1 O Israel dineʼé biBóhólníihii Diyin God nílíinii, nízhiʼ baa ahééh daniidzin, háálá ni tʼéiyá ná nidaalʼaʼí dabijéí tʼáá átʼé yee yáʼátʼéehgo deíkáhígíí bee ahaʼdeetʼáanii áádóó aa aʼááh hasinii bił hashtʼeyínísin—

2 Díí kweʼé [Kirtlandgi] ná ndaalʼaʼí nízhiʼ binahjįʼ hooghan hadadoohłééh bidíníniid.

3 Áádóó áko níníłʼį́, O Diyin Bóhólníihii, ná ndaalʼaʼí ábidíníniidyę́ę yedaʼiilaa.

4 Áádóó áko nídaniniikąąh, NihiZhéʼé Diyin Nilíinii, Jesus Christ bízhiʼ binahjįʼ, Diyingo nihiTaaʼ Nilíinii niYeʼ ádííníltąʼii, éí bízhiʼ binahjįʼ tʼéiyá nihokááʼ dineʼé baʼáłchíní yisdánídahidootʼish, bee daníníikeed, O Diyin Bóhólníinii, nihí ná nideilʼaʼí daniidlíinii, díí hooghan nihílaʼ bee ádeilyaa, éí bee lą́ ádííłeeł, éí hadadidoohłííł nihidíníniid.

5 Háálá nił bééhózin yéego nihichʼįʼ nidahwiiʼnáago díí naanish ałtso ádeilyaa; áádóó téʼéʼį́ biyiʼdóó nihinaadeełii bee díí hooghan nízhiʼ binahjįʼ hadadiilyaa, áko Diné Silį́įʼii díí hazʼą́ągi bidineʼé yichʼįʼ ííshją́ą́ ádiʼdoolnííł.

6 Diyingo ííshją́ą́ ályai biyiʼjįʼ ádííníniidgo, nihichʼįʼ kwíinlaago, nihikʼisoo nihidííníniidgo, kódíníigo—Diyingo áłah aleehgo ádaałééh, ánihidííniidígíí bikʼehgo;

7 Áádóó doo tʼáá ałtso oodląʼ bee dahólónígíí biniinaa, yéego bíká ádaahtʼį́ dóó saad bee hódzáanii bee ndaʼahinohtin; aooʼ, naaltsoos tsʼídá yáʼádaatʼéehii bitsʼą́ą́dóó saad bee hódzáanii ndahołááh, íhooʼaahgo naʼalkaah dóó oodląʼ ndi bee hadanohtá;

8 Hashtʼeʼ ádaʼdoołnééh; tʼáá ałtsoní nidzinígíí hashtʼedaałééh, dóó kin biiʼ sohodizinígíí ndi, dóó kin biyiʼ chʼiyáán ádąąh yitʼį́įgo bee hodílzin doo, dóó kin biyiʼ oodlą́ hólǫ́ǫ doo, dóó hooghan biiʼ óhooʼaahii doo, dóó kin biʼayóó átʼéii biiʼ hólǫ́ǫ doo, dóó kin biiʼ hashtʼeh hodítʼé, áádóó Diyin God bighan átʼée doo;

9 Diyin Bóhólníihii bízhiʼ díínísingo yah anánídaah, Diyin Bóhólníihii bízhiʼ díínísingo chʼéénídááh; Diyin Bóhólníihii bízhiʼ díínísingo kʼé diní, Aláahdi Ayóó Átʼéii bichʼįʼ dah díílnihgo—

10 Áádóó áko, NihiZhéʼé Diyin Nilíinii, nidineʼé daniidlíinii, nihíká adíílwołgo bee nídaniniikąąh, ni aʼááh hwiinidzinii bee, éí dahódilzingo áłah diidleeł, áko nádahodíníílzingo dóó diyingo lą́ asíníłį́ʼígíí bikʼehgo áłah dadiidleeł;

11 Áádóó nidááhdóó, bídeiníigahgo, áko nidine´í, bee bichʼįʼ ádee hahisínídzíʼę́ę ałtso bedaʼdiilnííł, éí diyingo nihił ííshją́ą́ íinilaaígíí biyiʼ;

