Wóltaʼii 87
Náasdi anaaʼ hodooleełgo, Diyin Yá Yáłtiʼí Joseph Smith díí diyingo bił ííshją́ą́ ályaa, éí Kirtland, Ohiodi doodaiiʼ bíighahgi, Níłchʼitsoh 25, 1832 yihahgo. Kweʼé hoolzhishgo United States dóó South Carolina ałchʼįʼ dadiikʼąąʼ háálá béeso nidahoołéeh dooleeł biʼdooniidgo doo bił yáʼádaatʼéeh da áko saad dóó anaaʼ hazlį́į́ʼ. Joseph Smith baa haneʼ biiʼ kóní “ałʼąą dineʼé dah deíkáhígíí bitahgóó tiʼhooʼníihgo baa dahodiistsʼą́ą́ʼ” éí Diyin Yá Yáłtiʼí “ákótʼéego yéego bił bééhoozin” “éí Sodizinjí Atah Danilínígíí índa béédahoozįįhgo dóó índa ahí dahiinéehgo doo ákóʼtʼéego anaaʼ yaa dahodiitsʼį́į́h da ńtʼę́ę́ʼ.”
1–4, Náhookǫsdę́ę́ʼ Hadahwiisdzoh dóó Shádiʼááhdę́ę́ʼ Hadahwiisdzoh anaaʼ bitah dahodooleełgo tʼah bítsʼéédi baa hóoneʼ; 5–8, Nahasdzáán yikááʼ kéédahatʼíinii tʼáá átʼé bił nitsohodinídéél dooleeł.
1 Tʼáá aaníigo, Diyin Bóhólníihii kóní anaaʼ dahodooleełígíí éí tʼáá áhánídę́ę́ʼ bichʼįʼ hoolzhish, South Carolina akʼijįʼ silį́ʼígíí bee hahodoolzhish, éí biniinaa ląʼí diné ndadootsxił dóó tidahwiidoonih;
2 Áádóó baa hodoolzhish tʼáá ałtso diné kéédahatʼį́į́góó anaaʼ bitah doołnih, kodóó hahodoolzhish.
3 Háálá áko shooh, Shádiʼááh Hadahwiisdzohdę́ę́ʼ éí Náhookǫs Hadahwiisdzohígíí ałtsʼą́ą́jí dadooleeł, áádóó Shádiʼááhdę́ę́ʼ Hadahwiisdzohígíí éí nahdę́ę́ʼ kédaayahígíí kodi nihíkáʼoohjeeh dadidooniił, Great Britain kéyahdę́ę́ʼ ndi, éí ákóhoolyé, áádóó éí nááná łahdę́ę́ʼ kédaayah nihíkáʼoohjeeh deididooniił, áko nááná łahdę́ę́ʼ kédaayah bíkáʼ adoojah; áádóó áko tʼáá ałtso diné kéédahatʼį́į́góó anaaʼ bitah doołnih.
4 Áádóó baa hodoolzhish, ląʼí yiską́ągo, naalteʼí éí binanitʼaʼí yichʼįʼ saad dahodoołeeł, háálá naabahí dadohłeeł dabiłníigo nidabiniłkaad dooleeł.
5 Áádóó baa hodoolzhish éí ákwéʼé kéyah yikááʼ dáádzíʼígíí anaaʼ yíká hashtʼeʼ ádadidoolnííł, áádóó tʼóó báhádzidgo bádahodoochįįł, áádóó Gentile dineʼé tʼáá awołí bee atíʼdeidoolííł.
6 Áádóó ákótʼáo, nahasdzáán yikááʼ kéédahatʼíinii béésh hał yee ndaʼahiltsééd doo dóó yaa yínííł danízin doo; dichin, dóó naałniihii, dóó kéyah ndahaʼnáa doo, áádóó yáʼąąshdę́ę́ʼ daʼdiʼníi doo, dóó tʼóó báhádzidgo atsiniltłʼish tsin bóʼoosniʼ nahalingo ałdóʼ bitsʼádiʼdoodlał, nahasdzáán yikááʼ kéédahatʼíinii hashké bichʼį́ kólyaaígíí yaa ákodadínóozįįł, áádóó ánihwiitʼaah báhádzidii, áádóó Diyin God Ayóó Ábóodziilii bichʼah hodooshkeeł, áádóó tʼáá ałtso nahasdzáán yikááʼ kéédahatʼíinii adabidiʼdooldįįłgo bee haʼoodzíʼę́ę ałtso bohoolyaago índa;
7 Diyin yá naazíinii yéego sodadilzin, dóó Diyin yá naazíinii bidił, áádóó Sabaoth Diyin Bóhólníihii doo yiditsʼaʼ da doo, nahasdzáán bikááʼdóó, éí yee beʼanaaʼí yikʼeh dadidoodleeł.
8 Ákohgo, dahodílzin hazʼą́ągi ndasoozį́, áko doo nahjįʼ kódanihidiʼdoolnííł da, Diyin Bóhólníihii tʼah doo yíghááhdą́ą́ʼ kóhodoonííł; háálá áko shooh, háálá tʼáá hooshchʼįʼ doogááł, ní Diyin Bóhólníihii. Amen.