1 Daʼíísínółtsʼą́ą́ʼ, O shisodizinjí daʼnohtahígíí, ní Bóhólníihii nihiDiyin God, dóó Diyin Bóhólníihii bizaad dóó nihá yinízinígíí dadoohtsʼį́į́h—

2 Diyin Bóhólníihii tʼáá hooshchʼįʼ bighan ntsaajįʼ doogááł; Diyin Bóhólníihii yáʼąąshdę́ę́ʼ adadoogááł dóó nahasdzáán doo yáʼáshóonii yee yikʼijįʼ hadoodzih; aooʼ, tʼáá ałtso nahasdzáán bikááʼgóó dahdaʼíldehígíí Diyin God doo deiyoodlánígíí, áádóó tʼáá ałtsoní nihitahgóó doo Diyin Godkʼehgo ádaatʼínígíí yichʼįʼ.

3 Háálá bigaan bitsxeʼii tʼáá ałtso ałʼąą dineʼé deidoołtsééłgo dah deíkáahii yitʼį́įgo yił ííshją́ą́ íidoolííł, áádóó tʼáá ałtso nahasdzáán bikááʼ adahwiisʼáádę́ę́ʼ diné tʼáá ałtso nihiDiyin God bibee yisdáʼiildéehii deizdoołtsééł.

4 Ákohgo, hashtʼeʼádaʼdoołnééh, hashtʼeʼádaʼdoołnééh, O shidineʼé; hadanołtʼéego ádaʼdołnééh; O shisodizinjí daʼnohtahígíí, kéyah Zion bikááʼ áłah óhnééh, tʼáá ánółtso tʼáá kǫ́ǫ́ naałdeeh doo danihiʼdooʼniidígíí.

5 Babylon kin haalʼáádóó chʼínóhnééh. Chin nihąąh ádingo ídaʼdołnééh Diyin Bóhólníihii binaalyéii deínóhjaahii.

6 Dahodíínóhsingo áłah wohłeeh, áádóó tʼáá ahą́ą́h ałchʼįʼ yádaałtiʼ. Áádóó diné tʼááłáʼí nízínígo Diyin Bóhólníihii bízhiʼ binahjįʼ sodadołzin doo bididííniił.

7 Aooʼ, tʼáá aaníigo Shí nihichʼįʼ hanáánásdziih, kʼad beiníłką́ Diyin Bóhólníihii bízhiʼ yee nihichʼįʼ haadziih: Babylon kin haalʼáádóó chʼínóhnééh; tʼáá ałtso diné dah deínééhdę́ę́ʼ ahíhohkááh, tʼáá dį́į́ʼdę́ę́ʼ hanáyołdę́ę́ʼ, yádiłhił biyaa kéyah nidaneesʼą́ą́dę́ę́ʼ.

8 Shisodizin bá hooghan biyiʼdóó elder danilínígíí danízaadę́ę́ʼ ałʼąą dineʼé dah deíkáhígíí; dóó tónteel bikáaʼgi kéédahatʼínígíí; áádóó nááná łaʼ kéyah ndaaznilígíí bikááʼgóó; tʼáá ałtso ałʼąą dineʼé dah deíkáhígíí bichʼįʼ dadołʼaah, áłtsé éí Gentile dineʼé bitahgóó, áádóó inda Jew dineʼé bitahgóó.

9 Áádóó áko shooh, dóó níníłʼį́, díí yee hadadoodzih, dóó Diyin Bóhólníihii biinééʼ yee tʼáá ałtso diné yichʼįʼ haadzííʼ: Kéyah Ziongóó dadohkááh, áko shidineʼé biníbaal siʼą́ągi hótsaago, dóó bistake bidziilgo ádadoohłííł, áádóó Zion binaagóó nidahazʼą́ą́góó yaa doogááł.

10 Aooʼ, tʼáá ałtso diné bitahgóó díí bee hadadoohdzih: Chʼéédanohdzííd dóó doahsįįh dóó Diné Iiyehii bichʼįʼ ninohkááh dóó beedahonohsįįh; dadínóhʼį́į́ʼ dóó danółʼį́, Diné Iiyehii aadę́ę́ʼ yigááł; nílááh bichʼįʼ chʼínohkááh. Diyin Bóhólníihii ayóó átʼéego nídoodááłdi bichʼįʼ hashtʼeʼ ádadoołnééh.

