Wóltaʼii 4
Diyin Yá Yáłtiʼí Joseph Smith díí diyingo bił ííshją́ą́ ályaa éí bizheʼé, Joseph Smith Sr. yee yił hodoolnih biniyé, éí Harmony, Pennsylvaniadi, Atsá Biyáázh 1829 yihahgo áhóótʼįįd.
1–4, Naanish hayóígo álʼínígíí éí Diyin Bóhólníihii bá nidaʼnitiní yisdábííʼeezh; 5–6, Diyin bá dahozhdísinígíí bikʼehgo naʼnitin baa dahiditʼaah; 7, Diyin God bitsʼą́ą́dóóígíí biká áhátʼį́į doo.
1 Áko shooh, diyingo naʼanish ayóó átʼéii nihokááʼ dineʼé baʼáłchíní bitahgóó kódoolnííł.
2 Ákohgo, O tʼáá háí shį́į́ Diyin God yá naalʼaʼí silį́įgo, tʼáá átʼéé ńtʼééʼ nijéí, bee ánítʼéhígíí, biniʼ dóó beʼadziil yee naalʼaʼ doo, áko beiníłką́ądi Diyin God bidááhdóó tʼáadoo bee bikʼíhótʼahígóó yidoohsįįł.
3 Éí bąą, Diyin God bá naashʼaʼ doo nohsingo éí naanish bee nihikʼih hodiiniiʼ;
4 Háálá áko shooh, dáʼákʼehdi tʼáá íídą́ą́ʼ daʼiigai doolzhihjįʼ ahoolzhiizh; níníłʼį́, háiida bee naʼálzhéhé yee tʼáá awołíbee naʼiishééhgo, nooʼ yiihʼiizniłgo doo nahjįʼ kódoolnííł da, ákondi biiʼsizíinii yisdádoodlóós.
5 Áádóó oodląʼ, haʼólní, diyinkʼehgo ayóóʼóʼóní, dóó ayóó oʼóní, áádóó Diyin God biʼayóó átʼéii tʼéiyá nélʼį́įgo, yee naanish yíneelʼą́ą doo.
6 Díídóʼ béédaałniih oodląʼ, aláahgo yáʼátʼééhii, ééhojísin, tʼáá áłtsojįʼ tʼah hwiindzin, haʼjólní, hakʼéí bichʼįʼ háʼáhwiinítʼį́, Diyin God jidósingo, diyinkʼehgo ayóóʼóʼóní,ʼ hojoobaʼ íízhnízingo, dóó tʼáá awołí ájítʼį́įgo.
7 Íínóhkeed, áko yínókeedígíí nihaa doolyééł, dáádílkał nánółtsʼin, áko nihá ąą ádoolnííł. Amen.