1 Tʼáá aaníí, Diyin Bóhólníihii kóníłní, shá naalʼaʼí Joseph Smith, nááʼiisíníłniiʼígíí dóó shaa ákóninzį́ʼígíí, éí íinilaaígíí tʼáá íiyisíí baa shił hózhǫ́; háálá díí kódíínííł biniyé bichʼįʼ hashtʼenishłééh, áko doo dabidziilígíí shibee hódzáanii bił ííshjání ádeeshłííł nahasdzáán bikááʼgóó.

2 Baa sodílzinígíí shił yáʼátʼééh; áádóó bá sodílzinígíí éí kónidishní, áko kʼad bee nikʼihodiiniiʼígíí éí shinaʼnitin bee yisdáʼiildéehii saad ílíinii tsxį́įłgo bee bichʼįʼ hadíídzih, Zion bitsé ásiʼáanii bee naa náʼástłʼinii nilį́, éí aláahdi naatʼáanii bighan nahalingo bikʼinizdidlaadgo ádeeshłííł.

3 Díí naaltsoos ílį́įgo hadilyaaígíí éí nahasdzáán bikááʼgóó aláahdi naatʼáanii danilíinii tʼáá ałtso bichʼįʼ ádadoolnííł, dį́į́ʼgóó adahwiisʼáágóó, alą́ąjįʼ naatʼáanii baa haʼniihgo dahnidaahígíí, dóó kééhonítʼį́įgi naatʼáanii-ayóó yáʼátʼéehgo ntsídaakeesii, dóó tʼáá ałtso nahasdzáán bikááʼgóó diné dah deínééhii áłʼąągóó adahaaznánígíí bichʼįʼ ádadoolnííł.

4 Hojoobaʼ hwiinidzingo dóó Iiʼ Sizį́ Diyinii bibeʼadziilii binahjįʼ díí náhidoodzoh bididííniił, éí niiʼ hólǫ́ǫgo naaltsoos ílíinii náhadíízoh;

5 Háálá Iiʼ Sizį́ Diyinii binahjįʼ aláahdi naatʼáanii danilíinii dóó bídahólníihii shí bá nisinígíí nihił béédahodoozįįł, azhą́ náásgóó haadadoonííł ílį́į ndi.

6 Háálá, áko shooh, kʼadę́ę bee bił hashneʼ dóó Zion bibee adinídíín dóó sheʼayóó átʼéii bíká hadaʼoosííd bidideeshniił, háálá bíkáʼadiijahgo baa hoolzhiizh.

7 Éí bąą, bíká ádíní, yéego bichʼįʼ ádidííniił, tʼáá aaníinii nił bééhózinígíí bee, tʼáadoo bééníldzidí, háálá tłʼoh ndahalin, dóó chʼillátah hózhóón ayóó átʼáo danizhóní éí hodíínaʼgo ndahidoołdas, áko háiida yikʼídahodooʼahígíí ádin doo—

8 Áko nahasdzáán bá nahodeeshʼááł bijį́įdi baa deeshááł, ákohgo áadi shiniiʼ bikʼéstiʼii bikʼideestsos, atídaʼałʼíinii éí bindaʼadloʼígíí bił bá ndahodeeshʼááł, éí shá nidaalʼaʼí dóó shił tʼáá aaníinii bee hwił dahweeshneʼę́ę nahjįʼ kódajiilaago áadi, hawooʼ ahídadikʼash doo.

9 Áádóó ałdóʼ, Baa deeshááł dóó bijéí daalzhólígo ádadeeshłííł, dóó ląʼída nihá yáʼátʼééh doo, áko biʼaa hajoobaʼ baa ákodadínóosįįł, áko tʼáá aaníinii bee adinídíinii yaa dahidookah, dóó Gentile dineʼé éí Zion yaa dahodoonih dóó ayóó átʼáo ádeidoolííł.

10 Háálá nishááhdi tsxį́įłgo bichʼįʼ hoolzhish, oolkiłígíí doo bééhózin góneʼ; áádóó háadishąʼ shidineʼé bá hasihgo hazʼą́ą doo, áádóó yah adahineezhchą́ąʼgo chʼéédziʼígíí shą́?

11 Chʼéédanohdzííd, O nahasdzáán bikáaʼgi aláahdi naatʼáanii danohłíinii! Hóshdę́ę́ʼ, O, hóshdę́ę́ʼ nahohkááh, shidineʼé bíkaʼoohjeeh, Zion bichʼéékęʼ dabighanjįʼ, nihiʼóolaa dóó nihibéésh łigai ndahoheeh.

12 Áádóó ałdóʼ, tʼáá aaníigo Shí nichʼįʼ haasdziih, shá naalʼaʼí Robert B. Thompson díí saad ílíinii náhádzóóhgi yee níkáʼadoolwoł bididííniił, háálá bí éí baa ahééh nisin, dóó nił naalnish dooleeł;

13 Áko, kóbididííniił, nahóʼáhígíí yíísíníłtsʼą́ą́ʼ doo, áádóó Shí éí akʼihojídlí ląʼígo bee bikʼihozhdeeshdliił; kodóó tʼáá aaníigo yéego nanilnish doo bididííniił, dóó ayóó átʼéego baa hashniih dooleeł;

14 Ákondi naanish baa diníʼánígíí yénálniihgo hazhóʼó íidoolííł.

15 Áádóó ałdóʼ, tʼáá aaníigo Shí nichʼįʼ haasdziih, shá naalʼaʼí Hyrum Smith bikʼihojídlíí doo; háálá Shí, Diyin Bóhólníihii, bijéí biyiʼdi doo binaʼadloʼígíí biniinaa ayóó ííníshní, áádóó yáʼádaatʼéehii ayóó áyóʼnínígíí ałdóʼ biniinaa, ní Diyin Bóhólníihii.

16 Nááná, shá naalʼaʼí John C. Bennett ninaanish aláahdi naatʼáanii dóó nihokááʼ dineʼé shizaad bichʼįʼ ádoolníłígíí bee shíkáʼ adíílwoł bididííniił, ni shá nanilʼaʼí Joseph Smith, yéego nichʼįʼ nahwiiʼná nanídleehgo; níighahgi sizį́į doo; áádóó ninahatʼá yikʼeh hółʼį́įgo akʼihojídlí doo bitsʼą́ą́ʼ niʼ kódoolníił da.

17 Áádóó biʼayóóʼóʼóní biniinaa ayóó átʼée doo, háálá díí kódzaago éí shichʼihjí nilį́į doo, ní Diyin Bóhólníihii. Haitʼáo naalnishígíí éí yiiłtsą́, dóó tʼáá ákótʼį́įgo bee lą́ adeeshłeeł, dóó akʼihojídlí dóó ayóó átʼáo bee bikʼijideeshdIiiłgo baa hodeeshnih.

18 Áádóó ałdóʼ, tʼáá aaníigo ándishní shí íínísingo shá naalʼaʼí Lyman Wight baʼátʼeʼ ádingo, Zion dineʼé tʼáá neinitin doo, nihokááʼ dineʼé yitahgóó shaa halneʼ doo, atsá hoł yitʼah nahlingo baa áháshyą́ą doo; tʼáá bí yee ayóó átʼée doo dóó shízhiʼ binahjįʼ ayóó átʼáo baa haʼniih doo.

19 Áko binaanish ałtso áyiilaago dahnídidoodááł shichʼįʼ, shá naalʼaʼí David Patten íishłaayę́ęgi átʼáo, éí kʼad shił hólǫ́, éí shá naalʼaʼí Edward Partridge íishłaaígi átʼáo ałdóʼ, áádóó ałdóʼ shá naalʼaʼí Joseph Smith, Sen. sání silį́į́ʼii, éí Abraham binishnáájí dah sidáa doo, dóó bikʼihojídlí dóó diyingo ábiʼdiilyaa, háálá éí shííʼ jílį́.

