Wólta’ii 134
Wáashindoon dóó bee haz’áanii t’áá át’é woodlánígíí ch’ét’ą́, éí Kirtland, Ohiodi, Bini’ant’ą́ą́ts’ózí 17, 1835 yihahgo ntsaago Sodizin Bá Hooghan áłah aleehdi bá yadazhdiilnii’go bee lą́ da’azlį́į́’. Lą’í Akéé’ Naazíinii áłah silį́į́’ éí Diyingo Na’nitin dóó Bee Ahadaʼdeest’áanii áłtsé naasdzo bii’ siléii baa náhást’įįd. ÍÍdą́ą́’, díí ch’ét’ánígíí saad áłtsé dashijaa’ ályaaígíí éí: “Áko nahasdzáán biwáashindoon dóó bee nahaz’áanii nihe’oodlą’ bídadéét’i’ígíí doo hait’áo da doo ákót’éégóó baa hodoonih dóó doo t’áá ádzaagi’ át’éego bik’e’didootį́į́ł da, hazhó’ó baa ntsá’ázkéezgo ch’ét’ą́, díí naaltsoos ałch’į’ ánályaadi, baa ntsídasiikézígíí t’áá ákót’é.”
1–4, Wáashindoon éí diné yá t’áá níík’eh ntsáhákees dóó nahadlá t’áá hólǫ́ǫgo áyósin doo; 5–8, T’áá ałtso nihokáá’ dine’é biWáashindoon yíká’anídaajah doo dóó bibee haz’áanii yá dahodísin dóó yik’eh dahół’į́į doo; 9–10, Sodizin bee dah da’íldééhgóó doo Wáashindoon bibe’adziilii chodayooł’į́į da doo; 11–12, Nihokáá’ dine’é t’áá bí ádá dóó bikéyah yich’ą́ą́h ndaabaahgo bee bá haz’ą́.
1 Diyin God éí wáashindoon nihokáá’ dine’é yił naalnish doo biniyé hólǫ́ǫgo áyiilaa ákót’éego deiniidlą́; áádóó nihokáá’ dine’é bídadéét’i’ígíí bik’ehgo hait’áo chodayoos’įįdígíí yá ndaatłizhgo áyiilaa, t’áá áłah bee haz’áanii ádeiyiilaaígíí dóó chodeiyoos’įįdígíí bik’ehgo, éí t’áá ałtsoní nihokáá’ dine’é bá yá’át’ééh dóó yee ádaa ádahalyą́ą doo biniyé.
2 Wáashindoon áhodiilzééh bąąh ádingo bił ndahaz’ą́ą doogo deiniidlą́, t’áá hazhó’ó bee haz’áanii dílzingo ályaago t’éiyá áko diné t’ááłá’í nízínígo t’áá bí ádeinízinígíí át’áo ntsídaakees doo, bikéyah t’áá bí yik’idadééz’į́įgo yaa ádahalyą́ą doo, áádóó be’iina’ bich’ą́ą́h na’adáa doo.
3 Nihí éí díí deiniidlą́ t’áá ałtso Wáashindoon hólǫ́ǫgi éí naat’áanii dóó bee haz’áanii ádeił’íiníí bee dahólǫ́ǫ doo dóó bee haz’áanii bik’eh dahoniil’į́į doogo yíká’ádaat’į́į doo; áádóó t’áá aheełt’éego dóó t’áá ákogi át’éego bee haz’áanii chodeiyooł’į́į doogo nidzin dóó diné ahínéikah lá daaníigo éí biWáashindoon ákót’éego deiyiyíłyeed doo, éí doodago alą́ąjį’ naat’áanii áníigo.
4 Oodlą’ bee dah ooldahígíí éí Diyin God haidiilaago deiniidlą́; áádóó nihokáá’ dine’é éí áda’iilááígíí Diyin yich’į’ yaa nídahodoolnih, t’áá éí t’éiyá yich’į’, háálá t’áá ákót’áo á’doolnííł, t’áá hazhó’ó nááná ła’ diné deiyoodlánígíí bit’áá ákogi át’éíí dóó t’áá bíníík’ehígíí yik’idadidooltáłgo doo daniidzin da; ákót’ée ndi nihí éiyá nááná ła’ nihokáá’ dine’é be’oodlą’ bibee haz’áanii yaa ntsékeesígíí doo dah hidiitł’óołgo deiniidlą́ą da, éí doodago nááná ła’ ahínéekahígíí dóó hait’áo da’oodlanígíí kót’é dadidii’niiłgo; áko beehaz’áanii ádeił’íinii éí atída’ał’ínígíí ni’ kódeiyósin doo, ákondi doo éí bintsékees neilo’ da doo; nda’iisíhígíí yá nahwii’aah doo, ákondi ii’sizį́ t’aa níík’eh ííł’ínígíí ts’ídá doo yaa koyósin da doo.
