1 Shá naal’a’í Joseph, Diyin Bóhólníihii t’áá aaníigo, kóníłní, áko nashídííníłkidgo shił bééhodoozįįł dóó bik’e’dideeshtį́į́ł Shí, Diyin Bóhólníihii, shá naal’a’í Abraham, Isaac, áádóó ałdó’ shá ndaal’a’í Jacob, dóó Moses, dóó David dóó Solomon bá lą́ da’séłį́į́’, éí shá ndaal’a’í danilį́, éí bitł’ááh naazléii dóó na’nitin lą’í beda’asdzáán dóó sáanii nidei’eesh dooleełígíí bídéét’i’—

2 Áko shooh, dóó níníł’į́, Shí éí Bóhólníihii niDiyin God nishłį́, díí bína’ídííníłkid bídéét’i’ígíí bee nił hodeeshnih.

3 Éí bąą, shí k’ad naanishłéhígíí biniyé nijéí hasht’enilééh dóó bee nandínéeshtįįłígíí bik’ehodííł’įįł; háálá díí bee haz’áanii bił ííshją́ą́ ádaalyaaígíí éí díí bee haz’áanii yik’eh dahół’į́į dooleeł.

4 Háálá áko shooh, bee aha’deet’aah ániidígíí dóó hool’áágóóígíí nihił ííshją́ą́ áshłééh; áádóó bee aha’deet’aahii doo bik’eh honił’į́į́góó, áádóó bááhádzidii éí nihich’į’ kódoolnííl; háálá diné doo ła’ díí bee ahada’deest’ánígíí doo yits’ą́ąjį’ nídooyis da dóó ákódaadzaago éiyá doo shi’ayóó át’éii yiih doogáał da.

5 Háálá t’áá háida bik’ihojideeshdliiłígíí éí ak’ihojídlí bee haz’áanii bídadéét’i’ígíí yik’eh dahół’į́į doo, dóó hait’áo áda’al’ínígíí bídadééti’, éí t’ahdoo nahasdzáán álnééhę́ędą́ą́’ díí ádaał’į́į dooleełgo bee nihoot’ą́.

6 Áádóó ániid dóó hool’áágóó diyingo bee aha’deet’aah bídéét’i’ígíí, éí shi’ayóó át’ée t’áá át’é hólǫ́ǫ doogo hadilyaa; dóó t’áá háíshį́į́ t’áá át’é beílyáhígíí éí bibee haz’áanii yik’eh hół’į́į doo, éí doodago éí doo Diyin yił yah anídoodááł da, ní Bóhólníihii Diyin God.

7 Áádóó t’áá aaníigo Shí nihich’į’ haasdziih, díí éí bik’ehgo bééhaz’áanii ál’į́į doo: T’áá áłtso bee ahada’deet’áanii, dóó naaltsoos bik’ehgo lą́ da’asdlį́į’ii, dóó diné ahił lą́ da’asdlį́į’ii, dóó naanish ádadoolníiłii, dóó bee ádee hada’iisdzíi’ii, dóó bee ałch’į’ hada’iidzíi’ii, t’áá ałtso ádazhdool’įįłii, hait’áo ahił nda’anish, dóó biniyé dah ooldah, éí doodago bidahodoolníłígíí, áko doo bee ahada’deest’ą́ą́góó dóó doo bee lą́ dazhdííniidgóó dóó doo Ii’ Sizį́ Diyinii yee ádee haadzíi’ii yee ahada’deest’ą́ą́góó, éí ak’ah bee atsiit’ááh bik’i daasdziidii í’iilaago, éí t’áá áłah hoolzhish dóó t’áá át’é hool’áágóó hoolzhishgóó, áádóó yéego hodílzin, diyingo ííshją́ą́ é’élyaa bee dóó shi ak’ah bee bik’ihodiinii’ yee haadzíí’go, éí nahasdzáán bikáa’gi bik’ihodiinii’go díí adziilii dahyooléeł doo (áko Shí shá naal’a’í Joseph bik’idiishnii’go akéedi dayoołkáałdi díí adziilii dah yooléeł doo, t’áá ła’í t’éiyá nahasdzáán bikáa’gi díí adziilii dóó Diyin Bibe’adziilii bił bee ąą ńdítį́hí bee bik’ihodiinii’ doo), áko díí t’áá át’é doo ílį́į da doo, dóó yá’át’éehii, éí doodago daneeznáanii tsxį́įłgo náá’iiná bii’ dóó bikéédę́ę́’ ádoolníiłgo doo bíighah da; áko t’áá ałtso bee ahada’deest’áanii doo ádaalyaagóó éí nihikwá’ásiní anídahaaskaiígíí t’áá áajį’ doo.

