Wólta’ii 106
Diyin Yá Yáłti’í Joseph Smith díí diyingo bił ííshją́ą́ ályaa, Kirtland, Ohiodi, Niłch’its’ósí 25, 1834 yihahgo. Díí diyingo ííshją́ą́ ályaaígíí éí Warren A. Cowdery, Oliver Cowdery bínaaí bich’į’ ályaa.
1–3, Warren A. Cowdery éí t’áá ákǫ́ǫ́ binaagóó sodizin yilą́ąjį’ sizį́įgo bee bik’ihodiinii’; 4–5, Christ Nínáádoodááł Bijį́įdi adinídíín ba’áłchíní doo ani’įįhii tsíhodiłhisígi át’éego doo tsídabi’didoolyis da; 6–8, Sodiziin Bá Hooghan biyi’ t’áá íiyisíí ajoodlą́ągo áká’aníjílwo’go ayóó at’éego ak’ihojídlí hailyééh.
1 Shí íínisingo shá naal’a’ Warren A. Cowdery éí shisodizin bá hooghan yik’i high priest nilíingo bik’ihodidoonih dóó yidoolzį́į́ł, kéyah Freedomdi dóó binaagóó nahaz’ánígi;
2 Áádóó shinahat’á bee yisdá’iildéehii doo ninít’i’ii yee na’nitin doo, dóó yéego biinéé’ diits’a’ dóó diné doo yá’ádaat’éehii yee yił halne’ doo, doo bighan binaagóó t’éiyá da, nídahaasdzoh ałhidadii’áágóó ałdó’;
3 Áádóó díí aghánáhóó’áádę́ę́’ diyingo bee bik’ihodiinii’ígíí t’éiyá ííł’į́į doo, éí Shí k’ad baa nishłé, yá’ąąsh biyi’ diyingo haz’ą́ dóó bit’áá ákogi ádaal’íinii yéego yidiilkaal doo, áádóó t’áá ałtso nínízinígíí biihdoo’nił; háálá naalnishí éí bich’į’ nahalyéhígíí yíighah.
4 Áádóó ałdó’, t’áá aaníigo Shí nihich’į’ haasdziih, Diyin Bóhólníihii nídoodáłígíí koshídę́ę́’ hoolzhish, tł’éé’go ani’įįhii yígháhígíí nahalingo nihokáá’ dine’é yiyaahodidoołhxis—
5 Éí bąą, éé’ nihoozhníí’ gónaa’í beda’ohtł’óh, áko adinídíín ba’áłchíní dadoohłeeł, áádóó éí bijį́ Diyin doogááłdi ani’įįhii yígháhígíí nahalingo doo nihiyaahodidoołhis da.
6 Áádóó ałdó’, t’áá aaníigo Shí nihich’į’ haasdziih, shá naal’a’í Warren shinaat’á gish yich’į’ yaa ádzaa doo yá’ąąshiidi kéédahát’íinii yaa bił dahóózhǫǫd, áádóó nihokáá’ dine’é doo yá’áshǫ́ǫ́góó áda’ał’íinii yits’áníyá;
7 Éí bąą, shá naal’a’í Warren bik’ihojisdli’, háálá Shí éí baa jiideeshbaał; áádóó, azhą́ bidázhnoolníinii bijéí biyi’ ndi, shidááhdóó ajooba’ ádiilyaago ayóó át’éii nilį́įgo ádeeshlííł.
8 Áádóó aa hajooba’ dóó ił chohoo’į́ yee sizį́įgo ádeeshłííł áádóó oodlą́ągo dóó sodizin bá hooghan nizhónígo yá sizį́įgo shiZhé’é bighan ílíinii góne’ naat’ááh ch’ah bá hasht’eishłaa. Tʼáá ákótʼée doo. Amen.