Wólta’ii 112
Diyin Yá Yáłti’í Joseph Smith díí diyingo bił ííshją́ą́ ályaa éí Thomas B. Marsh yee yił hodoolnih biniyé, éí Kirtland, Ohiodi, Ya’iishjáástsoh 23, 1837, díí éí Diyin God biDibé Yázhí hastóí naakitsʼáadah bikʼihodiiniiʼígíí bídadéétʼiʼ. Díí diyingo ííshją́ą́ ályaaígíi éí Elder Heber C. Kimball dóó Orson Hyde tsʼídá áłtsé Englanddi diyingo nahatʼá bee yisdáʼiildéehii yee naʼneeztą́ʼą́ądą́ą́ʼ díí bee haʼoodzííʼ. Thomas B. Marsh éí íídą́ą́ʼ Hastóí Naakitsʼáádah bik’idahodiinii’ígíí yilą́ąjįʼ dah sidáá ńt’ę́ę́’.
1–10, Hastóí Naakitsʼáadah dah yikahígíí éí tʼáá ałtso diné dah deiyínéhígíí dóó nihokááʼ dineʼé diyingo nahatʼá bee yisdáʼiildéehii dóó hóyéé’ áhodooníłígíí biinéé’ yee yił dahodoolnih; 11–15, Bitsin ałnáosdzo nídeididootį́į́ł, dóó Jesus bikéé’ jookah doo, dóó Bidibé baa ádahojilyą́ą doo; 16–20, Alą́ąjį’ Tált’éego Sodizin Yilą́ąjį’ Dah Nahááztánígíí biDiyin Bóhólníihii yikéé’ deidoozįįł; 21–29, Chahałheeł nahasdzáán bik’íidooldoh, dóó da’oosdląądígíí t’éiyá tó bee deidoolzįįł dóó yisdádoot’ish; 30–34, Ts’ídá Alą́ąjį’ Bídahólníhígíí dóó Hastóí Naakitsʼáádah dahyikahígíí díí t’áá át’é k’ad hoolzhishgo da’íchíhígíí bibee ąą ńdítį́hí dahdeiyójááh.
1 Shá naal’a’í Thomas Diyin Bóhólníihii éí t’áá aaníí kóniłní: Nisodizin sidéts’ą́ą́’; índa nee ajooba’ bee áká anánílwo’ígíí t’áá íiyisíí baa’ákoniizį́į́’, nik’isoo, bá íínít’įįd, éí shízhi’ t’áá aaníí yaa dahalne’ doogo bee bik’idahodiinii’ dóó tʼáá ałtso nihokáá’ dineʼé dah deíkááhgóó, ahidaʼdiilchíín, bizaad ał’ąą ádaat’éii dóó diné danilíinii bich’į’ adahaas’a’, éí shándaal’a’í ahandeiyizheezhgo deiyíísį́į́’.
2 T’áá aaníigo Shí nihich’į’ haasdziih, nijéí biyi’di dóó niyi’ łahgo doo ákódaat’ée da éí Shí, Diyin Bóhólníihii, doo shił yá’át’ééh da.
3 Ákót’ée ndi, áádóó a’ohgo ádaanitsíníkeesgo éí ayóó át’éego ándi’doolnííł; éí bąą, t’áá ałtso nibąąhági ádaat’éii baa nisíníyáhą́ą́ naanídidoot’ááł.
4 Shidááhdóó nijéí bił hózhǫ́ǫ doo; doo Gentile dine’é t’éiyá bitahgóó, shízhi’ t’áá aaníigo baa hólne’ doo, áádóó ałdó’ Jew dine’é bitahgóó; áádóó nahasdzáán bikáá’ t’áá ałtsogóó shizaad bíł chʼídadííʼááł.
5 Baa yáníłti’, áko, tʼáá abíní bikʼeh; dóó tʼáá ákwííjį́ bił nahólne’; bíniʼ niinééʼ hóyéé’ áhodooníłígíí adahwiisʼááǵóó baa halneʼ doo; áádóó tł’éé’ hazlį́į’go nahasdzáán yikáá’ kéédahat’íinii baa yáníłti’ígíí biniinaa, nits’ą́ą́’ da’oołháásh lágo.
6 Ziondi kééhonítʼínígíí bíniʼdii bił béédahoozįįh, áádóó łahjigo dahdóónééh lágo; háálá Shí, Diyin Bóhólníihii, naanish ayóó átʼéii naadideesh’ááł, éí nihokáá’ dine’é ba’áłchíní bitahgóó shízhiʼ baa hólneʼ doo.
7 Éí bąą, ni’éé’ noozhníí’ gónaa’í be’ítł’óh. Nikeeʼ ałdóʼ biih niʼéés, háálá ni náni’diiltį́, dóó dził daníʼáágóó atiin bikáá’ yínááł doo, dóó ląʼída dineʼé dahdeínééh bitahgóó ałdóʼ.
