1 O Diyin God, háájísh ííníyá? Áádóó háájí shąʼ nanítʼinídi bikʼéstiʼę́ę?

2 Haanízahjįʼ shąʼ nílaʼ doo nahaʼnáá da doo, dóó ninááʼ, aooʼ ninááʼ niłtólígíí, yáʼąąsh ahoolʼáádę́ę́ʼ nidineʼé dóó ná nidaalʼaʼí doo ákó dabiʼdilʼínígíí níníłʼį́į doo, dóó nijaaʼ éí daachaaʼígíí yidiiztsʼą́ą́ʼ doo?

3 Aooʼ, O Diyin Bóhólníihii, haanízahjįʼ shąʼ díí atiʼálʼį́ doo akotʼéhígíí dóó doo ákodaʼalʼínígíí yee tiʼdahoonííh doo, áko nijéí bichʼįʼ yilzhólí dooleeł, dóó niyiʼdi aa joobaʼ bichʼįʼ kódíílííł?

4 O Bóhólníihii Diyin God Ayóó Ábóodziilii, yáʼąąsh, nahasdzáán, dóó tónteel áyiilaaii, dóó tʼáá ałtsóní biyiʼ naazléi, dóó chʼį́įdii neiloʼii dóó yikʼi bóhólníihii, dóó Sheol yikʼi bóhólníihii chahałheeł dóó tʼáá aaníinii biyiʼ ádaadiniid—níla bee dahdiilnííh; ninááʼ bee biníkádíníʼį́į́ʼ leʼ; niníbaal de kódoolnííł leʼ; nanítʼinéegi bikʼéstiʼę́ę nahjįʼ kódoolnííł leʼ; nijaaʼ yéego íístsʼą́ą́ʼ leʼ; níjéí yilzhólí leʼ, áádóó niyiʼdóó ajoobaʼ nihichʼįʼ kónílééh leʼ.

5 Niheʼanaʼí bikʼijįʼ éí niʼáháchįʼ bikʼijįʼ kódoolnííł; áádóó, nijéí biyiʼdi áháchʼįʼ, nibéésh hał bee nihikʼijįʼ doo ákódaʼiilyaayę́ę bee atídíílííł.

6 Nikééʼ naazíinii tiʼdahooníhígíí béélnílniih, O nihiDiyin God; áko ná nidaalʼaʼí nízhiʼ hoolʼáágóó yaa bił dahózhǫ́ǫ doo.

7 Shiyeʼ, niiʼsizíinii ahodiilzeeʼ doo; bee nichʼįʼ nahwiiʼnáanii dóó atíníłʼíinii éí tʼóhóníshgháníjįʼ átʼée doo;

8 Áádóó áko, nizhónígo bííníłdzilgo, Diyin God yáʼąąshdi ayóó ánítʼéego ándoolííł; tʼáá ałtso nichʼįʼ nahwiiʼnánígíí bikááʼ hadíínááł.

9 Nikʼisoo nił naazį́, dóó bijéí yee ayóó ádanóʼníigo dóó bílaʼ yee nikáʼanájahgo naadahaniih doo.

10 Tʼahdoo Jobgi ániʼdilnééh da; tʼahdoo nikʼisoo nikʼijįʼ daaleeh da, áádóó ałdóʼ doo asínísiih daaníigo nikʼijįʼ deisʼą́ą da, Job ádeiiyilaayę́ęgi átʼáo.

11 Áádóó asínísiih daaníigo nánidahazʼánígíí, yee hadaʼólnínée bitsʼą́ą́ʼ dadidoolchʼosh, dóó yíká ádaatʼínée shoh łibáhígíí nahalingo dadidoołhxįh jóhonaaʼéí bitsʼádinílííd dookʼą́łígi átʼáo;

12 Áádóó ałdóʼ Diyin bílaʼ yee dah doolnih dóó hoolzhish dóó łah ánáhooʼnííł yiyíísį́į́ʼ, áádóó bíniʼ bichʼą́ą́h chahałheełgo áyiilaa, áko binaanish ayóó ánoolninígíí doo yikʼi daʼdidootį́į́ł da; áko ałdóʼ neidoołkah dóó tʼáá bí bindaʼagizígíí ádeiłʼį́įgo béédahodoozįįł;