12 Áko ni ayóó átʼéii nidineʼé, dóó nighan bikʼi hóóleʼ, éí kʼad nichʼįʼ bikʼi sohodoozin, áko haaltʼé dóó diyingo yiilzį́į́ʼ doo, dóó áko díí hooghan áłahjįʼ diyingo biyiʼ honílǫ́ǫ doo;

13 Áádóó áko tʼáá ałtso dineʼé Diyin Bóhólníihii bighan bichʼéʼétiinígi bidáahgi honílǫ́ǫgo bibeʼadziilii biyiʼdi yaa ákodadínóozįįł, áádóó haaltʼéego íinilaaígíí haaʼígishį́į́ bił ádadooníiłgo yaa ákodadínóozįįł, áádóó nighan átʼéego, dóó hodílzingi hazʼą́ągo yaa ákodadínóozįįł.

14 Áádóó NihiZhéʼé Diyin Nilíinii, áko tʼáá ałtso díí hooghan yiyiʼ hodísingo naaltsoos tsʼídá yáʼátʼéehii biyiʼdóó saad bee hódzáanii bee nabiʼdínóotįįł, dóó naaltsoos yiyiʼ nidaʼałkaahgo, dóó oodląʼ yinahjįʼ ałdóʼ ídahoołʼaah doo, ni ádíníniidígíí bikʼehgo;

15 Áádóó ni ninahjįʼ dadinóosééł, dóó Iiʼsizį́ Diyinii tʼáá ałtso átʼéhígíí yaa bił béédahodoozįįł, áádóó nibee hazʼáanii bikʼehgo hashtʼedadoolnííł, dóó tʼáá ałtso íiyisíí deinízingo yee hashtʼeʼ ádadiʼdoolníłígíí baa dahidoolyééł;

16 Áádóó díí kin biiʼ sohodizinígíí ndi, dóó kin biyiʼ chʼiyáán ádąąh yitʼį́įgo bee hodílzin doo, dóó kin biyiʼ oodlą́ hólǫ́ǫ doo, dóó kin Diyin God biʼayóó átʼéii biiʼ hólǫ́ǫ doo, díí éí nighan átʼée doo;

17 Áko díí hooghan biyiʼ diné nihił yah adahakáhígíí, éí Diyin Bóhólníihii bízhiʼ binahjįʼ ádaatʼį́į doo;

18 Áko díí hooghan biyiʼdóó diné chʼídahakáhígíí éí Diyin Bóhólníihii bízhiʼ binahjįʼ ádaatʼį́į doo;

19 Áádóó áko Diyin Bóhólníihii bízhiʼ deidósingo kʼé daaníi doo, áádóó Aláahdi Ayóó Átʼéii, bílaʼ dadiyingo yee yichʼįʼ dah dadidoolnih;

20 Áádóó áko chin átʼéii doo nighan góneʼ yidoołchxǫǫłgo bá yah ahóótʼiʼ da doo;

21 Áádóó nidineʼé nidaʼiisíihgo, tʼáá háiida, éí bíniʼdii tsxį́įłgo ádaa ńdaʼiidookąął dóó nichʼįʼ nináhidookah, dóó nadaʼólíigo yidííłtsééł, áádóó akʼihojídlí ádaatʼéii baa ndahidoolyééł éí nádahodísinígíí nighan góneʼ bee akʼi dahodidoonihyę́ę ląʼígo bichʼįʼ kódadoolnííł.

22 Áádóó NihiZhéʼé Diyin Nilíinii, ndanídíílkid, áko ná nidaalʼaʼí díí hooghandóó adziilii beedahólǫ́ǫgo dahidikááh doo, áádóó nízhiʼ bee bikʼidahodiiniiʼ, dóó niʼayóó átʼéii bił dahólǫ́ǫ doo, dóó na nidaalʼaʼí yaa ádahalyą́ągo íidoolííł;

23 Áádóó díí hazʼą́ą́dóó ayóó átʼáo haneʼ yáʼátʼéehii, nihoníyáajįʼ dayoołkáałdi, tʼáá aaníigo, yaa dahalneʼ doo, áko díí ninaanish átʼéego bił béédahodoozįįł, áádóó nílaʼ bee bichʼįʼ dahdíínílniiʼ, éí Diyin yá yádaałtiʼii yee hadahaasdzíʼę́ę, nihoogháahjįʼ dayoołkáałdi bídadéétʼiʼígíí bidahodíílííł.