8 Áko shooh, shighan éí kin biiʼ hasht’ehodít’éii át’é, ní Bóhólníihii Diyin God, áádóó doo éí biyi’ hahoochałii át’ée da.

9 Da’ naa’iiniihísh bee lą́ adeeshłííł, doo shízhi’ binahjį’ ályaagóó, ní Diyin Bóhólníihii?

10 Éí doodago daats’í nihílák’eedóó doo nihaaníláí shaa dadoołééł?

11 Áádóó dooísh nik’idiishnii’ da, ní Diyin Bóhólníihii, t’áá hazhó’ó bee haz’áanii beego t’éiyá, éí shí doo shizhé’é nahasdzáán t’ahdoo álnéhę́ędą́ą́’ diyink’ehgo bee, nik’idiilnii’?

12 Shí éí Bóhólníihii nihiDiyin God nishłį́; dóó díí bee haz’áanii nihaa nishłé—áko diné doo ła’ NihiZhé’é Nilíinii yił hólǫ́ǫ da doo t’áá hazhó’ó t’áá shí doodago shizaad bik’ehgo t’éiyá, díí shibee haz’áanii át’é, ní Diyin Bóhólníihii.

13 Áádóó nahasdzáán bikáá’ siléí, nihokáá’ dine’é yá sodoolzinii, aláahdi diné naatʼáanii nidahaʼáádóók’ehgo, éí doodago naat’áanii danilíiniik’ehgo, éí doodago óhólnííh bee dahólóoniik’ehgo, éí doodago ázhi’ ádaat’éii, dabik’ehgo, doo éí shí éí doodago shizaad bik’ehgooígíí, ní Diyin Bóhólníihii, éí ałtso nahjį’ kódadoolnííł, dóó nihokáá’ dine’é dahnídahidiikaijį’ doo hólǫ́ǫ da doo, áádóó nááda’iináadi éí doodago bikéé’dóó nidi, ní Bóhólníihii nihiDiyin God.

14 Háálá t’áá ałtsoní ch’éédzí’ígíí éí shí ásht’į́; áádóó ha’át’íhída doo shíhígíí éí nahidoolghą́ą́ł dóó nahjį’ kódoolnííł.

15 Éí bąą, díí nahasdzáán bikáá’ hastiin asdzą́ą́ yizyehgo, áádóó doo shí éí doodago shizaad doo bik’ehgo ahisgehgóó, dóó nahasdzáán bikáa’gi ahił nidlį́įgo aha’deet’ą́ągo, éí dah nídiit’áázhgo aha’deet’ánę́ę dóó ahisgehę́ę doo ílį́į da doo, áádóó díí nahasdzáán bikáá’dóó náábi’diilyáago; éí bąą, nahasdzáán yikáá’dóó dahnídiit’áázhgo bee haz’áanii bąąh ádin doo.

16 Éí bąą, nahasdzáán yikáá’dóó dah nídiit’áázhgo doo ahisgeh da doo dóó doo ahidooyeh da; éí Diyin yá naal’a’í ábidi’doolnííł, éí Diyin yá naal’a’í áká’anídaajahí danilį́į doo, hazhó’ó yá’át’éehii yíká ádaat’íinii yá ndaal’a’ doo, dóó aláahdi, dóó hool’áágóó ayóó ádaat’éii da’ílíinii danilį́į doo.

17 Háálá díí diyin yá ndaal’a’í éí shibee haz’áanii doo yik’eh dahół’į́įd da; éí bąą, doo lą’í bee dahodooleeł da, ákondi doo t’áá sahdii dóó t’áá sahídii danilį́į doo, aláahdi Diyin God bił hojílǫ́ǫ doogo éí ndaga’, yisdáheeskai bił haz’ą́ągo, t’áá ahool’áágóó; dóó doo Diyin Godgi ádaat’ée da doo, ákondi Diyin God yá ndaal’a’í hool’áágóó ahóyéel’áágóó danilį́į doo.

