Wóltaʼii 110
Tʼą́ą́chil 3, 1836góó yihahgo, Diyin Yá Yáłtiʼíʼ Joseph Smith dóó Oliver Cowdery Kirtlanddi, Ohiogi Diyin Bighan siʼą́ągi díí Diyingo bił ííshją́ą́ ályaa. Damóogo sodizin bá hooghangi áłah ílį́įgo áhóótʼįįd. Joseph Smith binákééʼ náhaneʼ biyiʼ ání: “Hííłchʼįʼgo, nááná łaʼ Táltʼéego Alą́ąjįʼ Naazíinii bił Diyin Bóhólníinii bibááh dóó tó Sodizin Daʼatahígíí atah bitaaséką́, éí Hastóí Naakitsʼáadah yitsʼą́ą́dóó bee bikʼidahodiiniiʼ, éí díí jį́ bikááʼ sonídahodizįįhgo yikáá ádaʼiilaaígíí yikʼi bídahólníihgo bá adahaaztʼiʼgo ádaʼiilaa. Díí bikééʼdóó shikʼisoo yá ádayiilaa, shí dahojilneʼ bá hazʼą́ąjįʼ níyá, daaʼdiníbaal nahjįʼ kólyaa, áadi Oliver Cowdery bił, yaaʼíísdzaa, hodílzingo dóó tʼáadoo íítsʼaʼí sodiilzin. Sodizin íilyaa dóó yiidzįʼgo, díí nihił ííshją́ą́ ąą ályaa.”
1–10, Diyin Bóhólníihii Jehovah ayóó átʼáo ííshją́ą́ áʼdiilyaa dóó Kirtlanddi bisodizin bá hooghan Bi doogo yee lą́ asłį́į́ʼ; 11–12, Moses dóó Elias tʼáá áłah ííshją́ą́ áʼdiilyaa dóó bibee ąą ńdítį́hí choidooʼįįł biniyé yiníjaaʼ dóó bibee hahodilyaii ałdóʼ; 13–16, Elijah nádzá dóó Malachi yee ádee haadzíʼę́ę bibee hahodilyaa bibee ąą ńdítį́hí choidoolʼįįł biniyé yiníjaaʼ.
1 Nihíniʼ bidááh aníbaalyę́ę nahjįʼ kólyaa, áádóó nihiniʼ ąą ádzaa.
2 Diyin Bóhólníihii nihidááhdóó, bikááʼdóó asdzíní yikááʼ dasizį́įgo yiiltsą́; áádóó bikeeʼ biyaagi éí béésh óola tʼéiyá bee atiin, łitsogo bee naashchʼąąʼ.
3 Binááʼ kǫʼ dookʼááł nahalin; bitsiighá bitsiitsʼiin bikáaʼgi yas niłtólí nahalingo łigai; biniiʼ Jóhonaaʼéí bilááh átʼéego bitsʼádiʼnílííd; áádóó bizhí ayóó átʼáo tónteel yiʼgo nahalingo diitsʼaʼ, Jehovah bízhí átʼéego, kóní:
4 Shí áłtséhígíí dóó akéeʼdiígíí nishłį́; Shí éí hinishná, Shí éí shiʼdiisxį́; aTaaʼ bił nihá akʼíyáłtiʼí nishłį́.
5 Áko shooh, nihibąąhági átʼéii bee nihaanídeestʼą́; shidááhdóó chin nihąąh ádin; éí bąą, nihitsiitsʼiin de óhłééh dóó yéego nihił dahózhǫ́.
6 Nihikʼéí nihijéí yéego bił dahózhǫ́ dabidohní, áádóó tʼáá ałtso shidineʼé yéego nihijéí bił dahózhǫ́ǫ dabidohní, jó éí, ayóó ádabóodziilgo, díí nízhiʼ binahjįʼ hooghan hadeidiilaa.
7 Háálá áko shooh, díí hooghan shił tʼáá áko, áádóó shízhiʼ éí kweʼé hólǫ́ǫ dooleeł; áádóó shidineʼé baa jinishbaʼgo díí hooghan biyiʼ bichʼįʼ ííshjání áníʼdiishʼįįh doo.