20 Áádóó ałdóʼ, tʼáá aaníigo Shí nichʼįʼ haasdziih, shá naalʼaʼí George Miller éí baʼátʼeʼ ádin; dóó bijéí biyiʼdi doo binaʼadloʼígíí biniinaa baʼódlí; áádóó shił bééhózinígíí ayóó áyóʼní áko Shí, Diyin Bóhólníihii, ayóóʼííníshní.

21 Éí bąą Shí nihichʼįʼ haasdziih, bishopric dóó yił dah naháaztáanii atah nilį́įgo bee bikʼidideeshnih, shá naalʼaʼí Edward Partridgegi átʼéego, sodizinjí bee ákáʼanáʼáwoʼígíí éí bee bíkáʼanáʼáwoʼ doo, áko shidineʼé baadahojoobaʼígíí bitsiitʼááh dah déesniiʼgo akʼihojídlí yíká sodidoolzįįł, ní Diyin Bóhólníihii. Diné doo łaʼ shá naalʼaʼí George yiʼį́į da dooleeł, háálá shidísin dooleeł.

22 Shá naalʼaʼí George, áádóó shá naalʼaʼí Lyman, áádóó shá naalʼaʼí John Snider, dóó łaʼdóʼ, kin shízhiʼ bee ndadohʼááł bididííniił, éí shá naalʼaʼí Joseph bił ííshją́ą́ íidoolííł éí bikʼehgo ádoolnííł, dóó haaʼígi nidootʼáłígíí ałdóʼ.

23 Áádóó ákweʼé háádaʼayį́į́h dóó daʼadą́ą́ dooleeł éí kin biyiʼ, éí nízaadę́ę́ʼ nidaakaiígíí akweʼé yiiʼ nídabiilkááh doo; éí bąą kin tsʼídá nizhónígo ádadoohłííł, biniyé ályaago bił danilį́į dooleeł, áko chʼaa naagháhígíí chʼééh deiyáago Diyin Bóhólníihii bizaad yaa ntsékeesgo bitsʼíís háádoolyį́h dóó baa áháyą́ą doo; áádóó éí Zion bitsé á siʼáanii bee naanáʼástłʼinii átʼée dooleełgo bee bá nihoníʼą́.

24 Díí kin éí shízhiʼ binahjįʼ ályaago éí chanáh bee niłdzilgo nízaadgóó siʼą́ą doo, áádóó díí kin yikʼi déezʼį́į́ʼii ábidiʼdoolníłígíí éí tʼóó badaaʼihígíí doo ákóneʼ yee yá hasʼą́ą da doo. Éí biyiʼ hodílzin doo, éí doodago éí Bóhólníihii nihiDiyin God doo yiiʼ hólǫ́ǫ da dooleeł.

25 Áádóó ałdóʼ, tʼáá aaníigo Shí nihichʼįʼ haasdziih, shikééʼ naazíinii nízaadę́ę́ʼ kojįʼ nihohkááh bididííniił.

26 Áádóó dahalneʼii tsxį́įłgo adoałʼaah, aooʼ, dahalneʼii dadilwoʼígíí, áádóó kódabididoohniił: Hóshdę́ę́ʼ nihookááh, nihibéésh óola, dóó nihibéésh łigai, dóó nihitłʼiz ałtaaséí, dóó tʼáá ałtso nihinaadeeł daʼílíinii; dóó tʼáá áłtso naadeełii bił béédahózinígíí, dóó tʼáá háí shį́į́ deeshááł nízinígíí, bíniʼdii doogááł, áádóó tsin sitsʼaaʼ, dóó chʼó, dóó ńdíshchííʼ chodeidooʼįįłígíí nidahohjááh, tʼáá altso tsin nahasdzáán bikááʼgóó ayóó ádanoolninii ahandahidoohjih;

27 Áádóó béésh dootłʼizhí, dóó béésh łichʼííʼii, dóó béésh łitsoii, dóó béésh dootłʼizh bił, áádóó tʼáá ałtso nahasdzáán bikáaʼgi daʼílíinii bił ndahohnééh; shízhiʼ bichʼįʼ shighan ádadoołííł, áko Tsʼídá Aláahdi Ayóó Átʼéii áadi hólǫ́ǫ doo.

28 Háálá nááná łahgi niʼ bikáaʼgi nídoodááł éí doo bééhózin da dóó nihitsʼą́ą́ʼ doo béédahoozinée ninéidoodlééł, éí doodago tʼáá bí dah néidiidlahą́ą, éí tʼáá átʼé diyin bibeʼadziilii ninályahę́ę ndi.

29 Háálá tó bee alzį́į́h biyiʼ álʼínígíí doo łaʼ nahasdzáán bikáaʼgi hólǫ́ǫ da, áko, nihikwáʼásiní ańdahaaskaiyę́ę bá, shikééʼ naazíinii tó bee nídabiʼdiilzį́į́h doo—

30 Háálá díí óʼoolʼįįł éí shighan góneʼ tʼéiyá ádaalʼį́, ákótʼáo tʼéiyá bee hoséłʼą́, téʼéʼį́ biiʼ naahkaiyę́ędą́ą́ʼ tʼéiyá, jó íídą́ą́ʼ éí shighan nidadoohʼááłgo doo nihá bíighah da ńtʼę́ę́ʼ.

31 Ákondi shí ánhidishní, tʼáá ánółtso shikééʼ nizoozíinii, shighan łaʼ ndadoohʼááł; áádóó hashį́į́ nízahgóó ahodoolzhish hooghan ádaałéehgo éí bee nihá hoołʼaʼ; áádóó ákweʼé hoolzhishgo tó bee alzį́į́h ádaałʼį́įgo bee nihá hoséłʼą́ą doo.

32 Ákondi shooh, díí bee nihoníʼánígíí bilááh hooshzhiizhgo ańdahaaskaiígíi bá tʼáá háidi da tó bee nídanihiʼdiilzį́į́hgo éí doo bee nihá hoséłʼą́ą da doo; ákondi díí biláhoozhiishgo díí doo bedaʼoołaagóó doo shisodizinjí atah danohłį́į da doo, áádóó ańdahaaskaiígíí ałdóʼ, ní Bóhólníihii nihiDiyin God.

33 Háálá tʼáá aaníigo Shí nihichʼįʼ haasdziih, áko bee nihoníʼánée bikʼehgo shighan ałtso hadadoołaago, éí ákweʼé ańdahaaskaiyę́ę bá tó bee alzį́į́h bee bá hazʼą́, áádóó éí tʼahdoo nahasdzáán álnééhę́ędą́ą́ʼ díí ádaałʼį́į dooleełgo bee nihootʼą́, éí biniinaa nihikwáʼásiní bá tó bee danihiʼdoolzį́ʼígíí doo nídideeshłééł da;

34 Háálá ákótʼáo diyin bibeʼadziilii bibee ąą ńdítį́hí diyingo niilyá, áko nihaahodooʼnih dóó ayóó átʼéii nihąąh ndahidoolyééł.

35 Áádóó díí bikééʼdóó, nihikwáʼásiní bá tó bee danihiʼdiilzį́įhgo, daʼníłtsʼą́ą́ʼgóó kéédahatʼínii, łahgo átʼáo ádaʼałʼínígíí doo shił aaníi da, ní Diyin Bóhólníihii.

36 Háálá éí Ziongi, dóó bistakes bił hadahoosdzohgóó, dóó Jerusalemgi, éí dahóyééʼdę́ę́ʼ deíkáhígíí bá hazʼą́ągo íishłaa, éí ákweʼé nihikwáʼásiní bá tó bee danihiʼdiilzį́į́h dooleeł.