18 Áádóó ałdó’, t’áá aaníigo Shí nihich’į’ haasdziih, diné asdzání ła’ yizyehgo, dóó k’ad dóó ahool’áágóó yił aha’deest’ą́ągo, áko éí aha’deet’ą́ doo shí ííshłaagóó éí doodago doo shizaad bik’eh ályaagóó, éí shibee haz’áanii át’é, dóó doo Ii’ Sizį́ Diyinii bee ádee haadzíi’ii doo bee ahaahodee’nilgóó, éí bik’idiishnii’ dóó díí bee adziilii bee nídiiłtinígíí, ákot’éego éí doo ílį́į da dóó doo ahił hólǫ́ǫ da doo díí nahasdzáán bikáá’dóó nábi’diilyáago, háálá doo éí shí ahaa honínil da, ní Diyin Bóhólníihii, dóó doo shizaad beegóó; dah ńdahidiikáahgo áadi doo áda’al’į́į da, háálá Diyin yá ndaal’a’í dóó diyin god daazlį́’ígíí éí áadi bik’idahodiinííh, éí yíighah ch’íhidookahgo doo bá bíighah da; éí yíighah doo ch’éhékáhí da, éí bąą, shi’ayóó át’éii doo baa dahalyée da; háálá shighan éí kin biiʼ hasht’ehodít’éii át’é, ní Bóhólníihii Diyin God.

19 Áádóó ałdó’, t’áá aaníigo Shí nihich’į’ haasdziih, shizaad bik’ehgo hastiin bich’ooní yił ahíí’áazhgo, éí shibee haz’áanii át’é, dóó éí ániid dóó hool’áágóó diyingo bee aha’deet’aah bee, dóó Ii’ Sizį́ Diyinii bee ádee haadzíi’ii bee ályaago, ła’ yiilzįįhígíí binahjį’, shí éí díí adziilii bee bik’idiishnii’ dóó díí Diyin bibe’adziilii bibee ąą ńdítį́hí bee; áádóó ádabidi’doo’niił—Áłtsé náá’iiná ályaago áadi ndidooh’ash; áádóó doo áłtsé náá’iináádę́ę́’ nídooht’áázhgóó, náá’ákóne’ náá’iiná ayaadi náádidooht’ash; éí naat’áanii yikáá’ dahnídanidaahii, dine’é bił ndahaz’áanii, aláahdi naat’áanii bił nahaz’ą́ądi, áádóó bee da’adziilii, bee idahólníihii, t’áá ałtso hódah dóó hóyah naazléi—áadi índa iiná naaltsoos Dibé Yázhí Wólyéii bíhígíí biyi’ nidoodzoh, áko doo iidiyoołhééł da áko doo na’ałtseedí bidił neidoosas da, áádóó shibee aha’deet’ą́ bee wohxááłgo, dóó háida doo na’ałtseedgóó áko doo na’ałtseedii bidił ndoosasgóó, dóó t’áá ałtso ahool’áágóó; áádóó kodóó dóó nahasdzáán dóó dahdoo’áázhgo t’áá ałtso adziilii choidooł’įįł; áádóó diyin ya ndaal’a’í, dóó diyin danilínígíí ákwe’é naazį́įgo ádaalyaaígíí, éí Diyin bił haz’ą́ądi yahanídookah dóó t’áá ałtsoní ayóó át’éii daabí doo, bitsiit’ááh diyingo deidoolzįįł, éí ayóó át’éii t’áá át’é dóó bílástsii’ hool’áágóó ahóyéel’áágóó náhoodleeł doo.

20 Áádóó diyin god danilį́į doo, háálá be’iina’ doo ninít’i’ da doo; éí bąą ahoolʼáádę́ę́ʼ dóó ahoolʼáágóó hiináa dooleeł, háálá t’áá náás dahiiná; t’áá ałtsoní yilááh nilį́į doo, háálá t’áá ałtsoní yik’i bóhólnííh doo. Áko diyin danilį́į doo, háálá t’áá ałtso adziilii bee dahólǫ́ǫ doo, dóó Diyin yá ndaal’a’í bik’eh dahół’į́į doo.

21 T’áá aaníí, t’áá aaníigo, Shí nihich’į’ haasdziih, ayóó át’éii baa dahidookah shibee haz’áanii bik’eh dahonoł’į́įgo ákót’ao t’éiyá doodago éí dooda.

22 Háálá daniditį́įhdi áhoołtsʼóózígo yah aʼatiin, áádóó áláahdi ayóó át’éii dóó iiná doo ninítʼiʼii éí áłtsʼóózígo bił yah ahóótʼiʼ, dóó tʼáá díkwíhígo tʼéiyá yikʼi hákááh, háálá nahasdzáán bikáa’gi doo dashinohsin da dóó doo shéédahonohsin da.