5 T’áá ałtso nihokáá’ dine’é kéédahat’į́į́góó wáashindoon bił ndahaz’ánígíí yíká’anájah dóó yaa ádahalyą́ą doogo deiniidlą́, áádóó éí biwáashindoon bibee haz’áanii éí baa ádahalyą́ éí t’áá ákogi’ át’áo bee nidabi’diizhchínígíí dóó baa dahaasyáhígíí; díí wáashindoon bik’ijį’ jílį́įgo dóó bił ahijighą́ągo éí doo ákót’ée da haa’ áháyą́ągo, dóó éí é’éł’ínígíí bik’eh bá nahodoot’ááł; áádóó t’áá ałtso wáashindoon bibee haz’áanii yik’ehgo áda’áł’į́į dooleełgo bee bá haz’ą́ éí t’áá bí yee ndahaz’ánígíí bik’ehgo éí bidine’é dahyiikahígíí hazhó’ó baa ntsáhazkéezgo bá ádaalyaa; áádóó ałdó’, áko, diné t’áá bí ádeinízingo ntsídaakeesígíí bá hodílzin doo.
6 T’áá ałtso nihokáá’ dine’é wáashindoon yá sizį́įgi, ak’i bóholníihgi dóó bee haz’áanii hazhó’ó yee naalnishii bá dahodíníílzin doogo deiniidlą́, éí bee haz’áanii doo k’ídeiyitííhii yaa ádahalyą́ągo bá hasih ádeiyósin doo dóó bee haz’áanii k’ideiyitííhii yá ndahwii’aah; áádóó áko t’áá ałtso nihokáá’ dine’é bee haz’áanii bił danilį́ dóó yá dahodísin doo, éí doo hólǫ́ǫ́góó k’é dóó ahił ídlį́ bee haz’áanii doo hólǫ́ǫ da doo dóó atí’ál’į́ dóó bá hádzidii bitsásk’eh siláa doo; nihokáá’ dine’é bibee haz’áanii ła’í sizíinii dóó dah ooldah hazhó’ó nidzinígíí naadlo’ doo biniyé hadilyaa, éí dine’é dóó dine’é bitahgi; dóó yá’ąąshdéé’ bee haz’áanii dadílzinii baa haasyá, éí ii’ sizíiniik’ehjí bee haz’áanii bídadéét’i’ígíí baa haasyá, éí beda’oodlą’ dóó deidósin dooígíí bá, éí t’áá áłah Ábiilaaii yich’į’ yaa náhodoolnih biniyé.
7 Áko ak’i bídahólníihii, ntsaago hadahwiisdzoh, dóó wáashindoon bibee haz’áanii bik’ídaasti’go bee bá ahóóti’go deiniidlą́, áádóó bee haz’áanii t’áá át’é bidine’é yee yaa áhalyą́ą doogo hadeidiilaa éí nahaghá deiyoodlánígíí bik’ehgo ádeidoolííł; ákondi bidine’é ła’ bee bá ahóót’i’ígíí dooda deididooniiłgo doo deiniidlą́ą da, éí doodago yee hadoodzihígíí doo dooda yididooniił da, éí beeha’oodzí’ígíí hazhó’ó dóó bee haz’áanii bá hodílzingo t’éiyá dóó woodlą́ baa ha’oodzí’ígíí doo ak’ijį’ ídlínígíí éí doodago nahat’á atí’doolíłígíí ádingo t’éiyá.