24 Nídaniikąąh, NihiZhéʼé Diyin Nilíinii, diné ná dahodísinígíí hadidíílííł, dóó díí nighan biyiʼ nízhiʼ yá dahodísin doo, áko tʼáá átʼé náásgóó daʼíchííhii dóó ahoyoolʼáágóó bá dooleeł;

25 Áádóó ádin bee daʼahijigáánii łaʼ ályaii doo bikʼeh didoodleeł da; áko éí yá hahwiizgeedígíí éí ałdóʼ tʼáá bí yiihdoogoh;

26 Áko doo yáʼáshóonii yaa nidaakaiígíí beʼadziil yee nidineʼé doo yikʼijįʼ deidoozįįł da dóó doo yikʼeh dadidoodleeł da háálá nízhiʼ díí hooghan biiʼ ndoolyééł;

27 Áádóó díí dineʼé nááná łaʼ dineʼé bikʼijįʼ deeskaigo, éí niʼáháchįʼ bikʼijįʼ kódoolnííł;

28 Áádóó díí dineʼé atídeiyiilaago ni éí atídadíílííł; áko nidineʼé anaaʼ náhádleehgo bichʼą́ą́h naninánéegi átʼáo, áko tʼáá áłtso beʼanaʼí yitsʼą́ą́dóó yisdeidooʼish.

29 Nídaniniikąąh, NihiZhéʼé Diyin Nilíinii, tʼáá ałtso, nahasdzáán bikááʼgóó, ná naalʼaʼí éí doodago ná nidaalʼaʼí, yoochʼííd yaa ndahasneʼígíí, tsístłʼadínííłkał, dóó biyaa dahodidííłhxis, dóó bił dahalą́ dóó yaa yá dadínóozįįłgo ádíílííł, hoolʼáágóó diyingo naʼnitin bee yisdaʼiidéehii bee nabiʼdineestʼą́ągo, éí doo yaa ndaʼookąąhgóó ákódíílííł;

30 Áádóó áko díí tʼáá áłtso ádáʼiilaayę́ę tʼáadoo nidadoodleełí da, áádóó ńló bee nahjįʼ bił adahidooyoł, áádóó náháchįʼ bee bá nahwíínʼánée, éí bee yoochʼíídę́ę dóó nidineʼé bee bikʼijįʼ hadaʼiisdziʼę́ę nahjįʼ kódadoolnííł.

31 Háálá ni nił bééhózin, O Diyin Bóhólníihii, ná nidaalʼaʼí nízhiʼ yaa dahalneʼgo baʼátʼeʼ ádaadin ńtʼę́ę́ʼ, háálá díí éí yaa tiʼdahoozniiʼ.

32 Éí bąą nidááhdóó díí tʼáá ałtso dóó tʼáá átʼé nihizéédadéetánígíí bitsʼą́ą́dóó yisdánihiiníiłgo baa nídaniikąąh;

33 O Diyin Bóhólníihii, nahjįʼ kónílééh; ná ndaalʼaʼí bikʼosdóó nahjįʼ kódanileʼ, neʼadziilii bee, áko daʼíchííhii bitahdóó deidiidzįįł dóó ninaanish ádadiilnííł.

34 O Jehovah, díí dineʼé baa jiiníbaah, dóó tʼáá ałtso diné ndaʼiisííhgo, nidineʼé ndaʼiisíʼígíí baa ndaʼdiyííʼaah, áádóó hoolʼáágóó bá kʼéédaʼdííłchxǫǫł.

35 Nándaʼnitiní akʼah bee daalzį́įʼii hódahdę́ę́ʼ adziilii bee dabidiʼdoolzį́į́ł bididííniił.

36 Pentecost beiníłką́ądi bił ádahoodzaaígi átʼáo, tʼáá ałtso bikʼi hodooleeł bididííniił; nidineʼé saad ałʼąą bee yáʼátiʼ ląʼígo bee dahodooleeł bididííniił, atsooʼ kǫʼ nidahalingo, áádóó bikʼi daʼdiitįįhgo bichʼįʼ kódadoolnííł.

37 Áádóó nighan, níyol ntsaaígíí tsxį́įłgo bidziilgo bił yah adooyoł, dóó niʼayóó átʼéii biiʼ hadidoobį́į́ł bididííniił.