23 Ákondi nahasdzáán bikáa’gi shaahisookaigo, ákohgo índa shéédahonosin doo, dóó aláahgo ayóó ahoot’éhígíí danihí doo; áko shí honishłǫ́ǫdi nihí ałdó’ áadi dahonohłǫ́ǫ doo.

24 Díí éí hool’áágóó dahiináanii ádaat’é—t’áá aaníinii Diyin God t’éiyá bił ééhózinii nílį́įgo yéédahosin doo, dóó Jesus Christ, yiníł’a’ígíí ałdó’. Éí shí ásht’į́, éí bąą, shibee haz’áanii nídadoołé.

25 Daniditį́hí nteel, dóó anoonééł bich’į’ hóteelgo atiin; áádóó lą’ída ákóne’ yah ahikááh, háálá doo dashinízin da, dóó shibee haz’áanii doo yik’eh dahół’į́į da.

26 T’áá aaníí, t’áá aaníigo, Shí nihich’į’ haasdziih, diné shizaad bik’ehgo bich’ooní yeigháahgo, dóó Ii’ Sizį́ Diyinii bee ádee haadzíi’ii yee hool’áágóó ahił naa’aashgo yiilzį́įgo, shí shik’ehgo ákodzaago, áádóó asihgo dóó bąąhági át’éii ániid dóó hool’áágóó diyingo bee aha’deet’aah yii’ ákódzaago, dóó t’áá áłtso dadílzinii bá naháłt’i’, ákondi doo háida doo átí’íł’íinii bidił yee yiyiiłhééhgóó, ákondi áłtsé náá’iináadi náádidoojah, dóó ayóó át’áo haz’ą́ą góne’ yah ahidookah; ákondi ats’íís bee dahólǫ́ǫgo ádooldįįł, Ch’į́įdii biti’hoonííh yii’ tádidookah bá niná’ályá bijį́įdi, ní Bóhólníihii Diyin God.

27 Iiʼ Sizį́ Diyinii bik’ijį’ ndahojiłt’i’go, éí nihokáá’ bikáa’gi dóó nahasdzáán bikáa’gi doo bee baa nída’didoot’ááł da, éí doo átída’íł’íinii bidił dazdeesasgo ajiis’xį́įgo, áádóó shíjí anoonééł bee lą́ ajisłį́įgo, dóó ániid dóó hool’áágóó diyingo bee aha’deet’aah haílyáago, ní Bóhólníihii Diyin God; áádóó díí bee haz’áanii doo yik’eh hół’ínígíí éí t’áá ádijį’ nizhdoogááł, éí doo shił yah anídoogááł da, ní Diyin Bóhólníihii.

28 Shí éí Bóhólníihii nihiDiyin God nishłį́, áádóó shiDiyin Bibe’adziilii Dílzin bibee haz’áanii nihaa dahideeshłééł, éí nahasdzáán t’ah doo hadilnééhyę́ędą́ą́’ shí dóó shiZhé’é bee nihoniit’ą́ą́ ńt’ę́ę́’.

29 Abraham t’áá ałtsoní beílyá, beílyáhígíí, diyingo ííshją́ą́ dóó bee haz’áaniik’ehgo, dóó shizaad bik’ehgo beílyá, ní Diyin Bóhólníihii, áádóó ayóó át’áo haz’ą́ą́ góne’ yah ííyá dóó binaat’áági dahsidá.

30 Abraham bee ádee hada’iisdzíi’ii baa heesyá éí ba’áłchíní bá, áádóó ba’áłchíní bits’ą́ą́dę́ę́’—éí ni bits’ą́ą́dę́ę́’ dahosoolį́į́’, ni, shá naal’a’í Joseph—díí éí t’áá náás bee hoolzhish doo nahasdzáán bikáa’gi; áádóó Abraham dóó bílástsii’ baa hane’go, nahasdzáándóó dahnídiikaigo t’áá náás yikah doo; t’áá áłah nahasdzáán biyi’ dóó doo nahasdzáán bikáa’gi sǫ’ ánéélą́ągi; éí doodago, tónteel bąąhgi séí doo wólta’ át’éego ánéelt’e’ doo.

31 Díí bee ádee ha’oodzíí’ii ałdó’ nihí, háálá Abraham bits’ą́ą́dę́ę́’ wohkah, áádóó Abraham éí bich’į’ ádee ha’oodzíí’; áádóó díí bee haz’áanii bee shizhé’é binaanish náás yigááł, ákóne’ ayóó át’éego ádólzin.

