Ílį́įgo Bee Hada’iisdzí’ígíí 1

Diyin God Bizaad Bible dóó Naaltsoos Mormon Wolyéhígíí biyi’ nanihidi’nitin éí Diyin God t’ááła’í hach’ooní ájósingo t’éiyá yee has’ą́ éí náána łahgo át’áo yee haadzíí’go índa (2 Samuel 12:7–8 dóó Jacob 2:27, dóó 30gi yídííłtah). Joseph Smith diyingo ííshją́ą́ bił ályaa bikéé’dóó, 1840yę́ędą́ą́’ Sodizin atah danilínígíí díkwíigo da asdzání daageh bá hólǫ́ǫgo ályaa (wólta’ii 132gi yídííłtah). 1860 dóó ńléí 1880 yihah biyi’, Wáashindoon bikéyah ałhidadiidzooígíí díí oodlą’ binahjį’ é’él’ínígíí doo ál’į́į da doo biniyé bee haz’áanii yik’ijį’ yee lą́ da’asłį́į́’. Díí bee ndahaz’áanii éí Wáashindoon Bikéyah Ałhidadiidzooígíí Hodahgi Bi’aadahwiinít’į́ yee lą́ da’asłį́į́’. Diyin bił ííshją́ą́ ályaa bikéé’dóó, Sodizin Bá Hooghan Yilą́ąjį’ Sizíinii Wilford Woodruff díí Manifesto naaltsoosígíí haidiilaa bik’eh hodool’įįłgo, éí Ghąąjį’ 6 yoołkááł, 1890 yihahgo bik’eh hół’į́į doogo dóó tʼáá bee ádá nihozhdiníʼánígíí éí Sodizin Bá Hooghanjí dahyikahígyíí yee lą́ da’asłį́į́’. Díí binahjį’ Sodizin biyi’ díkwíigo da asdzání daagehę́ę ninít’i’ silį́į́’.

Díí Bídéét’i’ígíí Bich’į’:

Aseezį́ saad yíká ádaat’ínígíí éí bílaʼashdlaʼii binahatʼaʼ bił nidaaztʼiʼígíí biniyé, Salt Lake Citydę́ę́’ ndahaaskai, éí t’áá la’ígo naaltsoos bikáá’ ándeiyiil’įįh, éí Utah Commission, Secretary of the Interior kódaaníigo yich’į’ áda’iilaa, éí díkwíigo da asdzání daageh t’ahdii ádaal’į́ dóó Ya’iishjááshchilídą́ą́’ éí doodago díí k’ad náághai hoolzhishdę́ę́’ dízdiin dóó ba’aan Utah hahoodzoh biyi’ ákót’áo dahodísingo diné nda’iigeh, áádóó ałdó’ Sodizin Bá Hooghan biyi’ naat’áanii danilínígíí kót’áo yee nda’nitin, bił t’áá da’áko dóó t’áá ákót’áo díkwíigo da asdzání daagehígíí t’áá deinízin ha’níigo baa hane’—

Áko éí bąą, Shí, Jesus Christ Bisodizin Bá Hooghan Dííjį́į́góó Yá Naazínígíí bilą́ąjį’ sézį́įgo, díí binahjį’, yéego baa hast’i’go, díí doo ákót’éégóó nihaa dahane’ dishní. Doo éí díkwíigo da nihe’asdzání ádaahłééh éí doodago daohyeh doo dadii’níi da, éí doodago éí doo háida t’aa ako dabidii’níigo o’ool’ííł nahalingo bee lą́ da’iidleeh da, áádóó Diyin Bighan Ntsaa góne’ éí doodago Kéyah t’áá binaagóó ha’ígii shį́į́’ dízdiin dóó ba’aan éí doodago t’áá haashį́į́ néilą́ą́’ t’áadoo bá dahodíníilzingo díkwíigo da asdzání da’izyeh da.

T’ááłá’í ákót’áo baa hóóne’, éí Endowment Hooghan biyi’ ákót’áo ła’ azyeh, Salt Lake Citydi, 1889 yę́ędą́ą́’ daaníigo yaa dahoolne’, ákót’ée ndi háí áadi ákót’áo azyehígíí doo baa shił bééhózin da; díí éí t’áadoo baa shił bééhoozįįdgo ákóhóót’į́į́d. Díí ákót’áo baa hóóne’ígíí biniinaa Endowment Hooghan, shí ádíshníigo, t’áá tsxíłįgo táosnil.