38 Ná nidaalʼaʼí tʼáá aaníinii yaa dahalneʼgo bee bił ahadaʼdidíítʼááłgo bił hólǫ́ǫgo ádíílííł, áko nidaakaigóó nizaad yee ndaʼnitingo bee hazʼáanii yee yidáʼdaʼdidoołjah, dóó nikééʼ naazíinii bijéí hashtʼedadíílííł éí tʼáá átʼé bee ndahosíníʼánée náháchįʼ bee kʼadę́ę nihokááʼ dineʼé, ndaʼiisíʼígíí biniinaa, bichʼįʼ bidahidíchííd, áko nidineʼé bichʼįʼ ndahwiiʼná yoołkáałdi doo chʼééh ádadootʼįįł da.

39 Áádóó nándaalʼaʼí tʼáá ałtso kintah ndahakáahgi, bitʼáá aaníigo yaa dahalneʼígíí éí kintahdóó dineʼé nídeididooléełgo, éí kintahgi ni ahodiilzeeʼ dóó ni bee yisdáʼiildéehii baa dahidoolyééł; áko éí kintahdóó yáʼátʼéehgo deíkáhígíí ahandeidiyooʼish, áko Zion, éí doodago bi stake bił hadahaasdzojįʼ ndahidookah, éí hazʼą́ ni bikʼi dinilniiʼ, áádóó ahoolʼáágóó sin baa dahózhóonii yee dahataał doo;

40 Áádóó bá ndahosíníʼánígíí éí tʼáadoo kintah bikʼijįʼ kóníléhé, díí ałtso bidahoolyaago índa.

41 Áádóó ná nidaalʼaʼí kintahdi nehakáahgo, áádóó diné éí kintahgi ná ndaalʼaʼí tʼáá aaníinii yaa dahalneʼígíí doo deinízingóó, dóó ná ndaalʼaʼí tsiʼnaʼaldeehgo oochíłígíí bitsʼą́ąjįʼ dahdadoohkááh deiłní, ni ná yádaałtiʼí hadahaasdzíʼę́ę bikʼehgo ádahodoonííł bididííniił.

42 Ákondi, O Jehovah, tʼáá shǫǫdí, ná ndaalʼaʼí éí bitsʼą́ą́dóó, yisdánínííł, áko bidił doo daabąąh da doo.

43 O Diyin Bóhólníihii, nihidineʼé ádadooldįįłgo doo baa nihił dahózhǫ́ǫ da; háálá biiʼ naazíinii ayóó nił nilį́;

44 Ákondi nizaad éí bohodoolnííł. Ná ndaalʼaʼí bíkáʼanilyeed, neʼadziilii bee ádíní: Ni íinínízinígíí bikʼehgo áhodoonííł, O Diyin Bóhólníihii, nihí nihikʼehgo éí dooda.

45 Áádóó nihił béédahózin, nihoogááh dayóółkáałdi, ni ná yádaałtiʼí nizaad yee hadahaasdzíiʼgo doo yáʼádaashóonii báádahadzidii bee bichʼįʼ hahínídzííʼ—doo nineelʼą́ą́góó, bee bá ndahosíníʼánée ląʼígo bichʼįʼ kódíílííł;

46 Éí bąą, O Diyin Bóhólníihii, nidineʼé doo yáʼáshóonii bichʼįʼ nidawiiłnánígíí bitsʼáníʼéésh; ná ndaalʼaʼí bee hazʼáanii yidáʼdaʼdidoołjahgo bá ádíílííł, áádóó tʼáá aaníinii yaa dahalneʼígíí bá béʼítłʼó, áko hodookʼą́ą́ł bijį́įdi yichʼįʼ hashtʼeʼádaʼdiilyaa doo.

47 Nídaniniikąąh, NihiZhéʼé Diyin Nilíinii, éí Jackson county hahoodzoh, Missouridóó kéédahatʼínígíí éí nideineeskaadyę́ę béídeelniih doo, éí kéyah baa dahideestʼánéedę́ę́ʼ, áádóó, O Diyin Bóhólníihii, díí bizéédadéetą́ ádaalyaago bee bichʼįʼ ndahwiiłnánígíí bá nahjįʼ kónilééh.

48 O Diyin Bóhólníihii, nił bééhózin, éí diné doo yáʼádaashóonii yéego bichʼįʼ nidahwiisnááʼ dóó átʼídabííłʼįįd; áádóó tsʼídá ayóó átʼéego achʼįʼnahwiiʼná bąąh nidahasyáhígíí biniinaa nihijéí biyiʼdóó yínííł nílį́.

