahodínóołnééł; 11–20, Zion bá nináʼílyáhígíí éí adziilii yee yaa dookah, dóó Diyin Bóhólníihii Bidineʼé yooʼish doo; 21–28, Diyin Yikééʼ Naazíinii éí Ziondi ahíhidookah, áádóó háiida beʼiinaʼ niʼ ndeiyizláago éí baa ndahidoolyééł; 29–40, Łaʼ diné Zion biCamp hadadidoohłííł dabiʼdooʼniid dóó Ziongóó dabiʼdoolʼaad; éí beʼoodlą́ yéego akééʼ naazį́įgo dahodínóołnéełgo bá bee haʼoodzííʼ.
1 Shikʼis danohłíinii, Shí tʼáá aaníigo nihichʼįʼ haasdziih, áko shooh, Shí éí diyingo nihił ííshją́ą́ ádeeshłííł dóó bee hazʼáanii nihaa deeshłééł, áko haitʼáo nihikʼis danilíinii yisdánáhidootʼish dóó bá ninádaʼdiyoolyééł éí haitʼáo nihinaanish ádadoołíłígíí nihił béédahodoozįįł, éí kéyah Zion bikááʼgóó adahineeskaad;
2 Sheʼenaʼí shidineʼé ndeineeskaad dóó atídeiyííłʼįįd, éí sháháchįʼ doo niʼ kóshłééhgo tʼáá shí íínísingo bikʼijįʼ kódeeshłííł.
3 Háálá kónízáádgóó atídaʼjiłʼį́įgo há bee hoołʼaʼ, áko bąąhági ádajitʼínígíí bee ndaʼjisdįįd, áko habąąhaʼíizhahí hadaʼdééłbįįd doo;
4 Áádóó áko shízhiʼ yee ádaʼdójíhígíí éí tʼóó hónishgháníjįʼ bichʼah dahodiʼdooshkeeł dóó ayóó átʼáo atídadeeshłííł, háálá bee hazʼáanii dóó bee haasdzíiʼii baa níláhígíí doo tʼáá ahą́ą́h yikʼeh dahółʼį́į da ńtʼę́ę́ʼ.
5 Ákondi tʼáá aaníigo Shí nihichʼįʼ haasdziih, bee ádee haʼoodzíiʼii bee nohoníʼą́ éí shidineʼé yaa ákodadínóozįįł biniyé, kʼad oolkiłdóó shinahatʼá Shí, Bóhólníihii biDiyin God nishłį́, éí yikʼeh dahółʼį́į doo.
6 Áko shooh, shí bee haasdzííʼgo, tʼáá kʼad oolkiłdóó sheʼenaʼí baa dahozhniłnéego hahodoolzhish.
7 Áádóó Shí, Bóhólníihii biDiyin God, tʼáá átʼé shizaad bee hachʼįʼ haasdzíiʼii, bikʼeh dahojíłʼį́į doo biniyé dazhdidootsʼį́į́ł, áádóó nahasdzáán bikáaʼgi bee ídahólníihgo bił nahazʼáanii tʼáá ałtso yikʼi déésʼeez silį́įʼgo índa tʼah tʼáá yikʼeh dadidlį́į dooleeł, áádóó yikééʼ naazíinii nahasdzáán beiyílyá, éí hoolʼáágóó ahóyéelʼáágóó daabí dooleeł.
8 Ákóndi shibee hazʼáanii doo yikʼeh dahółʼį́į́góó, dóó shizaad doo tʼáá átʼé doo hazhóʼó yikʼeh dahółʼį́į́góó, nahasdzáán bikáaʼgi bee ídahólníihgo bił nahazʼáanii bikʼeh dadidoodleeł.
9 Háálá éí nihokááʼ dineʼé yá daʼdiníłdíinii dajílį́įgo ádahoʼdiilyaa, dóó nihokááʼ dineʼé yisdáʼdajiiníiłii dajílį́įgo ádahoʼdiilyaa;
10 Áádóó nihokááʼ dineʼé doo yisdáʼdajiinííł dajílį́į́góó, éí áshįįh doo halniihii dadooleeł, dóó doo bá yáʼátʼéhí da yileeh dóó tʼóó yóóʼiilkaʼ dóó biki naʼaldeeh.
11 Ákondi tʼáá aaníigo Shí nihichʼįʼ haasdziih, nihikʼis danilíinii yóó ahineeskaadyę́ę bikʼéyah baa dahideestʼánéejįʼ nináhidookah, dóó Ziondi dahóóchxǫʼyę́ęgóó haa deididoodlííl.