37 Áádóó ałdóʼ, tʼáá aaníigo Shí nihichʼįʼ haasdziih, haash yitʼáo táádanihiʼdigisígíí shił tʼáá áko doo, háálá kin hadadoołaaígíí shízhiʼ binahjįʼ biyiʼ ádaʼoołʼį́įgo tʼéiyá?

38 Háálá, díí éí biniinaa Moses níbaal biiʼ hodílzinígíí hadidíílííł bidííniid, áko honoojį́į́góó deidooyééł, áádóó kéyah bee ahaʼdeetʼą́ądi kin ndeidooʼááł, áko ádaʼoolʼįįł bił ííshją́ą́ ádadoolnííł éí nahasdzáán tʼahdoo hadilnééhyę́ędą́ą́ʼ ndanilʼin ńtʼę́ę́ʼ.

39 Éí bąą, tʼáá aaníigo Shí nihichʼįʼ haasdziih, akʼah diyinii bee daʼoosį́ʼígíí, dóó bee nihitááʼágis, dóó nihikʼéí bá tó bee ndanihiʼdiilzį́hígíí, dóó hodílzingo áłah ndaahdleehígíí, dóó Levi biyeʼké yee náádaʼííłniihgo bééhániihyę́ę, áádóó diyin bighan ntsaa góneʼ tsʼídá hodílzin nihił ííshją́ą́ éʼełʼį́įgi ákweʼé Diyin bichʼįʼ háádaʼadzih, bibikʼeh óʼooʼníiłii índa yee nihwiizʼáanii, háálá éí bee Zion hadidoolnííł dóó áadi ííshją́ą́ éʼélʼį́į doo, áádóó ayóó átʼéii, baa hodooʼnih, dóó tʼáá ałtso bidineʼé, ádaʼoolʼįįł shighan hodílzin góneʼ ádaalyaaígíí aaníi dooleeł, éí tʼáá áłahjįʼ shidineʼé shízhiʼ dílzinígíí binahjįʼ ndadoohʼááł nábidishniih.

40 Áádóó tʼáá aaníigo Shí nihichʼįʼ haasdziih, díí kin shízhiʼ binahjįʼ ndadoohʼááł bididííniił, áko shee óʼoolʼįįł shidineʼé ákóneʼí bił ííshjání ádeeshłííł;

41 Háálá tʼahdoo nahasdzáán álnééhę́ędą́ą́ʼ díí ádaʼoolʼįįł bitsʼąą nanilʼínée shisodizin daʼatahígíí bił ííshją́ą́ ádeeshłííł nisin, éí Diyin binaanish nihokáaʼgi bídadéétʼiʼígíí ałtso ádaalyaago.

42 Áádóó shá naalʼaʼí Joseph tʼáá ałtso díí kin bídadéétʼiʼígíí bíł ííshją́ą́ ádadeeshłííł, áádóó diyin bibeʼadziilii ałdóʼ, áádóó haaʼígi diyin bighan nidootʼáłígíí ałdóʼ.

43 Áádóó ndootʼááł danohsingi ndadoohʼááł, háálá Shí éí ákweʼé ndadoohʼááłgo nihá nisin.

44 Niheʼadziil tʼáá átʼé yéego bee nidaałnishgo, ákweʼé hodílzingo ádeeshłííł.

45 Áádóó shidineʼé shizaad yikʼeh dahółʼį́įgo, dóó shá ndaalʼaʼí nídaháláʼígíí biinééʼ yikʼeh dahółʼį́į doo éí shidineʼé deiyíʼéésh doo, áko shooh, tʼáá aaníigo Shí nihichʼįʼ haasdziih, áko bił nidahazʼą́ą́dóó doo nahjįʼ kódabidiʼdoolnííł da.

46 Ákondi shizaad doo yikʼeh dahółʼį́į́góó, dóó hastʼóí náháláʼígíí doo biinééʼ yikʼeh dahółʼį́į́góó, éí doo bikʼihojidoodliił da, háálá hodílzingo hazʼą́ągi ndeiyiiłchxǫǫh, áádóó shidiyingo ádaʼoolʼįįł ałdóʼ, dóó naaltsoos beehazʼáanii dabikááʼígíí, áádóó shizaad dílzingo bee bichʼįʼ haasdzíʼígíí ałdóʼ.

47 Áádóó shízhiʼ binahjįʼ kin ádadoołííłjįʼ ahoolzhiizhgo, bee nihichʼįʼ yáshtiʼígíí doo ádaołʼį́įgóó, bee ahadaʼsidiitʼánée doo beʼdeeshłííł da, áádóó ałdoʼ ádee bee hadahisoodzíʼę́ę badaʼíínółíhę́ę ałdóʼ.

48 Háálá nihikʼihojidlíi dooyę́ę, nihí, tʼáá nihi ádaʼołʼį́įgo, yíi, dóó áháchįʼ, dóó báhádzidii, índa tʼáá nihí ádándaʼdiyohtʼaah, ndaʼiyohsííhgo, dóó tʼáá ánółtso íiyisíí daołachʼį́įdii, shidááhdóó ádaołʼį́, ní Diyin Bóhólníihii.

49 Tʼáá aaníi, Tʼáá aaníigo, ánhidishní, áko nihokááʼ dineʼé biyeʼké shízhiʼ binahjįʼ naanish ádadoołííł bidishníigo, áádóó éí nihokááʼ dineʼé biyeʼké tʼáá átʼé bibeʼadziilii dóó tʼáá áłtsoní yee naanish ádeiyiilaago, dóó doo niʼ danilį́į́góó, dóó beʼanaʼí bikʼijįʼ deeskaigo dóó éí naanish ádeidoolíłígíí niʼ kódeidoolííł ndi, áko shooh, shi íínísingo nihokááʼ dineʼé biyeʼké éí naanishígíí niʼ kódeidoolííł, ákondi náádeiyiisniiʼígíí éí bee lą́ aséłį́į́ʼ doo.

50 Áádóó shibeehazʼáanii dílzinii dóó bee hahasdziiʼii nichxǫʼígo naalyéego dóó kʼídahatííhgo éí shinaanish niʼ kódeileʼígíí atídadeeshłííł, tááʼ dóó dį́į́ʼ ałkééʼ daʼíchíígóó ndi, éí doo ádaa nídaʼookąąhgóó, dóó tʼáá dashijoołáago, ní Bóhólníihii Diyin God.

51 Ákohgo, Jackson, Missouri hahoodzodi, díí kintah dóó kin shízhiʼ binahjįʼ ádadoohłííł biʼdooʼniidę́ę, beʼanaʼí niʼ kódabiilaa ndi, bá lą́ aséłį́į́ʼ, ní Bóhólníihii niDiyin God.

52 Áádóó, ádá nahwiitʼaah, áháchįʼ, dóó báhádzidii, índa dajichah, áádóó yéego achʼįʼ nahwiiʼná, dóó biwooʼ ahídeidiłkʼash doogo bichʼįʼ kódadeeshłííł, náásgóó, tááʼ dóó dį́į́ʼ ałkééʼ daʼachííhjįʼ, doo ádaa ńdaʼookąąhgóó dóó dashijoołáágóó, ní Bóhólníihii niDiyin God.

53 Áádóó bikʼehgo eʼélʼíinii átʼéego nihá ádeeshłííł, dóó díí tʼáá ałtso naanish ádadoohłííł dabiʼdooʼniid dóó anaʼí niʼ kódabiilaago atidabiʼdiilyaaígíí, bá yáʼátʼééh doo biniyé, ní Bóhólníihii niDiyin God.

54 Háálá Shí Bóhólníihii niDiyin God nishłį́, dóó tʼáá ałtso nihikʼisoo bijéí daniłtólígíí, dóó Missouri kéyahdi ndabiʼdiztseedígíí, yisdáʼdeeshnił, ní Diyin Bóhólníihii.