49 O Diyin Bóhólníihii, haanízáádgóó shąʼ díí dineʼé bichʼįʼ ndahwiiʼnáago nił tʼáá áko doo, áádóó bá átʼeʼ ádaadinígíí daachago didíítsʼį́į́ł, áádóó bidił dadeeznaʼígíí nidááhdóó tʼáá aaníigo bee bééhózin doo, áádóó hahgo shąʼ díí bichʼihjí nílínígíí nihił ííshją́ą́ ádíílííł?

50 O Diyin Bóhólníihii, doo yáʼáshǫ́ǫ́góó átídaʼałʼíinii, baa jidííbaał, éí nidineʼé chʼídeineeskaad, áko doo daʼniʼįįh da doo, áádóó ádaa náʼookąąh hólǫ́ǫgo éí bibąąhági ádaatʼéii yaa ádaa ńdaʼiidookąął;

51 Ákondi doo ádaa nídaʼookąąhgóó éí, O Bóhólníihii, nigaan bichʼįʼ yitʼį́įgo ádíílííł, áádóó nidineʼé Zion bitah náhodoodleeł biniyé bá hashtʼéédíídlííł.

52 Áádóó doo ákótʼéego éí, dóó nidineʼé bá biniyéhígíí doo doochxǫǫłgóó niʼáháchįʼ bikʼijįʼ kódoolnííł, dóó ni ánahwiitʼaah báhádzidii bikʼijįʼ kódoolnííł, áko yáʼąąsh biyaadóó, tʼáá áłah bikétłʼóól dóó bitsʼádaazʼáhígíí, ádadooldįįł;

53 Ákondi ádaa ndaʼooskango, naa aa aʼááh hasin dóó jííníbáʼ, áko Déínísį́ʼígíí biniiʼ deiniłtsą́ągo niʼáháchįʼ nahjįʼ kódíílííł.

54 O Diyin Bóhólníinii, tʼáá ałtso nahasdzáán bikááʼgóó dahdaʼíldehígíí, baa jiiníbaah; nihikéyah bikááʼgóó naatʼáanii baa dajííníbaah; atłʼááh naazléí, éí ayóó átʼáo baa hasʼnih dóó baa áhóóyąąd, íiyisíígíí éí, nihikéyah bikááʼgóó Kéyah Bibee Hazʼáanii Bee Lą́ Daʼazlį́ʼígíí, éí hoolʼáágóó siláago ánílééh.

55 Aláahdi naatʼáanii, dóó tsíłkéí naatʼáanii, dóó diné bídahólníihii, dóó nihokááʼ bikáaʼgi ayóó ádaatʼé, dóó nihokááʼ dineʼé, dóó sodizin daʼatahígíí, dóó baadahojoobáʼígíí tʼáá átʼé, dóó bichʼįʼ andahaztʼiʼii, dóó nihokááʼ bikáaʼgi atídaalyai;

56 Áko ná nidaalʼaʼí nighandóó dahidikááhgo, O Jehovah, nízhiʼ tʼáá aaníigo yaa dahalneʼgo éí dabijéí yee doo akʼijįʼ danílį́į da dadooleeł; Tʼáá aaníinii deidiiztsʼą́ąʼgo doo akʼijįʼ danilį́į da doo, áko nihokááʼ dineʼ tʼáá ałtso nidineʼé bił danilį́į doo;

57 Áko tʼáá ałtso nahasdzáán nineesʼą́ąjįʼ bił béédahózin doo, ná nidaalʼaʼí, niinééʼ deidiiztsʼą́ą́ʼ, dóó ni éí anihííníłʼaʼ;

58 Áko díí tʼáá ałtso bitahdóó, ná nidaalʼaʼí, Jacob biyeʼ danilíinii, Diyingo dahináanii yił ahíhidookah éí shízhiʼ binahjįʼ kintah dílzingo hadeididoolííł, éí bee bichʼįʼ háínídzííʼ.

59 Nídaniniikąąh Zion bikʼi hodílzingo ánilééh danidiiʼní áko nááná łaʼ stakes haididoolííł díí éí tʼáá íídą́ą́ʼ bikʼidinilniiʼ, áko nidineʼé ayóó átʼáo adziilii dóó baʼódlíigo ąą hódoonííł, áko ninaanish yáʼátʼééhjigo tʼáá hodíínaʼí ałtso ádoolnííł.