8 Aooʼ, shá ndaalʼaʼí bichʼįʼ ííshjání áníʼdiishʼįįh doo, áádóó tʼáá shí shiinééʼ bee bichʼįʼ hanásdzih doo, éí shidineʼé shibee hazʼáanii yikʼeh dahółʼį́įgo, áádóó díí hooghan doo bąąhági átʼéii yiih deiyiiléégóó.
9 Aooʼ bikʼi dahojisdliʼígíí biniinaa dimííl ntsaaígíí dóó neeznáadi mííl ntsaaígíí bilááhgóó ayóó átʼáo bił dahodoozhǫǫł éí tʼáá átʼé bichʼįʼ kódoolnííł, áádóó diyingo aa iilyé shá ndaalʼaʼígíí díí hooghan biyiʼ baa dahasyáhígíí bił ałdóʼ.
10 Áádóó díí hooghan baa haʼniihígíí éí nááná łaʼ kéyah ndaaznilígíí bikááʼgóó baa hodoonih; áádóó díí binahjįʼ shidineʼé bee akʼihojídlí tʼáá ałtso bichʼįʼ kódadoolníiłgo bee hahodoolzhish. Tʼáá ákótʼée doo. Amen.
11 Áádóó díí nihił áhoodzaaígíí ałchʼįʼ ánályaago, tʼah ńtʼę́ę́ʼ yáʼąąsh nihichʼįʼ ąą ánáánályaa; áádóó Moses nihaa níyá, áádóó bee ąą ńdítį́hí Israel nahasdzáán dį́į́ʼdę́ęʼgo ałhaʼándoolníiłgo niheidiníʼą́, áádóó kéyah náhookǫsdę́ę́ʼígíí neeznáago dineʼé dah deínéhígíí ninádahidootʼish.
12 Díí bikééʼdóó, Elias nihichʼįʼ ííshją́ą́ áʼdiilyaa, Abraham bidiyingo naʼnitin bee yisdáʼiildéehii íídą́ą́ʼ daʼáchííhgo bił ííshją́ą́ ályaayę́ę niheinílá, nihí dóó nihílástsiiʼ tʼáá náásgóó daʼáchíhígíí bikʼIi dahozhdoodliił níigo niheinílá.
13 Díí ííshją́ą́ ályaa ałtso azlį́įʼgo, nááná łaʼ ayóó átʼáo nihił ánááhoodzaa; háálá diyin yá yáłtiʼí Elijah, éí tʼáadoo ádin yileehgóó yáʼąąsh góde ííyáhę́ę, nihidááh yiizįʼ, dóó kónihidííniid:
14 Áko shooh, tʼáá ałtso kʼad baa hoolzhiizh, éí Malachi tʼáá íídą́ą́ʼ yee haadzííʼ—éí [Elijah] tʼáá aaníí abidiʼdoolʼaał bidííniid, éí Diyin Bóhólníihii beiníłką́ądi tʼah doo ayóó átʼéego dóó báhádzidgo yee yíghááhdą́ą́ʼ—
15 Áłchíní bizhéʼé bijéí yee tʼááłáʼí nídadoodleeł, áádóó éí azhéʼé baʼáłchíní bijéí yee tʼááłáʼí nídadoodleeł, éí doodago éí deeshááł dóó nahasdzáán tʼáá siʼą́ą ńtʼę́ę́ʼ doo yáʼáshóonii bee bikʼijįʼ haʼdoodzih—
16 Éí bąą, díí bee ąą ńdítį́hí díí hoolzhishígíí biyiʼ nihílákʼedooʼnił; díí binahjįʼ éí Diyin Bóhólníihii ayóó átʼéego dóó báhádzidgo beidoołkáłígíí áyídídę́ę́ʼ bichʼįʼ hoolzhishgo nihił béédahodoozįįł, azhą́ chʼéʼatiingi ndi.