1 Yisdáʼiiníiłii yitʼį́ áʼdiilyaago tʼáá átʼéhígi átʼáo deidiiltsééł. Tʼáá nihígi átʼáo diné nilį́įgo deidiiltsééł.

2 Áádóó kʼad kweʼé nihitah kʼé hólónígi átʼáo tʼáá ákótʼéego náás yitʼih doo, áko díí kʼé éí hoolʼáágóó ayóó átʼéii bił ahóóltąʼ doo, ákondi díí ayóó átʼéii kʼad doo nihee hólǫ́ǫ da.

3 John 14:23gi—NihiTaaʼ Nilíinii dóó biYeʼ, éí saad dashijaaʼ biyiʼ, ííshjání aʼdiilyaa; áádóó NihiTaaʼ Nilíinii dóó biYeʼ nihokááʼ dineʼé bijéí yiiʼ hólǫ́ǫgo baa ntsáhákees éí ałkʼidą́ą́ʼ doo daʼoodláanii binahatʼá átʼé, dóó éí doo ákótʼée da.

4 Díí naʼádíkid baa náháneʼgo—Daʼ Diyin God, Diyin yá ndaalʼaʼí, Diyin yá dahalneʼii, dóó nihokááʼ dineʼé biʼoolkił, éí yádiłhiłdi nahasdzáángi átʼáo dah naaznilígíí bikʼehgo daʼílkeed?

5 Shí éí ádíshní, Aooʼ. Ákondi doo Diyin yá ndaalʼaʼí díí nahasdzáán yikááʼ aa ádahalyą́ą da tʼáá hazhóʼó yikááʼ éí doodago yikááʼ kéédahatʼínée tʼéiyá.

6 Diyin yá ndaalʼaʼí doo nááná łaʼ díí nahasdzáángi átʼáo yikááʼ kéédahatʼį́į da;

7 Ákondi Diyin God hólǫ́ǫdi kéédahatʼį́, nahasdzáán nahalingo tózis dóó kǫʼ tónteelgi átʼáo yikááʼ kéédahatʼį́, áadi tʼáá ałtsoní ałkʼidą́ą́yę́ę, kʼad, dóó náásgóóígíí ayóó átʼáo ííshją́ą́ ádaalneʼ, dóó tʼáá áłahjįʼ Diyin Bóhólníihii yidááhgii dahólǫ́.

8 Diyin God kééhatʼį́įdi éí Urim dóó Thummim ayóó áhootʼéedi átʼé.

9 Díí nahasdzáán, haałtʼé dóó hoolʼáágóó bił áhootʼé, éí tségháʼdinídíinii nahalingo ádoolnííł dóó yikááʼ kéédahatʼíinii Urim dóó Thummimgi átʼée doo, dóó tʼáá ałtsojįʼ tʼáá sahdii hazʼą́ą doo, éí doodago tʼáá ałtso nahazʼą́ hóyahgo ádaʼoolʼįįł nidahazʼą́ą doo, kótʼáó yikááʼ kéédahatʼíinii bił ííshją́ą́ ádadoolnííł; dóó díí nahasdzáán éí Christ bí dooleeł.

10 Áádóó índa Revelation 2:17gi tsé łigai baa haneʼígíí, éí tʼáá ałtso díí baa haasnilígíí Urim dóó Thummimgi átʼáo yaa tsídadookos, áko hódahgo diyingó nahazʼą́ ádaatʼéii bééhózin dooleeł;

11 Áádóó tʼáá ałtso celestial hazʼą́ą góneʼ yah ahikááhígíí tsé łigai baa dahidooʼnił, éí bikáaʼgi ázhiʼ ániidígíí álʼįįh, éí nihokááʼ dineʼé doo łaʼ bił bééhóziní da tʼáá hazhóʼó beiítʼánígííí tʼéiyá. Ázhiʼ ániidígíí éí saad ílíinii átʼé.

12 Bóhólníihii Diyin God bízhiʼ binahjįʼ, náasdi ádahodooníłígíí bee haasdziih, áko South Carolinadi Diné Silį́įʼii nádááh bítséedi achʼįʼ nidawiiʼná binahjįʼ ląʼí nihokááʼ dineʼé atídaʼahilʼį́įgo dadínóonééł.

13 Naalteʼé hólónígíí daatsʼí binahjįʼ kóhodoonííł. Yéego díí baa sodiszingo, Níłchʼitsoh 25góó yoołkááłgo, 1832 yihahgo, díí iinééʼ shichʼįʼ haadzííʼ.

14 Łah tʼáá íiyisíí yéego hahgo lá Diné Silį́įʼii nídoodááł dishníigo bíká sodiszin ńtʼę́ę́ʼ, ázhí díí díkwíí da yee hanáádziiʼ:

15 Joseph, shiyeʼ, tseebídiin dóó baʼaan ashdlaʼ néédoohahgo, Diné Silį́įʼii biniiʼ yidííłtsééł; éí bąą díí tʼáá ákóníłtsogo nił bééhózin doo, dóó díí bee shííníkeedígíí doo bee bínááshidíłkidí da doo.

16 Kótʼáo ntséskeesgo áshiʼdiilyaa, díí yígháhígíí daatsʼí tʼááłáhídi mííl yidoohahdi bee hahalzhííshígíí átʼé éí doodago nigháídę́ę́ʼ łah níyáhígíí daatsʼí átʼé, shí daatsʼí nááshiʼdiilyaago índa biniiʼ yideestsééł.

17 Díí éiyá yinishdlą́ Diné Silį́įʼii yíghááh góneʼ doo tʼáá bítséedi yíghááh da dooleeł.

18 Haʼátʼííshį́į́ bitłʼááh naazléí bídahwiilʼą́ʼígíí díí iiná biyiʼ nídadiilyáhígíí, éí nááʼiináadi bił náádidiijah.

19 Áádóó díí iiná biyiʼ háiida ééhózin dóó ééʼdeitįįh ląʼígo néidiiléehgo áádóó háiida tʼáá yéego átʼį́įgo dóó akʼehółʼį́įgo, éí éíí nááná łaʼ hazʼą́ądi yee aláahdi átʼéii dooleeł.

20 Bééhazʼáanii ndahaasyaʼ, éí nahasdzáán tʼahdoo álnééhyę́ędą́ą́ʼ yáʼąąshdi doo tʼą́ą́ʼ kóndoolnííłgóó bee ndahwiistʼą́, éí binahjįʼ tʼáá ałtso akʼihojídlí nihwiileeh—

21 Áádóó Diyin God bitsʼą́ą́dę́ę́ʼ akʼihojídlí nídadiilyéehgo, éí bee hazʼáanii bikʼeh hojíłʼínígíí binahjįʼ nihwiileeh.

22 NihiZhéʼé Nilíinii éí bitsʼíís dóó bitsʼin hólǫ́ tʼáá diné beihólónígi átʼéego; biYeʼ ałdóʼ tʼáá ákótʼé; ákondi Iiʼ Sizį́ Diyinii éí bitsʼíís dóó bitsʼin ádingo hiná, ákondi Iiʼ Sizíinii nilį́. Díí doo ákótʼéégóó éiyá, Iiʼ Sizį́ Diyinii doo nihiyiʼ hólǫ́ǫ da dooleeł ńtʼę́ę́ʼ.

23 Diné da Iiʼ Sizį́ Diyinii beilyééh, áádóó bikʼi hooleeh ndi doo áłahjįʼ bił hólǫ́ǫ da dooleeł.