55 Áádóó nááná, tʼáá aaníigo Shí nihichʼįʼ haasdziih, shízhiʼ binahjįʼ kin łaʼ ánáádaahdlééh nihidishní, kweʼé ndi, áko tʼáá ałtso ádadoołííł nihidishninígíí yéego deinohdlą́ągo bee shichʼįʼ ííshjání ádadiʼdoołnííł, dóó hoolʼáágóó Diyin bił iiná dóó iiná doo ninítʼiʼii nihitsiijįʼ bee nihaadahodooʼnihgo bee nihikʼihoozhdeeshdliił.

56 Áádóó áko Shí nihichʼįʼ haasdziih, díí shikin biiʼ ńdaʼnijah tʼáá háiida chʼaanaagháago yiiʼ biidoołkáałgo ádadoołííł nihidííniidyę́ę bídéétʼiʼ, shízhiʼ binahjįʼ ádoolnííł bididííniił, shízhiʼ biniyé ádoolnííł bididííniił, Joseph dóó baʼáłchíní yiyiʼ kééhatʼį́į doo bididííniił, tʼáá náás daʼáchííhgóó ałkééʼ ahoolʼáa doo.

57 Háálá díí éí bee bikʼidiishniiʼ, Áko bee bikʼihojisdliʼígíí náásgóó baʼáłchíní ałdóʼ bee bikʼihojidoodliił.

58 Áádóó Abraham nahasdzáán bikáaʼgi ałʼąą dineʼé bił nidahazʼáanii bídéétʼiʼígíí bee bił hweeshneʼígi átʼáo, ákótʼáo shá naalʼaʼí Joseph bee bił hweeshneʼ: Nahasdzáán bikáaʼgi nitsʼą́ą́dóó yichíiłii bee ałʼąą dineʼé tʼáá ałtso bikʼihozhdoodliił.

59 Éí bąą, shá naalʼaʼí Joseph dóó baʼáłchíní náás daʼahílchíihii díí kin yiyiʼ kéédahatʼíinii bididííniił, tʼáá náás daʼáchííhgóó ałkééʼ ahoolʼáa doo, hoolʼáágóó dóó ahoyoolʼáágóó, ní Diyin Bóhólníihii.

60 Áádóó éí kin Nauvoo Hooghan bee yídóojiił; áádóó diné ákweʼé ndahakáahgo bił yáʼádaatʼéeh doo bididííniił, dóó chʼaanidaakaigo chʼééhdadeeskaiígíí nizhónígo yiiʼ háádahalyį́į́h doo, áko Zion biʼayóó átʼéii yaa ntsídaakees doo, áádóó díí, tsé á siʼáanii bee naanáʼástłʼinii biʼayóó átʼéii ałdóʼ;

61 Áko éí diné kéyah bikááʼgóó nidaʼntʼąʼgo ndahonitingo bee hwééhoʼdílzingo ádeeshłííł, áádóó kin dah shijaaʼ yá hadaʼasíidii danilį́į doo.

62 Áko shooh, tʼáá aaníigo Shí nihichʼįʼ haasdziih, shá naalʼaʼí George Miller, dóó shá naalʼaʼí Lyman Wight, dóó shá naalʼaʼí John Snider, dóó shá naalʼaʼí Peter Haws, hashtʼeʼ ádadiʼdoolnííł, dóó ndahaʼáhígíí yilą́ąjįʼ sizíinii łaʼ yikʼi dadidoolnih áko éí kin ádoolníłígíí yikʼi déezʼį́į́ʼ doo bididííniił.

63 Áádóó bee hazʼáanii bikʼehgo yilwoł dooleełígíí hadeididoolííł, éí hooghan ályaaígíí bitsʼą́ą́dóó béeso ádeiłʼį́į doo.

64 Áádóó łahdóó kin niitʼánígíí bitsʼą́ą́dóó ashdladiin béeso tʼáá bichʼįʼdóó doo bichʼįʼ nidoolyééł da, áádóó łahdóó kin niitʼánígíí bitsʼą́ą́dóó ashdlaʼáadahdi mííl béeso tʼáá háiida bee nínilgo tʼáá áko dooleeł.

65 Ákondi tʼáá háiida bitsʼą́ą́dóó ashdlaʼáadahdi mííl bilááh béeso doo baa dooʼnił da.

66 Áádóó łahdóó kin niitʼánígíí bitsʼą́ą́dóó ashdladiin béeso tʼáá bichʼįʼdóó doo bichʼįʼ nidoolyééł da éí tʼáá háiida bitsʼą́ą́dóó.

67 Áádóó díí kin niitʼą́ągo béeso yee ákáʼeelwodígíí, éí doo tʼóó bóhólníhígíí yił nidaalnish da doo, tʼáá hazhóʼó naalyéhí bá hooghan binaaltsoos bí dooleełgo béeso yee naʼníláago tʼéiyá;

68 Áádóó ánéilą́ą́ʼ béeso neiníláhígíí éí bikʼehgo naalyéhí bá hooghan łahdóó bí dooleeł; ndi tʼáadoo łaʼ béeso neiníláágóó éí naalyéhí bá hooghan doo łahdóó bí da dooleeł.

69 Áádóó háiida béeso neiníláágóó éí hooghan biiʼ daʼíníísh álnéhígíí łahdóó bí dooleeł, éí tʼáá bí ádá doo, áádóó náásgóó baʼáłchínígíí ałdóʼ bá, hoolʼáágóó ahóyéelʼáágóó, tʼáá bí dóó baʼáłchíní badaʼdoolyéłígíí hooghan biiʼ daʼanííshígíí tʼáá hashį́į́ nízahjįʼ bá bóhoneedzą́ągo deiyótąʼ doo, dóó doo baa ndahidoonihgóó éí doodaiiʼ tʼáá bí ádeinízingo nááná łahjigo kódoolnííł, shi nihá nisinígíí ádaałaago, ní Bóhólníihii nihiDiyin God.

70 Áádóó ałdóʼ, tʼáá aaníigo Shí nihichʼįʼ haasdziih, shá naalʼaʼí George Miller, áádóó shá naalʼaʼí Lyman Wight, áádóó shá naalʼaʼí John Snider, áádóó shá naalʼaʼí Peter Haws, béeso, éí doodago kéyah béeso ánéelą́ą́ʼ bą́ą́h ílínígíí bééhózingo, nahalyéhígíí bílákʼeejaaʼgo, éí bichʼįʼ niilyáhígíí doo nááná łahjigo choidooʼįįł da, éí hooghan biiʼ daʼáníísh álnéhígíí bichʼįʼjigo tʼéiyá.

71 Áádóó éí nahalyéhígíí łahdóó nááná łahjigo chodeisʼįįdgo, éí hooghanígíí tʼéiyá bágo, stockholder doo yee lą́ asłį́į́ʼgóó, bąąh ílínígíí dį́įʼdi ánéilą́ągo tʼáadoo yikʼe nidaʼazláágóó dóó éí béeso nááná łahjigo chodeiyoosʼįįdgo, éí hooghanígíí bágo tʼéiyá, ákondi doo ákódaadzaagóó éí báhádzidii bichʼįʼ kódadoolnííł, áádóó hooghan ndootʼáłígíí yindaalnishę́ę bitsʼą́ą́dóó nahjįʼ hadahidooʼnił, ní Bóhólníihii Diyin God; háálá Shí, Diyin Bóhólníihii, Diyin God nishłį́, dóó díí éí doo tʼóó bee shaa oodloh da doo.