60 Dóó díí saad, O Diyin Bóhólníihii, éí nidááhdóó bee hadeidzííʼ, éí diyingo ííshją́ą́ ádaalyai dóó bee hazʼáanii bídadéétʼiʼ éí niháínílá, éí Gentile dineʼé bitahdóó dahaneʼ.

61 Ákondi Jacob baʼáłchíní danilíinii ayóóʼííníʼníigo nił bééhózin, éí daadziłgóó nízaadgóó ałtsʼą́ąjigo adabiʼdineeskaad, éí tłʼéeʼgo daakʼosgo ákóhoodzaa.

62 Éí bąą Jacob baʼáłchíní danilíinii binanídíshkid baa jiiníbaah, áko Jerusalem, díí kweʼé oolkiłdóó, bá nináʼílyéego bee hahodoolzhish;

63 Áádóó David bighandóó daʼíchíhígíí hóyéeʼgo ąąh shijéʼígíí bá nahjįʼ kónílééh;

64 Áádóó Judah bighandóó daʼíchíhígíí Abraham kéyah beiníʼánée yichʼįʼ dahnídadidoonééł.

65 Áádóó Judah bighandóó chʼéékaiígíí, bąąhági ádaadzaaígíí biniinaa hóyéeʼgo bá haʼoodzį́į́ʼ dóó atídaalyaa, báhádzidgo dóó daʼałchindę́ę́ʼ beʼiinaʼ łahgo ándeyidlaago diyingo naʼnitin bee yisdáʼiildéehii tʼáá átʼé yikééʼdeidoozįįł;

66 Áko bibee ndaʼaltseedii bitsʼą́ą́dóó dił ndaaszasígíí niʼnideidoonił, dóó akʼijįʼ danilínígíí nahjįʼ kódeidoolííł.

67 Áádóó tʼáá átʼé Israel bidineʼé ałtsʼá daneeskaadgo chʼéékaiígíí, dóó nahasdzáán bikááʼgóó ndahoneesʼą́ąjįʼ ndabiʼdineeskaadígíí, tʼáá aaníinii bił béédahodoozįįłjįʼ ndahidookah, dóó Messiah deidoodląął, dóó atídabiʼdilʼínígíí bá bikʼé nináʼdoolyééł, dóó nidááhdóó bił dahodoozhǫǫł.

68 O Diyin Bóhólníihii, ná naalʼaʼí, Joseph Smith, Jun., béénílniih, áádóó tʼáá átʼé atílyaa dóó bikʼijįʼ ídlínée—haitʼáo Jehovah yił ahaʼdeetʼánée, dóó nichʼįʼ ádee haadzííʼ, O Jacob bíDiyin ayóó ábódziilii—dóó beehazʼáanii baa hiníláhę́ę, dóó tʼáá aaníigo nínízinígíí nabiiłnáá ńtʼę́ę́ʼ.

69 O Diyin Bóhólníihii, bichʼooní dóó baʼáłchíní, baa jiiníbaah, áko ninááł hadaałtʼéego ádadoolnííł, dóó nílaʼ yáʼátʼéehii bee yisdábiʼdooʼnił.

70 Áádóó tʼáá áłtso binaagóó béédahósinii bikʼijinídliih, áko yee akʼijįʼ danílínígíí ałtsʼádadínóo da dóó tó bikʼi chʼínínaʼ nahalingo iidiyoołʼoł; áko daʼiidoodląął dóó Israel bił bá ninádaʼdoolyééł, dóó Diyin God nílínígíí bíł béédahodoozįįł.

71 O Diyin Bóhólníihii, naatʼáanii danilíinii, azhą́ díí sodizin bá hooghan biʼnaatʼáanii tʼáá átʼé danilíinii ndi, béénílniih, áko nishnáájí nílaʼ bee ayóó átʼáo bee baadahidíínih, tʼáá ałtso yił dahináanii bił, dóó bikʼéí danilínígíí ałdóʼ, áko hoolʼáágóó tʼáá daʼachííhgóó bízhiʼ béédahaniih doo.