13 Háálá bijéí doo yáʼádaashxónígíí biniinaa, dóó háiida bíighahí átʼéii yikʼijįʼ kódeiłʼínígíí biniinaa, dóó háiida tiʼdahooníihgo yaa bił dahoozhǫǫhígíí, dóó tsʼídá bąąhági átʼéii tʼéiyá aláahdi yaa naakai dadooleeł;

14 Áko éí ałdóʼ bąąh ndahidookał, áádóó hajoobaʼ ádeinízinée bitsʼą́ą́ʼ kʼídahidookał;

15 Áko tʼahdoo ląʼí náhááhdą́ą́ʼ, bí dóó baʼáłchíní yáʼąąsh biyaadóó nahjįʼ kódadoolnííł, ní Diyin God, áko tsʼídá doo łaʼ hináa da dooleeł.

16 Tʼáá ałtso dabíísį́ʼígíí yikʼijįʼ dadeezbaaʼgo éí hóyéeʼgo bá haʼdoodzih, ní Diyin Bóhólníihii, dóó bąąhági átʼéii yaa naakai daaníigo dadilwosh ákondi shí néshʼį́įgo éí shidááhdóó doo bąąhági átʼéii yaa naakai da, ní Diyin Bóhólníihii, ákondi shí íínísinígíí, dóó bee bichʼįʼ haasdziʼígíí éí yedaʼiilaa.

17 Ákondi ndaʼiyoosííh daaníigo daachaaígíí éí naʼiilzííh yá ndaalʼáʼígíí biniinaa ákódaaní, áádóó tʼáá bí ndi doo akʼeh dahółʼíinii baʼáłchíní danilį́.

18 Áádóó shá ndaalʼaʼí doo ákótʼáo yikʼijįʼ yádaałtiʼígíí, éí awáalyah góneʼ yah adeidoonił dóó nideidoołtsxił biniyé ádaaní—

19 Yíi bikʼijįʼ kódoolnííł; háálá shaʼáłchíní yikʼijįʼ bąąhági átʼį́ ájiilaaígíí éí shighanjí ádaʼoolʼįįłígíí bitsʼádahidooʼnił.

20 Bitsʼaaʼ doo biiʼ hadiʼdoobį́į́ł da, dabighan dóó binaaldlooshii dabighanée bitsʼą́ą́ʼ dadoolchxǫǫł, áko baa dahaniihę́ę daboołchʼį́į́d dooleeł.

21 Diyin bibeʼadziilii doo bee bichʼįʼ bá adahóótʼiʼ da doo, baʼáłchíní bikééʼdóó dahodooleełígíí ałdóʼ doo bee bichʼįʼ bá adahóótʼiʼ da dooleeł éí hoolʼáágóó ahóyéelʼáágóó.

22 Tʼáá hó tsé daashjééʼ nitsaii hazéédadééʼą́ągo, éí tónteel bitłʼááhdi tó bił nidadoonahgo bá yáʼátʼéeh doo ńtʼę́ę́ʼ.

23 Yíi tʼáá ałtsóní shidineʼé yichʼįʼ nidawiilʼnánígíí, dóó ndeiniłkaadígíí, dóó ndeiłtseedígíí, dóó yikʼijįʼ yádaałtiʼígíí, ní Diyin Tʼáá Ałtsoní bee Bóhólníihii; tłʼiish baʼáłchíní danilíinii éí hoolʼáágóó tiʼhooʼnííh bił hazʼą́ doo yaa dáádidoohkah da.

24 Áko shooh, binaanish tʼáá ałtso shinááʼ bee yishʼį́ dóó baa shił bééhózin, áádóó tsxį́łígo hánahodootʼááł, éí tʼáá ałtso baa hodoolzhishgo bá hashtʼehooshłaa;

25 Háálá nihokááʼ dineʼé tʼááłáʼí nízínígo bá ndahwiistʼą́, binaanish ádeiyiilaaígíí bikʼehgo.

26 Diyin God éí biIiʼ Sizʼį́ Diyiniii binahjįʼ nił ééhózin doo, aooʼ, éí Iiʼ Sizʼį́ Diyinii aʼílyé doo bee haʼdoodzih átʼée bee, áko éí nahasdzáán hadilyaayę́ędą́ą́ʼ tʼahdoo ííshją́ą́ álnéeh da ńtʼę́ę́ʼ, kʼad índa;

27 Éí dííshjį́įdi nihił ííshjání ádadoolníiłgo danihizázíyę́ę yéego yíká dadéezʼį́į́ʼ ńtʼę́ę́ʼ, éí Diyin yá ndaalʼaʼí bíniʼ yichʼįʼ kódeiłʼį́į́ ńtʼę́ę́ʼ, éí tʼáá ałtso ayóó átʼéii baa dahidoolyéełgo bá hashtʼeʼniilyáá ńtʼę́ę́ʼ;

28 Áajįʼ ayííłką́ągo ádin doo tʼą́ą́ʼ kólziní da dooleeł, Diyin God éí doodago ląʼída bichʼįʼ dahodílzin doo, éí ííshjání adadoolnííł.