32 Náás wohkah, éí bąą, Abraham binaanish ádaołééh; shibee haz’áanii ádaołééh áko éí binahjį’ yisdáhidoohkah.

33 Ákondi shibee haz’áanii doo ádaałééhgóó shiZhé’é bi ádee ha’oodzíí’ doo nihaadoolyéeł da, éí Abraham yee nílá.

34 Diyin God Abraham bee haz’áanii yeinílá, áádóó Sarah éí Hagar Abraham bich’ooní dooleełgo yeiníłtį́. Áádóó ha’át’íí biniinaa ákodzaa? Háálá díí éí bee haz’áanii át’éego biniinaa; áko Hagar bits’ą́ą́dóó dine’é lą’í hazlį́į́’. Díí, éí bąą, bee ádee ha’oodzíí’, dóó nááná ła’, bidahoolyaa.

35 Éí bąą, da’ Abraham, díí bik’ijį’ siláa doo? T’áá aaníigo Shí nihich’į’ haasdziih, Ndaga’; háálá Shí, Diyin Bóhólníihii, bee haz’áanii ííshłaa.

36 Abraham biye’ Isaac niididoo’ááłgo bee bich’į’ ha’oodzíí’; ákót’ée ndi, bee na’asdzoh: Diné ts’ídá doo diyííłhéeł da. Ákót’ee ndi, Abraham, doo yik’ijį’ silį́į́’ da, dóó t’áá áko í’iilaago bee bá yisdzoh.

37 Abraham sáanii beʼasdzáán ííłʼį́į doogo baaheesnil, dóó bá nda’iishchį́; áádóó t’áá áko í’iilaago béísdzoh, háálá éí baadahaasnil, dóó bee haz’áanii yik’ehgo í’iilaa; Isaac ałdó’ dóó Jacob doo nááná ła’ áyiilaa da t’áá áłah bee bich’į’ ha’oodzí’ígíí ye’iilaa; áádóó doo nááná łah í’iilaa da t’óó bee bich’į’ ha’oodzí’ígíí t’éiyá ye’iilaa, t’áá áłah ayóó áhoot’éé góne’ yah íí’áázh, bee ádee hada’iisdzí’ígíí bik’ehgo, dóó naat’ááh bikáá’ dahasdáhígíí yikáá’ dah neezké, dóó doo diyin ya naal’a’í danilį́į da ákondi diyin daazlį́į́’.

38 David ałdó’ lą’í sáanii be’adzáá’ dóó beʼasdzáán ííłʼį́į doogo baa heesnil, áádóó Solomon dóó Moses shá naal’a’í ałdó’, áádóó lą’í shá ndaal’a’í ałdó’, t’áádoo le’é ádaalyaa dóó dííjį́įjį’; áko ádin t’áadoo nda’iisíí’ da t’áá hazhó’í t’áádoo baa háláhígíí t’éiyá.

39 David bich’odaaní dóó sáanii beʼasdzáán ííłʼį́į dooleełígíí éí shí baa hánil, éí shá naal’a’í, Nathan bílá binahjį’, áádóó ła’ Diyin yá yádaałti’í éí díí adziilii bibee ąą ńdítį́hí bee; áko doo éí shí shik’ijį’ asih da t’áá hazhó’í Uriah dóó bich’ooní bił áhoot’įįdígíí t’éiyá; dóó, éí bąą bi’ayóó áhoot’éédę́ę́’ hadááyá, dóó yoosbánígíí éí beílyá; dóó díí nahasdzáándóó daniidzáágóó doo baa hidoolyééł da, háálá nááná łahjigo baa hélá, ní Diyin Bóhólníihii.

40 Shí éí Bóhólníihii niDiyin God nishłį́, dóó shá naal’a’í Joseph, t’áá ałtsóní bee ninádahidoolyéłígíí, bee nahoot’ánígíí, naadeeshnił. Nínízinígíí bee bínashidííłkił, dóó shizaad bik’ehgo nił ch’ídeesh’ááł.

41 Áádóó aa’dilyé béé bínashídííníłkidígíí, t’áá aaníí, t’áá aaníigo, Shí nihich’į’ haasdziih, hastiin ła’ bich’ooní ániid dóó hool’áágóó diyingo bee aha’deet’aah ayiilaago, áádóó nááná ła’ hastiin yił naa’aashgo, áádóó hodiyingo yiisį́į́’go bee bá nahoní’ą́ągo, bí éí aa’diiláa doo áádóó nahjį’ kóbidi’doolnííł.

