Wólta’ii 123
Díí kwe’é éí Akéé’ Naazíinii hait’áo bich’į’ ndahwiiłnáanii yił ndaalnish doogo ályaa, éí Diyin Yá Yáłti’í Joseph Smith Liberty, Missouridi awáalyah góne’ sidáago yaa ná’íízoh. Díí kwe’é baa hane’ígíí éí Sodizn Bá Hooghan Wóózhch’į́į́d 20, 1839 yihahgo naaltsoos bich’į’ ályaaígíí biyi’dóó haadzoh (wólta’ii 121gi alą́ąjį’ saad dashijaa’ígíí yídííłtah).
1–6, Akéé’ Naazíinii éí tʼáá átʼé yik’ee ti’dahoozníí’ę́ę dóó bikʼijįʼ ídlínée hane’ ałhą’ ádeidoolíiłgo naaltsoos yee ndeidoo’ááł; 7–10, Ii’ siz’į́ t’áá ádzaagóó oodlą’ yee nihoní’ánée t’áá éí ałdó’ Akéé’ Naazíinii atíyiilaa; 11–17, T’áá ałtso dahyikahígíí bitahdóó lą’í diné t’áá aaníinii deidoodląął.
1 Áádóó ałdó’, díí baa ntsídadoohkos t’áá ałtso akéé’ naazíinii t’áá aaníí ádahóót’įįdígíí, dóó díí Náhásdzo biyi’ diné atídabííł’įįdgo yiyaa tí’dahooznii’ígíí yaa nda’íídoozoh;
2 Áádóó ałdó’ t’áá ałtso bindaadeełii dóó haashį́į́ néilą́ą́’ yits’ą́ą́dóó atídaadzaaígíí, éí t’áá áłah yee át’éhígíí dóó bits’íís bee bąąh dahoo’a’ígíí, dabikin dóó bikéyah ádaat’éii ałdó’;
3 Áádóó ałdó’ t’áá ałtso diné ade ádabósinée, hadeineezt’ą́ą’jį’ dóó biniinaa bił béédahodoozįįłjį’.
4 Áádóó ła’ diné ats’ádoo’nił éí díí ndeidoołkah, éí yaa dahalne’ígíí dóó ch’íhdeiyii’aahígíí nídeidiyoolah; áádóó ałdó’ yooch’ííd bee baa hane’go naaltsoos bikáá’ ádaalyaayę́ę éí nínádazhdidoonił;
5 Áádóó t’áá ałtso aseezį́ binaaltsoos, dóó encyclopedia biyi’ nídáasdzoohígíí, áádóó t’áá ałtso yooch’ííd bee nákéé’ náhane’ naaltsoos bikáá’ ádaalyaayę́ę, dóó baa nída’íísdzooígíí, dóó háí náyiizoo’ígíí, áádóó t’áá ałtso doo yá’áshxǫ́ǫ́góó doo yits’íídgóó ałkéé’ ádaahoodzaaígíí dóó iiníziin dóó da’iisxíinii baa hodoonih éí díí dine’é bee ndabidi’neestą́ą́’—
6 Áko doo éí t’áá ałtso nihokáá’ dine’é díí naaltsoos bich’į’ hadadidiilníił da, ákondi Wáashindoon yilą́ąjį’ naazínígíí ałdó’ bich’į’ kódadiilnííł t’áá áłtso chahałheeł dóó ch’į́įdii bits’ą́ą́dóó danít’i’ígíí, éí nihiTaaʼ Yáʼąąshdi Hólóonii ts’ídá akéedi bindadiilnishgo nihá yinízin, éí nanit’indę́ę́’ hágo dabidi’diiniił áko yee adééhaadzí’ę́ę t’áá ałtso bídeiyídííkił; áádóó ałdó’ t’áá ałtso dahda’ánééhgóó akéé’ naazíinii yiká adoojahgo béé’ádahozhdilyáah dooleełígíí ts’ídá doo bohónéedzą́ą da áko índa bibe’adziilii yich’į’ kwíídooliíł.