Wáashindoondi beehaz’áanii ádeił’ínígíí éí díkwíigo da asdzání daagehígíí doo bee haz’ą́ą́góó ádeiyiilaa, éí hódahdi aadahwiinít’į́ yee t’áá ákót’é daaníigo yee lą́ da’asłį́į́’, éí binahjį’ Shí k’ad éí bee haz’áanii bik’eh honish’į́į doo nisin dóó bikéé’ ninishááh, áádóó Sodizinjí atah danilínígíí bik’idínísh’į́’ígíí ałdó’ t’áá hait’áo da shígi át’áo t’áá ákódadoonííł nisin.

Sodizin Bá Hooghan atah danilínígíí dóó bił héédahonisinígíí, díí hoolzhish biyi’ baa hóóne’ígíí, díkwíigo da asdzání daagehígíí ádaahłééh doo dabidishníi da dóó doo bee nidabinishtin da; áádóó Sodizin Bá Hooghan biyi’ Elder danilínígíí ákót’áo saad yee yádaałti’ dóó yee nda’nitin nahalingo, éí honiitehdii bich’ahoshishké. Áádóó k’ad éí adahwiis’áágóó Jesus Christ Dííjį́į́góó Yá Naazínígíí éí kéyah bibee haz’áanii iigehígíí bik’eh dahonoł’į́į doo bidííniid.

Wilford Woodruff

Jesus Christ Bisodizin Bá Hooghan Dííjį́į́góó Yá Naazínígíí Yilą́ąjį’ Sizį́.

Lorenzo Snow Alą́ąjį’ Sizíinii éí kódííniid:

“Díí bihodish’aah, Wilford Woodruff éí Jesus Christ Bisodizin Bá Hooghan Dííjį́į́góó Yá Naazínígíí Yilą́ąjį’ Sizį́įgo nihił béédahózin, dóó t’áá bí t’éiyá díí nahasdzáán bikáá’ iigeh bee álzį́į́h bee ó’ool’įįł bibee ąą ńdítį́hí dahyoojih, díí binaanish áyósinígíí binahjį’ bóhólnííh díí Manifesto nihił ch’ííní’ánígíí jó éí áłah siidlį́’ę́ędą́ą́’ nihich’į’ wóólta’, dóó éí Bini’ant’ą́ą́tsoh biyi’ 24góó yoołkááłgo, 1890 yihah biyi’ ályaa, áádóó Diyin Bá Hooghan Ntsaago Álah Siidlį́įgi, díí díkwíigo da asdzání daagehígíí doo ál’į́į da doo dóó éí baa nihił ch’ét’ą́hígíí bik’eh dahoniil’į́į doogo nihił t’áá da’áko.”

Salt Lake City, Utah, Ghąąjį’ 6, 1890.

President Wilford Woodruff
Táádi Hanáádzíí’ éí Manifesto
Biyi’dóó Díí Saad Haa’nil

Diyin Bóhólníihii éí shí éí doodago nááná ła’ díí Sodizin Bá Hooghan Yilą́ąjį’ Sizínígíí ts’ídá doo yoo’anihidoo’ishgóó yee hodooł’aał da. Doo éí kót’áo hadilyaa da. Diyin God éí doo ákót’áo yaa ntsékees da. Nabídínéeshtaał niizį́įgo éí, Diyin Bóhólníihii díí naanish ásh’ínígíí yits’áshidoołtééł, áádóó t’áá ákót’áo nááná ła’ Diyin God bits’ą́ą́déé’ ííshją́ą́ ádaalyaaígíí dóó naanish baa deet’ánígíí nihokáá’ dine’é ba’áłchíní yits’ą́ąjį’ dahdidookah nízingo neinitaahígíí ałdó’ nahjį’ kóbidi’doolnííł. (Hastą́diin-ła’ Hastą́ą́ Ninádízi’go Ntsaago Áłah Ná’ádleeh Sodizin Da’atahígíí bágo, Damóo Biiskání, Ghąąjį’ 6góó yoolkáálgo, 1890 yihahgo, Salt Lake City, Utah. Deseret Evening News naaltsoos biyi’ bizaad náháásdzoh, Ghąąjį’ 11góó yoolkááłgo, 1890 yihahgo, p. 2.)