42 Ániid dóó hool’áágóó diyingo bee aha’deet’aah doo bá ályaagóó, dóó nááná ła’ hastiin yił naa’aashgo, éí aa’dííláa doo.

43 Áádóó bahastiin nááná ła’ asdzání yił naa’aashgo, dóó ádee ha’oodzíí’ áyiilaago, yee ádee haadzí’ę́ę k’íínít’į’ dooleeł dóó aa’dííláa doo.

44 Áádóó asdzání doo aa’dííláágóó, áádóó t’áadoo ádzaagóó dóó t’áadoo yee ádee haadzí’ígíí k’ííníti’góó, dóó bił bééhózingo, dóó díí nił ííshją́ą́ ádeeshłííł, shá naal’a’í Joseph, áko índa adziilii nee hólǫ́ǫ doo, she’Ádziilii Dílzinígíí bee, asdzánígíí hastiin beíltį́ éí doo aa’dííláa da ndi ak’ehół’į́; háálá hastiin éí lą’ígo yik’i bóhólníihgo ábidi’doolnííł.

45 Háálá Diyin bibee ąą ńdítį́hí dóó bibe’adziilii bee níísį́į́’, háálá éí binahjį’ t’áá ałtsóní nináníshdlá, dóó baa hoolzhiizhgo t’áá ałtsoní nił ííshją́ą́ ádeeshłííł.

46 Áádóó t’áá aaníí, t’áá aaníigo, Shí nich’į’ haasdziih, áko t’áá ałtsóní nahasdzáán bikáa’gi hool’áágóó diyingo ahéstł’ǫ́ǫgo éí yá’ąąshdi ałdó’ hool’áágóó diyingo ahéstł’ǫ́ǫ doo; shízhi’ dóó shizaad binahjį’, ní Diyin Bóhólníihii, éí ahool’áágóó yá’ąąshdi ahił hólǫ́ǫ doo; áádóó nahasdzáán bikáa’gi bąąhági ádaat’éii nahjį’ kwíínlaago éí yá’ąąshdi nahjį’ kódoolnííł; áádóó bąąhági ádaat’éii t’áá yínít’a’go éí yá’ąąshdi t’áá yínítą’ doo.

47 Áádóó ałdó’, t’áá aaníigo haasdziih, háida bik’ihosinídli’ígíí éí shí bik’ihozhdeeshdliił, áádóó t’áá háida doo yá’át’ééhgóó bá háínídzíi’go shídó’ doo yá’át’ééhgóó bá hadeesdzih, ní Diyin Bóhólníihii; háálá Shí, Diyin Bóhólníihii, niDiyin God nishłį́.

48 Áádóó ałdó’, t’áá aaníigo Shí nich’į’ haasdziih, shá naal’a’í Joseph, nahasdzáán bikáa’gi aahíléhígíí, áádóó háida nahasdzáán bikáa’gi baa híléego, shizaad bee dóó shibee haz’áanii bik’ehgo, ak’ihojídlí bich’į’ kódoolnííł áádóó doo yá’át’éehii éí doodá, áádóó shi’adziilii bee doo, ní Diyin Bóhólníihii, áádóó nahasdzáán bikáa’gi dóó yá’ąąshdi doo bik’ijį’ siláhí da doo.

49 Háálá Shí éí Bóhólníihii niDiyin God nishłį́, dóó nihoníyáajį’ ndi nił honishłǫ́ǫ doo, dóó ahoyool’áágóó t’áá ałtsogóó ndi; háálá Diyin bił haz’ą́ądi yah anídíídááłgo ashłééh, áádóó naat’ááh bikáá’ dahasdáhí shiZhé’é bił haz’ą́ą góne’ nahasht’eeshłééh, nizhé’é Abraham bił.

50 Áko shooh, náádahisííníłnii’ígíí yiiłtsą́, dóó t’áá át’é nibąąhági ádaat’éii bee naanídideesh’ááł; náádahisíníłnii’ígíí yiiłtsą́ éí bee nił hooshne’ígíí bik’eh honíł’į́įgo ákódzaa. Yíwohjį’, éí bąą, dóó ch’ídíníít’į́įłgo ná ííshłaa, áádóó Abraham biye’ Isaac nááyiisnii’ígíí bee lą́ aséłį́į́’.