8 Áádóó nizaad binahjį’ diné bibee ádaa dahodzódli’ noolninii wóyahgo ádoolnííł áádóó ayóó át’éego ádaa adeidzódlíi a’ohgo ádadoolnííł.
9 Ndaʼiisíihii ninééʼ tsʼídá bee bich’ahodííshkeeł; dóó bikʼijį’ háíndzíí’go bíniʼdii akʼijįʼ yáłtiʼii doo hanáádoodzih da.
10 Joobaʼí ádíínílzin; dóó Bóhólníihii niDiyin God níla’ yee noolóós doo, dóó nisodizin biyiʼ bínaʼídíłkidę́ę yee nił hodoolnih.
11 Nił bééhózinígíí shił bééhózin, dóó nikʼisoo bá sodílzinígíí sidétsʼą́ą́ʼ. Tʼáadoo neʼayóóʼóʼóní nááná łaʼ bilááhgóó bichʼįʼ kóníłʼíní, ákondi bíniʼdii neʼayóó’óʼóní bichʼįʼ kóníłʼínígíí t’áá ni achʼįʼ kónílʼínígiʼ átʼée doo; dóó neʼayóó’óʼóniʼ tʼáá ałtso nihokááʼ dineʼé ląʼígo bichʼįʼ kónílééh, dóó tʼáá ałtso shízhiʼ ayóó ádeiyónínígíí ałdóʼ bichʼįʼ.
12 Hastóí Naakitsʼáadah nikʼiské dahyikahígíí bá sodílzin. Shízhiʼ biniinaa yéego bichʼahoshíníké, áádóó tʼáá átso bibąąhági ádaatʼéii ádáátʼįįdígíí bee bichʼahoshíníké, dóó yéego shízhiʼ baʼíínílí.
13 Áádóó doo yáʼát´éehii deinízínígíí bee ndabiʼdiskáaʼgo, dóó lą́ʼígo bichʼįʼ ndahwiisnáaʼgo, áko shooh, Shí, Diyin Bóhólníihii, éí baa ntséskees doo, dóó doo bijéí deistłʼisgóó, dóó shikʼijįʼ doo bikʼos deistłʼisdą́ą́ʼ, idahididookah, dóó shí éí nídadeesdzih.
14 Áko kʼad, ándishní, dóó ándishnínígíí, éí Hastóí Naakitsʼáadah ábidishní: Daosįįh dóó nihoozhníí’ gónaaí bedaʼohtłʼóh, nihitsin ałnáozʼá ńdadoohtįįh, shikééʼ deinóhkááh, dóó shidibé badaʼołtsóód.
15 Tʼáadoo ayóó áníshtʼé danohsiní; shá naal’a’í Joseph bikʼijįʼ wohłeeh lágo; háálá t’áá aaníigo Shí nihich’į’ haasdziih, Shí bił honishłǫ́, dóó baaʼáháshyą́ą doo; áádóó bee ąą ńdítį́hí baa níjaaʼígíí ałdó’, dóó ni ałdóʼ, éí shí níyáajįʼ doo bitsʼą́ą́ʼ náádidoohjih da.
16 T’áá aaníigo Shí nich’į’ haasdziih, shá naal’a’í Thomas, ni éí shidiyingo hazʼą́ągi shibee ąą ńdítį́hí dahyíjih doogo nikʼidiishniiʼ, éí Hastóí Naakitsʼáadah bidadéétʼiʼ, éí tʼáá ałtso nihokááʼ dineʼé dahdeiíkááhgóó ndaakai—
17 Shá naal’a’í nílį́įgo t’áá áłtso diyingo nahaz’ą́ą́góó ąą ádadíílííł éí áadi shá naal’a’í Joseph, dóó shá naal’a’í Sidney, dóó shá naal’a’í Hyrum, doo dookah da;
18 Háálá t’áa ałtso sodizin bá hooghan naaznilígíí binaanish t’óó honízáhíjį’ bąąh naazláago ííshłaa.
19 Ákohgo, t’áá háágóshį́į́ danííł’a’góó, ákǫ́ǫ́ díínááł, dóó Shí éí nił honishłǫ́ǫ doo; dóó tʼáá haa’ígiishį́į́ shízhiʼ baa hólneʼgóó dáádíilkał nichʼįʼ ąą át’ée doo, áko shizaad deididoots’į́į́ł.
20 Tʼáá háíshį́į́ shizaad nídeidiiláhígíí shí shéédahodoosįįł, áádóó háida shéédahoosinígíí, éí díí bił yá’ádaat’éeh doo, Ts’ídá Alą́ąjį’ Bídahólníhígíí, ahéłʼaʼii yéédahodoosįįł, éí nihá shízhiʼ binahjįʼ bił ndahashʼáago ííshłaa.