72 Tʼáá aaníigo Shí nihichʼįʼ haasdziih, shá naalʼaʼí Joseph éí hooghan álnéhígíí bá béeso bilákʼeidíínił bididííniił, tʼáá bí íinízinígíí bikʼehgo; ákondi shá naalʼaʼí Joseph éí hooghan ashdlaʼáadah dimííl yikʼeh niʼdooléełgo doo bá bíighah da, éí doodago ashdladiin béeso tʼáá bichʼįʼgo ałdóʼ; nááná łaʼ diné ałdóʼ díigi átʼáo béeso neidoolééłgo doo bá dabíighah da, ní Diyin Bóhólníihii.

73 Áádóó nááná łaʼ diné ałdóʼ bá nisinígíí shił bééhodoozįįł danízin, háálá éí yee shichʼįʼ nidaʼádéíłkid.

74 Éí bąą, shá naalʼaʼí Vinson Knight bídéétʼiʼígíí Shí bee nihichʼįʼ haasdziih, shí nisinígíí áyiilaago tʼáá bí ádá kin álnéehjįʼ béeso ádíínił bididííniił, áádóó bikééʼdóó daʼáchíhígíí ałdóʼ yá, hoolʼáágóó ahóyéelʼáágóó.

75 Áádóó nízhí nízaadgóó dóó ayóó íítsʼaʼgo ádíílííł bididííniił, diné bitahgóó, éí baa dahojoobáʼígíí dóó bichʼįʼ anídahaztʼiʼígíí yá náʼiidookąął; dóó doo chʼééh íídoołʼįįł da, áádóó bijéí ałdóʼ doo bąąh nahodookał da; áádóó Shí éí yaa náʼookąąhígíí bee lą́ ádeeshłííł, háálá Cain nááʼiisniiʼígi átʼáo éí doo íidoolííł da, háálá éí shí dooleeł, ní Diyin Bóhólníihii.

76 Baʼáłchíní dóó beʼasdzáá yaa bił dahózhǫ́ǫ doo dóó yaa tiʼdahoníhę́ę bitsʼą́ąjigo nídadoohyis bididííniił; háálá shí nídiiłtį́ dóó bikʼi diishniiʼ, áádóó bighan biyiʼ bá hodílzin doo, háálá tʼáá ałtso bibąąhági ádaatʼéii bee baa nídiʼdeeshʼááł, ní Diyin Bóhólníihii. Amen.

77 Tʼáá aaníigo Shí nihichʼįʼ haasdziih, shá naalʼaʼí Hyrum tʼáá bí íinízinígíí bikʼehgo kin álnéehjįʼ béeso adíínił bididííniił, tʼáá bí ádá dóó bikééʼdóó daʼáchíhígíí ałdóʼ bá, hoolʼáágóó ahóyéelʼáágóó.

78 Shá naalʼaʼí Isaac Galland kin álnéehjįʼ béeso adíínił bididííniił; háálá Shí, Diyin Bóhólníihii, naanish íyiilaaígíí biniinaa ayóóʼííníshní, dóó tʼáá ałtso bibąąhági ádaatʼéii bee baa nídiʼdeeshʼááł; éí bąą, éí hooghan álnéhígíí łahdóó bígo bee bééhaʼniih doo bididííniił hoolʼáágóó ahóyéelʼáágóó.

79 Shá naalʼaʼí Isaac Galland nihitahdóó bikʼihodidoonih bididííniił, dóó shá naalʼaʼí William Marks yidoosį́į́ł, dóó yikʼihojidoodliił, áko shá naalʼaʼí Hyrum yił yiʼash doo éí shá naalʼaʼí Joseph naanish ádoohłííł yidííniidyę́ę íidoolííł, áádóó tʼáá áłah yéego bikʼihojidoodliił.

80 Shá naalʼaʼí William Marks tʼáá bí íinízinígíí bikʼehgo, kin álnéehjįʼ béeso adíínił bididííniił, tʼáá bí ádá dóó bikééʼdóó daʼáchíhígíí ałdóʼ bá, hoolʼáágóó ahóyéelʼáágóó.

81 Shá naalʼaʼí Henry G. Sherwood tʼáá bí íinízinígíí bikʼehgo, kin álnéehjįʼ béeso ádíínił bididííniił, tʼáá bí ádá dóó bikééʼdóó bílástsiiʼ ałdóʼ, hoolʼáágóó ahóyéelʼáágóó.

82 Shá naalʼaʼí William Law tʼáá bí íinízinígíí bikʼehgo, kin álnéehjįʼ béeso adíínił bididííniił, tʼáá bí ádá dóó bikééʼdóó bílástsiiʼ ałdóʼ, hoolʼáágóó ahóyéelʼáágóó.

83 Shí nisinígíí áyiilaago baʼáłchíní kéyah haʼaʼaahjigo naaznilígíí bichʼįʼ dahdidookááh lágo bididííniił, Kirtlandjįʼ ndi; ákótʼée ndi, Shí, Diyin Bóhólníihii, Kirtland hadideeshłííł, ákondi Shí, Diyin Bóhólníihii, ákweʼé kéédahatʼínígíí atíʼálʼį́ bá hashtʼeeshłaa.

84 Áádóó shá naalʼaʼí Almon Babbitt bił, tʼáá ląʼí tʼáadoo leʼé doo baa shił yáʼátʼééh da; áko shooh, bee nihoníʼánígíí doo yikʼeh áʼdoolííł nízin da ákondi tʼáá bí yaa nitsézkéézígíí tʼéiyá beʼdeeshłííl nízin, Tsʼídá Alą́ąjįʼ shiSodizin Bá Hooghan bee Bídahólníhígíí ndi; áádóó éí shidineʼé béégashii yázhí óolaa bee hadilyaago yá dahodísin doogo áyiilaa.

85 Łaʼ diné kweʼé níyáhígíí shibee hazʼáanii yikʼeh hółʼį́ nízinígíí éí doo kodóó dahdidoogááł da.

86 Kweʼé kéédahoohtʼį́įgo éí shikʼehgo dahinohnáa doo bididííniił; áádóó danohnééhgo shichʼįʼ danohnée doo bididííniił; háálá tʼáá ałtso binaanish yitsʼą́ą́dóó háádadoolyįh, áádóó binaanish ádeiłʼínée yinínáádaalnish doo.

87 Éí bąą, shá naalʼaʼí William shaʼólíi doo bididííniił, áádóó baʼáłchíní dóó beʼesdzą́ą́ yá náldzidę́ę doo yąąh bíníʼ da dooleeł, háálá kéyah bikááʼgóó naałniih hólónígíí biniinaa. Ayóóʼádahshíínóhníigo, éí shibee hazʼáanii bikʼeh dahonołʼį́į doo; áádóó kéyah bikááʼgóó naałniihígíí éí nihiʼayóó átʼéii yíkáʼadoolwoł.

88 Shá naalʼaʼí William shinahatʼá bee yisdáʼiildéehii doo ninítʼiʼii bizhí yee ayóó íítsʼaʼgo yaa halneʼ doo, áádóó ayóó átʼáo bíł hózhǫ́ǫgo, éí shiʼIiʼ Sizį́ Diyinii nabiiłnáago, éí Warsawgi kéédahatʼínígíí bichʼįʼ, dóó Carthagegi kéédahatʼínígíí ałdóʼ bichʼįʼ, dóó Burlingtongi kéédahatʼínígíí ałdóʼ bichʼįʼ, dóó Madisongi kéédahatʼínígíí ałdóʼ bichʼįʼ, áádóó shi ntsaago áłah aleehdi łaʼ naʼnitin bee nihił nááhodoonihígíí hazhóʼó bá hashtʼeʼádadíínółzin dóó wołí bee bíkáʼádaahtʼį́ bididííniił, ní Diyin Bóhólníihii.