72 O Diyin Bóhólníihii, nisodizin bá hooghan daʼatahígíí tʼáá ałtso béínílniih doo, tʼáá ałtso yił dahináanii, dóó bikʼéí danilínígíí ałdóʼ, bitah dahoneezgaiígíí dóó tiʼdahooníhígíí tʼáá átʼé, tʼáá ałtso baa dahajoobáʼígíí dóó nahasdzáán bikááʼgóó báʼátʼe ádaadinígíí; áko Diyin bee óhólníihgo bił hazʼáanii, éí doo álaʼ bee ályaa da, éí dził ayóó átʼéii dooleeł dóó nahasdzáán tʼáá átʼéé ńtʼééʼ bikááʼ hodooleeł;

73 Áko nisodizin bá hooghan hashtʼeelyaaígíí chahałhxeeł bił hazʼą́ą́dę́ę́ʼ yitʼį́į dooleeł, áádóó tłʼéhonaaʼéí nahalingo bitsʼádiʼnílííd doo, jóhonaaʼéí nahalingo niłtólí doo, dóó siláołtsooí báádahadzidígíí dah natʼaʼí dahdeiyółtsóós nahalin doo;

74 Áádóó yáʼąąsh bidáádiníbaal bikʼeeltsoozjįʼ ahoolzhiizhgo asdzání iiyehgo hadilyaaígíí nahalin doo, áádóó dził daníʼáhígíí ninááł yaa kódadoonííł, áádóó dadzigaigóó ayóó ádaatʼéego ádadoolnííł, áádóó dahodiwolgóó dahodilkǫǫhgo ádadoolnííł; áko niʼayóó átʼéii nahasdzáán biiʼ hadidoolbį́į́ł;

75 Áádóó daneeznánígíí dilní bá didootsʼį́į́ł, nihí éí kʼos dego nihił yildohgo naadiikah, áko Diyin Bóhólníihii hoolʼáágóó bił honiidlǫ́ǫ doo;

76 Áko nihiʼééʼ éí chin bąąh ádaadin doo, áko diyinkʼehgo oodááł ééʼ bee hadadiniitʼée doo, dóó tsin bitʼąąʼ dahdeiyínííjááhgo, dóó ayóó átʼéii naah nidoolyééł, dóó baa tidahwisiiʼnííʼyę́ę tʼáá ałtso bitsʼą́ą́dóó hoolʼáágóó ił hózhǫ́ deidiilbįįł.

77 O Bóhólníihii Diyin God Ayóóʼánóodziilii, díí nihisodizin dinitsʼį́į́h, dóó yáʼąąsh, diyingo nił hazʼą́ą́dę́ę́ʼ, nihichʼįʼ hanidziih, naatʼáanii bikááʼ dahʼasdáhídę́ę́´, ayóó átʼáo, aahaʼniih, adziilii, aʼódlí, tʼáá ákogi átʼée, nihwiitʼaah, ajoobaʼ bee, ahoolʼáágóó haʼdeezbindę́ę́, ahoolʼáádę́ę́ʼ dóó ahoolʼáágóó dahsínídáádę́ę́ʼ bee.

78 O nihííníłtsʼą́ą́ʼ, O nihííníłtsʼą́ą́ʼ, O nihííníłtsʼą́ą́ʼ, O Diyin Bóhólníihii! Díí baa nídaʼiiniikąąhígíí baa náhólneʼ, díí hooghan, nihilaʼ bee bindashiilnishgo, yiilzį́ʼígíí nídiilé, díí nízhiʼ bichʼįʼ ádeilyaaígíí;

79 Áádóó díí sodizin hadilyaaígíí, nízhiʼ bee wójíigo ánílééh. Dóó Iiʼsizí Diyiinii bee nihíkaʼanilyeed, nibikááʼ dah asdáhí ná nidaalʼaʼí bitsʼádiʼnílíidgo, bee bitsʼádaʼdinídínígíí bibąąhgóó béédaʼalyaaígíí éí nihízhí biłgo, baadahwiiʼniigo hadadidiilwosh, Diyin Hosanna dóó bidibé yázhí bidiʼníinii bee dahwiitaał doo!

80 Áádóó bíniʼdii díí, bikʼidahodiiniiʼígíí, bee yisdáʼiildéehii dabiʼééʼ doo, dóó nikééʼ naazíinii yéego bił dahózhǫ́ǫgo dadilwosh doo. Amen, áádóó Amen.