Wólta’ii 127
Diyin Yá Yáłti’í Joseph Smith éí Diyin Dííshjį́įdi Yá Naazínígíí Nauvoo, Illinoisdiígíí díí naaltsoos yich’į’ áyiilaa, éí kwá’ásiní ańdahaaskaiígíí bá tó bee danihi’diilzį́į́h hait’áó ál’ínígíí yaa halne’, éí Nauvoodi, Bini’ant’ą́ą́tsoh 1 yoołkaałgo, 1842 yihahę́ędą́ą́’ ályaa.
1–4, Joseph Smith ach’į’ nahwii’ná dóó ti’hoo’nííh ayóó át’áó yaa tsídeezkééz; 5–12, Kwá’ásiní ańdahaaskaiígíí bá tó bee dabi’diilzį́hígíí naaltsoos bikáá’ bá ádaalne’ doo.
1 She’ana’í Diyin Bóhólníihii shił ííshją́ą́ áyiilaaígíí, Missouri dóó díí Hahoodzoh biyi’, shíkánináádei’á; dóó biniyé shíkánidei’á doo bééhózingo, dóó ha’át’íí biniyé shíkándei’á azhą́ áłts’íísí dóó t’áá aaníí ndi; díí ts’ídá yéego doo ákót’éii shá ndeiz’ą́ą da ndi, dóó t’óó honíshgháníjį’ tsx’į́įłgo dóó hódzą́ągo bits’ą́ą́jigo dahdideeshááł, háálá éí shí dóó shidine’é doo atí’danihi’didoonííł da biniyé. T’áá ałtsoní bił ndaashnishígíí ábidideeshniił, éí naanish yee háká’anídaajahígíí dóó naaltsoos nideich’idígíí éí t’áá ałtso naanish biyi’ ádadoolníłígíí tsx’į́įłgo dóó t’áá ákót’áo ádeidoolíiłgo baa diní’ą́, dóó shaa háá’áhę́ę t’ahdoo bee e’e’aahgóó yik’éh nida’doolééł, éí kéyah baa nahidoonihígíí bił béédahózin, éí doodago, nidzingo, éí doodago ádoolnííłgo. Díí t’áá át’é shik’ijį’ siláhígíí nahjį’ kódzaago, índa nihaa nídeeshdááł.
2 Áádóó báádahadzidii bii’ ndíínááł shi’dooniidígíí, éí t’áá áłts’íísíyee’ shił nahalin, háálá oolch’į́į́d dóó nihokáá’ dine’é dahashké éí t’áá ałtso shiiníłką́ą́’dę́ę́’ shił hólǫ́; áádóó ha’át’íí biniyéhígíí éí t’óó haashį́įt’é, éí yá’át’ééh biniyé t’ahdoo nahasdzáán álnééhę́ędą́ą́’ daats’í bee shik’ihodiinii’ ńt’ę́ę́’, éí doodago doo yá’át’ééhígíí daats’í, éí t’áá nihí hait’áo da bee deidóóshiił. Éí hait’áo baa ntsídadoohkosígíí t’áá nihí bee nihóhólnííh. Diyin God díí tʼáá átʼé bił bééhózin, yá’át’ééh daats’í éí doodago doo yá’át’ééh da. Ákót’ée ndi, tó ditánígíí bii’ na’ashkǫ́ǫ́’go bíníshdin. Díí t’aa ałtsoní t’áá áhą́ą́h bii’ tádísháhígíí biniinaa t’óó bíníshdin; dóó Paul át’éhígi át’áo, shídó’ ákónísht’é sélį́į́’, ach’į’ nahwii’ná shił ayóó át’é; háálá dííshjį́įdi shizhe’é biDiyin God t’áá ałtsoní bii’ yiisháłígíí biyi’dóó háshį́į́łtį́, áádóó kodóó’ yisdáshidoolóós; háálá áko shooh, dóó danół’į́, she’ena’í t’áá ałtso bik’ehdideeshdleeł, háálá Bóhólníihii Diyin God yee haadzíí’.
3 Bíni’dii t’áá át’é Diyin Yá Naazíinii bił dahózhǫ́, éí bąą, ts’ídá yéego bił dahodoozhǫǫł; háálá Israel biDiyin God éí dabiDiyin God, áádóó t’áá ałtsoní atídabił’ínígíí haanéelą́ą́’ bíighahgo bich’į’ ndahidoolyééł.