89 Shí nisinígíí ííléehgo shá naalʼaʼí Joseph yee naʼnitinígíí kodóó bikʼeh hóníłʼį́į doo bididííniił, dóó tʼáá bí binaalyéhí bee baa dahojoobáʼígíí yee yíkáʼanálwoʼ dooleeł, dóó shizaad dílzinígíí tʼáá ániidgo ánálnéhígíí naaltsoos yee neidooʼááł éí nahasdzáán yikááʼ kéédahatʼíinii bichʼįʼ kódoolnííł.

90 Áádóó díí yeʼiilaago Shí ląʼígo akʼihojídlí bee bikʼihozhdeeshdliił, áko doo tʼóó baa hodiyooʼnah da, éí doodago bílástsiiʼ doo bááh yíká daʼdóokeed da doo.

91 Áádóó ałdóʼ, tʼáá aaníigo Shí nihichʼįʼ haasdziih, shá naalʼaʼí William nídidooltééł, bidiʼdoolzį́į́ł, dóó akʼah bee bá sohodidoozįįł, éí shá naalʼaʼí Joseph yíkáʼanálwoʼ doo biniyé, éí shá naalʼaʼí Hyrum bikékʼehjįʼ adoogááł, áko shá naalʼaʼí Hyrum éí Diyin Bibeʼadziilii dóó Á Sodilzinii binaanish ííłʼį́įgo ádoolnííł bididííniił, éí naanish biniyé bizhéʼé nábidiiłʼtį́, éí bee bikʼi sohodoozinígíí dóó alą́ąjįʼ naagháhígíí ałdóʼ biniinaa;

92 Áko kodóóʼ ásohodizin bee akʼihojídlí bibee ąą ńdítį́hí bee hólǫ́ǫgo tʼáá ałtso shidineʼé yitsiitʼááh dahdéisniiʼgo yá sodizin ííłʼį́į doo,

93 Áko tʼáá háí shį́į́ yikʼi sodilzinígíí bikʼihojidoodliił, áádóó tʼáá háí shį́į́ hóyéeʼgo yá haadzíiʼgo eí hóyéeʼii bichʼįʼ kódoolnííł; áko haʼátʼíhída nahasdzáán bikáaʼgi bee ádaazhdeetʼánígíí, tʼáá éí yáʼąąshdi bee ádaahodeetʼą́ą doo; índa haʼátʼíida nahasdzáán bikáaʼgi nahjįʼ kwíinlaaígíí, tʼáá éí yáʼąąshdi nahjįʼ kódoolnííł.

94 Áádóó kodóóʼ dóó ahoolʼáágóó Diyin yá yáłtiʼí, dóó diyingo ooʼíinii, dóó shisodizin bá hooghan yá diyingo bił ííshją́ą́ éʼélʼíinii nilį́į doogo bee bikʼi diishniiʼ, éí shá naalʼaʼí Joseph átʼéhígi átʼáo;

95 Áko éí ałdóʼ shá naalʼaʼí Joseph tʼááłáʼí yił nilį́įgo ahił naalnish doo; áádóó shá naalʼaʼí Joseph nabinitin doo, éí bee ąą ńdítį́hí binahjįʼ sodizin yee naʼídíłkid dóó binahjįʼ bił náhánih dooígíí yee neidínóotʼįįł, dóó akʼihojídlí, dóó ayóó átʼéii, dóó há dahodísin doo, dóó Diyin bibeʼadziilii, dóó Diyin bibeʼadziilii biʼaadaʼályéii bąąh nidoolyééł, éí shá naalʼaʼí Oliver Cowdery łah tʼáá ákótʼáo bąąh niilyáá ńtʼę́ę́ʼ, éíígi átʼáo bí ałdóʼ bąąh nidoolyééł;

96 Áko shá naalʼaʼí Hyrum bił ííshją́ą́ ádeeshłíłígíí tʼáá aaníigo yaa hodoolnih, áko bízhiʼ hoolʼáágóó ahóyéelʼáágóó, ayóó átʼáo bee bééhaniih dooleeł.

97 Shá naalʼaʼí William Law ałdóʼ bee ąą ńdítį́hí baa doojih áko éí binahjįʼ sodizin yee naʼídíłkidgo bikʼihojidlíi dooleeł bididííniił; shidááhdóó aʼohgo ádólzin doo bididííniił, dóó baʼátʼeʼ ádin doo, áko shiʼIiʼ Sizį́ Diyinii bee hólǫ́ǫ doo, Aaʼáhályáanii ndi, éí tʼáá ałtsoní tʼáá daʼanííʼígíí yił ííshją́ą́ ííłʼį́į doo bididííniił, dóó yee hadoodzihígíí, tsʼídá yee hadoodzihígi, yaa yiilée doo.

98 Áádóó Diyin God bitsʼą́ą́dóó béédahózinii kódaatʼéhígíí áyoolíiłgo yíneelʼą́ą doo—bitah dahoneezgaiígíí néídoołdzih, chʼį́įdii bidaʼiiníziinii ayiʼdę́ę́ʼ hainiłkaad doo, áadóó háiida haʼátʼíhígíí da daʼagháanii bídeiyíłdlą́ągo doo atíbidoolíił da;

99 Áádóó tłʼiish daʼagháanii doo bikétal yidoołhashgóó boolóós doo, áádóó atsá bitʼaʼ yikááʼ dah sidáago yá biyiʼjigo bił yitʼahgo ntsékees doo.

100 Áádóó diné daneeznáanii hinááh anídeidleʼgo baadiníʼą́ągo shąʼ, nizhí tʼáadoo tʼą́ą́ʼ yínítąʼí bididííniił.

101 Éí bąą, shá naalʼaʼí William yéego hodiitsʼaʼgo náʼookąąh doo dóó doo łaʼ yichʼįʼ yistiʼ da doo bididííniił, ił hózhǫ́ dóó baa hózhóonii bił hólǫ́ǫgo, áádóó hoolʼáágóó ahóyéelʼáágóó hosanna bidiʼníi doo natʼáá bikááʼ dah asdáhí yikááʼ dah sidáii, ní Bóhólníihii nihiDiyin God.

102 Áko shooh, Shí nihichʼįʼ haasdziih, shá naalʼaʼí William, dóó shá naalʼaʼí Hyrum, tʼáá bí tʼéiyá, naanish íidoolíłígíí bá hólǫ́ǫgo íishłaa; áádóó shá naalʼaʼí Joseph tʼáá hooghangi sínídáa doo bididííniił, háálá áadi binaanish hólǫ́. Áádóó łahjįʼígíí éí díí bikééʼdóó nihił ííshją́ą́ ádeeshłííł. Tʼáá ákótʼée doo. Amen.

103 Áádóó ałdóʼ, tʼáá aaníigo Shí nihichʼįʼ haasdziih, shá naalʼaʼí Sidney shá naalʼaʼgo dóó shá naalʼaʼí Joseph yił naalnishí nilį́įgo, yiizįįh dóó naanish bee nikʼihodiiniiʼígíí baa díínááł dóó ákweʼé díízįįł, dóó shidááhdóó aʼohgo ádiʼdidíílnííł bididííniił.

104 Áádóó naaʼiiniih bee lą́ adeeshłiiłígíí shichʼįʼ nááyiisniiʼgo, bee lą́ aséłį́įʼgo, dóó shidineʼé tʼáá yił naaldeehgo, áko shooh, Shí, Bóhólníihii nihiDiyin God, éí néidoołdzih áko haałtʼéego íidoolííł; áádóó dziłgą́ą́ʼgóó bízhiʼ yéego diitsʼaʼgo íidoolííł, dóó shidááhdóó shá halneʼii nilį́į doo.

105 Doogááł dóó shá naalʼaʼí Joseph kééhatʼínéegi baʼáłchíní bił nidíínééł bididííniił.

106 Áádóó tʼáá náábiʼdilaahgóó bizhí dilní diitsʼaʼ nahalingo de kódíílííł bididííniił, áádóó nihokááʼ dineʼé áháchįʼ bichʼįʼ kólnéhígíí yikʼee adahidínóochééł.

