Wóltaʼii 35
Diyin Yá Yáłtiʼí Joseph Smith dóó Sidney Rigdon díí diyingo bił ííshją́ą́ ályaa, éí Fayette, New York bíighah doodaiiʼ binaagóó, Níłchʼitsoh 7, 1830 yihahgo. Ákweʼé hoolzhishgo, Diyin Yá Yáłtiʼí tʼáá ahą́ą́h Diyin God Bizaad yá ataʼ halneʼgo néíyiizoh. Yaʼiishjááshchilí 1830 bee hahoolzhiizhyę́ędą́ą́ʼ atah ataʼ haneʼ áyiilaa, áádóó tʼáá áłah Oliver Cowdery dóó John Whitmer atah náʼíízoh. Ndaanish łaʼ bee bikʼinááhodiiniiʼgo, Sidney Rigdon éí Diyin Yá Yáłtiʼí díí naanish biyiʼ yíkáʼanálwoʼ éí yá ataʼ naʼazohgo diyingo bee bikʼihodiiniiʼ (saad dahshijaaʼ 20 yídííłtah). Díí diyingo ííshją́ą́ ályaa ndaháasdzohígíí bilą́ąjįʼ dashijaaʼígíí átʼé, éí Joseph Smith binákééʼ náháneʼ biyiʼ ání: “Níłchʼitsoh biyiʼ Sidney Rigdon [Ohiodę́ę́ʼ] níyá áko Diyin Bóhólníihii neidídóółkiłgo, áádóó Edward Partridge yił níʼáázh. … Tʼáá áłah akʼisóó tʼóó níʼázhígo, Diyin Bóhólníihii haadzííʼ.”
1–2, Haitʼáó nihokááʼ dineʼé Diyin God baʼáłchíní dadooleeł; 3–7, Sidney Rigdon éí tó yee iisį́į́h dóó Iiʼ Sizį́ Diyinii aa yiiléehgo bee bikʼihodiiniiʼ; 8–12, Yitʼíinii dóó álilee éí oodląʼ binahjįʼ ndahwiileeh; 13–16, Diyin Bóhólníihii bá ndaalʼaʼí éí Iiʼ Sizį́ Diyinii bibee adziilii bee ałʼąą dineʼé dah yikahgo íidoolííł; 17–19, Joseph Smith éí tʼah doo béédahoozįįhígíí bibee ąą ńditį́hí dahyoojih; 20–21, Nídahiséláʼígíí Diyin Bóhólníihii doogááł bijį́įdi yídaníłdzil doo; 22–27, Israel yisdádooʼnił.
1 Bóhólníihii nihiDiyin God bizhí yísínółtsʼą́ą́ʼ, Alpha dóó Omega ndi, bee hodeeztʼiʼii áádóó bee nihonítʼiʼii, éí bihoogááł éí tsʼídá tʼááłáʼí áhoolʼáá góneʼ bee áhóótʼiʼ, díí jį́ éí adą́ą́dą́ą́ átʼéhę́ęgi átʼé, dóó tʼáá ákótʼéego bee ahoolʼá.
2 Shí éí Jesus Christ áshtʼį́, Diyin God biYeʼ, tsin ałnáozʼá bikáaʼjįʼ shił oʼoolkaalgo nihokááʼ dineʼé bibąąhági ádaatʼéii bá bikʼé nináʼníshdlá, ląʼígo shízhiʼ deidoodląąłígíí ndi, áko da Diyin God biyeʼké dadooleeł, índa shił tʼááłáʼí dadohłeeł shí shiZhéʼé bił tʼááłáʼí nishłínígi átʼáo, shiZhéʼé shił tʼááłáʼí nilínígi átʼao, áko da bee łaʼ dadiidleeł.
3 Áko shooh, tʼáá aaníí, tʼáá aaníigo, shá naalʼaʼí Sidney ábidishní, ninaanish dóó ni hanisííd ńtʼę́ę́ʼ. Nisodizin sidétsʼą́ą́ʼ, dóó ayóó átʼáo naanish ádíílííłgo bichʼįʼ hashtʼeniishłaa.
