Karaipiture
Mōhia 3


Upoko 3

Ka kōrero tonu atu a Kīngi Peniamine—Ka minita te Ariki Kaha Rawa ki waenganui i te tangata i roto i tētahi tapenākara uku—Ka heke iho te toto i ngā pōnaho katoa o te kiri i a Ia e whakamārie ana i ngā hara o te ao—Mā Tōna ingoa anake te whakaoranga e tau ai—Ka taea e te tangata ngā hiahia o te ira tangata te karo atu me te tahuri hei Hunga Tapu mā roto i te Whakamārietanga—Ka rite te whakamamaetanga o te hunga whakarihariha ki tētahi roto ahi whānāriki. Takiwā 124 M.K.

1 Waihoki rā e aku teina, me aro mai rā koutou, nā te mea he kōrero anō tāku ki a koutou; nana rā, kei ahau anō ētahi mea hei kōrero atu ki a koutou e pā ana ki ērā e haere mai ana.

2 Ā, kua whakamōhiotia mai ngā mea e kōrero atu nei au ki a koutou e tētahi anahera nō te Atua. Ā, ka mea mai ia ki ahau: E oho; ā, ka oho au, ā nana, i te tū ia i tōku aroaro.

3 Ā, ka mea mai ia ki ahau: E oho, me te whakarongo ki ngā kupu e kōrero atu ai au ki a koe; nana rā, kua haere mai au ki te whakapuaki i te rongo whakahari o te koa nui.

4 Nā, kua rongo te Ariki i ō inoi, ā, kua arotake nei i tōu tika, ā, kua tukuna mai au ki te whakapuaki atu ki a koe kia harikoa ai koe; ā, kia whakapuaki atu koe ki tō iwi, kia kī anō ai rātou i te harikoa.

5 Nana rā, e tata mai ana te wā, ā, kāore hoki i te tawhiti, ka heke iho mai te Ariki Kaha Rawa, koia anō e kīngi ana, koia i mua, ā, koia katoa nō te āke tonu atu ki te āke tonu atu, i runga i taua mana, ki waenganui i ngā tamariki a te tangata, ā, ka noho i tētahi tapenākara uku, ā, ka haere whakamua atu ki waenganui i te tangata, e mahi merekara nui ana, pērā i te whakaora i ngā tūroro, te whakaara i te hunga mate, e mea ana i ngā kopa kia hīkoi, i ngā matapō kia kite, i ngā turi anō hoki kia rongo, ā, e whakaora ana i ngā tū mate katoa.

6 Ā, māna ngā rēwera e pei atu, ngā wairua kino rānei e noho nei i ngā ngākau o ngā tamariki a te tangata.

7 Anana, ka pā ngā whakawainga ki a ia, me ngā mamae o te tinana, te matekai, te mateinu, me te ruha, ka nui ake i tō te tangata e taea ana, hāunga ko te mate; nana rā, ka heke iho te toto i ngā pōnaho katoa o te kiri, nā te nui o tōna auē mō te whakarihariha me ngā mōrikarika o tēnei iwi.

8 Ā, ka karangatia ia ko Ihu Karaiti, te Tama a te Atua, te Matua o te rangi me te whenua, te Kaihanga o ngā mea katoa mai i te timatanga; ā, ka karangatia tōna whaea ko Mere.

9 Anana, ka haere mai ia ki tōna ake anō, kia tau mai ai te whakaoranga ki ngā tamariki a te tangata mā roto pū i te whakapono i runga i tōna ingoa; ā, nō muri katoa i tēnei ka whakaarohia ia e rātou he tangata, me te kī ake he rēwera tōna, ā, ka whakawhiua ia, ā, ka rīpekatia ia.

10 Ā, ka ara ake ia i te mate i runga i te rā tuatoru; ā nana, ka tū ia ki te whakawā i te ao; ā nana, e meatia ana ēnei mea katoa e tau ai tētahi whakawākanga tika ki runga i ngā tamariki a te tangata.

11 Nana rā, e whakamārie ana anō hoki ōna toto i ngā hara o te hunga kua taka iho i te haranga o Arama, kīhai i mōhio he aha te hiahia o te Atua e pā ana ki a rātou, kua hara rānei i runga i te kuare.

12 Engari auē, auē te mate mō te tangata e mōhio ana kei te tutū ia ki te Atua! Nā te mea kāore e tau mai te whakaoranga ki tētahi e pēnei ana hāunga mā te rīpenetātanga me te whakapono ki runga i te Ariki Ihu Karaiti.

13 Ā, kua tonoa e te Ariki te Atua ana poropiti tapu ki waenganui i ngā tamariki katoa a te tangata, ki te whakapuaki i ēnei mea ki ngā hapū katoa, ki ngā iwi, ā, ki ngā reo, mā reira te hunga e whakapono ai ki te haerenga mai a te Karaiti, koia tonu e whiwhi ai tētahi murunga i ō rātou hara, ā, ka hari i runga i te hari nui rawa, me te mea nei kua tae kē mai ia ki waenganui i a rātou.

14 Heoi anō i kitea e te Ariki he iwi kakī mārō tana iwi, ā, ka whakatakotoria e ia tētahi ture mō rātou, arā, ko te ture a Mohi.