11 Éí bąą, hadaʼísídółʼį́į́ʼ, háálá yoołkááł áádóó oolkił góneʼ doogáłígíí doo nihił béédahózin da.

12 Éí bąą, kódabididoohniił, Gentile dineʼé bitahdóóʼígíí éí Ziongóó dah dadínóohchééł.

13 Áádóó bínidii Judah yitsʼą́ą́dóóígíí Jerusalemgóó dadínóochééł, éí Diyin Bóhólníihii bighan dził bighą́ądígóó.

14 Tʼáá ałtso diné dah deínééhdę́ę́ʼ chʼínóhnééh, Babylon kin haalʼáádóó ndi, doo yáʼáshǫ́ǫ́góó ádahoonííł bitsʼą́ą́dę́ę́ʼ, éí ííʼ sizíiniikʼehgo Babylongi daʼdooldah.

15 Ákondi tʼáá aaníigo, Diyin Bóhólníihii kónihiłní, tʼáadoo tʼóó tsxį́įłgo noohchééł nahalingo deínohkáhí, ákótʼée ndi tʼáá ałtsóní tʼáá bítséedi hashtʼeʼnídaałʼįįh doo; dóó ákǫ́ǫ́ atah noohchéłígíí, doo tʼą́ąjįʼ nízdídóotʼįįł da háálá tʼáadoo hooyání bee íʼdooldįįłii bikʼi hodooleeł.

16 Daʼdoohtsʼį́į́h dóó daʼíísínółtsʼą́ą́ʼ, O nahasdzáán bikááʼ kéédahohtʼíinii. Elders shisodizinjí atah danohłínígíí, daʼdoohtsʼį́į́h, dóó Diyin Bóhólníihii biinééʼ dadidoohtsʼį́į́h; háálá tʼáá ałtso nihokááʼ dineʼé yíká ání, áádóó bílaʼ asdhdlaʼii tʼáá ałtso ádaa ńdaʼoohkąąh yił ní.

17 Háálá áko shooh, Bóhólníihii Diyin God éí bá naalʼaʼí yáʼąąsh yíyiʼ góneʼ yitʼahgo ndíʼnóotį́į́łgo yiʼníłniiʼ, kóníigo: Diyin Bóhólníihii bihonítʼiʼ hashtʼedaołééh, dóó beʼatiin kʼéházdongo ádaołééh, háálá oolkił góneʼ yíighahígíí koshídę́ę́ʼ bichʼįʼ hoolzhish—

18 Dibé Yázhí Wólyéii éí Mount Zion bighą́ąʼgi yidoozįįł, áádóó neeznádiin dóó baʼaan dízdiin dóó baʼaan dį́į́ʼ dimííl yiltʼéego bił, biZhéʼé Bízhiʼ bitááʼ gónaa bikʼeʼdaʼeshchį́į doo.

19 Ákohgo, Diné Iiyehii yígháhígíí bichʼįʼ hashtʼeʼádaʼdoołnééh; nílááh, nílááh bichʼįʼ chʼínohkááh.

20 Háálá áko shooh, mount Olivet bighą́ąʼgi yidoozįįł, tónteel bidziilígíí bikááʼ, tó daditáanii ndi, dóó tónteel bikááʼ kéédahatʼínígi, áádóó kéyah Zion bikáaʼgi ałdóʼ.

21 Áádóó Ziondóó Bóhólníihii ayóó íítsʼaʼgo ádidooniił, áádóó Jerusalemdę́ę́ʼ hadoodzih, áádóó biinééʼ tʼáá ałtso dineʼé bitahgóó deididootsʼį́į́ł;

22 Dóó bízhí tó tʼóó ahayóí danílį́įgo dadiitsʼaʼígíí nahalin doo, dóó ayóó íitsʼaʼgo adiʼnínígíí nahalingo yáʼąąshdę́ę́ʼ iinééʼ diistsʼaʼ doo, éí dził niʼjįʼ niidoołdas, áádóó chʼídahootso chʼééh hádeidéizʼį́į́ʼ dooleeł.

