Wólta’ii 115
Diyin Yá Yáłti’í Joseph Smith díí diyingo bił ííshją́ą́ ályaa, Far West, Missouridi, T’ą́ą́chil 26, 1838 yihahgo, díí Diyin Bóhólníihii bighan ntsaago ndoot’áłígíí éí Diyin God yínízinígíí bik’ehgo bił ííshją́ą́ ádoolnííł éí yik’ehgo ndeidoo’ááł. Díí diyingo ííshą́ą́ ályaaígíí éí Sodizinjí da’atahígíí dóó áájí bídahólníhígíí bee bił hodoonih.
1–4, Diyin Bóhólníihii éí Bisodizin Bá Hooghan díí yee yiyíízhi’ Jesus Christ Bisodizin Báhooghan Dííjį́įdi Yá Naazínígíí; 5–6, Zion dóó stakes bił hadahaasdzogóó ákwe’é éí dííshjį́įdi akéé’ naazínígíí binaagóó ádahooníłígíí biniinaa baa ádahalyą́ągo yiyaa anídanichéeh doo; 7–16, Diyin Yikéé’ Naazíinii éí Far Westdi Diyin Bóhólníihii bighan ntsaaígíí ndadooh’ááł dabi’dooniid; 17–19, Joseph Smith éí nahasdzáán bikáa’gi Diyin God bił haz’ą́ bibee ąą ńdítį́hí dahyoojih.
1 Diyin Bóhólníihii t’áá aaníí kónihiłní, shá naal’a’í Joseph Smith, Jun., áádóó ałdó’ shá naal’a’í Sidney Rigdon, áádóó ałdó’ shá naal’a’í Hyrum Smith, áádóó níká anáhi’nilchéhígíí k’ad dóó náasdi bik’ihodidoonih;
2 Áádóó ni ałdó, shá naal’a’í Edward Partridge, dóó níká’anáhi’nilchéhígíí;
3 Áádóó ałdó’ shá ndaal’a’í yéego da’oodlánígíí éí Ziongi shisodizin yilą́ąjį’ ándaha’áii, háálá éí kót’áo bee yídóojiił, Jesus Christ Bisodizin Báhooghan Dííjį́įdi Yá Naazínígíí éí bielders dóó t’áá ałtso bidine’é, t’áá ałtso nahasdzáán bikáá’góó beda’doolnih;
4 Háálá shisodizin bá hooghan akéedi dayoołkáałdi díí bee wójíi doo, Jesus Christ Bisodizin Bá Hooghan Dííshjį́įgóó Yá Naazínígíí.
5 T’áá aaníigo Shí t’áá anołtso nihich’į’ haasdziih: Daosįįh dóó ándasoozį́, áko nihe’adinídíín diné dah deiyínééhgóó bidahnaat’a’í danohłį́ nahalingo yee danihiníł’į́į doo;
6 Áádóó Zion haz’ą́ądi áhínáokahgo, dóó stake bił hadahaasdzogóó, éí ákwe’e nihaa áháyą́, dóó hóyéé’ nídahodiłtį́įhgo biyaa aná’níchééh doo, áádóó t’áá ałtso nahasdzáán bikáá’góó atí’doolíiłii doo t’ą́ą́’ kólzin da doo.
7 Bíni’dii kin dashijaa’, Far Westgi, éí kéyah shízhi’ binahjį’ hodílzin dóó diyingo bik’ihodidoonih; áádóó ts’ídá aláahdi hodílzinii wolyée doo, háálá ni’ bikáá’ sínízinígíí éí dílzin.
8 Éí bąą, kin shá nidadooh’ááł, shikéé’ naazínígíí ákwe’é áłah nídaadleeh doo biniyé, áko shá dahodísin doo.
9 Áádóó dííshį́į́jį’ ahoolzhiizhgo, ákwe’é shinaanish bee hahodoolzhish, dóó naanish bá hasht’e hodoolnííł, dóó ákwe’é ha’dootł’į́į́ł;
10 Áádóó Ya’iishjáástsoh dį́į́’góó yoołkáałgo bee hahodoolzhish; áádóó ch’íhoolzhiizhgo bíni’dii shidine’é yéego ndaalnishgo shízhi’ yee kin ndeidoo’ááł;
11 Áádóó dííjį́ dóó ńléí t’ááłá’í nááhaijį’ bíni’dii shighan bitł’ááhdóó hanááda’atł’ingo yinínáádadoolnish.
12 Áko éí áádóó bíni’ yéego yindaalnishgo ałtso ádeidoolííł, tsé bee ha’ootł’inígíí bikáá’dóó ńléí bílátahjį’, éí binda’doonishígíí ałtso ádeidoolííł.
13 T’áá aaníigo Shí nihich’į’ haasdziih, shá naal’a’í Joseph, áádóó shá naal’á’í Sidney, dóó shá naal’a’í Hyrum ałdó’, hooghan shízhi’ binahjį’ álnéhígíí biniinaa ąąh háá’á biih náánóhdééh lágo bidííniid;
14 Ákondi shízhi’ígíí binahjį’ kin ndoot’ááł éí bik’ehgo ádoolníłígíí bił ííshją́ą́ ádeeshłííł.
15 Áádóó shidine’é sodizin yilą́ąjį’ naazíinii bił ííshją́ą́ ííshłaaígíí doo yik’ehgo ndeez’ą́ą́góó, Shí éí doo bee lą́ adeeshłeeł da.
16 Ákondi shidine’é sodizin yilą́ąjį’ naazíinii, jó éí shá naal’a’í Joseph dóó bíká anáhi’nilchéhígíí, bił ííshją́ą́ ííshłaaígíí yik’ehgo ndeiz’ą́ą́góó, ákót’áo shidine’é áda’iilaago t’éiyá Shí bee lą́ adeeshłeeł.
17 Áádóó ałdó’, t’áá aaníigo Shí nihich’į’ haasdziih, shí íínisingo éí shikéé’ naazíinii t’áá tsxį́łígo Far Westdi nahidookah áádóó ákwe’é kin dashijaa’ nideidoonił;
18 Áádóó ałdó’ nááná łah nahaz’ą́ągi dóó binaagóó ałdó’ stakes nidahidoo’nił, éí shá naal’a’í Joseph, t’áá hoolzhishgi bił ííshją́ą́ ánásh’įįh doo.
19 Háálá áko shooh, Shí éí bił honishłǫ́ǫ doo, áádóó Shí diné bidááhdóó haałt’éego ádeeshłííł; háálá bí éí Shí díí diyingo haz’ą́ bibee ąą ńdítį́hí baa níjaa’ dóó Diyin binaanish bąąh ninílá. Tʼáá ákótʼée doo. Amen.