Wóltaʼii 21
Diyin Yá Yáłtiʼí Joseph Smith díí diyingo bił ííshją́ą́ ályaa, Fayette, New Yorkdi, Tʼą́ą́chil 1830 yihahgo. Díí diyingo ííshją́ą́ ályaaígíí éí Sodizin hadilnééhdi bił chʼétʼą́, yoołkááł wóójiʼgi, Peter Whitmer Sr. bighangi. Hastą́ą́ hastóígo, éí tʼáá íídą́ą́ʼ tó bee dabiʼdoolzį́į́ʼgo, éí atah ádaʼiilaa. Ádeinízingo tʼáá átʼé lą́ daʼasłį́į́ʼ dóó nahatʼá yídadiilkaalgo, éí Diyin God bibee hazʼáanii bikʼehgo (wóltaʼii 20 yídííłtah). Áádóó ałdóʼ Joseph Smith Jr. dóó Oliver Cowdery bił danilį́ dóó Sodizin yilą́ąjįʼ tʼáá áłah ásizį́į doogo yee lą́ daʼasłį́į́ʼ. Atsíí tʼááh dah adéesniiʼ bee, Joseph éíí Oliver Sodizinjí elder nilį́į doogo yee yiyísį́į́ʼ, áádóó Oliver tʼáá ákótʼáo Joseph yiyíísį́į́ʼ. Bááh dóó tó ataa daaską́ dóó bikʼijįʼ, Joseph dóó Oliver ákaʼííjéʼígíi tʼááłáʼí nízínígo yitsiitʼááh dahdadéesniiʼgo Iiʼ Sizį́ Diyinii yaayiizlá dóó łaʼí nízį́įgo Sohodizin atah dadooleełgo yikʼi sodoolzin.
1–3, Joseph Smith éí diyingo ooʼíinii, ataʼ halneʼé, Diyin yá yáłtiʼí, hastóí naaki tsʼáadah, dóó elder dooleełgo bikʼihodiiniiʼ; 4–8, Bizaad Zionjí biniyéhígíí yá hooʼááł doo; 9–12, Diyin Yá Naazínígíí bizaad deidoodląął Aaʼáhályáanii yinahjįʼ yáłtiʼgo.
1 Áko shooh, haneʼ łaʼ ndaahʼáa doo; éí biyiʼ diyingo ooʼíinii, ataʼ halneʼii, Diyin yá yáłtiʼí, Jesus Christ yá sizíinii, Diyin God Nihizhéʼé nilíinii íinízinígíí biníkááʼ góneʼ sodizinjí elder, dóó niDiyin Bóhólníihii Jesus Christ bibee ajoobaʼ yinílyéego nikʼihodiiniiʼ doo,
2 Iiʼ Sizį́ Diyinii adeesnááʼgo atłʼáahdi bee haʼaztłʼin niilyáago, áádóó íiyísii diyingo oodląʼ bee hadidoolnííł.
3 Éí sodizin binahastʼą́ dóó hadilyaa tseebíí tsʼáadah dóó biʼaan tádiin yihahgo, dį́į́ʼ góneʼ yiziłgo, dóó hastą́ą́góó yoołkááłgo, Tʼááchil wolyéhígíí biyiʼ.
4 Ákohgo, sodizinjí áłdishní, bizaad tʼáá átʼé bikʼeh dahonołʼį́į doo áádóó bibee nahazʼáanii baa halyéhígíí bikʼehgo nihaidoolééł, hodílzingo deínóhkáahgo;
5 Háálá bizaad ndadidoohłééł, tʼáá shí shizééʼdóó nahalingo, tʼáá ałtsojįʼ haʼíínílníigo dóó iinídlą́ągo.
6 Háálá díí áníłʼį́įgo chʼį́įdii bidáńdítį́hí doo nikʼeh didoodleeł da; aooʼ, dóó Bóhólníihii Diyin God chahałheeł bibeʼadziilii nidááhdóó nahjįʼ kwíidoolííł, áádóó yáʼąąshdi naazléí ná yáʼádaatʼééh dooígíí biniyé nidahidooʼnaał, dóó bízhiʼ baa hodooʼnih.
7 Háálá Bóhólníihii Diyin God kóní: Éí Zionjí biniyéí shinitsékees bichʼįʼ kóshʼį́įgo nizhónígo ayóó ábóodziilgo yiyoołwoł doo, dóó tʼáá awołí bee ájítʼį́įgo shił bééhózin, dóó bisodizin dasidítsʼą́ą́ʼ.
8 Aooʼ, Zion yíká binákʼeeshtoʼ náálį́įgo yiiłtsą́, áádóó yaa atí nilínígíí nahjįʼ kódeeshłííł, háálá bibąąhági ádaatʼéiiyę́ę bee baa ńdeetʼą́ągo yaa bił hózhǫ́, dóó binaanish ííłʼínígíí bikʼijinishdlíigo ííshją́ą́ áshʼį́.
9 Háálá, áko shooh, shidáʼákʼehgi nidaalnishígíí tʼáá ałtso ayóó átʼáo bikʼihojideeshdliił, áádóó saad yee yááłtiʼígíí deidoodląął, éí shí Aaʼáhályáanii binikááʼ góneʼ bichʼįʼ kwíishłaa, éí Jesus diné bąąhági ádaatʼíinii tsin ałnáosdzoh yikááʼ deiyiisxínígíí yaa hoolneʼ éí nihokááʼ dineʼé ndaʼiisíhígíí yá nináʼnídlá, aooʼ, háálá bijéí yínííł danilį́įgo bąąhági ádaadzaayę́ę bá yóóʼahididootʼáał.
10 Ákohgo íínísin Oliver Cowdery shikééʼ sínízíinii, tʼáá ni yidíísį́į́ł;
11 Díí óʼoolʼįįł ni naah silá, ni biyaadóó elder nilį́, éí nilą́ąjįʼ sizį́, áko Christ bisodizin biyiʼ elder nilį́į doo, éí shízhiʼ bee bikʼeʼashchį́—
12 Áádóó díí sodizin biyiʼdóó áłtsé halneʼí nilį́į doo, dóó nihokááʼ dineʼé bidááhdóó, aooʼ, Gentile dineʼé bidááhdóó; aooʼ, áádóó ákótʼáo Bóhólníihii Diyin God kóní, shooh, danółʼį́! Jew dineʼé ałdóʼ bidááhdóó. Amen