23 Áádóó Bí éí tó daditáanii, náhookǫs bichʼijigo anáálį́įgo íidoolííł, áádóó táłkáaʼdi kéyah dah naaznilígíí tʼááłʼáʼí siʼą́ągo íidoolííł;

24 Áádóó kéyah Jerusalem dóó kéyah Zion sinilyę́ęgi átʼáo anídoolnííł, áádóó nahasdzáán éí tʼah doo ałtsʼánííłyę́ędą́ą́ʼ siʼánéegi átʼáo ándoolnííł.

25 Áádóó Diyin Bóhólníihii, Yisdáʼiiníiłii ndi, bidineʼé yitahgi sizį́į doo, áádóó tʼáá ałtso bitsʼíís dahólóonii yikʼi hooʼááł doo.

26 Áádóó náhookǫs kédaayahdę́ę́ʼ nidaakaiígíí Diyin Bóhólníihii yéédaalniihgo yidááhdóó nahidookah; dóó bidiyin yá ndaalʼaʼí biinééʼ deididootsʼį́į́ł, áádóó badaʼólíi doo; dóó tsé nídeididoołhał, áko biyiʼdę́ę́ʼ tin ałtsʼádooltǫǫłgo binááł yilzhoł doo.

27 Áádóó tó daditáanii ałníiʼgi biyiʼdóó atiin hadadidoolnííł.

28 Beʼanaʼí éí yíká ndaalzheeh dooleeł,

29 Áádóó halgaidi tó ádingo hazʼánígi tooh hináanii naazyį́įgo ádeeshłííł; áádóó niʼ dahoozdláádgi kéyah doo dibááʼ náánízin da doo.

30 Áádóó binaalyéhí daʼílíinii shá ndaalʼaʼí, Ephraim baʼáłchíní yaa deidiyoojih.

31 Áádóó hoolʼáágóó daadziłígíí nidaneesʼą́ąjįʼ bidááhdóó daditxiz doo.

32 Áádóó Ziongi ndi, ákweʼé ntsídadidoogoh dóó ayóó átʼéii bąąh ndahidoolyééł, éí Diyin Bóhólníihii bá ndaalʼaʼí bąąh ndeiyizlá, Ephraim baʼáłchíní danilį́įgo.

33 Áádóó hoolʼáágóó ił hózhǫ́ biyiin biiʼ hadaʼdeezbingo yee dahataał doo.

34 Áko shooh, hoolʼáágóó diyin binaʼnitin bee yisdáʼiildéehii éí díí akʼihojídlí nihiDiyin God hoolʼáágóó hólóonii Israel bidineʼé yee yikʼihozhdoodliił, áádóó akʼihojídlí tsʼídá ílínígíí éí Ephraim bitsiiʼkáaʼjįʼ áádóó bikééʼ yikahii yee yikʼihojidoodliił.

35 Áádóó Judah bidineʼé bitsʼą́ą́dóóígíí ałdóʼ, tiʼdahoozniiʼ bikééʼdóó, Diyin Bóhólníihii yidááhdóó dahodísingo hadaałtʼéego ádabidiʼdoolnííł, tʼáá ákwíí jį́ dóó tʼáá ákwíí tłʼééʼ yidááh kéédahatʼį́į doo, hoolʼáágóó ahóyéelʼáágóó.

36 Áádóó áko, Diyin Bóhólníihii tʼáá aaníí kónihiłní, áko díí baa ákodanohsin doo, O nahasdzáán bikááʼ kéédahohtʼíinii, diyingo shá naalʼaʼí yá ałníiʼgi yitʼahgo íishłaa, éí tʼáá ałtso hoolʼáágóó Jesus Christ binaʼnitin bee yisdáʼiildéehii dahyoolééł, éí łaʼ diné yichʼįʼ ííshją́ą́ aʼdiilyaa dóó nihokááʼ dineʼé ndeilée dooleełgo yeinínil, éí łąʼí nahasdzáán yikááʼ kéédahatʼíinii yichʼįʼ ííshją́ą́ ádiʼdidoolnííł.

