Wóltaʼii 39
Diyin Yá Yáłtiʼí Joseph Smith díí diyingo bił ííshją́ą́ ályaa éí James Covel, yee yił hodoolnih biniyé, éí Fayette, New Yorkdi, Yas Niłtʼees 5, 1831 yihahgo áhóótʼįįd. James Covel, éí Methodist dahʼooldahjí dízdiin nááhai yá halneʼí nilį́įgo, éí Diyin Bóhólníihii diyingo yił ahaʼdeetʼą́ áko Diyin Yá Yáłtiʼí Joseph Diyin Bóhólníihii bił náhálnihígíí tʼáá átʼé bikʼeh honishʼį́į doo dííniid.
1–4, Jesus Christ Yikééʼ Naazíinii éí Diyin God baʼáłchíní dadooleełgo yídeiyíghah; 5–6, Jesus Christ binaʼnitin bee yisdáʼiildéehii joodląąhgo éí Christ bikééʼ dahjidiighááh; 7–14, James Covel tó bee nidiʼdoolzį́į́ł dóó Diyin Bóhólníihii Bidáʼákʼeh biiʼ nanilnish doo biʼdooʼniid; 15–21, Diyin Bóhólníihii yá ndaalʼaʼí éí Jesus Christ binaʼnitin bee yisdáʼiildéehii yee ndaʼnitin doo Christ Nínáádoodáłígíí tʼah doo beiyíłkaahdą́ą́ʼ; 22–24, Tʼáá háí shį́į́ Jesus Christ binaʼnitin bee yisdáʼiildéehii deiyoosdląądígíí ahíídootʼish kʼad hoolzhish dóó hoolʼáágóó.
1 Bizhí dintsʼį́į́h dóó bikʼeh honíłʼįįh éí hoolʼáágóó dóó ahoyoolʼáágóó, Ayóó Átʼéii tʼáá éí áshtʼį́, azhą́ Jesus Christ ndi—
2 Nahasdzáán beʼadinídíín dóó binahjįʼ daʼíináanii; éí adinídíinii chahałheeł biyiʼdi bitsʼádiʼnídíín dóó éí chahałheeł doo yikʼiʼdiitʼįįh da;
3 Tʼáá éí áłníiʼgi hoolzhishgo tʼáá bíhígíí yaa níyá, dóó tʼáá shíhígíí doo dashiniizį́į́ʼ da;
4 Ákondi tʼáá ląʼída dashoosdląądígíí, éí shiyeʼké dadooleeł yídeiyíghahgo íishłaa; áádóó tʼáá ákótʼáo tʼáá ląʼída dashooshdląądígíí ałdóʼ, shiyeʼké dadooleeł yídayíighahgo íishłaa.
5 Áádóó tʼáá aaníí, tʼáá aaníigo, Shí ándishní, tʼáá háí shį́į́ shinaʼnitin bee yisdáʼiildéehii yoosdląądígíí éí shikééʼ dahdiighááh; áádóó tʼáá háí shį́į́ shinaʼnitin bee yisdáʼiildéehii doo yoosdląądígíí éí doo shikééʼ dahdidoogáał da.
6 Áádóó díí éí shinaʼnitin bee yisdáʼiildéehii átʼé—ádaa náʼoohkąąh dóó tó bee alzį́į́h, áádóó áko índa kǫʼ dóó Iiʼ Sizį́ Diyinii bee nihiʼdiʼdoolzį́į́ł, Aaʼáhályáanii ndi, éí tʼáá ałtsoní ííshją́ą́ ííłʼį́, áádóó éí diyingo hazʼą́ądi bee kʼé dahólónígíí yee naʼnitin.
7 Áádóó áko, shooh, Shí ándishní, shá naalʼaʼí James, naanish íinilaaígíí háásid dóó néhosésįįd.
8 Áádóó tʼáá aaníí Shí ándishní, kʼad hoolzhishgi shidááhdóó nijéí tʼáá ákogii átʼé; áádóó, áko shooh, ayóó átʼáo akʼihojídlí naah ninílá;
9 Ákótʼée ndi, ayóó átʼáo yínííł biih tádíníyá, háálá ádaa dzíínídlí dóó nihokááʼ oodááł naah bínʼígíí biniinaa łą́ądi doo shiisínídląąd da.
