Wóltaʼii 122
Diyin Bóhólníihii bizaad díí Diyin Yá Yáłtiʼí Joseph Smith yee yichʼįʼ haadzííʼ, éí Liberty, Missouridi awáalyah góneʼ sidáago. Díí kweʼé baa haneʼígíí éí Sodizn Bá Hooghan Wóózhchʼį́į́d 20, 1839 yihahgo naaltsoos bichʼįʼ ályaaígíí bitsʼą́ą́dóó haadzoh (wóltaʼii 121gi alą́ąjįʼ saad dashijaaʼígíí yídííłtah).
1–4, Nahasdzáán bikááʼgóó ndahoneesʼą́ąjįʼ éí Joseph Smith bízhiʼ yíndaʼádíłkid doo; 5–7, Tʼáá ałtso bichʼįʼ nahwiisnáʼígíí dóó yiiʼ tádííyahígíí éí yitsʼą́ą́dóó íhoołʼaah doo dóó éí bá yáʼátʼéeh doo; 8–9, Diné Silį́įʼii éí díí tʼáá ałtso yitłʼáahdi tádííyá.
1 Nahasdzáán bikááʼgóó ndahoneesʼą́ą́góó nízhiʼ yíndaʼádíłkid dooleeł, áádóó diné doo ádahalyáanii éí ná nidahałtʼiʼ doo, áádóó chʼį́įdiitahdę́ę́ʼ éí tsʼídá doo yiitsʼíídgóó nikʼijįʼ danilį́į doo;
2 Ákótʼée ndi bijéí daniłtólígíí, dóó dahóyánígíí, dóó yáʼátʼéehgo ntsídaakeesígíí, dóó daʼílíinii, éí baa ntsíníkeesígíí yee yíndanídíłkid doo, dóó óhólníihii, dóó atsiitʼááh dahadéesniiʼ tʼáá áłahjįʼ bee akʼihojídlíhígíí áníłʼį́į doo.
3 Áádóó nidineʼé daʼoosdląądígíí éí nitsʼą́ą́jí danilínígíí doo deiyóotsʼą́ą́góó doo nikʼijįʼ dadooleeł da.
4 Áádóó yee nikʼijįʼ danilínígíí achʼįʼnahwiiʼná yiih danidoołtʼeeł ndi, awáalyah béésh dóó tsé daníʼáhígíí góneʼ ndi, ákótʼée ndi naahaʼniih dooleeł; áádóó neʼanaʼí bitahgi tʼóó honíshgháníjįʼ nízhí éí náshdóítsoh bitsiijįʼ daditłʼooígíí daʼałchinígi bilááh átʼáo diitsʼaʼ doo, háálá díí éí Diyinkʼehgo yínáłígíí biniinaa; dóó niDiyin God éí hoolʼáágóó ahóyéelʼáágóó nííghahgi sizį́į doo.
5 Achʼįʼ nahwiiʼná biiʼ chʼídíínáałgo bee nikʼihodiiniiʼgo; nikʼis tʼóó ádaʼdilʼínígíí tʼóó báhádzidgo bitah yínááłgo; daʼniʼįįhii tʼóó báhádzidgo bitah yínááłgo; áádóó kéyah dóó tónteel bikááʼgóó tʼóó báádahadzidii bitah yínáałgo;
6 Áádóó tʼáá ałtso tʼáá adzaagóó haneʼ nikʼijįʼ yisdzohgo; neʼanaʼí nikʼijįʼ deeskaigo; dóó nizhéʼé dóó nimá dóó nikʼiské dóó nilahké yitsʼádahaasdzį́įzgo; neʼanaʼí béésh hał yee nimá bitsʼą́ą́dóó yitsʼádaniisghango, áádóó naʼáłchíní, dóó niyeʼ alą́ąjįʼígíí, éí hastą́ą́ binááhaigo, niʼééʼ deiyójiʼgo, dóó kódadidooniił, ShiZhéʼé, shizhéʼé, haʼátʼíísh biniinaa doo kǫ́ǫ́ nihił honílǫ́ǫ da? O, shizhéʼé, éí hastóí lá haadanidoolííł? áádóó béésh hał binahjįʼ bitsʼániʼdoolghango, áádóó awáalyahgóó niʼdoodzį́įzgo, áádóó neʼanaʼí maʼiitsoh dibé yázhí bidił deinízin nahalingo ninaagóó naandaaʼnaʼgo;
7 Áádóó ahoodzání góyaaʼí andiyoolghango, éí doodago ndaʼałtseedii danisiłgo, áádóó niʼdiyoolyééł niʼdooniidgo; áádóó tónteel yiih daniisghango; áádóó tó nikʼijįʼ nídiiʼnaʼgo; áádóó niyoltsoh tʼóó báhádzidgo neʼanaʼí silį́įʼgo; áádóó yáʼąąsh biiʼ chahółhéelgo, áádóó tʼáá ałtso ninaagóó siléí tʼáadoo chʼíjóyaʼjígóó áhodoolííł; áádóó tsʼídá aláahdi, chʼį́įdiitah biyaatsʼiin dóó biwooʼ yee yéego bizééʼ ąąʼ íidoolíiłgo niká didoochʼah, shiyeʼ, baa ákoninzįįh, díí tʼáá átʼé bitsʼą́ą́dóó óhodííłʼááł, dóó ná yáʼátʼéeh dooleeł.
8 Diné Silį́įʼii éí díí tʼáá ałtso yitłʼáahdi tádííyá. Daʼ éíísh biláahdi ánítʼé?
9 Éí bąą, yínáłígíí yéego yínítąʼ, dóó Diyin bibeʼadziilii tʼáá nił hólǫ́ǫ doo; háálá binahjįʼ choidooʼįįłígíí éí hashtʼedaalyaa, éí doo bilááhgóó áʼdoolnííł da. Yoołkáłígíí éí béédahózin, áádóó ninááhaiígíí doo biʼohgo náándiʼdoolyééł da; éí bąą, diné íidoolíłígíí tʼáadoo bináníldzidí, háálá Diyin God hoolʼáágóó ahóyéelʼáágóó nił hólǫ́ǫ doo.