29 Tʼáá ałtsoní naatʼáanii ayóó ádaatʼéii dóó bídahólníihii, naatʼáanii danilíinii dóó óhólnííh bee dahólóonii, Jesus Christ binahatʼá bee yisdáʼiildéehii dabidziilgo dóó doo nídaaldzidgóó yiiʼ tádookaiígíí éí bił ííshją́ą́ ádadoolnííł dóó baa dahidoolyééł.

30 Áádóó ałdóʼ, yáʼąąsh éí doodago tónteel, éí doodago kéyah hółtsei, éí doodago jóhonaaʼéí, ooljééʼ, éí doodago sǫʼ nidahoneesʼą́ąjįʼ—

31 Tʼáá ałtso dahwéelzhííshgóó ahénínádaadáhígíí, tʼáá ałtso jį́, nínáhidizííd, dóó nináháhááh, dóó tʼáá ałtso bijį́, binínáhidizííd, dóó binínáháhááh, dóó tʼáá átʼé biʼayóó ádaatʼéii, bibee hazʼáanii, dóó bee ahéédahwiilzhíísh, díí tʼáá átʼé kʼad hoolzhishgo daʼíchíhígíí biyiʼ ííshją́ą́ ádadoolnííł—

32 Díí nahasdzáán tʼahdoo álnéeh yę́ędą́ą́ʼ tʼáá ałtso diyin danilíinii Hoolʼáágóó Diyin God yił áłah daazlį́į́ʼ éí bikʼehgo daalzį́ʼígíí ííshją́ą́ ádadoolnííł, áko hashtʼeʼnidooʼnił ńléí ałtso ádaʼalnéehdi dóó nihoolzhííshdi, áadi nihokááʼ dineʼé tʼááłáʼí nízínígo hoolʼáágóó Diyin yił hináa doo dóó doo daatsaahgóó Diyin bił hazʼą́ądi yah adoogááł.

33 Haanízáádgóó shąʼ tó daalkʼoołgo danílínígíí tʼah daníłtólí doo? Háʼátʼíísh adziil yáʼąąsh tʼą́ą́ʼ kóyósin doo? Éí doodaiiʼ nihokááʼ dineʼé bigaan doo bidziilígíí Missouri tooh nílínígíí íílį́įjigo yichʼąąh ndidoolnihgo, éí doodaiiʼ tʼą́ą́ʼ anáádlį́įgo íídoodííł, ááhyiłnínígíí éí yáʼąąshdę́ę́ʼ Ayóó Ábóodziilii bee éédahózinii Jesus Christ Díí jį́į́góó Yá Naazínígíí bitsiitʼááhjįʼ náálį́įgo doo łaʼ yichʼą́ą́h nididoolnihí da.

34 Áko shooh, ląʼída bikʼi dahodiiniiʼ, ákondi tʼáá díkwíhí nábiʼdiisdlááʼ. Áádóó haʼátʼíísh biniinaa doo tʼáá átʼé nábiʼdiisdlááʼ da?

35 Háálá bijéí yee nahasdzáán bikááʼ naazléi íiyisíí deinízin, éí nihokááʼ dineʼé yee baa dahaʼniihígíí yíká ádaatʼį́, áko díí łaʼ bóhodooʼááłii doo yikʼedaʼdiitʼįįh da—

36 Áko diyin bibeʼadziilii bił nahazʼáanii éí yáʼąąsh bibeʼadziilii doo ałtsʼáʼnííł átʼée da, áádóó yáʼąąsh bibeʼadziilii doo naadloʼ da dóó doo naalyée da tʼáá hazhóʼó tʼáá ákogi átʼéii bitłʼááh naazléíí bikʼehgo tʼéiyá.