15 Ā, he maha ngā tohu, me ngā mea whakamīharo, me ngā ritenga, me ngā ātārangi i whakaatuhia e ia ki a rātou, e pā ana ki tana haerenga mai; ā, i kōrero anō hoki ngā poropiti tapu ki a rātou e pā ana ki tana haerenga mai; hei aha koa rā i whakapakekehia e rātou ō rātou ngākau, ā, kīhai i mārama kāore he take ō te ture a Mohi hāunga mā roto i te whakamārietanga o ōna toto.

16 Ā, mehemea hoki i taea e ngā tamariki nonohi te hara kua kore e taea te whakaora i a rātou; engari e mea atu nei au kia koutou kua manaakitia rātou; nana rā, he pērā i a Arama, i te tikanga o te tangata rānei, e taka ai rātou, waihoki e whakamārie ana ngā toto o te Karaiti i ō rātou hara.

17 Hei āpiti atu, ko taku kupu tēnei ki a koutou, kua kore he ingoa kē atu e homai, he huarahi kē atu rānei, he aha noa rānei e puta mai ai te whakaoranga ki ngā tamariki a te tangata, mā roto anake i te ingoa o te Karaiti, te Ariki Kaha Rawa.

18 Nana rā e whakawā ana ia, ā, he tika tana whakawākanga; ā, ehara i te mea ka ngaro te wairua o te kōhungahunga e mate nei i tōna kōhungahungatanga; engari e inumia ana e te tangata te whakawākanga ki ō rātou ake wairua ki te kore rātou e whakaiti i a rātou anō me te meinga kia rite ki ngā tamariki nonohi, me te whakapono ki te whakaoranga mā roto i ngā toto whakamārie o te Karaiti, te Ariki Kaha Rawa, i mua, ināianei, ā, hei ngā rā e kainamu mai nei.

19 Nā te mea he hoariri te ira tangata ki te Atua, ā, kua pērātia mai i te takanga o Arama, ā, ka pērā anō mō āke tonu atu, ki te kore ia e tuku i a ia anō ki ngā whakawainga a te Wairua Tapu, me te karo atu i te ira tangata kia meinga hei tangata tapu mā roto i te whakamārietanga o te Karaiti te Ariki, ā, kia meinga kia rite ki tētahi tamaiti, e ngohengohe ana, e māhaki ana, e whakaiti ana, e manawanui ana, e kī ana i te aroha, e hiahia ana kia ngohengohe ki ngā mea katoa e tika ana ki te Ariki kia whakapā atu ki runga ki a ia, e pērā ana i tētahi tamaiti e ngohengohe ana ki tana matua.

20 Hei āpiti atu, ko taku kupu tēnei ki a koutou, nā, ka tae mai te wā e puta whānui atu te mātauranga mō tētahi Kaiwhakaora ki waenganui i ngā iwi katoa, i ngā hapū, i ngā reo, me ngā huihuinga tāngata.

21 Ā nana, ina tae mai taua wā, kāore tētahi e kitea harakoretia i te aroaro o te Atua, hāunga ko ngā tamariki nohinohi, mā roto anake i te rīpenetātanga me te whakapono i runga i te ingoa o te Ariki te Atua Kaha Rawa.

22 Ā, hei tēnei wā tonu, ina oti i a koe te whakaako i tō iwi ngā mea kua whakahaua koe e tō Ariki te Atua, hei reira tonu kāore e kitea harakoretia atu anō i te tirohanga a te Atua, e ai ki ngā kupu anake kua kōrerotia atu e au ki a koe.

23 Ināianei ā, kua kōrero atu ahau i ngā kupu kua whakahaua ahau e te Ariki te Atua.

24 Ā, e pēnei ana te kōrero a te Ariki: Ka tū rātou hei whakaaturanga pīataata ki tēnei iwi, hei te rā whakawā; mā konei rātou e whakawākia ai, ia tangata, ia tangata e ai ki āna mahinga, mehemea i pai, mehemea rānei i kino.

25 Ā, mehemea i kino ka whakataua rātou ki tētahi tirohanga weriweri ki ō rātou kaniawhea me ō rātou mōrikarika, nā konā ka nuku wehi atu rātou mai i te aroaro o te Ariki ki tētahi āhuatanga pōuri, ā, ki tētahi whakamamaetanga mutunga kore, e kore nei e taea e rātou te hoki mai i reira; nō reira kua inumia e rātou te whakawākanga ki ō rātou ake wairua.

26 Nō reira, kua inumia e rātou mai i te kapu o te riri a te Atua, kāore tonu e taea ana e te tika te kaiponu atu i a rātou pērā anō i tōna kore i taea te kaiponu atu i te takanga a Arama nā tana kai i te hua i rāhuitia ai; nō reira, kāore te aroha e whaitake tonu ana ki runga i a rātou mō āke tonu atu.

27 Ā, he rite tō rātou whakamamaetanga me he roto ahi whānāriki, tē taea ōna mura te tīnei, me tōna pawa e kake tonu ake ana mō āke tonu atu. Kua whakahau pēnei mai te Ariki ki ahau. Āmine.