Wólta’ii 119
Diyin Yá Yáłti’í Joseph Smith díí diyingo bił ííshją́ą́ ályaa, Far West, Missouridi, Ya’iishjáástsoh 8, 1838 yihahgo, díí sodizin biyi’ na’ádéíkidgo baa náháne’ígíí: “O Diyin Bóhólníihii! Nándaal’a’í bił ííshją́ą́ ánílééh nidine’é éí díkwíí binaadeełii Diyin yich’į’ nideiyiilée doo.” Diyin bibéeso nahalyéhígíí bibee haz’áanii, dííshjį́įdi bééhózinígíí, díí diyingo ííshją́ą́’ ályaaígíí éí Sodizin da’atahígíí t’ahdoo bił ííshją́ą́ álnééh da ńt’ę́ę́’ k’ad índa. Diyin bibéeso nahalyé wolyéhígíí éí sodizin biyi’ baa na’ádéíkidígíí dóó áłtséédą́ą́’ ííshją́ą́ ádaalyaayę́ę (64:23; 85:3; 97:11) éí neeznáá níjaa’go t’ááłá’ígo bits’ájíniłgo doo t’áá éí t’éiyá ááha’níi da, ákondi t’áá át’é há bíighahígíí bik’ehgo náá’iiniih, éí doodago Sodizin Bá Hooghanjí, béeso ła’ bá ajiiníiłgo. Diyin Bóhólníihii éí áłtséédą́ą́’ t’áá át’é bee aná’ázhdeit’aah bibee haz’áanii dóó diyingo naadeełii bik’i’ádéest’į́į́’, éí sodizin da’atahígíí (éí íiyisíí alą́ąjį’ elders danilínígíí) éí hool’áágóó yee ahada’deest’ą́. Háálá díí bee ałhada’deest’áanii lą’ída t’áadoo yik’eh dahół’įįdígií biniinaa, Diyin Bóhólníihii t’óó hónízáhíjį’ nahjį’ kóyiilaa áádóó bitsásk’eh góne’ Diyin bibéeso ndeiyiiléí bibee haz’áanii Sodizin da’atahígíí t’áá ałtso yich’į’ kóyiilaa. Diyin Yá Yáłti’í Diyin Bóhólníhii neiyídééłkid haanéílą́ą́’ binaadeełii diyingo na’anish biniyéhígíí Yinízin doo. Díí diyingo ííshją́ą́ ályaaígíí biyi’ bee bił hóóne’.
1–5, Ákéé’ Naazíinii éí bindaadeełii dabíí’ohígíí nideiyiilé dóó aa deiyiilée doo, éí Diyin bibéeso át’é, t’áá nináháhááh béeso aa hinidééhii bits’ą́ą́dóó neeznáá níjaa’go t’ááłá’ígo yits’ánídei’nił doo; 6–7, Kót’áo áda’ał’į́įgo éí Zion kéyah haałt’é dooleeł.
1 T’áá aaníigo, Diyin Bóhólníihii kóní, Shí ádíshníigo éí t’áá ałtso bindaadeełii ch’íhinidéhígíí éí Ziongi shisodizin bá hooghan bishop danilínígíí bílák’ee hajááh doo,
2 Háálá éí bee shikin naha’nííł doo, áádóó éí Zion bitł’ááh naazléí bee hahidootł’į́į́ł áádóó Diyin bibe’adziilii ałdó’, áádóó éí Ts’ídá Alą́ąjį’ Bídahólníhígíí bąąh hadaaz’áhígíí yik’é ni’doolééł.
3 Áádóó díigi át’áo shidine’é Diyin bibéeso ndeiyiilée doo.
4 Áádóó díí bikéé’dóó, Diyin bibéeso nideiyiiléhígíí éí t’áá nináháhááh béeso aa hinidééhii bits’ą́ą́dóó neeznáá níjaa’go t’ááłá’ígo yits’ánídei’nił doo; áádóó díí éí hool’áágóó beehaz’áanii bik’eh hól’į́į doo, éí diyingo she’adziilii bee choo’į́į doo, ní Diyin Bóhólníihii.
5 T’áá aaníigo Shí nihich’į’ haasdziih, baa hodoolzhish t’áá ałtso kéyah Ziongi ahínéíkahígíí éí bindaadeełii ch’íhinidéhígíí neeznáá níjaa’go t’ááłá’ígo yits’ánídei’nił doo, áádóó díí beehaz’áanii yik’eh dahół’į́į doo, éí doodago éí nihitahgóó kéédahat’į́įgo doo bá bíighah da doo.
6 Áádóó Shí nihich’į’ haasdziih, shidine’é díí beehaz’áanii doo yik’eh dahół’į́į́góó, doo deidósingóó, áádóó kéyah Zion díí beehaz’áanii doo yee haałt’é ádeiyósingo, áko shibee haz’áanii dóó shibee ndahwiit’aahii yik’eh dahół’į́įgo, áko ts’ídá diyin doo, áko shooh, t’áá aaníigo Shí nihich’į’ haasdziih, kéyah Zion doo nihá hólǫ́ǫ da doo.
7 Áádóó díí éí t’áá ałtso Zion bistakes yich’į’ dadéez’į́į́’ doo. Tʼáá ákótʼée doo. Amen.