Wóltaʼii 129
Diyin Yá Yáłtiʼí Joseph Smith díí yee naʼneeztą́ą́ʼ, Nauvoo, Illinoisdi, Atsá Biyáázh 9, 1843 yihahgo, táaʼgo agháadi bee ąą ńdítį́hí haitʼáo Diyin yá nidaalʼaʼí dóó iiʼsizį́į diyinkʼehgo akáʼanádaalwoʼígíí bééhózin doogo yił ííshją́ą́ áyiilaa.
1–3, Yáʼąąshiidi éí tʼáá áłah anoonééłdę́ę́ʼ atsʼíís náádabiʼdiiljéíʼígíí doo iiʼsizį́ tʼahdoo anoonééłdę́ę́ʼ náádabiʼdiiljeehígíí hólǫ́; 4–9, Bee ąą ńdítį́hí aa yílyá áko éí binahjįʼ daaʼdiníbaal biníkáhootʼį́įgo dahalneʼígíí béédahózin.
1 Yáʼąąshdi éí naakigo dah ooldah, íiyisígíí éí: Diyin Yá Nidaalʼaʼí, anoonééłdę́ę́ʼ bitsʼíís náádabiʼdiiljééʼ, éí bitsʼíís atsįʼ dóó tsin bee daholǫ́—
2 Háálá díí bee ééhózin, Jesus ádííniid: Shitsʼíís bídadołnih dóó danółʼį́ áko nihił béédahodoozįįł, háálá iiʼsizį́į éí bitsʼíís índa bitsʼin doo hólǫ́ǫ da, nidi shí éí dashinółʼį́įgo shitsʼíís hólǫ́.
3 Naaki góneʼ éí: diné tsʼídá tʼáá ákogi ádaatʼéii biʼii sizį́į hadaałtʼéiigo ádadoolnííł, éí anoonééłdę́ę́ʼ tʼahdoo náádabiʼdiiljeeh da, ákondi ayóó átʼéii tʼáá éidi yígíí baa dahidoolyééł.
4 Halneʼii łaʼ naaníyáago dóó Diyin God bitsʼą́ą́dóó haneʼ yishʼááł nídííniidgo, bichʼįʼ dahdidíílnih dóó shílákʼedíílnih bididííniił.
5 Diyin yá naalʼaʼí nilį́įgo éí nílákʼedidoolnih, dóó bílaʼ bididíílchiłgo baa ákodíníizįįł.
6 Diné tsʼídá tʼáá ákogi átʼéii biʼii sizį́į hadíłtʼé nilį́įgo éí ayóó átʼéii bee hólǫ́ǫgo doogááł; háálá ákótʼáo tʼéiyá ííshją́ą́ ádidiʼdoolnííł—
7 Shílákʼedílnííh bididííniił, ákondi doo nahidooʼnááł da, háálá diné tsʼídá tʼáá ákogi átʼéii binaʼadloʼ doogo éí yáʼąąshii doo yee hasʼą́ą da; ákondi haneʼ neiʼáhígíí tʼahdii yaa hodoolnih.
8 Chʼį́įdii adinídíín yá naalʼaʼí áʼdiilyaago, shílákʼedílnííh bidíniidgo nílákʼeh didoolnih, ákondi doo bizhdoolchid nahalin da doo; áko éí nilínígíí nił bééhodoozįįł.
9 Diyin God bitsʼą́ą́dę́ę́ʼ haneʼ ádaatʼéhígíí éí díí táaʼgo agháadi bee ąą ńdítį́hí binahjįʼ nił bééhózin doo.