Háí t’ah dahiiná éí doodago daazneezná éí naazt’i’ígíí doo bídéét’i’ da, éí doodago háí díí Sodizin Bá Hooghan yilą́ąjį’ sizį́į dooleełgo bee bik’ihodiinii’ígíí, éí Diyin God Ayóó’ábóodziilii bił halneʼígíí yik’ehgo oo’ish doo. Doo ákót’áo é’iilaagóó éí, doo yíneel’ą́ą da doo. …

T’áá ániidgo ła’ diyingo shił ííshją́ą́ ádaalyaa, dóó aláahdi ádaat’éii shich’į’ ályaa, áádóó Diyin Bóhólníihii shich’į’ yee haadzí’ígíí bee nihił hodeeshnih. Nihíni’ díí manifesto wolyéhígíí bee nihił hashne’. …

Diyin Bóhólníihii éí Jesus Christ Dííjį́į́góó Yá Naazínígíí na’ádíkid bee nabídídííłkił shiłní, áádóó ałdó’ Áshíłní díí bee bich’į’ haasdzíí’ígíí deiyóosts’ą́ą́’go dóó bee nabidí’déikidígíí yich’į’ háádaasdzíí’go, Ii’ Sizį́ Diyinii dóó Diyin God bibe’adziilii bee, t’áá aheełt’éego hadadoodzih, áádóó díí bídéét’i’ígíí t’áá aheełt’éego deiyoodlą́ą doo.

Díí éí bee nabidí’dóokił: Jesus Christ Dííjį́į́góó Yá Naazínígíí háájígo lá dahóyą́ągo yikéé’ dahdidookah—díkwíigo da asdzání daagehígíí daats’í t’ah yídanitaahgo áda’ał’į́į doo, éí kéyah bibee haz’áanii doo bik’ehgóó dóó nihokáá’ dine’é hast’ą́diin miiltsoh yik’ijį’ danilíi ndi, áádóó t’áá át’é Diyin Bighan Ntsaaígíí nihits’ą́ą́’ nídeididoonił dóó nihits’ą́ą́’ dah ádadooldįįł éí díí bąąh adooleeł, áádóó t’áá át’é ó’ool’įįł biyi’ ádaal’ínée deidínóołtł’ah, éí tʼáá áłah dahiináanii dóó ańdahaaskaiígíí bá, áádóó Ts’ídá Alą́ąjį’ Bídahólníhígíí dóó Hastóí Naakits’áadah Bik’idahodiinii’ígíí dóó Sodizin Bá Hooghan biyi’ alą́ąjį’ ash’eezhígíí awáalyah góne’ yah abidi’doonił, áádóó éí diné bindaadeełii yits’ą́ą́’ nídeididoonił (díí t’áá át’é ákóhoodzaago éí tʼáá ałtso díí yits’ą́ą́jį’ ńdadooyis); éí doodago éí, áádóó díí ó’ool’įįł bik’eh dahoniil’įįd dóó bik’ee ti’dahwii’níihgo éí doo ánáádadiil’įįł da dóó bee haz’áanii bik’eh dahodiil’įįł, áádóó díí kódeidzaago éí Diyin Yá Yáłti’í, Hast’óí Naakits’áadah Bik’ihodiinii’ígíí dóó danihizhé’é t’áá hooghangi nihił dahólǫ́ǫgo ádadiilnííł, áko bí éí diné nideinitin doo dóó Sodizin Bá Hooghanjí naanish bídéét’i’ígíí yindaalnish doo, áádóó ałdó’ Diyin Bighan Ntsaaígíí Jesus Christ Yikéé’ Naazíinii bílák’ee naaznil doo, áko Jesus Christ bina’nitin bee Yisdá’iildéehii bee ó’óól’įįłii ádeił’į́į doo bididííniił, éí tʼáá áłah dahiináanii dóó ańdahaaskaiígíí bá?

Diyin Bóhólníihii éí díí ó’ool’įįłígíí doo nahjį’ kodeilyáágóó haa hodooníłígíí bee shił áhoodzaa dóó diyingo shił ííshją́ą́ ayiilaa. Díí doo nahjį’ kódeilyaagóó éí, díí Logangi Diyin bighan ntsaaígíí biyi’ t’áá háiida hast’óí … doo chodeil’į́į da doo ńt’ę́ę́’; háálá kéyah Zion t’áá ałtsogóó ó’ool’įįł t’áá át’éé ńt’éé’ ni’ kodaalyaa doo ńt’ę́ę́’. Israel dine’é bitahgóó tʼóó báhádzidgo bił dahwiidoo’aał, áádóó lą’í hast’óí awáalyah góne’ yah adabidi’doo’nił. Díí t’áá át’é Sodizin Bá Hoohgan Da’atahígíí bee bich’į’ ndahwii’náa doo ńt’ę́ę́’, áádóó díí ádeil’ínígíí nihídeiniłchééhgo nahjį’ kodeiyiilaa doo ńt’ę́ę́’. Áko k’ad, díí bee nanihídishkid, kót’áo daats’í nihits’ą́ą́’ ni’ kodoolnííł, éí doodago daats’í Diyin Bóhólníihii nihił ííshją́ą́’ ayiilaaígíí bik’ehgo yiikah doo, dóó ákót’áo éí NihiDiyin Yá Yáłti’í dóó nihiHast’óí Naakits’áadah Bik’idahodiinii’ígíí dóó nihizhé’é danilínígíí doo ąąh naazhjéé’ da doo, áádóó Diyin bighan ntsaaígíí éí t’áá dine’é yee bidahólnííh doo, áko ańdahaaskaiígíí yisdáádoot’ish. Díí dine’e’ t’áá íídą́ą́’ lą’í ii’ sizį́ bá haz’ą́ awáalyah dabi’dóót’ą’dę́ę́’ ch’ídeiznil, áko díí naanish daats’í t’áá naas ál’į́į doo éí doodago daats’í nidoot’ih? Díí éí Jesus Christ Dííjį́į́góó Yá Naazínígíí bee nabídíshkid. T’áá nihí ádáh ndahooh’á. T’áá nihí baa nitsídaahkeesgo hadadoohdzih. Shí éí doo áajį’ hadeesdzih da; ákondí ánihidishní éí éí t’áá aaníí nihá ákót’ée doo ńt’ę́ę́’ doo díí bik’eh áda’iilyaagóó.