12 Háala yéego achʼįʼ nahwiiʼná bikééʼdóó, áłtséédą́ą́ʼ bee nihichʼįʼ haasdzííʼyę́ęgi átʼáo, nihikʼi dahozhdoodliił.
13 Áko shooh, díí akʼihojídlí nichʼįʼ nahwiisnááʼ bikééʼdóó bee nichʼįʼ, ádee haasdzíiʼii dóó nihikʼisoo bichʼįʼ ndahwiisnááʼii—bee nánáʼílyaii, dóó nihikʼisoo bá ndaʼiisyáii, kéyah Ziondi baa ńdahaasyáii ałdóʼ, dóó hááʼhodidoolnííł, éí doo náádoolchxǫǫł da.
14 Ákótʼée ndi, baa dahaasyáhígíí deiyíílchxǫʼgo éí atídadoolnííł; háálá doo yisdáʼdeeshʼish da baa dahaasyáhígíí deiyííłchxǫʼgo.
15 Áko shooh, tʼáá aaníigo Shí nihichʼįʼ haasdziih, Ziondi kéédahatʼíinii bá nináʼályáii éí adziilii bee ákódzaa;
16 Éí bąą, hastiin łaʼ díí diné bá dínéésééł, éí Moses Israel baʼáłchíní chʼííníʼeezh nahalingo chʼíídooʼish.
17 Háálá níhí éí Israel baʼáłchíní danohłį́, dóó Abraham bílátsiiʼ danohłį́, áádóó adziilii bee ąąh shoojééʼdę́ę́ʼ, bigaan nihichʼįʼ ąą kótʼéego chʼínihidooʼish.
18 Áádóó danihizhéʼéyę́ę áłtsé chʼíbiʼdootʼeezh, tʼáá ákótʼéego Ziondi akééʼ naazíinii éí bá nináʼdoolyééł.
19 Éí bąą, tʼááká nihijéí biyiʼdi áhódįįh lágo, háálá danihizází bee bił hweeshneʼę́ę éí tʼáadoo bee nihił hweeshneʼ da: Shá ndaalʼaʼí nihilą́ąjįʼ deeshʼaał, ákondi sheʼayóó átʼéii éí ndagaʼ.
20 Ákondi tʼáá aaníigo Shí nichʼįʼ haasdziih: Shá ndaalʼaʼí nihilą́ąjįʼ deeshʼaał, áádóó sheʼayóó átʼéii ałdóʼ, áádóó baa hodoolzhish kéyah yáʼátʼéehii bikʼi nihídahólnííh doo.
21 Tʼáá aaníí, tʼáá aaníigo Shí nihichʼįʼ haasdziih, shá naalʼaʼí Joseph Smith, Jun., éí hastiin ánaalʼaʼí baa haneʼyę́ę beełtʼé áko dáʼákʼeh yikʼi Bóhólníihii haneʼ biyiʼ baa hóóneʼę́ę éí bee nihił hweeshneʼ.
22 Éí bąą shá naalʼaʼí Joseph Smith, Jun., shighandóó beʼadziil, shitsíłkéí dóó tʼáá náás béédááhaiígíí kwíididooniił—kéyah Ziondi áłah wohłeeh, éí kéyah béeso dílzingo shichʼįʼ kólyaaígíí bee naháłniiʼ.
23 Áádóó tʼáá ałtso sodizin bá hooghan bibéeso éí hastóí dahóyáanii deiyínóohjááh dabididoohniił, áko éí yee kéyah nideidiyoołnih ábidíiniidyę́ęgi átʼáo.
24 Áádóó áko sheʼenaʼí shikéyah hózhǫ́ǫ́dóó nihikʼijįʼ dookahgo áádóó chʼínihidíʼnóolkał, éí kéyah Zion bá hodílzingo íishłaa, éí danihikéyahdę́ę́ʼ dóó tʼáá aaníigo yaa dahoolneʼ, éí bitsʼą́ą́dóó daʼanaʼí bikʼijįʼ íishłaa, dóó hóyéeʼgo bikʼijįʼ hadadoohdzih;
25 Áádóó tʼáá háí shį́į́ hóyéeʼgo bikʼijįʼ haahdzííʼgo, Shí ałdóʼ éí bikʼijįʼ hóyéeʼgo hadeesdzih, dóó sheʼenaʼí shá atídíílííł.