37 Áádóó díí Jesus Christ binaʼnitin bee yisdáʼiildéehii tʼáá áłtso ałʼąą dineʼé dah deíkáahii, ałkʼéí danidlíinii, bizaad ałʼąą adaatʼéii, dóó tʼáá áłtso nihokááʼ dineʼé bee ndadínóotįįł.

38 Áádóó Diyin God bá ndaalʼaʼí adahwiisʼáágóó, bizhí yee ayóó íítsʼaʼgo kódaaní: Diyin God dadíínóhsin, háálá bá nahodootʼáałjįʼ oʼoolkid;

39 Áádóó yáʼąąshii, dóó nahasdzáán, dóó tónteel, índa tó hadaazlíinii áyiilaii bichʼįʼ nidahohłá—

40 Tʼáá ákwíí jį́ dóó tʼáá ákwíí tłʼééʼ Diyin Bóhólníihii bízhiʼ deínóhshíigo nídoahkąąh, kódadohníigo: Yádiłhił ąą dóółdlaad laanaa; hadaóyaʼ laanaa, nidáahgi dził daditłid laanaa.

41 Áádóó bił éédahodoozįįł; háálá Diyin Bóhólníihii binaagóó éí kǫʼ adoołkʼą́ął nahalin doo, dóó kǫʼ tó yiłbézhígi átʼée doo.

42 O Diyin Bóhólníihii, éí bee niʼanaʼí bichʼįʼ nízhiʼ bééhózin doo, índa nidáahgi tʼáá ałtso ałʼąą dineʼé dah deíkáhígíí bitah dahoditłid doo—

43 Doo nidayíníidlíi da yę́ę, tʼóó báhádzidígi íinítʼįįd;

44 Aooʼ, hadéíníyáago, dził nidáahgi daditłid doo, tʼáá ákogi ááníiłgo bił hóshóonii, índa nikʼehgo deíkáahii yéédaalniihígíí bidááh yíníyá.

45 Háálá nahasdzáán tʼóó bee hahoolzhiizhdóó wóshdę́ę́ʼ, daʼ nihokááʼ dineʼé tʼáadoo tʼáá nigi átʼáo, O Diyin God nílíinii, nighangi nibaʼ sidáii ayóó átʼáo bá hashtʼehwiinilaa yaa dahodiitsʼį́įh da, índa doo deidiitsʼį́įh da, doo ndi anááʼ doo łaʼ dayiiłtsééh da.

46 Áádóó ádabidiʼdooʼniił: Diyin God bitsʼą́ą́dóó yáʼąąshdę́ę́ʼ biʼééʼ yiilchiiʼgo adááyahígíí háísh átʼį́; aooʼ, éí kéyah nahósʼaʼdi doo bééhózin da, éí biʼééʼ tʼáá íiyisí nizhónígo, ayóó átʼéego bidziil yee tádígháhígíí háísh átʼį́?

47 Áádóó bí kódidooniił: Shí tʼáá ákogi átʼéego yáshtiʼgo, áádóó shidziilgo yisdáʼdeeshniłígíí éí áshtʼį́.

48 Áádóó Diyin Bóhólníihii éí biʼééʼ yiilchiiʼgo yiiʼsitʼį́į doo, chʼil naʼatłʼoʼii hayéʼéłʼéesii nahalingo biʼééʼ łichíiʼgo naaghá.

49 Áádóó ayóó éʼétʼé bináhaazláhígíí biniinaa jóhonaaʼéí yádínóozįįłgo doo yitʼį́į da dooleeł, áádóó ooljééʼ doo adiníłdíín da doo, áádóó sǫʼ yáʼąąshdę́ę́ʼ adahidinóodah.