10 Ákondi, áko shooh, yisdádíínááłdi bichʼįʼ hoolzhish, shizhí dinitsʼaʼgo, éí kóníłní: Yiizįįh dóó tó bee ndiʼdoolzį́į́ł, áádóó nibąąhági ádaatʼéii naah táádoogis, shízhiʼ binahjįʼ sodílzingo, dóó shiʼIiʼ Sizį́ Diyinii, áádóó akʼihojídlí tsʼídá doo nił bééhózinígi átʼéii naa doolyééł.
11 Áádóó díí íinilaago, naanish alááh átʼéii bichʼįʼ Shí hashtʼeniishłaa. Shinaʼnitin bee yisdáʼiildéehii tʼáá átʼé bee naʼnítin dooleeł, éí akéeʼdi yoołkááłdi adahwiisʼáágo baa hodoonihgo íishłaa, diyingo bee ahaʼdeetʼą́ éí shidineʼé yisdánídookahgo bee bił chʼíhiséʼą́, éí Israel bighandóó danilį́.
12 Áádóó baa hodoolzhish adziilii naah ndoolyééł; neʼoodląʼ aláah átʼée doo, áádóó nił honishłǫ́ǫ doo dóó nilą́ąjįʼ yishááł doo.
13 Shidáʼákʼehgi nanilnish doogo bee nikʼihodiiniiʼ, dóó shisodizin daʼatahígíí ląʼígo ádíílííł, dóó Zion hózhǫ́ hólǫ́ǫ doo, áko dahdaaskʼidgóó baa hózhǫ́ǫ doo dóó noosééł doo.
14 Áko shooh, tʼáá aaníí, tʼáá aaníigo, Shí ándishní, doo haʼaʼaahjigo nahazʼą́ą́góó díínáałgo anííłʼaʼ da, ákondi Ohiogóó díínáałgo anííłʼaʼ.
15 Áádóó shidineʼé Ohiodi áłah dooleełgo, akʼihojídlí łaʼ bá hashtʼeʼninílá éí nihokááʼ dineʼé baʼáłchíní bitahgóó tʼah doo béédahoozįįh da, dóó bitsíítʼááhgi baadahidoolyééł. Áádóó áádę́ę́ʼ dineʼé ałʼąą dineʼé bitahgóó adahidoolʼaał.
16 Áko shooh, tʼáá aaníí, tʼáá aaníigo, Shí ándishní, áko Ohiodi dineʼé bidaʼoodląʼ daaląʼígo shichʼįʼ sodadoolzin, éí shílaʼ ałʼąą dineʼé bitahgóó bee nahwiitʼaah niʼ kódeeshłííł danízin, ákondi Shí éí shizaad éí doo bikʼijįʼ deeshłeeł da.
17 Ákohgo yéego ndaałnish dóó shidáʼákʼehgi akééʼ naazį́įgo nidaalnishígíí bikʼidahidoołnííh, áko tsʼídá akéeʼdi dooldah.
18 Áádóó ádaa ńdaʼooskango dóó shinaʼnitin bee yisdáʼiildéehii tʼáá átʼé deiyoosdląądgo, dóó haałtʼé daazlį́į́ʼgo, shílaʼ bee nahwiitʼaah niʼ kódeeshłííł.
19 Ákohgo, náásee ánítʼį́, yéego niinééʼ diitsʼaʼgo, kódíní: Yáʼąąshdi diyingo hazʼą́ áyíídídę́ę́ʼ bichʼįʼ hoolzhish; Yéego kódíní: Dooládóʼ Baa Hózhǫ́ǫ da! Tsʼídá Aláahdi Diyin God bízhiʼ dílzin.
20 Náásee ánítʼį́ tó bee iisįįh, deeshááłdi shilą́ąjįʼ hastʼehólééh;
21 Háálá áyíídídę́ę́ʼ bichʼįʼ hoolzhish; yoołkááł doodaiiʼ oolkiłgi diné doo łaʼ bił bééhózin da; ákondi tʼáá aaníí baa hodoolzhish.
22 Áádóó díí bił bee yílyáhígíí éí shí shikééʼ dahdidookah; dóó hoolʼáágóó dóó ahóyoolʼáágóó shí naasháadi ahíídootʼish.
23 Áádóó ałdóʼ, baa hodoolzhish tʼáá ánéelą́ą́ʼ tó bee yínísįʼígíí, bitsiitʼááhgi dahdadidíílnih; dóó Iiʼ Sizį́ Diyinii baadahidoolyééł, dóó náníshdááhdi yaa halneʼígíí yíká dadéezʼį́į́ʼ doo, dóó shéédahósin doo.
24 Áko shooh, tʼáá hooshchʼįʼ deeshááł. Tʼáá ákótʼée doo. Amen.