Wólta’ii 137
Diyin Yá Yáłti’í Joseph Smith díí bił ííshją́ą́ ályaa, Diyin bighan ntsaaígíí biyi’ Kirtland, Ohiodi, Yas Niłt’ees 21, 1836 yihahgo. Diyin bibee ó’ool’įįł aa dahidoolyééł biniyé ahí’iildee’ éí Diyin bighan ntsaaígíí yiidlish bich’į’ hasht’e’ ádínéehgo.
1–6, Celestial haz’ą́ągi Diyin Yá Yáłti’í bínaaí Alvin yiyiiłtsą́; 7–9, Ańdahaaskaiígíí Diyin bina’nitin bee yisdá’iildéehii t’ah doo nídeidiiléhígíí ííshją́ą́ ályaa; 10, T’áá ałtso áłchíní yázhí celestial haz’ą́ągi yisdádookah.
1 Yá’ąąsh nihich’į’ ąą ályaa, áádóó Diyin God celestial bił haz’ą́ągi yiiłtsą́, dóó bi’ayóó áhoot’éii, t’áá shits’íís beego daats’í éí doodago t’áágeedgo daats’í, éí doo shił bééhozin da.
2 Dáńdítį́hí ayóó ánóolninii éí bił hazʼáanii bííʼ dadooleełígíí ákóne’ yii’ chíhidookahgo yiiłtsą́, éí kǫʼ dah nidinoodígíí nahalingo binázt’i’;
3 Diyin God bikááʼdóó nahatʼáii bits’ádi’ńlíídgo ałdó’, éí bikáá’dóó NihiZhé’é Nilíinii dóó biYe’ Nilíinii dahsiké.
4 Éí haz’ą́ądi atiin ts’ídá danizhónígo yiiłtsą́, éí béésh óola bee ahoodléézh nahalin.
5 NihiZhé’é Adam dóó Abraham yiiłtsá; áádóó shizhé’é dóó shimá ałdó’; shínaaí Alvin ałdó’, éí ałk’idą́ą́’ dahnídiidzá;
6 Áádóó baa shił hózhǫ́ hailéet’áo éí haz’ą́ądi yah ííyáh nisingo baa ntséskees, jó díí nahasdzáán yikáá’dóó dahnídiidzá Diyin Bóhólníihii t’ah doo naaki góne’ Israel ałghąʼánéídlééhgo, áádóó tó bee ilzį́į́h binahjįʼ bąąhági ádaatʼéii nahjįʼ kólʼįįhígíí t’ah doo bá álnééh da ńt’ę́ę́’.
7 Háálá Diyin Bóhólníihii kót’áo bizhí shich’į’ kóyiilaago sidiits’ą́ą́’, kóníigo: T’áá ałtso díí shinahat’á bee yisdá’iildéehii na’nitinígíí t’ah doo nídeidiilééhgóó andahaaskaiígíí, éí t’áá kǫ́ǫ́ t’ah ndaakaigo ndeidiiláa doo ńt’ę́ę́’ígíí, éí éí Diyin God celestial bił haz’ą́ągi yił kéédahat’į́į dooleeł;
8 Áádóó ałdó’ t’áá ałtso kodóó t’ah doo yaa bił béédahoozįįhgóó dahnídadiikaiígíí, éí bijéí t’áá át’éé ńt’ę́ę́’ yee nídeidiiláa doo ńt’ę́ę́’ígíí, éí haz’ą́ądi kéédahat’į́į dooleeł;
9 Háálá Shí, Diyin Bóhólníihii, éí t’áá ałtso nihokáá’ dine’é binaanish ádayiilaayę́ę bikʼehgo bá nahodeeshʼááł, éí t’áá íiyisíí bijéí bitł’ááhdóó deinízinígíí bik’ehgo.
10 Áádóó ałdó’ áłchíní ni’iisííh t’ahdoo yaa ákoniizįįhgóó béédaahaiígíí éí dahnídahidiikaiígíí yiiłtsą́ éí yá’ąąsh celestial haz’ą́ądi yisdánáhaaskai.