8 Áádóó atí’doolíłígíí hait’éhígíí bik’ehgo ndahwiit’aah doogo deiniidlą́; áko háida iisxį́įgo, biwáashindoon yik’ijį’ naalnishgo, ani’įįhgo agha’iinííłgo, an’įįhgo, dóó hahoniłchaadgo, t’áá ałtsóní bii’, asihígíí bik’ehgo bá nahodoot’ááł dóó nihokáá’ dine’é doo yá’áshóonii t’éiyá ííł’į́į dooleeł yá yinízingo, éí wáashindoon bibee haz’áanii ákwe’é ályaaígíí bik’ehgo bá ndahwiidoot’ááł; áádóó diné bitahgi k’é dóó ahodiilzéé’ hólǫ́ǫ doo diné náásee ndadidooltał dóó yee danilínígíí bee bee haz’áanii yá’adaat’éehii k’ídayiitį́įhii nináda’doodlééłjį’ ndeiyi’éésh doo.
9 Nahagháádéé’ bó’oolkąąhígíí dine’é biwáashindoon doo bił ałtaadooniłgo deiniidlą́ą da, ákohgo doo ła’ nahaghá dah ooldah dínóosééł da dóó nááná ła’ diyingo hodílzin doo bee bá ahoot’i’ da doo, dóó sodizinjí da’atahígíí t’áá bí yee ádah ndaha’áhígíí, diné da’ílíinii, doo bits’ą́ą́’ nídidoolyéeł da.
10 T’áá ałtso nahaghá dah da’íldéhígíí bá ahóót’i’ hait’áo da’atahígíí doo ákǫ́ǫ́ áda’ał’ínígíí yił nidaalnishgo deiniidlą́, éí dah oodahígíí bibee haz’áanii dóó hait’áo áda’ał’ínígíí bik’ehgo; áko hait’áo ahił ndaalnishgo ahił áká’andaajah dóó yá’át’ééhjí ndaalnishgo bá nizhóní; ákondi nahaghá dah deíkáhígíí doo nihokáá’ dine’é kéyah dóó iiná bee bá adahazt’i’ígíí bídahólníihgo yee yá ndahwii’aah doo, éí nihokáá’ bikáá’ binaadeełii yits’á deiyiinííł, éí doodago be’iina’ éí doodago bits’íís atídoolníiłgo, éí doodago bits’íís atíl’į́įgo. Dahodílzingo dah yikah dóó ła’ nahjį’ yeda’iiłnííh, áádóó bízhi’ dah nahjį’ hadeiyizóóh.
11 T’áá ałtso nihokáá’ dine’é nda’iisíí’ dóó doo áko da’iilaaígíí, atí’iilaago éí doodago binaadeełii éí doodago yee át’éhígíí bits’ą́ą́’ k’éti’go, t’áá k’é bił naazt’i’go beehaz’áanii bik’ehgo aadawiinít’ínígíí bá nináda’doodléeł, ákondi t’áá ałtso nihokáá’ dine’é bá ahóót’i’ ach’ą́ą́h ne’áłhaałgo t’áá bí ádá éí doodago bik’isoo atílyaago bá, éí doodago dabikéyah, éí doodago biwáashindoon, ákwe’é tsxį́įłgo bee haz’áanii hólǫ́ǫgo aa’áhályą́ągo ályaa, áko doo t’áá hooshch’į’ bee haz’áanii bich’į’ hazhdoodzih da, áádóó hak’ihodooldoh.
12 Nihokáá’ dine’é nahasdzáán bikáá’ diné dah deiyíkááhgóó Jesus Christ bina’nitin bee yisdá’iildéehii t’áá ákó bee ndaniitingo díí deiniidlą́, áádóó yá’át’éehgo dahiinánígíí nahasdzáán bikáa’gi yooch’ííd baa ooldahígíí bits’ą́ąjį’ dah dadoohkááh; ákondi naalte’-áká’análwo’í bita’ neidáa dooleełgo éí t’áá ákohgo doo ádeil’į́į da, dóó doo Jesus Christ bina’nitin bee yisdá’iildéehii bee ndaniitingo doo ádeil’į́į da, dóó doo tó bee deilzį́į́h da dóó ndabił’a’í doo bá deinízingóó, éí doodago doo nihídéét’i’ da ndi bił neildeeh, éí bąąh diné be’iina’ dah bąąh dawiil’aah; éí ákót’áo baa hwiinít’į́įgo doo bee haz’ą́ą da dóó doo t’áá ákogi át’éego deiniidlą́, áádóó t’áá ałtso wáashindoon bibee áhodiilzééh bąąh dahwiil’aah éí nihokáá’ dine’é doo áká’anídaajahgóó dabi’dótą’ doo.