4 Nikʼihojisdliʼ, háálá ayóó ádaatʼéii ádiilííł. Áko shooh andoolʼaʼ, Johngi átʼáo, shilą́ąjįʼ shá honítʼiʼgo hashtʼehodíílííł, áádóó tʼah doo Elijah yíghááhdą́ą́ʼ, dóó éí doo baa ákonínízin da ńtʼę́ę́ʼ.
5 Ádaa ńdaʼooskanígíí tó bee yínísį́į́h, ákondi Iiʼ Sizį́ Diyinii tʼáadoo baadahisíníláa da;
6 Ákondi kʼad éí bee hazʼáanii łaʼ nichʼįʼ kóshłééh, tó bee íísį́į́h doo, áádóó atsiitʼááh dah ádéesniiʼ bee Iiʼ Sizį́ Diyinii baadahidíílééł, áłkʼidą́ą́ʼ hastóí bikʼidahodiiniiʼ ádaʼałʼínéegi átʼáo.
7 Áádóó baa hodoolzhish naanish ayóó átʼéii kéyah bikááʼgóó ádoolnííł, azhą́ Gentile dineʼé bitahgóó ndi, háálá ndaʼiisííʼyę́ę dóó tsʼídá aláahdi woolchʼį́į́d ádeiyiilaayę́ę diné tʼáá ałtso binááł ííshją́ą́ ádadoolnííł.
8 Háálá Shí éí Diyin God nishłį́, dóó shigaan éí doo yiʼoh neelʼání da; áádóó tʼáá ałtsóní shízhiʼ deiyoodlánígíí ayóó átʼáo álílee, bee ééhózinii, dóó tʼóó bikʼedaʼayóí bił ííshjání ádeeshłííł.
9 Áádóó tʼáá háí shį́į́ oodląʼ bee shízhiʼ binahjįʼ yínashídíłkidgo, éí níłchʼi bidaʼiiníziinii nahjįʼ hadeinizood doo; bitah dahoneezgaiígíí bitah yáʼádahootʼéehgo áńdeidleʼ doo; binááʼ ádaadinée daʼooʼį́įgo áńdeidleʼ doo, áádóó bijédaakałę́ę daʼdiitsʼaʼgo áńdeidleʼ doo, áádóó doo yádaałtiʼę́ę yádaałtiʼgo ándeidleʼ doo, dóó doo nidaakaiyę́ę éí nidaakaigo áńdeidleʼ doo.
10 Áádóó nihokááʼ dineʼé baʼáłchíní ayóó átʼéego ádahodooníłígíí bił ííshjání ádaʼdoolnííł háálá éí tsxį́įłgo bichʼįʼ hoolzhish;
11 Ákondi oodląʼ ádingo éí ádin doo łaʼ bił ííshjání ádoolníił da tʼáá hazhóʼí Babylongi ádahasdįįdígíí tʼéiyá, tʼáá éí ałʼąą dineʼé tʼáá ałtso wáán yiyííłdlą́ą́ʼgo ałjiłnii bibeʼadziilii naʼiiłchxǫǫhii yiih yikai.
12 Áádóó doo éí łaʼ yáʼátʼéehii íidoolííł da tʼáá hazhóʼí shinaʼnitin bee yisdáʼiildéehii tʼáá ałtso hashtʼeʼ ádaʼdiilyaago nídeididooléłígíí tʼéiyá, díí kʼad daʼoochíłígíí bichʼįʼ kwíishłaa.
13 Ákohgo, nihokááʼ dineʼé bikááʼ doo dabidziilii bikʼidadiishniiʼígíí, éí dajoodláhígíí dóó doo ndabidiʼneestʼą́ʼígíí, shiʼIiʼ Sizį́ Diyinii bibeʼadziilii bee ałʼąą dineʼé dah yikahgo ádeidoolííł;
14 Áádóó shigaan éí dabigaan doo, áádóó beʼachʼą́ą́h naatʼáhí dóó beʼachʼą́ą́h naatʼáhí áłtsʼíísígíí nishłį́į doo, áádóó boozhnííʼgónaa dabidziilgo ádeeshłiíł bá bikʼidadeeshtih, áádóó yéego shichʼą́ą́h ndadoobah; áádóó beʼanaʼí éí yikʼi nidookah; áádóó béésh hał bikʼijįʼ kólʼį́įgo bee atídabiʼdoolnííł, áádóó kǫʼ nahalingo bee honishkéhígíí éí bee yisdáʼdeeshnił.