107 Shá naalʼaʼí Joseph bíkáʼadíílwoł bididííniił, áádóó ałdóʼ shá naalʼaʼí William Law shá naalʼaʼí Joseph yíkáʼadoolwoł bididííniił, nahasdzáán bikááʼgóó aláahdi naatʼáanii danilínígíí saad ílíinii yee yił chʼíidooʼááł, éí áłtséédą́ą́ʼ ánihidííniidyę́ęgi átʼáo.

108 Shá naalʼaʼí Sidney nisinígíí áyiilaago, bighan hazʼą́ kéyah haʼaʼaah siniljigo doo yił adoonéeł da, ákondi nááná łahgi nidíínééł bididííniił, Shí ádííniidígi átʼáo.

109 Áko shooh, kin dah shijaaʼ bá bikʼi diishniiʼyę́ę bilááhjigo chʼízhdínóochééł dóó yisdáʼjídínóochééłgo doo há nisin da, éí kin dah shijaaʼ Nauvoogi ááhdishní.

110 Tʼáá aaníigo Shí nihichʼįʼ haasdziih, kʼad ndi, shizaad yikʼeh hółʼį́įgo, éí bá yáʼátʼéeh doo. Tʼáá ákótʼée doo. Amen.

111 Áádóó ałdóʼ, tʼáá aaníigo Shí nihichʼįʼ haasdziih, shá naalʼaʼí Amos Davies éí kin biiʼ nídaʼnijahí ádeiléhígíí béeso yílákʼeidoojih áko łahdóó bí dooleeł bididííniił, éí Nauvoo Hooghan ááhdishní.

112 Díí tʼáá bí íinízingo ádíílííł bididííniił; áádóó shá naalʼaʼí Joseph nahaʼáhígíí yíísénéłtsʼą́ą bididííniił, dóó tʼáá bí bílaʼ yee íidoolííł áko diné bił danilį́į doo.

113 Áádóó tʼáá ałtsoní baadeetʼánígíí tʼáá aaníí ałtso íidoolííłgo bééhoozingo, aooʼ, azhą́ tʼįįhdígo íʼiilaa ndi, kʼad éí ląʼí bee bíhólníihgo ábidiʼdoolnííł;

114 Éí bąą aʼohgo ádiʼdoolnííł áko ayóó átʼéego ábidiʼdoolnííl bididííniił. Tʼáá ákótʼée doo. Amen.

115 Áádóó ałdóʼ, tʼáá aaníigo Shí nihichʼįʼ haasdziih, shá naalʼaʼí Robert D. Foster shizhí yikʼeh hółʼį́įgo, shá naalʼaʼí Joseph bá hooghan ádíílííł bididííniił, éí yee yił ahaʼdeetʼánígíí bikʼehgo, éí tʼáá háí shį́į́ nízaadjįʼ nináhálzhishgo dáádílkał bá ąą átʼée doo.

116 Áádóó tʼáá ałtso baa naʼíísínísihígíí baa ádaa náʼiidííkąął bididííniił, dóó Diyin bibee ajoobaʼ yee hadítʼée doo; dóó doo yáʼáshóonii yóóʼiididooʼááł, áádóó bikʼeʼashchʼííʼgo hanádzihę́ę nahjįʼ kwíidoolííł;

117 Áádóó ałdóʼ Nauvoo Hooghan ndootʼáałgo yindahaʼáhígíí béeso yílákʼeedoonił, éí tʼáá bí ádá áádóó náásgóó baʼáłchínígíí ałdóʼ bá, hoolʼáágóó ahóyéelʼáágóó;

118 Áádóó shá ndaalʼaʼí Joseph, dóó Hyrum, dóó William Law, dóó Zion hadeididoolíiłgo binaatʼáanii bikʼi dadiishniiʼígíí yikʼeh dahółʼį́į doo; áádóó bá yáʼátʼéeh doo hoolʼáágóó dóó ahóyéelʼáágóó. Tʼáá ákótʼée doo. Amen.

119 Áádóó ałdóʼ, tʼáá aaníigo Shí nihichʼįʼ haasdziih, Nauvoo Hooghan ndootʼáałgo yindahaʼáhígíí diné doo łaʼ béeso yílákʼeedoonił da tʼáa hazhóʼó Naaltsoos Mormon Wolyéhígíí, dóó diyingo nihił ííshją́ą́ áshłaaígíí yoodlą́ągo tʼéiyá, ní Bóhólníihii nihiDiyin God;

120 Háálá díí bilááh éí doodago biʼohgo éí chʼį́įdii biʼiiníziinii bitsʼą́ą́dę́ę́ʼ átʼé, áádóó éí hóyéeʼgo bá haʼdoodzih dóó éí akʼihojídlí bee da, ní Bóhólníihii nihiDiyin God. Tʼáá ákótʼée doo. Amen.

121 Áádóó ałdóʼ, tʼáá aaníigo Shí nihichʼįʼ haasdziih, Nauvoo Hooghan ndootʼáałgo yindahaʼáhígíí éí Nauvoo Hooghan tʼáá átʼé yinádaalnishígíí yinádaalnishgo beełtʼéego bichʼįʼ náádaʼalyééh doo bididííniił; áádóó béeso bikʼeh niʼdoonishgo yee lą́ daʼasłíʼígíí, éí bikʼehgo bichʼįʼ nidaʼdoolyééł.

122 Áádóó tʼáá háí shį́į́ béeso neiyiiléhígíí éí naashnishgo béeso áyiilaaígíí łahdóó neidoolééł, díí nidzingo éí ákódoonííł, háálá éí bee áajigo bikáʼadoowoł, ní Diyin Bóhólníihii; doo ákótʼéégóó éí, hooghan ádeiléhígíí yininádaalnishgo éí béeso yichʼįʼ nideiyiilé nahalin doo. Tʼáá ákótʼée doo. Amen.

123 Tʼáá aaníigo Shí nihichʼįʼ haasdziih, Shí éí kʼad Diyin Bibeʼadziilii dahdeiyóolééłgo yindaalnishígíí nihił ííshją́ą́ áshłééh, éí bee ąą ńdítį́hí dahdeiyójááh doo, éí Diyin Bibeʼadziilii Melchizedek bił ałkééʼ dah nahazʼą́ bikʼehgo, áádóó shiYeʼ Tʼáá Éí Tʼéiyá Shá Yizhchíinii biʼałkééʼ dah nahazʼánígíí bikʼehgo.

124 Áłtsé éí, Hyrum Smith éí á sodilzinii nihá nílį́į doogo ádeeshłííł, éí shisodizin bá hooghanjí akʼi dahojídlí aa dahalyéhígíí dahyoolééł dooleeł, Iiʼ Sizį́ Diyinii yee ádee haadzíiʼii yee, éí nináʼdoolyééłjįʼ ahoolzhiizhgo nihikʼéstiʼ doo, áko nanihiʼdilkaah nihikʼihooleʼgo doo adanihidoolóós da.

125 Shí éí shá naalʼaʼí Joseph tʼáá ałtso shisodizin bá hooghangóó elder yikʼi déezʼį́į́ʼ doogo ádeeshłííł, dóó ataʼ halneʼii, diyingo bił ííshją́ą́ éʼélʼíinii, diyingo ooʼíinii, dóó Diyin yá yáłtiʼí nilį́į dooleeł.

126 Shá naalʼaʼí Sidney Rigdon dóó shá naalʼaʼí William Law bíkáʼanáhiʼnilchééh doogo ádeeshłííł, áko díí éí áłah náʼadleehgo akʼi dahwéeʼaah doo dóó Tsʼídá Alą́ąjįʼ Bídahólníhígíí danilį́į doo, éí tʼáá ałtso sodizin bá hooghan yá diyingo bił ííshją́ą́ ádaʼalʼį́į doo.