26 Áádóó shí nihił honishłǫ́ǫ doo azhą́ sheʼenaʼí shá atíniłʼį́į ndi, ńléí tááʼ dóó dį́į́ʼ ałkeeʼ daʼachííhdę́ę́ʼ dashijoołáa ndi.
27 Háiida diné shí shiniinaa beʼiinaʼ niʼ niidoolééłgo tʼáadoo yináldzidí doo; háálá háiida shí shiniinaa beʼiinaʼ niʼ neiléehgo éí tʼáá ninéididoodlééł.
28 Áádóó háiida shí shiniinaa beʼiinaʼ doo niʼniyíléédą́ą́ʼ éí doo shikééʼ sizíinii nilį́į da.
29 Díí éí nisin shá naalʼaʼí Sidney Rigdon ńléí haʼaʼaahdi hadahwiisdzohdi biinééʼ daʼoodláanii áłah nídaadleehdi hanádzih doo, éí sodizin naaznilígíí shibee hazʼáanii baa háláhígíí yikʼeh dahółʼį́į doo biniyé éí Zion bá nináʼílyá dóó yisdáʼdootʼish.
30 Áádóó shá naalʼaʼí Parley P. Pratt dóó shá naalʼaʼí Lyman Wight bikʼisoo bikéyahgóó doo nídootʼashgóó bá nisin, éí łaʼ hastóí kéyah Ziongóó yił dookahígíí haineeztą́ągo índa, éí neeznáá da, éí doodago naadiin da, éí doodago ashdladiingo da, éí doodago neeznádiingo da, ńléí ashdladi neeznádiindi shighan dóó ashiiké anééltʼeʼgo yił dookah.
31 Áko shooh díí éí nisin; bíndaʼádóółkidígíí nihił ííshją́ą́ ádeeshłííł; ákondi nihokááʼ dineʼé shí nisinígíí łah da doo yedaʼáłʼį́į da łeh.
32 Éí bąą, ashdladi neeznádiin doo łaʼ bikʼííníyáágóó, yéego ánítʼį́įgo bíighahdą́ą́ʼ táadi neeznádiin da bikʼídíínááł.
33 Áádóó táaʼdi neeznádiin doo bikʼííníyáágóó, yéego ánítʼį́įgo neeznádiin da bikʼídíínááł.
34 Ákondi tʼáá aaníigo Shí nihichʼįʼ haasdziih, Shí bee hazʼáanii łaʼ nihaa nishłé, áko kéyah Ziondi doo doohʼash da neeznádiin tsíłkéí shighandóóʼígíí bikʼínooʼáazhgo índa, éí kéyah Ziongóó bił doohkah.
35 Éí bąą, tʼáá aaníigo ánihidishní, bee nihichʼįʼ haasdziih; binaʼídółkid áko nihił ííshją́ą́ ádeeshłííł yéego sodołzingo áko shá naalʼaʼí Joseph Smith, Jun., akǫ́ǫ́ bił doohkah, dóó shidineʼé bitahgi bóhólníih doo, dóó shi diyingo hazʼą́ kéyah bikʼi sohodoozingi haididoolííł, áádóó Zion baʼáłchíní bee hazʼáanii dóó bee hadaʼiisdzííʼii bee hadidoolnííł éí nihaílyá dóó nihaadoolyééł.
36 Yéego idadoołkaalgo, dóó akʼeh dahonółʼį́įgo, dóó daʼiinohdlą́ągo sodadołzingo éí binahjįʼ tʼáá ałtso bee akʼeh deesdlį́įʼii dóó ayóó átʼéii nihaadahidoolyééł.
37 Shá naalʼaʼí Parley P. Pratt éí shá naalʼaʼí Joseph Smith, Jun bił yiʼash bididííniił.
38 Shá naalʼaʼí Lyman Wight éí shá naalʼaʼí Sidney Rigdon bił yiʼash doo bididííniił.
39 Shá naalʼaʼí Hyrum Smith éí shá naalʼaʼí Frederick G. Williams bił yiʼash doo bididííniił.
40 Shá naalʼaʼí Orson Hyde éí shá naalʼaʼí Orson Pratt bił yiʼash doo bididííniił, tʼáá ałtso Joseph Smith, Jun., bá nahaʼáago, éí díí bee hazʼáanii bee nihichʼįʼ haasdziʼígíí bohodoolnííł, dóó bííʼohígíí shí beeshóhólnííh doo. Tʼáá ákótʼée doo. Amen.