50 Áádóó biinééʼ tʼáá ałtso deididootsʼį́į́ł: Diné doo łaʼ shił naaʼaashgóó, tʼáá sáhí chʼil naʼatłʼoʼii habíʼííłʼeez; tʼáá ałtso dadineʼé bá ndahodootʼáałgo ííshłáá;

51 Áádóó tʼóó báhádzidgo sháháchįʼgo łeeh bíʼdeesʼis, háálá sháháchįʼgo bikʼi niséyá, dabidił shiʼééʼ bikʼídadooltah, dóó shiʼééʼ tʼáá átʼé bee łichíiʼgo ádeeshłííł; háálá kʼéédideeshnííł baa hoolzhiish éí shijéí biyiʼdi baa nitséskees ńtʼę́ę́ʼ.

52 Áádóó áko bikʼé nináʼníshdláhígíí baa hoolzhiizh; áádóó biDiyin Bóhólníihii beʼayóóʼóʼóní yee ajoobaʼígíí yaa hadadoodzih, áádóó bibeeajoobaʼ binahjįʼ tʼáá ałtsoní bee bikʼi dahodiiniiʼígíí, éí biʼayóóʼóʼóní yee ajoobaʼígíí bikʼehgo, hoolʼáágóó ahóyéelʼáágóó.

53 Tʼáá ałtso yikʼee tiʼdahoozniiʼígíí bikʼee tiʼhodzoozniiʼ. Áádóó tʼáá hó hojílónígi hadiyingo naalʼaʼí yisdábíínil; hweʼayóóʼóʼóʼniʼ, áádóó baa aʼááh jinízingo, bee bikʼé nináʼjídlá, ałkʼidą́ą́ʼ hoolzhishii bikʼehgo bił haʼjólníigo náás jiníjaa;

54 Aooʼ, áádóó Enoch ałdóʼ, dóó bił naaldeehígíí; éí diyin yá ndaalʼaʼí tʼah bítséedi nidaakaiyę́ę; áádóó Noah ałdóʼ, áádóó tʼah bítséedi nidaakaiyę́ę; dóó Moses ałdóʼ, áádóó tʼah bítséedi nidaakaiyę́ę;

55 Áádóó Moses dóó Elijahjįʼ, áádóó Elijah dóó Johnjįʼ, éí Christ náábiʼdiilyáago yił ndaaldeeh ńtʼę́ę́ʼ, dóó hastóí naakitsʼáadah dahodísinii, Abraham, dóó Isaac, dóó Jacob yił, Dibé Yázhí Wólyéii yił kéédahatʼį́į doo.

56 Áádóó Diyin yikééʼ naazíinii bidajishchááʼ ąą ádadoolnííł; áádóó hahidookah dóó Dibé Yázhí Wólyéii binishnáájígo deidoozįįł, éí Mount Zion bighą́ąʼgi yidoozįįł, áádóó kintah dílzin bikááʼ, éí New Jerusalemgi; áádóó Dibé Yázhí Wólyéii biyiin yee dahodootał, tʼáá ákwíí jį́ dóó tʼáá ákwíí tłʼééʼ hoolʼáágóó ahóyéelʼáágóó.

57 Áádóó díí biniinaa, áko nihokááʼ dineʼé ayóó ádaatʼéii ííshją́ą́ ádadoolníłígíí bił dahólǫ́ǫ doo, Diyin Bóhólníihii binaʼnitin bee yisdáʼiildéehii tʼáá áłtso nihichʼįʼ kwíyiilaa, hoolʼáágóó diyingo bibee ahaʼdeetʼáanii ałdóʼ, doo nanitłʼagóó dóó tʼáá bééhózínígo baa hwiinítʼį́—

58 Nahasdzáán bikááʼ ádahodooníłígíí bichʼįʼ doo dabidziilígíí hashtʼedadíílííł, áádóó Diyin Bóhólníihii binaanish ałdóʼ baa hodoolzhish aʼohgo danilíinii nihokááʼ dineʼé dahóyáanii tʼóó ádaa yádadínóodzįįłgo ádeidoolííł, áádóó aʼoh áníłtsooígíí éí dineʼé dabidziilii dadooleeł, áádóó naakizhdiltʼéego éí neeznáadi mííl diné hakʼee yóóʼadínóodzoł.

59 Áádóó nihokááʼ bikááʼ doo dabidziilii Diyin Bóhólníihii biʼIiʼ Sizį́ Diyinii bibeʼadziilii bee ałʼąą dineʼé dah yikahgo ádeidoolííł.