127 Shá naalʼaʼí Brigham Young éí Naakitsʼáadah alą́ąjįʼ ándahaʼáii nízaadgóó nidaakaiígíí yilą́ąjįʼ sizį́į doogo ádeeshłííł;

128 Éí Naakitsʼáadah bee ąą ńdítį́hí dah deiyójááhgo shił hazʼą́ądi óhólníihii éí tʼáá dį́į́ʼ adahwiisʼáágóó yee ąą ádeidoolííł, áádóó bikʼijįʼ nihokááʼ dineʼé tʼáá ałtso shizaad deididootsʼį́į́ł.

129 Éí éíí kódaalyé Heber C. Kimball, Parley P. Pratt, Orson Pratt, Orson Hyde, William Smith, John Taylor, John E. Page, Wilford Woodruff, Willard Richards, dóó George A. Smith;

130 David Patten éí shił hólǫ́ǫ dooleełgo náádiiłtį́; ako shooh, Diyin bibeʼadziilii beiyílyáhígíí doo nááná łaʼ diné bighaidoolééł da; ákondi, tʼáá aaníigo Shí nihichʼįʼ haasdziih, éí dah sidáhę́ę góneʼ nááná łaʼ da tʼáá éí bee bikʼihodidoonih.

131 Áádóó ałdóʼ, Shí nihichʼįʼ haasdziih, alą́ąjįʼ ándahaʼáii, Zion bitsé á siʼáanii bee naanáʼástłʼinii danilį́į doogo nihá áshłaa—

132 Íiyisíígíí éí, Samuel Bent, Henry G. Sherwood, George W. Harris, Charles C. Rich, Thomas Grover, Newel Knight, David Dort, Dunbar Wilson—Seymour Brunson éí shił holǫ́ǫ dooleełgo náádiiłtį́; Diyin bibeʼadziilii beiyílyáhígíí doo nááná łaʼ diné bighaidoolééł da, ákondi éí dah sidáhę́ę góneʼ nááná łaʼ da tʼáá éí bee bikʼihodidoonih; áádóó tʼáá aaníigo Shí nihichʼįʼ haasdziih, shá naalʼaʼí Aaron Johnson bitsáskʼeh góneʼ díí naanish bee nikʼihodidoonih bididííniił—éí David Fullmer, Alpheus Cutler, dóó William Huntington.

133 Áádóó ałdóʼ, Don C. Smith éí high priests alą́ąjįʼ ándahaʼáii yilą́ąjįʼ sizį́į doo;

134 Éí óʼóólʼįįł tʼáá ákǫ́ǫ́ alą́ąjįʼ naazíinii éí doodago ałʼąą stakes hadahaasdzohgóó yá ndaalʼaʼí daniilį́į doo biniyé hadadilyaa;

135 Áádóó ádeinízingo ałdóʼ yitahgóó nídadikah doo, ákondi tʼáá ákǫ́ǫ́ alą́ąjįʼ naazíinii yá dabidiʼdoolzį́į́ł; díí naanish éí biniyé bikʼi dahodiiniiʼ, ní Bóhólníihii nihiDiyin God.

136 Shá naalʼaʼí Amasa Lyman dóó Noah Packard bíkáʼanáhiʼnilchééh doo, shisodizin bá hooghan bihigh priest danilíinii yilą́ąjįʼ ándahaʼáii danilį́į doo, ní Diyin Bóhólníihii.

137 Áádóó ałdóʼ, Shí nihichʼįʼ haasdziih, John A. Hicks, Samuel Williams, dóó Jesse Baker, éí diyin bibeʼadziilii dahdeiyóléhígíí elders yilą́ąjįʼ ándahaʼáii yikʼi dadéezʼį́į́ʼ dooleeł, éí alą́ąjį́ʼ ándahaʼáii tʼáá ákǫ́ǫ́ alą́ąjįʼ Diyin yá nidaalnishgo ánaazíinii danilį́į doo; ákótʼée ndi diné yitahgóó nídadikah doo, ákondi tʼáá ákǫ́ǫ́ shisodizin bá hooghan yá alą́ąjįʼ ndaazíinii danilíi doo, ní Diyin Bóhólníihii.

138 Áádóó ałdóʼ, Joseph Young, Josiah Butterfield, Daniel Miles, Henry Herriman, Zera Pulsipher, Levi Hancock, dóó James Foster, éí tsostsʼidiin aląąjiʼ ándahaʼáii dah yikahígíí yikʼi dadéezʼííʼ doo;

139 Éí alą́ąjįʼ ándahaʼáii éí nahasdzáán bikááʼ tʼáá ałtsogóó elders danilíinii tádadikááh bá hahodiilyaagóó shízhiʼ tʼáá aaníigo yaa dahalneʼ doo, tʼáá háágóó shį́į́ alą́ąjįʼ ándahaʼáii nízaadgóó nidaakaiígíí, shihastóí naakitsʼáadah, shidááhdóó hashtʼedahoolííłgo nídabiʼdilʼaah doo.

140 Díí alą́ąjįʼ ndahaʼáhígíí éí elder danilíinii alą́ąjįʼ ndahaʼáii éí ałʼąą átʼé łaʼ éí tʼáá áłahjįʼ tádadikááh, dóó łaʼ éí tʼáá hashį́į́ nízaadjįʼ nináhálzhishgo sodizin bá hooghan yikʼi dadéezʼį́į́ʼ; łaʼígíí tʼáá hashį́į́ nízaadjįʼ nináhálzhishgo akʼi déezʼį́į́ʼ łeh, áádóó nááná łaʼígíí éí akʼiʼádeestʼį́į́ʼ doo bee bóhólníih da, ní Bóhólníihii nihiDiyin God.

141 Áádóó ałdóʼ, Shí nihichʼįʼ hanáánásdziih, Vinson Knight, Samuel H. Smith, dóó Shadrach Roundy, naanishʼéésh, lą́ biʼdooniidgo éí bishop dóó bikáʼanáhinilchéhígíí yikʼi bóhólnííh doo; bishop dóó bikáʼanáhinilchéhígíí naaltsoos Diyingo Naʼnitin dóó Bee Ahadaʼdeestʼáanii biyiʼ náháásdzoh.

142 Áádóó ałdóʼ, Shí nihichʼįʼ haasdziih, Samuel Rolfe dóó priest danilínígíí yił nidaalnishígíí, dóó teachers danilínígíí yilą́ąjįʼ sizínígíí dóó yił nidaalnishígíí, áádóó deacons danilínígíí yilą́ąjįʼ sizínígíí dóó yił nidaalnishígíí, dóó stake hahoodzoh yilą́ąjįʼ sizínígíí dóó yił nidaalnishígíí ałdóʼ.

143 Naanish ániid hódahgo bee nihikʼi diishniiʼígíí, dóó bee ąą ńdítį́hí bee, éí ákáʼaʼayeed dóó wáashindoon yíkáʼadoojah biniyé, háálá éí ákáʼanáʼáwoʼ binaanish dóó shikééʼ naazíinii hadaałtʼée dooleełígíí bá.

144 Áádóó bee hazʼáanii łaʼ bee nihichʼįʼ haasdziih, éí díí naanish nahazʼą́ dóó bízhiʼ deiyíízhiʼígíí tʼáá ałtso bee lą́ daʼdoohłeeł, éí doodago shi ntsaago áłah aleehdi doo bee lą́ daʼdoohłeeł da;

145 Áádóó shighan biyiʼdi díí naanishígíí bá nahazʼą́ągo bá hashtʼeʼ ádadoohłííł shízhiʼ bichʼįʼ bee ndasooʼą́ągo, ní Bóhólníihii nihiDiyin God. Tʼáá ákótʼée doo. Amen.