… T’áadoo baa nídéit’įįdgóó éí t’áá íiyisíí nihitah áhodooníłígíí yiiłtsą́. T’áá nízaadgóó díí baa ntséskees. Ákondi díí éí bee ádideeshniił: Bíni’dii daats’í t’áá ałtso Diyin bighan ntsaaígíí doo bee nihíhólnííhgóó ádeeshłííł ńt’ę́ę́’; awáalyah góne’ yah ashi’doolt’eeł ńt’ę́ę́’, áádóó t’áá ałtso hast’óí yah adabidi’doo’nił ńt’ę́ę́’, éí Yá’ąąshdéé’ Diyin God ííshłaaígíí kódíínííł t’áadoo shidííniidgóó; áádóó díí ádíílííł shi’doo’niidgo baa hoolzhiizhgo, t’áá át’é doo shił naaki nilį́į da ńt’ę́ę́’. Diyin Bóhólníihii bidááhdóó niníyá, dóó Diyin Bóhólníihii baa ná’iidíízoh shiłnínée baa ná’iisézoh. …

Díí t’áá kǫ́ǫ́ nihił ninishłé, háálá nidadoołkah dóó baa ntsídadoohkos. Diyin Bóhólníihii éí nihił naalnish. (Cache Stake Conference, Logan, Utahgi, Damóo, Níłch’its’ósí 1góó yoołkááłgo, 1891 yihahgo. Deseret Weekly naaltsoos biyi’ náháásdzoh, Níłch’its’ósí 14, 1891 yihahgo.)

Áko k’ad díí shił diyingo ííshją́ą́’ ályaaígíí dóó hait’áo Diyin God biYe’ díí yinaashnishígíí bee nihił hodeeshnih. … Díí t’áá ałtso bohodoolnííł ńt’ę́ę́’, ts’ídá t’áá aaníí Diyin God Ayóóʼábóodziilii hiiná nahalingo díí t’áá aaníí, díí naaltsoos biyi’dóó hane’ Manifesto t’áadoo niheiyílyáágóó. Ákohgo, Diyin God biYe’ éí Sodizin Da’atahígíí dóó nihokáá’ dine’e bił ííshją́ą́ ádoolnííł nízingo biniyéí éí t’áá bí yaa ntsézkééz. Diyin Bóhólníihii Zion hadidoolníiłgo yee haadzíí’. Éí díí Bighan Ntsaaígíí ałtso hadidoolníiłgo yee haadzíí’. Díí deiyíldzis dził bił nahazʼánígi biyi’ éí tʼáá áłah dahiináanii dóó ańdahaaskaiígíí yisdádoot’ish Níigo yee nihoní’ą́. Áádóó Diyin God Ayóóʼábóodziilii éí Ch’į́įdii díí doo yidínóołtł’ah da dííniid. Áko díí bik’ida’dohtą́ągo éí, éí binahjį’ nihił béédahózingo chodaoł’į́į doo. (Díí éí Salt Lake Diyin Bighan Ntsaaígíí daʼiidlishgo díí hast’ą́ą góne’ yah ííjéhígíí áadi bee ha’oodzíí’, T’ą́ą́chil 1893 yihahgo. Daʼiidlishgo Áłah Ázlį́’ígíí Béésh Bee Ak’e’elchíhí Bee Díí Naaltsoos Bikáá’ Baa Náháásdzoh, Archives, Church Historical Department, Salt Lake City, Utah.)

Bitáhaneʼígíí t'áá Álnééh