Kia mōhio mai ngā iwi katoa, ngā hapū, ngā reo, me ngā huihuinga tāngata, e tae ai tēnei pukapuka: Ko mātou, nā te aroha noa o te Atua te Matua, o tō tātou Ariki hoki o Ihu Karaiti, kua kite i ngā papa e mau nei tēnei tuhituhinga ki runga, koia nei he tuhituhinga nō te iwi o Nīwhai, nō ngā Rāmana hoki, ō rātou tuākana, nō te iwi anō hoki o Iarere, i haere mai rā i te pourewa kua kōrerotia ake nei. E mōhio ana anō mātou kua whakapākehātia ēnei mea, he mea nā te takohatanga me te mana o te Atua, nā tōna reo hoki tēnei i whakapuaki mai ki a mātou; nō reira e tino mōhio ana mātou e pono ana tēnei pukapuka. E whakaatu pono atu ana anō mātou kua kite mātou i ngā whaowhaonga i runga nei i ngā papa; kua whakakitea ki a mātou e te mana o te Atua, ehara nō te tangata. Ā, e whakapuaki ana mātou i runga i ngā kupu whaiwhakaaro, i heke iho tētahi anahera a te Atua i te rangi, nāna i mau mai, i whakatakoto mai ki mua i ō mātou karu, ā, kite ana, mātakitaki ana mātou i ngā papa, me ngā whaowhaonga i runga; ā, e mōhio ana mātou, nā te aroha noa o te Atua Matua, o tō tātou Ariki hoki o Ihu Karaiti, i kite ai, ā, e whakaatu atu nei anō mātou e pono ana ēnei mea. He mea whakamīharo ki ō mātou karu. Ahakoa rā nā te reo o te Ariki mātou i whakahau kia whakaatuhia atu ai tēnei mea e mātou; Hei ahakoa rā, e whakaatuhia atu nei ia e mātou kia ngohengohe ai ki ngā whakahaunga a te Atua. E mōhio ana anō mātou ki te ū tonu mātou i roto i a te Karaiti, nā, ka whakakorea atu e mātou te toto o ngā tangata katoa i runga i ō mātou kākahu, ā, ka kitea kohakoretia i te aroaro o te nohoanga whakawā o te Karaiti, ka noho āke tonu atu hoki i a ia i roto i ngā rangi. Ā, mō te Matua te hōnore, mō te Tama hoki, me te Wairua Tapu, ko ia he Atua kotahi. Āmine.