15 Áádóó téʼéʼį́ danilínígíí dóó baʼátʼeʼ ádaadinígíí éí nahatʼá bee yisdáʼiildéehii bee ndabidiʼnóotį́į́ł, áádóó náníshdááhgi ndeiyólíi doo, háálá kʼadę́ę baa hoolzhíísh—
16 Áádóó fig tsin sikaad baa haneʼ yídahodoołʼááł, háálá kʼad ndi tʼáá íídą́ą́ʼ shį́ bichʼįʼ hoolzhish.
17 Shá naalʼaʼí Joseph bílákʼeedóó shinaʼnitin bee yisdáʼiildéehii tʼáá áłtso nihichʼįʼ; áádóó doo tʼáá ałtso bił bééhózin da ndi shí bikʼihojishdliʼ;
18 Áádóó tʼáá aaníinii tʼah doo béédahoozįįhígíí éí ahídadiiljéʼígíí bibee ąą ńditį́hí baa níjaaʼ, éí nahasdzáán álnéhę́ędą́ą́ʼ ádaalyaa yę́ę ndi, áádóó kodóóʼ hoolzhishdóó dóó ńléí nááníshdááhdi ádahodooníłígíí, éí shaʼ ólíígo tʼéiyá, áádóó doo ákótʼéego éí, nááná łaʼ bitséskʼeh adeeshtʼeeł.
19 Ákohgo, bikʼidíníʼį́į́ʼ áko beʼoodląʼ doo ádoodįįł da, áádóó Aaʼáhályáanii, Iiʼ Sizį́ Diyinii, tʼáá ałtsóní bił bééhózinii bił ííshją́ą́ íidoolííł.
20 Áádóó bee hazʼáanii łaʼ nichʼįʼ kóshłééh—éí bá naʼízoh doo; áádóó Diyin God bizaad ííshją́ą́ ádoolnííł, azhą́ tʼáá shí shiyiʼdi siláa ndi, éí ńdahiséláʼígíí yisdádookahjįʼ;
21 Háálá shizhí deididootsʼį́į́ł, dóó dahshiidoołtsééł, áádóó doo daʼałhosh da dooleeł, áádóó nishááh bijį́įdi yídaníłdzil doo; háálá hadaałtʼéego ádadoolnííł, azhą́ shí nishtólígi átʼáo.
22 Áádóó áko ánidishní, bił honílǫ́, dóó nił yiʼash doo; bitsʼą́ą́ʼ dahdóónááł lágo, áádóó díí tʼáá aaníigo ałtso bohodoolnííł.
23 Áádóó doo naʼoosohgóó, áko shooh, Diyin bikʼeh áhodoonííłgo yee hadoodzíhígíí baa doolyééł; áádóó ni éí shinaʼnitin bee yisdáʼiildéehii bee naʼnítin doo dóó Diyin yá yádaałtiʼii dadiyinii dabizaadígíí choidííłʼįįłgo tʼáá aaníigo bee hadíídzih, éí saadígíí baa halyée doo.
24 Bee hazʼáanii dóó diyingo bee ahadaʼdeestʼáanii tʼáá átʼé bikʼeh honoołʼį́į doo; áádóó yáʼąąshdi naazléí ná yáʼádaatʼééh dooígíí biniyé nidahidooʼnaał, áádóó Chʼį́įdii ditsxiz dooleeł áádóó Zion dahdaaskʼid bikáagi bił hózhǫ́ǫ dooleeł áádóó nizhónígo dínóosééł;
25 Áádóó Israel shá bóhónéedzą́ą́ góneʼ yisdáʼdeeshʼish; áádóó bibee ąą ńditį́hí baa níjaaʼígíí bee bikʼihootʼááł doo, áádóó tsʼídá doo bił náádahalą́ą da dooleeł.
26 Nihijéí haʼólníigo óhłééh dóó nihił hózhǫ́, nihá nináʼílyáhígíí éí bichʼįʼ hoolzhish.
27 Tʼáadoo nídaałdzidí, tʼáá díkwíhígo dahwohkahii, háálá yá ąąsh hazʼą́ níyáájįʼ nihí dooleeł. Áko shooh, áko tʼáá hooshchʼįʼ deeshááł. Tʼáá ákótʼée doo. Amen.