4 Áádóó ałdó’, Diyin Bóhólníihii t’áá aaníí kónihiłní: Bíni’dii shighan ntsaa bina’azhnishígíí, dóó t’áá ałtso naanish nihaa diní’ánígíí, éí doo nahjį’ kódaohłééhgóó t’áá náás bindaałnish doo; áádóó yéego bidadoołkaal doo, dóó yéego ádaaht’į́į doo, dóó hada’íínóhłį́į doo, ákót’áo nihinaanish naakidi ałhą́ą́h nániilyá dooleeł, áádóó dasoołbánígíí doo nihits’ą́ą́’ náádidoo’nił da, ní Diyin T’áá Ałtsoní bee Bóhólníihii. Áádóó atídanihiilaago, tʼáá díígi átʼéego nihiląąjįʼ Diyin yá yádaałti’ii dóó nihokáá’ dine’é t’áá ákogi át’áo áda’iilaaígíí atídeił’į́į́’ ńt’ę́ę́’. Háálá díí t’áá át’é yá’ąąshdi deidoołbįįłgo bá hólǫ́ǫ doo.
5 Áádóó ałdó’, nihikwá’ásiní ándahaaskaiígíí tó bee bá danihi’didoolzį́łígíí saad bídéét’i’ígíí ła’ bee nihich’į’ haasdziih.
6 T’áá aaníigo, Diyin Bóhólníihii nihikwá’ásiní bá tó bee danihidi’doolzį́łígíí kót’áo yee nihich’į’ haadzíí’: Nihikwá’ásiní bikéé’ ádahaasdįįdígíí bá tó bee danihi’doolzį́į́’go, bíni’dii na’iizóohii áhooníłígíí naaltsoos yikáá’ íidoolííł, áádóó bíni’dii díí tó bee oolzį́’ígíí yá oo’íinii nilį́į doo; bíni’dii bijaa’ yee adidoots’į́į́ł, áko t’áá aaníí ádahóót’įįdígíí yaa hodoolnih, ní Diyin Bóhólníihii;
7 T’áá ałtso nídaháásdzooígíí éí yá’ąąsdi ałdó’ nídaháásdzoh; áko ha’át’íhída nahasdzáán bikáa’gi bee ádaazhdeet’ánígíí, t’áá éí yá’ąąshdi bee ádaahodeet’ą́ą doo; índa ha’át’íida nahasdzáán bikáa’gi nahjį’ kwíinlaaígíí, t’áá éí yá’ąąshdi nahjį’ kódoolnííł;
8 Háálá lą’ída t’óó ahayóí t’áadoo le’é nahasdzáán bikáa’gi nináhideeshdlééł, éí diyin bibe’adziilii bídadéét’i’, ní Diyin T’áá Ałtsoní bee Bóhólníihii.
9 Áádóó ałdó’, bíni’dii t’áá ałtso baa nída’íísdzohyę́ę t’áá ałkéé’ sinil doo, áko shighan ntsaal diyingo ályaaígíí biyi’ hasht’e’nidoo’nił, áko hool’áágóó t’áá da’achííhgóó bízhi’ bééhániih doo, ní Diyin T’áá Ałtsoní bee Bóhólníihii.
10 T’áá ałtso Diyin Yikéé’ Naazíinii bich’į’ haasdziih, áko nisingo, ts’ídá t’áá íiyisíí nisingo, háá ádzihdóó kwá’ásiní andahaaskaaígíí bá tó dabi’diilzį́į́h bee bich’į’ hadeesdzih, éí Damóo Dahodílzin góne’. Ákondi doo she’adziil biighadą́ą́’, Diyin Bóhólníihii bizaad t’áá baa náhalzhizh góne’ náhásóóh dooleeł, éí baa hada’iisdzí’ígíí, dóó nihich’į’ áneish’įįh doo, dóó lą́ t’áadoo le’é ałdó’.
11 K’ad naaltsoos áshłéhígíí ni’ kóshłééh, naahoot’a’go nááná dooleeł; ana’í hada’nitah, dóó Yisdá’iiníiłii ání, díí nahasdzáán binaat’áanii yíghááh, ákondi doo shits’ą́ą́dóó’ yiníziní da.
12 Áko shooh, Diyin God nihá bich’į’ sodiszin áádóó nihiDiyin Bóhólníihii yá naal’a’í nishłį́. Áádóó Shí éí Jesus Christ Bisodizin Báhooghan Dííjį́įdi Yá Naazínígíí Diyin Bóhólníihii binahjį’ nihánaasha’í, Diyin yá yáłti’í dóó oo’íinii niishłį́.
Joseph Smith.