Wóltaʼii 14
Diyin Yá Yáłtiʼí Joseph Smith díí diyingo bił ííshją́ą́ ályaa éí David Whitmer yee yił hodoolnih biniyé, Fayette, New Yorkdi, Yaʼiishjááshchilí 1829 yihahgo. Whitmer bił hazʼą́ągi Naaltsoos Mormon Wolyéhígíí baa ataʼ haneʼ tʼáá íiyisíí yídanéésdlįįd. Áádóó Diyin Yá Yáłtiʼii Peter Whitmer Sr. bighangi yił yah ííná, áádí naanish ataʼ haneʼígíí ałtso áyiilaa dóó naaltsoos hadidoolnííł bee hazʼánígíí bee bá lą́ azlį́į́. Táaʼgo Whitmer biyeʼké, éí naanish tʼáá aaníí átʼéego bił béédahózingo, tʼááłáʼí nízínígo binaanish ádeidoolíłígíí tʼáá íiyisíí yaa dabíniʼ daazlį́į́ʼ. Díí diyingo ííshją́ą́ ályaaígíí dóó naakigo (daóltaʼii 15 dóó 16) éí Urim dóó Thummim binahjįʼ yaa ndaʼídééłkidyę́ę yaa bił dahóóneʼ. David Whitmer éí náasdi Naaltsoos Mormon Wolyéhígíí łaʼ Táaʼgo Daʼooʼíinii silį́į́.
1–6, Chʼil naʼatłʼoʼí kʼéédílyééhdi nidaalnishí yisdáʼiildééh nídeididoolééł; 7–8, Hoolʼáágóó iiná éí tsʼídá Diyin God bi aʼiilyéii biláahdi átʼé; 9–11, Christ yádiłhił dóó nahasdzáán haidiilaa.
1 Áádóó naanish tsʼídá ayóó átʼéego dóó ayóó ánoolningo kʼadę́ę́ʼnihokááʼ dineʼé baʼáłchíní bichʼįʼ kólnééh.
2 Áko shooh, shí éí Diyin God nishłį́; shizaad yéego bikʼeh honíłʼį́, éí hiná dóó ayóó bidziil, béésh hał-ałtsʼą́ą́ʼgo deenínígíí biláahgo hááheeshchxiiʼ, éí tʼáá áłah ahadaditʼą́ índa awol nidi ałtsʼáyiiłneʼ; éí bąą shizaad yéego bikʼeh honíłʼį́.
3 Áko shooh, dáʼákʼeh tʼáá íídą́ą́ʼ deigai éí dooldah; éí bąą, háiida bee naʼálzhéhé yee tʼáá awołí yee naʼáshééhgo, bíniʼdii tʼah ooʼááłgo bee iigéshí yéego yee iishééh, áko biʼiiʼsizíinii Diyin God bił hazʼą́ądi hoolʼáágóó yisdáʼiildééh ílíinii yá hashtʼehósin doo.
4 Aooʼ, tʼáá háí shį́į́ tłʼoh bee yilzhéhé yee daʼiishééhgo dóó ahaneiyiiłjoołgo, Diyin God tʼáá éí yikʼidiilniiʼ.
5 Éí bąą, shíínóhkeedgo éí nihaa doolyééł, dáádílkał nanóhłtsʼingo nihichʼįʼ ąą ádoolnííł.
6 Zion bá ánítʼį́įgo hadííłwoł dóó níłdzilgo ádíílííł. Tʼáá ałtsojįʼ shibee hazʼáanii bikʼeh honíłʼį́į doo.
7 Áádóó, shibee hazʼáanii bikʼeh honíłʼį́įgo dóó neiníłką́ąjįʼ bikééʼ sínízį́įgo éí hoolʼáágóó iiná naa doolyééł, éí aʼiilyéii tsʼídá tʼáá ałtso Diyin God bi aʼiilyéii biláahdi átʼé.
8 Áádóó baa hodoolzhish, Diyin aZhéʼé nilíinii shízhiʼ binahjįʼ naʼádíłkidgo, neʼoodląʼ bee aʼíínílíigo, Iiʼ Sizį́ Diyinii nił hólǫ́ǫ doo, éí yaniiłtiʼ doo, áko tʼáá áłah didíítsʼíłígíí dóó dadííłtséłígíí tʼáá aaníigo bee sínízį́į doo, áádóó ałdóʼ kʼad díí oochííłígíí biyiʼ ádaa náʼookąąh bee nanítin doo.
9 Áko shooh, Shí éí Jesus Christ áshtʼį́, Diyin God hináanii biYeʼ, éí yádiłhił dóó nahasdzáán áyiilaa, éí adinídíín chahaałheeł doo biyiʼ nídidoolʼį́į́ł da;
10 Ákohgo, shinaʼnitin bee yisdáʼiildéehii tʼáá áłtso Gentile dineʼé dóó ńléí Israel bighandóó dah yikahjįʼ baa deeshłééł.
11 Áádóó áko shooh, David éí ánítʼį́, áádóó ákáʼadiilwołgo niká áhodooʼniid; éí íinilaago, dóó neʼoodląʼ bee aʼíínílí, iiʼsizíiniikʼeh dóó atsʼíseekʼeh tʼáá áłah bee nikʼihozhdoodliił, áádóó bee nikʼihojídoodliiłígíí ayóó átʼéii doo. Amen.