37 Áádóó nihąąh ndahidoolyééł, éí tʼáá aaníí; ákondi bąąhági ádaatʼéii ndaniilʼin deidleehgo, éí doodago bee ádaa dzíínídlíigo, nihí niidzinígíí tʼéiyá bíká íítʼį́įgo, éí doodago nihokááʼ dineʼé baʼáłchíní biiʼ sizíinii biláahgi átʼáo ádaantsíikeesgo doodaiiʼ bichʼįʼ ídahóníilníihgo doodaiiʼ ndeidloʼgo, tsʼídá doo ákótʼéii bichʼįʼ kwíilyaago, áko shooh, yáʼąąsh tʼą́ą́ʼ kódaatʼįįh; Diyin Bóhólníihii biIiʼ Sizʼį́ Diyinii yínííł yileeh; áádóó éí nihaanáádiilyéehgo, Diyin bibeʼadziilii doodaiiʼ éí diné bibee óhólniih Amen bidiʼniih.

38 Áko shooh, tʼahdoo yaa ákoniizįįhdą́ą́ʼ, tʼáá sáhí yileeh, tʼáá íiyisíí bikʼeʼashchʼíiʼgo deeníinii yótaał doo, áko Jesus Christ yá naazínígíí atííłʼį́į doo, dóó Diyin God yikʼijįʼ naabaah doo.

39 Doo yáʼátʼéehii biiʼ neidáago baa ákóniidzįįh kʼasdą́ą́ʼ tʼáá ałtso nihokááʼ dineʼé kódaatʼé dóó kódeinízin łeh, ałtsʼíísígo óhólnííh baa ditʼááhgo, kódeiniizį́į́h, tʼáá hodinaʼí doo yáʼátʼééhgóó akʼinahaʼá daaleeh.

40 Áko ląʼída bikʼi dahodiiniiʼ, ákondi tʼáá díkwíhí nábiʼdiisdlááʼ.

41 Tʼáá háádę́ę́ʼ shį́į́ adziilígíí hániʼ silį́įʼgo éí doo Diyin bibee adziilígíí bee hadítʼée da, tʼáá hazhóʼó hániʼ álʼįįhgo tʼéiya, nízaadgóó haʼahóní bee, haaʼáhwiinítʼį́ʼígo bee dóó háʼátʼeʼ ádingo, dóó tʼáá aaníigo ayóóʼóʼóʼní beego tʼéiyá;

42 Kʼé, dóó ééhózinii tʼáá aanínígíí bee, éí hwiiʼsizʼíinii ntsaago íidoolííł tʼóó áhozhdilʼį́, dóó yoochʼííd bąąh ádingo—

43 Hashké yéego nidzingo, Iiʼ Sizʼį́ Diyinii naʼiiłnáago; áádóó bichʼahoʼdooshkeedígíí hweʼayóóʼóʼóní bidziilgo bichʼįʼ kózhdoolííł, díí doo ákótʼéégóó éí sheʼenaʼíʼ átʼé dínóozįįł;

44 Áko neheʼoodląʼ éí anoonééł bitłʼóól bilááhgóó bidziilgo bił bééhodoozįįł.

45 Áádóó bíniʼdii Diyin beʼayóóʼóʼóní nihiyiʼdi haʼdeezbingo tʼáá ałtso nihokááʼ dineʼé bichʼįʼ kódoohłííł, dóó Christ dayoodlánígíí ałdóʼ bichʼįʼ, áádóó doo niʼ kódaałéehgo tsʼídá yáʼátʼéehgo ntsídaahkees doo; áko índa bee ánóhtʼéhígíí Diyin God bidáahgi bee nihidziilgo nisoozį́į doo; áádóó Diyin bibeʼadziilii binahatʼá nihiiʼ sizʼíinii yáʼąąshdę́ę́ʼ dahtooʼ nahalingo nihichʼįʼ kódoolnííł.

46 Iiʼ Sizʼį́ Diyinii éí tʼáá áłahjįʼ nihił hólǫ́ǫ doo, áádóó ninaatʼá gish éí tʼáá ákogi átʼáo óʼoolʼįįł dóó tʼáá aaníinii doo łahgo áánííł da; áádóó índa bee níhólníhígíí éí hoolʼáágóó bee níhólníih doo, dóó doo tʼą́ą́ʼ kólzingóó hoolʼáágóó ahóyéelʼáágóó nichʼįʼ íílį́į doo.