60 Áádóó díí biniinaa bee hazʼáanii baa daheesyá; áko díí baa daheesyáhí góneʼ nihokááʼ dineʼé yitsʼą́ąjįʼ kódeínóhsin doo, ákondi kʼad éí tʼáá ałtsoní bitsʼíís dahólóonii bee ndadínóhtįįł dabiʼdooʼniid—

61 Áádóó díí éí Diyin Bóhólníihii binitsíkees dóó yinízinígíí bikʼehgo, tʼáá ałtsoní bitsʼíís dahólóonii yikʼihooʼááł.

62 Áádóó háí shį́į́ Diyin Bóhólníihii yidááhdóó ádaanáʼookąąhgo dóó haałtʼé áʼdílnéehgo éí hoolʼáágóó iiná baa doolyééł.

63 Áádóó Diyin Bóhólníihii biinééʼ doo yikʼeh dahółʼínígíí éí Diyin yá naalʼaʼí Moses yaa naʼíízohyę́ę bohodoolnííł, éí diné bitsʼą́ąjįʼ dáʼdidoolkał.

64 Áádóó ałdóʼ Diyin yá yáłtiʼí Malachi yaa náʼíízoh: Háálá, áko shooh, bichʼįʼ yoołkááł éí bijį́ bááh bighan biiʼ kǫʼígi átʼéego hodinóogah, dóó ádaa dahaʼniihii, aooʼ, dóó bąąhági átʼéii yaa deíkááhą́ą, tséhégod ndahalin doo; dóó éí bijį́ biiníłką́ągo ałtso adahididookʼą́ą́ł, ní Diyin Tʼáá Ałtsoní bee Bóhólníihii, áko bikétłʼóól dóó bitsʼáozʼá ndi doo łaʼ doodzih da.

65 Ákohgo, Diyin Bóhólníihii díí yee yichʼįʼ hadoodzih:

66 Áádóó áájįʼ ayííłką́ągo tʼáá shíhígíí baa níyáago, nihitahdóó diné doo łaʼ dashiniizį́į́ʼ da, áádóó chʼídanihineeskaad.

67 Nihíká ánáádeeshniidgo tʼáadoo łaʼ shichʼįʼ hanádzííʼ da; ákondi shílaʼ éí doo nihiʼoh neelʼą́ą́góó nihikʼé nináʼdeeshdléeł da, áádóó sheʼedziil bee yisdánihideeshʼishgo ałdóʼ.

68 Áko shooh, hoshishkéego tónteel nínáltsih. Índa tooh danílíinii hóółtseiigo ánáshʼįįh; tó ádaadinígíí biniinaa łóóʼ dibááʼ nídabigą́ą́, áádóó nídadiłdziʼgo daniłchxon łeh.

69 Chahałheeł éí yádiłhił bikʼénáshtih, áádóó tłʼoh azis bikʼéstiʼgo ánáshʼįįh.

70 Díí shitsʼą́ą́dóó nihee dahodooleeł—yínííł bikʼee shoojéeʼ doo.

71 Áko shooh, dóó níníłʼį́, tʼáadoo yisdábidooʼishí da; háálá yáʼąąshdę́ę́ʼ nihíká ádííniidgo tʼáadoo shizaad bikʼeh dahosoołʼįįd da; shá ndaalʼaʼí tʼáadoo deisoodląąd da, áádóó nihichʼįʼ ííłʼaʼgo tʼáadoo danoozį́į́ʼ da.

72 Ákohgo, Bee akʼeʼashchíinii bee bééhániihii dóó bee hazʼáanii yidádiʼníłjeeh, áádóó nihí éí hodiłhiłgo hazʼą́ą́ góyaa bichʼįʼ konihiʼdiilyaa.

73 Díí éí chahałheeł biyiʼgóó ahijidookah, áadi dajichah, dóó yéego dajidilwoshgo dajichah, dóó hawooʼ ahídazhdiłkʼash doo.

74 Áko shooh Bóhólníihii nihiDiyin God yee haadzííʼ. Amen.