Wóltaʼii 7
Diyin Yá Yáłtiʼí Joseph Smith dóó Oliver Cowdery díí diyingo bił ííshją́ą́ ályaa, Harmony, Pennsylvaniadi, Tʼą́ą́chil 1829 yihahgo, íídą́ą́ʼ Urim dóó Thummim yinahjįʼ, John akééʼ sizíinii ayóó ábidooʼníinii, éí daatsʼí tʼahdii nahasdzáán yikááʼ hiiná doodaiiʼ dah nídiidzáago yínaʼádééłkid. Diyingo ił ííshją́ą́ ályaaígíí éí John akágí bikááʼ ataʼ haneʼ néíyíízooígíí átʼé dóó tʼáá bí néídeesʼį́į́ʼ.
1–3, John Ayóó Ábidóʼníinii éí Diyin Bóhólníihii nádzáájįʼ hiináa doo; 4–8, Peter, James, dóó John éí Diyin binaʼnitin bee yisdáʼiildéehii bibee ąą ńditį́hí dah deíjááh.
1 Áádóó Diyin Bóhólníihii áshíłní: John, ayóó ánííníshníinii, haʼátʼíísh nínízin? Háálá haʼátʼííshį́į́ nínízinígíí yíínkeedgo, éí naadoolyééł.
2 Áádóó shí ábidishní: Diyin Bóhólníihii, anoonééł bikʼi shidziilgo áshílééh, áko hinishnáago iiʼnaazíinii naahishʼéésh dooleeł.
3 Áádóó Diyin Bóhólníihii áshíłní: Tʼáá aaníí, tʼáá aaníigo, Shí ánidishní, díí tʼáá íiyisíí nínízinígíí biniinaa tʼáá kǫ́ǫ́ honílǫ́ǫ doo sheʼayóó átʼéii bee náánísdzáajįʼ índa, dóó ałʼąą dóoneʼé bił nahazʼą́ą́góó, ałkʼéí danilį́įgóó, bizaad ałʼąą ádaatʼéiigóó dóó dineʼé Diyin bikʼeh áhodooníłígíí baa hólneʼ dooleeł.
4 Áádóó díí biniinaa Diyin Bóhólníihii Peter ííłní: Náánísdzáajįʼ tʼáá kǫ́ǫ́ hólǫ́ǫgo bee bá lą́ aséłį́įʼgo, éíísh nídééʼiʼ? Háálá iiʼnaazíinii shaa yíʼéésh dooleełgo yee nashídééłkid, ákondi ni éí tʼáá tsxįłígo shił hazʼą́ądi shaa nídíídááłgo yííníkeed.
5 Shí ánidishní, Peter, díí nínízinígíí tsʼídá yáʼátʼééhii átʼéii ńtʼę́ę́ʼ; ákondi ayóó ííníshʼníinii éí aláahgo naanish íidoolíiłgo yinízin, doodago nihokááʼ dineʼé bitahgo tsʼídá naanish ílíinii áyiilaaígíí biláahgo íidoolííł.
6 Aooʼ, éí ayóó átʼáo naanish ílíinii ákʼiidiitʼą́; éí bąą kǫʼ dookʼą́ą́łii nahalingo ádeeshłííł dóó Diyin yá naalʼaʼí diyinkʼehgo akáʼanálwoʼígíí nilį́į doo; nahasdzáán yikááʼ yisdáʼiildééh deiyoosbánígíí Diyinkʼehgo yíkáʼanálwoʼ doo.
7 Áádóó diyinkʼehgo bíkáʼanánálwoʼ doo dóó nikʼéí James ałdóʼ bá; áádóó tánółtʼéego díí adziilii dóó diyinkʼehgo ákáʼanídaahjahgo bibee ąą ńditį́hí nihaa deeshjih éí náánísdzáájįʼ kótʼée doo.
8 Tʼáá aaníí shí ándishní, tʼáá ánóhłah nohsinígíí bikʼehgo nihaa doolyééł, háálá tʼáá ánóhłah nohsinígíí tsʼídá baa nihił hózhǫ́ǫ doo.