7 Akéé’ naazíinii éí díí naanish wołí bee nidzinígíí Diyin God, dóó diyin yá ndaal’a’í yá ádeidoolííł, éí bidááhdóó deidiidzįįł, áádóó t’áá nihí ałdó’, nihich’ooní dóó nihada’áłchíní, éí chah, yínííł, dóó aa áháyą́ yaa dabóta’go ti’dahooznii’, éí na’atseed ts’ídá woodláhígíí áyiilaaígíí, dóó doo ts’íí át’éego óhólnííh, dóó bee ade áhoot’é óolzinii chodeiyooł’ínígíí, éí ii’ siz’íinii bił hasihgo dóó bá yineidlį́įgo dabizází deiyoodlánée t’áá íiyisii deiínóhtą’ yiłní, éí bits’ą́ą́dóó yooch’ííd deiyoosdląąd, éí ba’ałchíní bijéí yii’ ndeiyiizlá, áádóó nihokáá’ dine’é bił dahalą́ągo áyiilaa, áádóó éí hózhǫ́ bitsxe silį́į́’, áádóó éí k’ad ts’ídá íiyisíí bits’ą́ą́dóó t’áá ałtso nihoochxǫǫh hazlį́į́’, dóó t’áá ałtso nihokáá’ dine’é bibąąhági ádaat’éii yik’ee dadi’ní.
8 Éí béésh azéédéetą́ át’é, niłdzilgo bináz’á; áádóó éí látsíín niná’niłí át’é, dóó béésh da’ahólzha’í, dóó látsíín bee ahé’átł’óh, dóó éí ch’į́įdiitahdi bee dabi’dót’ą’ígíí ádaat’é.
9 Éí bąą éí díí naanish wołí bee nidzinígíí, doo éí nihich’ooní dóó niha’áłchíní t’éiyá bich’į’ da, ndi asdzání bąąh ádaasdįįdii dóó bizhé’é ádaadinígíí ałdó’ bich’į’, éí béésh bílá biyaa ahastiin dóó azhé’é danilínígíí nidabi’distseed;
10 Éí chahałheeł biyi’ t’óó baa’ihgo baa na’aldeehígíí éí ch’į́įdiitah ndi ditsxizgo yéédooldzííł, dóó yik’eedidoolyis dóó binii’ yidoogah, áádóó t’áá éí ch’į́įdii bíla’ ditł’id dóó ditsxisgo íídoolííł.
11 Áádóó ałdó’ díí naanish t’áá íiyisíí nidzinígíí ániid háádanoot’ánígíí, dóó t’áá át’é bijéí daniłtólígíí bá ádadiilnííl—
12 Háálá díí nahasdzáán bikáá’ t’áá lą’í ał’ąą dah da’áldéhígíí, ał’ąą át’áo sodadilzinígíí, dóó ał’ąą da’oodlání, éí nihokáá’ dine’é na’agiz yee diné nideilo’, éí binahjį’ yida’didoolohgo yiba’ naazhjéé’, áádóó éí t’áá aaníinii doo bił béédahózin da háálá háadi yik’í doogáłígíí doo bił bééhózin da—
13 Éí bąą, chahałheełdi ádajíít’įįdii bééhózingo ádadiilnííł éí t’áá íiyisíí bindeilnishgo biká ádeet’į́į doo, háálá éí baa nihił béédahózin; dóó éí t’áá aaníí yá’ąąshdéé’ ííshją́ą́ ádaalyaa—
14 Áko díí éí t’áá íiyisíí bindeilnish dooleeł.
15 Nihokáá’ dine’é díí ílį́įgo doo ła’ yaa nitsídookos da; háálá náasdi lą’ída hólǫ́, éí akéé’ naaz’íinii bídadéít’i’ígíí, díí naanish bídadéít’i’.
16 Nihił béédahózin, shik’isoo, tsin naa’eeł ayóó áníltsooígíí ałts’íísígo bee naadlo’ígíí bee hólǫ́ éí yéego nahałtin ndi yee neilo’ łeh, éí tsin naa’eeł bichį́į́h níyol dóó tó hanádáhígíí yił naalnish.
17 Éí bąą, shik’isoo ayóó ánihííníshníinii, nihił dahózhǫ́ǫgo t’áá ałtso nihe’adziilii bee ádeil’į́į le’; áádóó áko índa deidiidzįįł, áádóó bídaniildzilgo, Diyin God biyisdá’iiníiłii deidiiltsééł, áádóó bigaan yit’į́įgo íídoolííł.