Wóltaʼii 31
Diyin Yá Yáłtiʼí Joseph Smith díí diyingo bił ííshją́ą́ ályaa éí Thomas B. Marsh yee yił hodoolnih biniyé, Biniʼantʼą́ą́tsoh 1830 yihahgo. Díí Sodizin ntsaago áłah azlį́į́ʼ bikééʼdóó tʼáá áko (wóltaʼii 30gi alą́ąjįʼ saad dashijaaʼígíí yídííłtah). Thomas B. Marsh éí díí yiziłígíí hahoolzhiizhyę́ędą́ą́ʼ tó bee biʼdoolzį́į́ʼ dóó Sodizinjí elder dooleełgo bee bikʼihodiiniiʼ díí diyingo bíł ííshją́ą́ ádoolníłígíí tʼah bitséédi.
1–6, Thomas B. Marsh éí Jesus Christ binaʼnitin bee yisdáʼiildéehii yee nidiʼnóotįįłgo bee bikʼihodiiniiʼ dóó baʼáłchíní yáʼáhootʼéehgo bił hazʼą́ą doo bidooʼniid; 7–13, Haʼíínílní, tʼáá áłahjįʼ sodílzin, áádóó Aaʼáhályáanii bikʼeh honíłʼį́ bidooʼniid.
1 Shiyeʼ, Thomas, shinaanish yinídlánígíí biniinaa nikʼihojisdliʼ.
2 Áko shooh, naʼáłchíní biniinaa ląʼígo nichʼįʼ nahwiisnááʼ; ákótʼée ndi, ni dóó naʼáłchiní bikʼihozhdeshdliił, aooʼ, naʼáłchíní yázhí; áádóó áájįʼ iidoołkááł tʼáá aaníinii deidoodląął dóó bił béédahodoozįįł dóó shisodizin biyiʼ bił tʼááłáʼí dííleeł.
3 Nijéí hidíłnááh dóó nił hoozhǫǫh, háálá biniyé anidoolʼaʼígíí baa hoolzhiizh; dóó doo nanitłʼahgóó yáníłtiʼ doo, dóó díí kʼad daʼáchííhdi haneʼ tsʼídá baa hózhǫ́ǫgo bee nanitin doo.
4 Shá naalʼaʼí, Joseph Smith, Jun. diyingo bił ííshją́ą́ ádaalyaaígíí bee naʼnítin doo. Kʼad kodóó náásjįʼ díí bee naʼnítin doo, aooʼ, dáʼákʼehdi daʼdooldah háálá adidoolkʼą́ą́łgo tʼáá íídą́ą́ʼ daʼiigai.
5 Éí bąą, tʼáá átʼéé ńtʼééʼ niiʼsizíinii bee alzhéhí bee íshééh, áádóó nibąąhági ádaatʼéii yóóʼádaalyaa, tłʼoh naadą́ą́ʼ nidaazgo dahyíłjił doo, háálá nidaalnishí éí bichʼįʼ niʼdoolyéełgo yííghahgo bee bidiʼnélʼį́. Ákohgo, naʼáłchíní náás dahináa doo.
6 Áko shooh, tʼáá aaníigo shí ándishní, tʼóó honíshgháníjįʼ bitsʼą́ą́ʼ dahdidíínááł, dóó shizaad bee naʼnítin doo, áádóó shí éí bá hashtʼehodeeshłííł.
7 Aooʼ, nihokááʼ dineʼé bijéí ąą ádadeeshłiił, dóó naahakááh dooleeł. Áádóó sodizin atah dadooleełígíí hadidíílííł;
8 Áádóó bidziilgo ádadíílííł áádóó ahanahidootʼishjįʼ ahodoolzhishgo hashtʼedíílííł.
9 Tiʼdahooʼnííh bichʼįʼ haʼíínílní, doo yáʼáshǫ́ǫ́góó akʼijįʼ yádaałtiʼígíí tʼáadoo bikʼijįʼ yáníłtiʼí. Nighan hazʼą́ągi aʼoh ádínílzingo bikʼidíníʼį́į́ doo, áádóó nidziilgo sínízį́.
10 Áko shooh, shí andishní sodizin bá náʼáłdziihii nílį́į doo, ákondi nihokááʼ dineʼé bichʼįʼ éí ndagaʼ, háálá doo daninízin da doo.
11 Nílááh ánííłʼaʼjigo yínááł, áádóó Aaʼ Áhályáanii haadííníłígíí dóó háajigo dahdidíínááłígíí yee nił hodoolnih.
12 Tʼáá áłahjįʼ sodílzin, doo ákónítʼį́įgo éí azánidiʼdoodlóós dóó bee nikʼihojisdliʼyę́ę nitsʼą́ą́ʼ náádidooʼnił.
13 Nihoníyáajįʼ akééʼ sínízį́, áádóó shooh, shí nił honishłǫ́ǫ doo. Díí saad éí doo diné doodago hastʼóí bitsʼą́ą́dę́ę́ʼ da, ákondi shí shitsʼą́ą́dę́ę́ʼ átʼé, Jesus Christ, náNináʼnídléí ndi, Azhéʼé iinízinígíí bee. Amen.