21 Áádóó ałdó’, Shí ánáánihidishní, áko tʼáá háida shizhiʼ binahjįʼ ííníłʼaʼgo, Shikʼiské, Hastóí Naakitsʼáadah ádaaníigo, éí ni bee nóhólnííh dóó bee lą́ asíníłį́į́’, éí adziilii bee dahólǫ́ǫgo ląʼída tʼáá ałtso dineʼé dahdaʼínééhgóó shi diyingo hazʼą́ bidáádíilkał tʼáá bił ndahazʼą́ą́góó yichʼįʼ ąą ádeidoolííł—
22 Shinááł a’ohgo ádaa tsídadidoohkos, dóó shizaad yikʼeh dahółʼį́įgo, dóó shi Iiʼ Siz’į́ Diyinii biinééʼ dayóósts’ą́ąʼgo.
23 T’áá aaníí, t’áá aaníigo, Shí nihich’į’ haasdziih, chahałheeł nahasdzáán bikʼiidooldoh, yéego chahałheeł dineʼé bintsékees dabiyiʼ doo, áádóó tʼáá ałtso dineʼé bąąhági ádaatʼéii yiih yikaigo yiiłtsą́.
24 Áko shooh, atiʼálʼį́ nahasdzáán yikááʼ dahiináanii tsxį́įłgo bikʼiidooldoh, yéego áháchįʼjįʼ iidoołkááł, hodookʼą́ą́ł beidoołkááł, ałtso hodoochxǫǫłjįʼ iidoołkááł, dóó chah hasin doo, dóó dazhdiʼní, dóó yínííł; áádóó nááts’ó’oołdísii nahalingo nahasdzáán tʼáá ałtso yikáá’ tádidoogaal, ní Diyin Bóhólníihii.
25 Áádóó shighandóó bee hahodoolzhish, dóó shighandóó adahwiisʼáágóó kódoolnííł, ní Diyin Bóhólníihii;
26 Áłtsé nihitahgóó, ní Diyin Bóhólníihii, nízhiʼ béédahoniilzin dadoohníi ndi doo shéédahonohsin da, shighan biyi bíighahí dashidooniid, ní Diyin Bóhólníihii.
27 Éí bąą, t’áadoo kwe’é shisodizin biyi’ ádahooníłígíí bee nihich’į’ ndahwii’nání, ní Diyin Bóhólníihii.
28 Ákondi shidááhdóó haałtʼé ádaʼdołnééh; áádóó tʼáá ałtso nahasdzáán bikááʼgóó dahidohkááh, dóó shinaʼnitin bee yisdáʼiildéehii diné tʼáá ałtso tʼahdoo deidiitsʼį́hígíí bee ndanohtin doo;
29 Áádóó háida oosdląądgo dóó tó bee biʼdoolzį́į’go éí yisdádoogááł, dóó háída doo oosdląądígíí, dóó doo tó bee biʼdoolzį́ʼígíí, éí ch’į́įdii nabilo’ doo.
30 Háálá nihí dóó, Hastóí Naakitsʼáadah, dóó éí, Ts’ídá Alą́ąjį’ Bídahólníhígíí, éí ni dóó bí nihikʼidahodiiniiʼ éí bił ndanilnishígíí dóó ninaatʼáanii danilį́į doo, éí díí Diyin bibe’adziilii baa dahidoolyééł, díí biniinaa éí dííjį́įdi dóó nihoolzhiishjįʼ díí diyin bibeʼadziilii niilyá, éí biyiʼ éí ląʼígo dah ooldahgo hoolzhizhígíí bił hwiidooʼaał,
31 Éí adziilii ni dahyílééł, éí nahasdzáán hadilyaayę́ędą́ą́’ t’áá ałtso díí adziilii baa dahaasyáhígíí bił;
32 Háálá t’áá aaníigo Shí nihich’į’ haasdziih, díí hoolzhishgi bee ąą ńdítį́hí, éí neiyí’nil, éí danihizhéʼéyę́ę bitsʼą́ą́dééʼ yílyá, áádóó yíwohdą́ą́ʼ éí, yá’ą́ą́shdééʼ kojįʼ neiyí’nil.
33 T’áá aaníigo Shí nihich’į’ haasdziih, naanish bee nik’idahodiinii’ígíí ayóó át’é. Nihijéí dóó nihe’iina’ hadaałt’éego ádaołééh, áko díí da’áchíhígíí bibąąhági ádaat’éii doo níhíla’ daabąąh da dooleeł.
34 Nánísdzáajį t’áá shikéé’ nidahsoozį́į dooleeł, háálá t’áá tsxį́łígo deeshááł; áádóó nihokáá’ dine’é t’áá ła’í nízínígo yíká ndaashnishígíí yíighahígíí bik’ehgo bich’į’ niná’deeshdlééł. Shí éí Alpha dóó Omega nishłį́. Amen.