51 T’áá aaníigo, Shí nich’į’ haasdziih: Asdzání shá naal’a’í, Emma Smith, nich’ooní, naaníłt’íinii éí ábidishní, ádíílííł bididííniił nidííniidyę́ę doo íídoolííł da; háálá shí ííshłaa, ní Diyin Bóhólníihii, éí t’áá ánółtso nihił béédahodoozįįł biniyé, Abraham ííshłáá’ígi át’áo, áko náá’diyííłnihgo bee ná nahoní’ą́, bee aha’dit’aah dóó niná’ádeet’aah bee.

52 Áádóó bíni’dii asdzání shá naal’a’í, Emma Smith, t’áá ałtsoní baa deet’ánígíí shá naal’a’í Joseph, éí shidááhdóó daniłtólí dóó hadaałt’é; áádóó doo hadaałt’éhígíí, dóó hadaniilt’é daanínígíí, éí adabidi’dooldįįł, ní Bóhólníihii Diyin God.

53 Háálá Shí éí Bóhólníihii niDiyin God nishłį́, dóó shiinéé’ bik’eh dahinoł’į́į doo; áádóó shá naal’a’í Joseph lą’í da yik’i bóhólnííh doo; háálá t’áá áłch’į́dí ndi yéego yídínéelkaal doo, dóó kodóó’ bidziilgo ádeeshłííł.

54 Áádóó asdzání shá naal’a’í, Emma Smith, shá naal’a’í Joseph yił naa’aash dóó yéego yótą́ doo, áádóó doo éí nááná háida yił da. Ákondi díí bee haz’áanii doo yik’eh hół’į́įgo éí ho’diyoolyééł, ní Diyin Bóhólníihii; háálá Shí éí Bóhólníihii niDiyin God nishłį́, áko hodi’yoolyééł shibee haz’áanii doo bik’eh hojíł’į́į́góó.

55 Ákondi díí bee haz’áanii doo bik’eh hojíł’į́į́góó, ákodzaago éí shá naal’a’í Joseph t’áá ałtsoní yá ííł’į́į doo, t’áá bí ádííniidígi át’éego; bik’ihozhdeeshdliił dóó ba’áłchíní náhoodleeł doo dóó neeznádiindi ałhą́ą́h nániláago díí nahasdzáán bikáa’gi baa doolyééł, hazhé’é dóó hamá, bik’is dóó biláhkéí, dahooghan dóó kédaayah, bich’ooní dóó ba’áłchíní, dóó hool’áágóó iiná bąąh nidahidoolyééł éí hool’áágóó ndahaz’ą́ą́góó ákót’ée doo.

56 Áádóó ałdó’, t’áá aaníigo haasdziih, asdzání shá naal’a’í bíni’dii shá naal’á’í Joseph ni’iisí’ígíí yaa ndi’doo’ááł; áádóó índa asdzání ni’iisí’ígíí bándi’doot’ááł, éí shí shik’ijį’ ni’iisí’ígíí; áádóó Shí, Bóhólníihii niDiyin God, asdzání bik’ihozhdeeshdliił, dóó ba’áłchíní hólǫ́ǫ doogo ádeeshłííł, dóó bijéí bił hózhǫ́ǫgo ádeeshłííł.

57 Áádóó ałdó’, Shí haasdziih, shá naal’a’í Joseph t’áadoo bikéyah baa nahaniihí, ákódzaago éí ana’í baadoogááł dóó bidiyoołhééł; háálá Ch’į́įdii bidiyoołhééłgo bíká’ át’į́; háálá Shí éí Bóhólníihii niDiyin God nishłį́, áádóó bí éiyá shá naal’a’í nilį́; áádóó áko shooh, dóó níníł’į́, Shí Abraham, bił honishłǫ́, nizhé’é bił honishłǫ́yéegi’ át’áo, éí binahjį’ Diyin bił haz’ą́ądi yah ańdoodááł dóó ayóó át’éego ábidi’doonííł.

58 K’ad, Diyin bibe’adziilii bibee haz’áanii bídéét’i’go, lą’í da t’áá doole’é bídadéét’i’.

59 T’áá aaníí, hastiin shiZhé’é bik’idiilnii’go, Aarongi át’áo, t’áá shí shiinéé’ bee, dóó ashííł’a’ii biinéé’ bee, áádóó Diyin bibe’adziilii bibee ąą ńdítį́hí bee yiisį́į́’, shízhi’ yinahjį’ á’áł’į́įgo, áádóó shibee haz’áanii dóó shizaad bik’ehgo, doo bąąhági ádooníił da, dóó shí éí doo bik’íhodeesh’áał da.

