Wólta’ii 111
Diyin Yá Yáłti’í Joseph Smith díí diyingo bił ííshją́ą́ ályaa, Salem, Massachusettsdi, Bini’ant’ą́ą́ts’ózí 6, 1836 yihahgo. Áwe’é hoolzhishgo Sodizin yilą́ąjį’ naazínígíí nda’nitingo bindaanishígíí biniinaa t’áá íiyisíí béeso bąąh hadaaz’á. Salemdi béeso ląʼí sinil haʼníi´go Diyin Yá Yáłti’í, Sidney Rigdon, Hyrum Smith, dóó Oliver Cowdery, yaa ndeidínóotaał biniyé Kirtland, Ohiogóó, dahdiikai, ákǫ́ǫ́ yikahgo naʼnitin bee yisdáʼiildéehii ałdó’ yee ndaʼneeztą́ą́’. Díí ałkʼisoo danilíinii Sodizin binaʼanish bídéít’i’ígíí ádeiyiilaa dóó ndaʼneeztą́ą́’. Áko áadi béeso adinígíí biniinaa, Kirtlandgóó nákai. Díí diyingo ííshją́ą́ ályaaígíí biyi’ t’áá ííshjání ádahoodzaaígíí baa hane’.
1–5, Diyin Bóhólníihii éí Bá ndaalʼaʼí atsʼíískʼeh deinízinígíí yee yikʼidéézʼį́į́ʼ; 6–11, Zion daʼatahígíí yaa joobaʼgo yiká análwoʼ doo dóó tʼáá ałtsoní bá ndaalʼaʼí bá yáʼádaatʼéhígíí yá hashtʼéídoolííł.
1 Shí, Bóhólníihii nihiDiyin God, díí ákǫ́ǫ́ nohkaiígíí shił t’áá áko, azhą́ nda’ayoosíí’ ndi.
2 Háálá díí kin dashijaaʼ biyiʼ ląʼí daʼílíinii nihá hólǫ́, éí Zion bá yá’át’ééh dooleeł, dóó díí kin dashijaaʼ biyiʼ ląʼí dine’é, éí náasdi baa hoolzhiizhgo Zion bíká’adoohjah, biniyé áłah ánihideeshłííł.
3 Éí bąą, díí kintah biyiʼ dineʼé, béédahodoosįįł, éí baa danihi’doodlóós, dóó nihił ííshją́ą́ ádoolnííł.
4 Áádóó baa hodoolzhish díí kin haal’á nihilákʼedeeshłééł, áko bikʼi nihídahólníih doo, áádóó biniyé ádaahtʼínígíí doo bił béédahodoozįįł da; áádóó bibéésh óolaa dóó bibéésh łigai ádaatʼée bee daʼatʼíinii danihí doo.
5 Nihąąh hadaazʼáhígíí tʼáadoo baa nihíniʼí, háálá adziilii nihaadeeshłééł áko bikʼé ndaʼdoohłééł.
6 Zion tʼáadoo baa danihíniʼí, háálá ajoobaʼ bee bikáʼadeeshwoł.
7 Tʼáá ákweʼé naałdeeh doo, áádóó binaagóó ałdóʼ;
8 Áádóó tʼáá ákwe’é naałdeeh doo nánihidishniihiigóó ałdóʼ, tʼáá ákweʼé naałdeeh doo, éí shi’Iiʼ Siz’į́ Diyinii hodiilzéé’ dóó bibeʼadziilii bee nihił hodoonih, éí łą́ągo nihichʼįʼ kódoolnííł.
9 Díí hazʼą́ bikʼéndaʼayohłéego shódeidoołtʼeeł. Áádóó tʼáá ałkʼidą́ą́ʼ kǫ́ǫ́ kéédahatʼínée dóó Kintah hadeidiilaayę́ę yéego ndabídídóołkił;
10 Háálá ląʼígo daʼílíinii díí kin łaní biyiʼ nihá hólǫ́.
11 Éí bąą, tł’iish hóyánígi át’éego dahonohsą́ dóó bąąhági átʼéii nihee ádaadingo; áádóó nihá yáʼátʼéehii k’ee’ąą yilzhishgo nihá ádeeshłííł, tʼáá tsxį́įłgo bídeinóhahígíí bikʼehgo nihaa halyée doo. Amen.