60 Éí bąą, doo éí ła’, shá naal’a’í Joseph yik’íhó’ááh da doo; háálá Shí doo bik’ihodeesh’ah da; háálá na’iisí’ígíí t’áá bí bílák’eedóó yaa ádaa ná’iidiyoołnih, ní Bóhólníihii nihiDiyin God.

61 Áádóó ałdó’, Diyin bibe’adziilii bibee haz’áanii bídéét’i’ígíí éí—hastiin t’áá háida ła’ asdzání t’ah doo diné bahastiin iilééhígíí yaaníyáago, áádóó yinízingo nááná ła’ yaa náádoodááłgo, áádóó áłtséhígíí t’áá áko níigo, áko náákiígóne’ígíí yaaníyáago, dóó t’áá áłah t’ahdoo diné bahastiin iilééhígíí nilį́įgo, dóó doo nááná ła’ hastiin yaa’ádeet’ą́ą́góó, áko éí t’áadoo át’éhí da; doo éí aa’dííláa da doo háálá bí éí beiínil; áko éí doo aa’dííláa da doo yee át’éhígíí t’áá bít’éí bídéét’i’ dóó doo nááná ła’ da.

62 Áádóó ch’ikéí t’ah doo diné bee haleehii neeznált’éego díí bee haz’áanii bik’ehgo beí’nilgo, éí doo aa’dííláa da doo, háálá éí daabí, dóó bí dooleełgo beí’nil; éí bąą bí t’áá áko’iilaa doo.

63 Ákondi ch’ikéí t’ah doo diné bee haleehii neeznált’éego ła’, azyeh bikéé’dóó, hastiin ła’ yił neezhtéézhgo, éí ch’ikéí aa’dííláa doo, dóó nahjį’ kóbidi’doolnííł; háálá ch’ikéí beí’nil nahasdzáán bikáa’gi áłchíní lą’ígo nááhoodleeł doo biniyé, éí shibee haz’áanii bik’eh áhodoonííł, áádóó t’áhdoo nahasdzáán álnééhyę́ędą́ą́’ shizhé’é ádee ha’oodzíí’ bohodoolnííł biniyé beílyá, dóó náásgóó ahool’áágóó Diyin bił haz’ą́ądi yił yah anídookah biniyé, áko dine’é bits’íís nihwiileeh doo; háálá áko shiZhé’é binaanish t’áá náás yit’ih doo, áko bí ayóó át’áó baa ha’niih doo.

64 Áádóó ałdó’, t’áá aaníí, t’áá aaníigo, Shí nihich’į’ haasdziih, hastiin bich’ooní hólǫ́ǫgo, éí díí adziilii bibee ąą ńdítį́hí dahyoojihgo, dóó shibe’adziilii bibee haz’áanii ch’ikéí yee neineezt’ą́ą’go, éí díidí bídadéét’i’go, áko índa ch’ikéí iidoodląął dóó hastiin yá ye’doolííł, éí doodago éí ábidi’dooldįįł, ní Bóhólníihii nihiDiyin God; háálá nahjį’ kóhodeeshłííł; háálá t’áá áłtso shibee haz’áanii baadahasyá dóó yik’eh dahół’ínígíí éí shízhi’ binahjį’ ayóó át’áo baa dahodeeshnih.

65 Éí bąą, díí bee haz’ą́ągo ádeeshłííł, ch’ikéí díí bee haz’áanii doo yik’eh í’iilaagóó, éí hastiinígíí Shí, Bóhólníihii biDiyin God nishłíinii, t’áá ałtsoní baa deeshłééł, háálá ch’ikéí’ígíí doo shizaad yoodlą́ą́góó dóó yik’eh áhoolaagóó; áádóó ch’ikéí ni’iisííhii silį́į’go; áádóó hastiin Sarah bibee haz’áanii doo bá bich’į’ ahóót’i’góó, éí Abraham Hagar nich’ooní adíílííł bindííniidyę́ędáá’ bee haz’áanii yik’ehgo Abraham yíká’eelwod.

66 Áádóó áko, díí bee haz’áanii bídéét’i’go, t’áá aaníí, t’áá aaníigo, Shí nihich’į’ haasdziih, díí bikéé’dóó, lą’ígo nihił ííshją́ą́ ánáádeeshdlííł; éí bąą, k’ad éí díí bíni’ áłtsé bik’ehgo doo. Áko shooh, Shí éí Alpha dóó Omega nishłį́. Amen.